Ebhikorwa bhya Abhatumwa 2
2
Abhaanu ꞉bheejusiibhwe Mwoyo Omutaakatiifu orusuku rwa Pentekoositi
1Bhunu orusuku rwa Pentekoositi#2:1 Pentekoositi. Ni rusuku rwa makumi gataanu okwambira ku-nsikukuru ya Paasaka na insikukuru ya emikaate ginu gitakutuurwa-mo kimera. Orusuku ruyo Abhayawudi ꞉bhaakoraga insikukuru ya ebhigeswa. ꞉rwayikire, abhaanu bhayo bhoone kutyo, ꞉bhaariga bhasangiiye amwi mu-nyumba yimwi. 2Kimwi mbataka era, oruyiriro muna ruyiriro rwa omuyaga mwafu ndwiyungwanira. Oruyiriro ruyo okusooka mu-rwire ndwijusha mu-nyumba yoone kutyo munu ꞉bhaariga bheekaaye. 3Kimwi mbarora ebhiinu rwa gindimi gya omuriro, mbiswerana ku-bhaanu wumwiwumwi. 4Abhaanu bhayo bhoone kutyo mbeejushwa Mwoyo Omutaakatiifu, mbaamba okwaika mu-nyaaika nyafunyafu, rwa kutyo Mwoyo Omutaakatiifu ꞉aabhasakiiye okwaika.
5Na Yerusareemu ayo ꞉bhaariga bhariwo Abhayawudi bhanu ꞉bhaariga mbaramya Nyamuwanga. Abhayawudi bhayo ꞉bhaariga bhaasookere bhyaro bhyone kutyo ku-bhuteero bhwabhyo.#2:5 Mu-kabhaga kayo Abhayawudi abhaafu ꞉bhaariga bhanyarageene mu-bhyaro ebhindi. 6Bhunu ꞉bhoonguuywe obhuku bhuyo, abhaanu mbaaja bhaafu mbasangira ayeeyi. Abhaanu bhayo bhoone kutyo mbatangʼaara, kwa okubha muunu wumwiwumwi ꞉aabhoonguuywe mbaaika iinyaaika yaaye omwene. 7Bhunu ꞉bhaariga bhakyaruguurira amangʼana gayo, mbabhwirana ati, “Mwitegeereshe! Toga abhaanu bhanu bhoone kutyo ni Bhagariraaya? 8Mmbe woori! Yaabha kutiki ati eswe wumwiwumwi ekyungwa mbaaika mu-nyaaika gyeswe? 9Na agati weeswe, bhariwo abhaanu okusooka ekyaro kya Abhaparati, na kya Medi, na kya Erami. Na abhandi bhasookereeye ekyaro kya Mesopotamiya, Ebhuyawudi, Kapadokiya, Ponto, na Asiya, 10Furiigiya, Pamufwiriya, na Miisiri. Bhariwo abhandi bhasookere mbaara gya ekyaro kya Riibhiya ginu giri ayeeyi na omusi gwa Kureene. Bhariwo na abhagenyi bhanu bhasookereeye mu-musi gwa Ruumi, abhaanu bhayo abhandi ni Bhayawudi bhusimukwa, na abhandi ꞉bhaariga bhatari Bhayawudi, nawe woori ꞉bhaariga bhayindukiiye iidiini ya Ekiyawudi. 11Bhariwo abhandi bhanu ni Bhakurete, na abhandi ni Bhaarabhu. Na eswe bhoone kutyo, ekyungwa abhaanu bhanu mbaaika ebhikorwa ebhikuru ebhya Nyamuwanga mu-nyaaika gyeswe abheene!”
12Abhaanu bhoone kutyo mbaruguura muno mbataamibhwa okumenya amangʼana ganu ꞉bhaaroraga na okuungwa, mbabhuushaanya ati, “Amangʼana ganu insonga yaago niki?” 13Nawe abhaanu abhandi mbasangʼaya abheeyigira bha Yeesu bhayo, mbaaikaga ati, “Bhaanywa obhwarwa bhakorerwe!”
Peetero kaabhwira abhaanu iiguru ya Mwoyo Omutaakatiifu
14Nawe Peetero ˆnaayambaara, amwi na abhatumwa bheejaabho ekumi na wumwi, enu aamuuye obhuraka bhwaye, ˆnaabhwira abhaanu bhayo ati, “Emwe abhaanu bha Ebhuyawudi, na Abhayawudi abhandi emwe bhanu mwikaaye Yerusareemu anu, munyiitegeereshe kujomu, insonga nibhabhwire riingʼana rinu! 15Omutoga ati abhaanu bhanu bhakorerwe, nawe itari kutyo, bhatakorerwe. Woori anu kukyari muno, ni nsa esatu era egya katondo! 16Nawe riingʼana rinu ꞉ryaragirwe na omuragi Yoweeri bhunu ꞉aaikire ati,
17‘Nyamuwanga kaaika ati,
“Ku-nsiku gya obhuteero,
nirisuka Omwoyo gwani ku-bhaanu bhoone kutyo.
Abhamura na abhayara bheemwe bharisoosha obhuragi,
na abhamura bheemwe bharirora ebhiroro,
na abhakaruka bheemwe bhariroota ebhirooto.
18Ku-nsiku giyo nirisuka Omwoyo gwani
na ku-bhajuuma bhaani, abharume na abhagasi,
bhoone kutyo bharisoosha obhuragi.
19Nirikora amangʼana ga okuruguusha iiguru mu-rwire,
na ebhimenyegesho ansi ku-kyaro,
amaanyinga na omuriro,
na ingesi nyafu.
20Riisuubha ririyinduka ndibha kisuute,
na okwesi kuribha kukangaaru rwa amaanyinga.
Gayo goone kutyo garikoreka bhukyari okubha-wo
obhugungyo bhwa orusuku orukuru orwa Raatabhugenyi.
21Na woonewoone unu aritogora riisiina rya Raatabhugenyi amusakire, aryerusibhwa.” ’#2:17-21 Ringira Yoweeri 2:28-32.”
22Peetero ˆnaagenderera okwaika ati, “Emwe abhaanu bha Ijirayeeri, woori munyiitegeereshe kujomu! Nyamuwanga ꞉aareetere Yeesu Omunaajareeti ˆnaamweresha kw-imwe ati asookere ku-mwene, murora ebhigwa, ebhiruguusho, na ebhimenyegesho bhya mbaga nyafu bhinu Nyamuwanga ꞉aamusakiiye okukora agati weemwe. Gayo emwe abheene mugamenyere kujomu. 23Okumara gayo, Yeesu ˆnaatuurwa mu-mabhoko geemwe, rwa kutyo Nyamuwanga ꞉aariga amenyere okuriingʼaana na kutyo ꞉aariga ˆneenda okusooka ku-bhwambiro. Kimwi emwe okuturira ku-bhanu bhatakuseeta ebhiraagiro bhya Nyamuwanga, mumwitira ku-musarabha. 24Nawe Nyamuwanga ꞉aamusuurire okusooka mu-bhafuuye ˆnaamusoosisha-ko obhusungu bhwa orufu, kwa okubha ꞉yaariga itakuturikana ku-Yeesu okugwatirirwa na amanaga ga orufu! 25Na omukama Dawudi ꞉aaikiiye Yeesu kutya,
‘꞉Naarorere Raatabhugenyi abheeye amwi na anye nsiku gyone kutyo.
Na kwa okubha ari ku-rubhaara rwani orwa ebhuryo, nitarisingisibhwa.
26Ku-gayo, omutima gwani ogusaasamuka,
na enijomerwa na akanwa kaani.
Na omubhiri gwani, guri na obhwisige nsiku gyone kutyo,
27kwa okubha utarisiga omwoyo gwani nyombe,#2:27 Nyombe. Ringira riingʼana rinu mu-Mangʼana Amakomeeye.
utakuuja okwikirisha ati omubhiri gwa omutaakatiifu waawo gubhorere eyo.
28Awe unyeresiishe injira ya obhurame,
urinyiijusha amajomerwa maafu,
kwa okubha uri amwi na anye.’#2:25-28 Ringira Ijabhuri 16:8-11.”
29Peetero ˆnaagenderera okwaika ati, “Bhayiiri bhaani, enibhabhwira ekimari ati jaaji weeswe Dawudi ꞉aafuuye, ˆnaabhiikwa, na imbiiyira yaaye iriwo anu na reero. 30Nawe Dawudi ꞉aariga ari omuragi, na ꞉aariga amenyere ati Nyamuwanga ꞉aamuragire ˆnaarayira ati, mu-rwibhuro rwa abheebhurwa bha Dawudi kaaja okwikasha owumwi weebhwe ku-kitebhe kyaye ekya obhukama. 31Kwa okubha Dawudi ꞉aarorere amangʼana ganu garibha-wo, ꞉aaikire iiguru ya okusuuka kwa Kiriisitu#2:31a Kiriisitu. Ringira riingʼana rinu mu-Mangʼana Amakomeeye. ati, ꞉ataasigirwe nyombe na omubhiri gwaye ꞉gutaabhorere.#2:31b Ringira Ijabhuri 16:10. 32Yeesu unu, Nyamuwanga ꞉aamusuurire okusooka mu-bhafuuye, na eswe kyone kiri abharori bha riingʼana riyo. 33Yeesu unu, Nyamuwanga ˆnaamwimusha ˆnaamuriinʼya ekyewu, woori eekaaye orubhaara rwaye orwa ebhuryo. Kimwi Raata Nyamuwanga ˆnaayaana Yeesu Mwoyo Omutaakatiifu rwa kutyo ꞉aaragire. Yeesu woone ˆnaakisukira Mwoyo Omutaakatiifu uyo. Okumara okukisukira, woori nigo amangʼana gayo omurora na okuungwa. 34Dawudi omwene atariinyire na okwingira mu-rwire, nawe omwene ꞉aaikire ati,
‘Raatabhugenyi Nyamuwanga ꞉aabhwiriiye Raatabhugenyi waani ati,
Iikara orubhaara rwani orwa ebhuryo,
35okuyikira anu nikatuure abhasoko bhaawo emwaro,
awe ubhatunge.’#2:34-35 Ringira Ijabhuri 110:1.”
36Peetero ˆnaamariisha, ˆnaaika ati, “Ku-mangʼana gayo, Abhaijirayeeri bhoone bheesire bhamenye kujomu ati, Yeesu unu abheene bheetiiye ku-musarabha, Nyamuwanga amukorere abhe Raatabhugenyi na Kiriisitu.”
37Abhayawudi bhayo, bhunu ꞉bhoonguuywe amangʼana gayo, ngabheengira muno mu-mitima gyebhwe. Mbabhuusha Peetero na abhatumwa abheejaabho ati, “Bhayiiri bheeswe, woori kikore kutiki?” 38Peetero ˆnaabhabhwira ati, “Munuge ebhikayo bhyemwe wumwiwumwi, mubhatiisibhwe kw-isiina rya Yeesu Kiriisitu, musoosibhwe-ko ebhikayo bhyemwe. Mukamara gayo, omuramira Mwoyo Omutaakatiifu. Uyo niwe omusanga gwemwe okusooka ku-Nyamuwanga. 39Nyamuwanga ꞉aaragire kutyo ku-nsonga yeemwe na abhaana bheemwe, na abhaanu bhoone kutyo bhanu bhamuriko areera, bhanu Raatabhugenyi Nyamuwanga weeswe aribhirikira bhamuuje-ko.”
40Peetero ˆnaagenderera okubhwira abhaanu bhayo amangʼana agandi maafu aga okubhagonya. ꞉Aabheesaasaamire ˆnaaikaga ati, “Mwiyerushe na orwibhuro rwa abhajeema runu!” 41Abhaanu muna bhiwumbi bhisatu kutya, mbeekirisha amangʼana gayo Peetero ꞉aabhabhwiriiye, mbabhatiisibhwa, mbagwatana na abheeyigira abhandi abha Yeesu kwambira orusuku ruyo.
Obhumwi bhwa abheeyigira bha Yeesu
42Abheeyigira bhayo ꞉bhaaramire ku-bhumwi bhuyo, mbeeyigiraga ameeyigisho ga abhatumwa bha Yeesu, na okuriira amwi, mbajomererwaga okurya kw-igari rya Raatabhugenyi, na okusaasaama Nyamuwanga. 43Abhatumwa bhayo ꞉bhaariga mbakora ebhiruguusho, na ebhimenyegesho bhyafu, na abhaanu bhoone kutyo mbayaya muno. 44Abheeyigira bhoone kutyo ꞉bhaariga bhari amwi, na ꞉bhaatuuraga amwi ebhiinu bhyebhwe mbagabhana bhuriingʼaanya. 45꞉Bhaariga mbagusha ebhiinu bhyebhwe, na giiyera ginu ꞉bhaanyooraga, mbagigabha ku-bhaanu bhoone kutyo okuriingʼaana na obhukene bhwa omuunu. 46Ku-nsiku ꞉bhaariga mbanyookana amwi mw-ibhanja rya riiyekaru,#2:46 Riiyekaru. Ringira riingʼana rinu mu-Mangʼana Amakomeeye. nawe bhunu ꞉bhaariga mbeekara okurya kw-igari rya Raatabhugenyi, ꞉bhaariiraga amwi ebhyokurya mu-nyumba gyebhwe bheerere emitima, enu bhajomeeywega. 47꞉Bhaariga mbakumangya Nyamuwanga, mbajomisha na abhaanu bhoone kutyo. Na ku-nsiku Raatabhugenyi Yeesu ꞉aariga ˆneerusha abhaanu abhandi, na obhukumi bhwa abhaanu bhanu ꞉bhaariga mbeerusibhwa mbwiyongeshaga muno.
Currently Selected:
Ebhikorwa bhya Abhatumwa 2: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
