Ruuka 4

Sitaani kaasaka Yeesu

(Mataayo 4:1-11; Maariko 1:12-13)

1Kimwi Yeesu, enu eejuuye Mwoyo Omutaakatiifu, ˆnaasubha okusookerera ku-ruuji rwa Yorodaani. Mwoyo Omutaakatiifu ꞉aamutangashaga ari mw-ibhara, ˆnaamara-yo nsiku makumi gana, 2Sitaani#4:2 Sitaani. Ringira riingʼana rinu mu-Mangʼana Amakomeeye. ˆnaamusakyaga. Ku-nsiku giyo gyone kutyo, ꞉ataaryaga kiinu kyonekyone. Ginsiku giyo ꞉gyeejire gyakuumira omweko ngumuruma muno. 3Sitaani ˆnaaja ˆnaamubhwira ati, “Raabhe awe uri Mwana wa Nyamuwanga, siiga riigina rinu riyinduke ribhe mukaate.” 4Yeesu ˆnaamusubhya ati, “Ikaamirwe mu-Makaamo Amataakatiifu ati, ‘Obhurame bhwa omuunu bhutari ku-bhyokurya era.’#4:4 Ringira Ekiyiityo kya Ebhiraagiro 8:3.”

5Kimwi Sitaani naamugega ˆnaamusira ku-kiima ekireera, ˆnaamweresisha amwi ginkama gya ekyaro kyone kutyo. 6ˆNaamubhwira ati, “Eniija okukuyaana obhutungi na obhuniibhi bhwa ganu goone kutyo, kwa okubha ganu goone kutyo ni gaani, eniyaana woonewoone unu eneenda. 7Woori, ukandamya, enikuyaana gayo goone kutyo.” 8Yeesu ˆnaamusubhya ati, “Ikaamirwe mu-Makaamo Amataakatiifu ati, ‘Ramya Raatabhugenyi Nyamuwanga waawo, ukorere emirimu omwene era.’#4:8 Ringira Ekiyiityo kya Ebhiraagiro 6:13.”

9Kimwi Sitaani ˆnaamusira Yerusareemu, ˆnaamuyambaasha iiguru ku-kiisonge kya riiyekaru, ˆnaamubhwira ati, “Raabhe uri Mwana wa Nyamuwanga, iiyesa ansi, 10kwa okubha ikaamirwe mu-Makaamo Amataakatiifu ati, ‘Nyamuwanga kaaragirira bhaamaraayika bhaaye bhakwangarire.’ 11Ikaamirwe kweki ati, ‘Owugwira mu-mabhoko geebhwe, waasiga okwikuujura okuguru kwawo kw-igina.’#4:10-11 Ringira Ijabhuri 91:11-12.”

12Yeesu ˆnaamusubhya ati, “Ikaamirwe ati, ‘Waasiga okusakya Raatabhugenyi Nyamuwanga waawo.’#4:12 Ringira Ekiyiityo kya Ebhiraagiro 6:16.” 13Bhunu Sitaani ꞉aamarire okusakya Yeesu, ˆnaamusiga okwamba.

Iinema ya Nyamuwanga itari ku-Bhaijirayeeri era

(Mataayo 4:12-17, 13:53-58; Maariko 1:14-15, 6:1-6)

14Kimwi Yeesu ˆnaasubha Gariraaya, eejuuywega na obhuturo bhwa Mwoyo Omutaakatiifu, amangʼana gaaye, ngaswerana mu-kyaro kiyo kyone kutyo. 15ˆNaagenda ˆneeyigishaga abhaanu mu-masunagoogi#4:15 Mu-masunagoogi. Ringira riingʼana Riisunagoogi mu-Mangʼana Amakomeeye. geebhwe, abhaanu bhoone kutyo, mbamugungyaga.

16Kimwi Yeesu ˆnaayika iika ewaabho Naajareeti, anu ꞉aakuriiye. Orusuku rwa Insabhaato,#4:16 Insabhaato. Ringira riingʼana rinu mu-Mangʼana Amakomeeye. ˆneengira mw-isunagoogi rwa kutyo ꞉aariga anarire. ˆNaayambaara asome Riingʼana rya Nyamuwanga. 17ˆNaayaanwa ekitabho kya omuragi Isaaya, ˆnaakifundukura, ˆnaagara anu akaamirwe ati,

18“Mwoyo Omutaakatiifu wa Raatabhugenyi,

ari amwi na anye,

kwa okubha, aamarire okunsora nibhwire abhatobhu Amangʼana Amajomu.

Antumire ku-bhanu bhabhoyerwe nibharaasishe obhwiyagaaro bhwebhwe,

na okubhwira abhawofu ati abhatura okurora kweki,

na bhoone kutyo bhanu abhanyansibhwa, nibhatuurye.

19Na niraasishe abhaanu ati omwaka gwa iinema ya Raatabhugenyi nigwo gunu.”#4:18-19 Ringira Isaaya 61:1-2.

20꞉Eejire aamara okusoma amangʼana gayo, Yeesu ˆnaafundikira ekitabho, ˆnaasubhisha omuyereja, ˆneekara okwamba okwiyigisha. Abhaanu bhoone kutyo mw-isunagoogi muyo, ꞉bhaariga mbamwikomeeresha. 21Niwe Yeesu ˆnaamba okubheeyigisha ˆnaabhabhwira ati, “Amakaamo Amataakatiifu ganu mwoongwa, reero inu gaakuumira mu-matwi geemwe.” 22Bhunu Yeesu aaikaga amangʼana gayo, abhaanu bhoone kutyo mbaaika ati kaaika kujomu, mbagaruguurira muno amangʼana ga iinema ganu ꞉aariga ˆnaaika. Mbaamba okubhuushaanya ati, “Angu, unu atari mumura wa Yuusufu!”

23Yeesu ˆnaabhabhwira ati, “Amwi woori omutura okumbwira ati, ‘Omuragusi, woori nwiragure awe omwene.’ Na omuuja okumbwira ati, ‘Ganu kyunguuywe ati ꞉waariga nuukora Kaperinawumu eyo, nuugakore na ewaasu enu!’” 24Yeesu ˆnaaika ati, “Enibhabhwira ekimari, omuragi atakunyoora ekibharo mu-kyaro kya ewaabho. 25Nawe enibhabhwira ekimari ati, ꞉bhaariga bhariwo abhakimari bhaafu mu-kyaro kya Ijirayeeri ku-nsiku gya omuragi Eriya. Mu-kabhaga kayo ingubha itaaguuye myaka esatu na meesi gasansabha, injara niingira mu-kyaro kyone kutyo. 26Nawe, Eriya ꞉ataatumirwe okusakira mukimari wundi woonewoone, tari ꞉aatumirwe ku-mukimari wumwi era owa mu-musi gwa Sarepita, ayeeyi na Sidooni.#4:26 Ringira 1 Abhakama 17:9-24. 27Mu-kabhaga ka omuragi Erisha koone, ꞉bhaariga bhariwo abhagenge bhaafu mu-kyaro kya Ijirayeeri, nawe ꞉bhataawosiibhwe bhoone kutyo tari Naamaani era, omuunu unu ꞉aariga asookere mu-kyaro kya Siiriya!”#4:27 Ringira 2 Abhakama 5:1-14.

28Abhaanu bha mw-isunagoogi muyo ꞉bheejire bhoongwa amangʼana gayo, mbabhiiyirwa muno. 29Kimwi mbeemuka bhwangubhwangu bhawooye esungu. Mbagenda mbamukuura, mbamuyikya ku-kyoromoko kya ekiima kinu omusi gwebhwe ꞉gwariga guumbakirwe-ko, mbeenda bhamukuure ayiringitire ansi. 30Nawe, ˆnaatura agati mw-isangi rya abhaanu, ˆnaagenda gyaye.

Yeesu kaawosha abhaanu Kaperinawumu eyo

(Maariko 1:21-28)

31Kimwi Yeesu ˆnaagenda mu-musi gwa Kaperinawumu, mu-kyaro kya Gariraaya. Orusuku rwa Insabhaato, ˆneengira mw-isunagoogi, ˆnaamba okwigiyisha abhaanu. 32Abhaanu mbaruguurira muno ameeyigisho gaaye, kwa okubha amangʼana gaaye ꞉gaariga gari na obhuturo.

33Mw-isunagoogi muyo, ꞉aariga arimo muunu wumwi awungirwe ekiwi, nkirira, nkyamura obhuraka nkyaika ati, 34“Awe Yeesu wa Naajareeti, owukyenda-koki? Waaja okukimara-wo? Anye nikumenyere ati uri niga, ni awe Omutaakatiifu#4:34 Omutaakatiifu. Ringira riingʼana Abhataakatiifu mu-Mangʼana Amakomeeye. unu usorerwe na Nyamuwanga!” 35Yeesu ˆnaasiiga ekiwi kiyo ˆnaakibhwira ati, “Jibhira! Usooke ku-muunu unu!” Kimwi, ekiwi kiyo nkigwisha omuunu uyo ansi, mu-meeso ga abhaanu bhayo bhoone kutyo. Kimwi nkimusooka-ko kitamuwutaasiishe.

36Abhaanu bhoone kutyo, mbaruguura muno, mbabhuushaanyaga ati, “Ni mangʼanaki ganu? Ndora kaasiiga ebhiwi kwa obhuturo bhisooke mu-bhaanu, mbibhasooka-mo!” 37Amangʼana gayo, ngaswerana mu-kyaro kiyo kyone kutyo.

Yeesu kaawosha bhaanu bhaafu

(Mataayo 8:14-17; Maariko 1:29-34)

38Yeesu ˆnaasooka mw-isunagoogi, ˆnaagenda ewa Simooni, ˆnaanyoora nyaabhuko Simooni arwaye ari na omuswija. Mbasabha Yeesu amuwoshe. 39Niwe Yeesu ˆnaayambaara ayeeyi na nyaabhuko Simooni, ˆnaasiiga omuswija guyo gumusooke-ko. Kimwi omuswija ngumuwa-ko. Niwe omugasi uyo ˆneemuka, ˆnaamba okubhayaana ebhyokurya.

40Anu riisuubha ꞉ryaguuye, abhaanu bhoone kutyo bhanu ꞉bhaariga bhari na abharwaye, mbareetera Yeesu abharwaye bheebhwe, bhari na marwara ga mbaga nyafu. Yeesu ˆnaatuura amabhoko gaaye ku-muunu wumwiwumwi, ˆnaabhawosha bhoone kutyo. 41Na ebhiwi ꞉bhyasookere mu-bhaanu bhaafu mbimwayaga mbyaikaga ati, “Awe uri Mwana wa Nyamuwanga!” Ebhiwi bhiyo ꞉bhyaaikaga kutyo kwa okubha ꞉bhyariga bhimenyere ati Yeesu niwe Kiriisitu, nawe Yeesu ˆnaabhigaanya bhisige okwaika kweki.

Yeesu keeyinda mu-kyaro kya Abhayawudi

(Maariko 1:35-39)

42Mbukya mwejo, Yeesu ˆnaasooka ayo, ˆneebhereera ˆnaagenda anu bhatari abhaanu. Abhaanu bhaafu mbamwagara, bhunu bhaamurorere, mbeenda okumugaanya asige okubhasiga. 43Nawe, Yeesu ˆnaabhabhwira ati, “Eyeendwa nigende mu-misi egindi gyone, nibhabhwire Amangʼana Amajomu aga obhukama bhwa Nyamuwanga,#4:43 Obhukama bhwa Nyamuwanga. Ringira riingʼana rinu mu-Mangʼana Amakomeeye. kwa okubha ꞉naatumirwe ku-nsonga iyo.” 44Niwe, Yeesu ˆnaagenderera okutura mu-kyaro kya Ebhuyawudi, ˆnaaraasishaga abhaanu mu-masunagoogi geebhwe.

Currently Selected:

Ruuka 4: kya

Highlight

Copy