Mataayo 15

Yeesu kaarema meeyigisho ga Abhafarisaayo

(Maariko 7:1-13)

1Mmbe, Abhafarisaayo abharebhe na abheeyigisha bha ebhiraagiro bhya Musa ꞉bhaasookere Yerusareemu mbaaja ku-Yeesu, mbamubhuusha ati, 2“Kubhaki abheeyigira bhaawo bhatakuseeta amaragiriro ga abhakaruka? Bhakeenda okurya, bhatakwisaabha amabhoko geebhwe rwa kutyo eyeendwa!”#15:2 Bhatakwisaabha amabhoko geebhwe rwa kutyo eyeendwa. Abhayawudi ꞉bhaariga bhari na gintungwa gyebhwe ku-bhwisaabhi bhwa amabhoko bhakeenda okurya. ꞉Bhaariga mbeesaabha kutyo insonga bheesooshe-ko obhunaabhi. Ringira riingʼana Obhunaabhi mu-Mangʼana Amakomeeye.

3Yeesu ˆnaabhasubhya ati, “Kubhaki emwe mwone omuseeta amaragiriro ga abhakaruka bheemwe, musiga okukora kutyo ebhiraagiro bhya Nyamuwanga ebhyenda? 4Nyamuwanga ꞉aaikire ati, ‘Uyaane ekibharo abheebhusi bhaawo.’#15:4a Ringira Obhungʼaanyi 20:12; Ekiyiityo kya Ebhiraagiro 5:16. ˆNaaika kweki ati, ‘Woonewoone unu kaafuma abheebhusi bhaaye, akomerwe.’#15:4b Ringira Obhungʼaanyi 21:17; Abharaawi 20:9. 5Nawe emwe omwaika ati, omuunu keekirisibhwa okubhwira abheebhusi bhaaye ati, ‘Ebhiinu bhinu nikabhasakiiye, naabhisoosiishe ku-Nyamuwanga.’ 6Okwaika kutyo okweresha ati omuunu atakwenderwa okuyaana ekibharo abheebhusi bhaaye. Nawe okukora kutyo, omujeera Riingʼana rya Nyamuwanga ku-nsonga ya okuseeta amaragiriro ga abhakaruka bheemwe abha kara. 7Bhabheeyi emwe! Omuragi Isaaya bhunu ꞉aasoosiishe obhuragi ˆnaaikiraga emwe, ꞉aaikire ekimari ati,

8‘Ekibharo kya abhaanu bhanu ku-anye,

ni kya mu-kanwa era,

nawe emitima gyebhwe giri areera na anye.

9Abhandamya bhusa,

kwa okubha kinu abheeyigisha ni maragiriro ga abhaanu era.’#15:8-9 Ringira Isaaya 29:13.”

Ganu agasooka mu-mutima nigo aganaabhiyasha

(Maariko 7:14-23)

10Mmbe, Yeesu ˆnaabhirikira riisangi rya abhaanu, ˆnaabhabhwira ati, 11“Mwitegeereshe, musombookerwe! Bhinu ebhikora omuunu ˆnaabha munaabhi bhitari bhinu ebhiingira mu-kanwa kaaye. Tari, bhinu ebhisooka mu-kanwa kaaye, nibhyo ebhimukora abhe munaabhi.”

12Niwe abheeyigira bhaaye mbamuuja-ko, mbamubhuusha ati, “Umenyere ati Abhafarisaayo bhaabhiiyirwa muno bhunu bhoongwa amangʼana ganu waaika?” 13Yeesu ˆnaabhasubhya ati, “Kyonekyone kinu kitayambirwe na Raata wa mu-rwire, arikiiya. 14Emwe mubhasige, bhayo ni bhatangasha bhawofu, bhanu abhatangasha abhawofu bheejaabho! Omuwofu akatangasha omuwofu weejaabho, bhoone kutyo bhabhiri abhagwa mw-itoko.”

15Mmbe, Peetero ˆnaabhwira Yeesu ati, “Kisomboorere ekirengekanyo kiyo.” 16Yeesu ˆnaamusubhya ati, “Emwe mwone mukyari okubha na bhwenge? 17Mutakumenya ati kyonekyone kinu ekiingira mu-kanwa, ekitura mu-nda, nkimara nkisirwa emwira? 18Nawe amangʼana ganu agasooka mu-kanwa ka omuunu, agasooka mu-mutima gwaye. Gayo nigo aganaabhiyasha omuunu. 19Mu-mutima gwa omuunu, nimwo obhusooka obhwiganiirisha obhubhiibhi, obhwiti bhwa abhaanu, obhutaasi bhwa ameega, obhwifi, obhubheeyeresha, na amafumo. 20Gayo goone kutyo, nigo aganaabhiyasha omuunu. Nawe omuunu atakutura okubha munaabhi ku-kurya ateesaabhire rwa kutyo eyeendwa.”

Obhwikirisha bhwa omugasi unu atari Muyawudi

(Maariko 7:24-30)

21Mmbe, Yeesu ˆnaasooka ayo, ˆnaagenda mu-bhyaro bhya Tiiro na Sidooni. 22Niwe mugasi wumwi Mukanaani, mwikasi wenda eyo ˆnaamuuja-ko. Omugasi uyo ˆnaamura obhuraka ˆnaabhwira Yeesu ati, “Ee Raatabhugenyi, Omuyiiri Dawudi,#15:22 Omuyiiri Dawudi. Ringira riingʼana rinu mu-Mangʼana Amakomeeye. nuunfwire kigongo! Omuyara waani ebhiwi bhyamunyansiishe muno.”

23Nawe Yeesu ataamusubhiishe engʼana ryoneryone. Niwe abheeyigira bhaaye mbaaja mbamwisaasaama ati, “Mubhwire agende, kaakiseeta enu ˆnaakimwayira.” 24Yeesu ˆnaasubhya omugasi uyo ati, “Nyamuwanga antumire ku-nsonga ya Abhaijirayeeri era, bhayo nibho bhari rwa giingʼondi ginu gibhurire.”

25Omugasi uyo ˆnaafugerera Yeesu, ˆnaamwifukamira, ˆnaamwisaasaama ati, “Ee Raatabhugenyi, unsakire!” 26Yeesu ˆnaamusubhya ati, “Itari kujomu okugega ebhyokurya bhya abhaana nuweesera gimbwa.”#15:26 Okugega ebhyokurya bhya abhaana nuweesera gimbwa. Nyaaika iyo insonga yeende-ko ni ati, Abhayawudi bhanyoore bhusakisi okwamba, bhanu bhatari Bhayawudi bhakyari okubhunyoora. 27Omugasi uyo ˆnaaika ati, “Yee Raatabhugenyi, nawe gimbwa gyone, egirya bhinu ebhigwa ansi kw-igari rya esebhugenyi waagyo.”

28Yeesu ˆnaamusubhya ati, “Maayi, obhwikirisha bhwawo ni bhunene! Nyamuwanga akukorere rwa kutyo oweenda.” Ayoayo, omuyara waaye ˆnaawora.

Yeesu kaawosha abharwaye bhaafu

29Mmbe, Yeesu ˆnaasooka eyo, ˆnaakekera ku-murambo gwa omwaro gwa Gariraaya. ˆNaariinya ku-kiima ˆneekara eyo. 30Bhaanu bhaafu muno mbamuseeta eyo, mbamusirira abharema, abhawofu, abhajibhi na abharwaye abhandi bhaafu. Mbatuura abharwaye bhayo ayeeyi na amaguru gaaye ayo, ˆnaabhawosha. 31Abhaanu ꞉bheejire bhaarora abhajibhi mbaroma, abharema mbawora, abhawofu mbarora, mbaruguura muno. Mbaamba okugungya Nyamuwanga wa Abhaijirayeeri.

Yeesu kaayaana abhaanu bhiwumbi bhina ebhyokurya

(Maariko 8:1-10)

32Niwe Yeesu ˆnaabhirikira abheeyigira bhaaye, ˆnaabhabhwira ati, “Enifwira ekigongo abhaanu bhanu, kwa okubha kyeekaaye nabho nsiku esatu, woori bhatari na bhyakurya. Na nitakwenda kubharaga bhagende bhari na omweko, kwa okubha abhandi abhatura okurambukira mu-njira.”

33Abheeyigira bhaaye mbamubhuusha ati, “Anu, kiri iibhara, na abhaanu bhanu ni bhaafu. Ekinyoora aaki emikaate gya okwisa abhaanu bhanu bhoone kutyo?” 34Yeesu ˆnaabhabhuusha ati, “Muri na mikaate eringa?” Mbamusubhya ati, “Kiri na mikaate mungati na bhiswi bhitooto era.”

35Mmbe, Yeesu ˆnaabhwira abhaanu bhoone kutyo bheekare ansi. 36ˆNaagega emikaate mungati giyo na ebhiswi, ˆnaakumya Nyamuwanga. Kimwi ˆnaabhuturabhutura omukaate, ˆnaayaana abheeyigira bhaaye, mbagabhira abhaanu. 37Abhaanu mbarya, mbeeguta. Abheeyigira mbakumanya ebhisaaga bhya emikaate, mbeejusha bhikapo mungati. 38Abhaanu bhanu ꞉bhaariiye ebhyokurya bhiyo ꞉bhaariga bhari bharume bhiwumbi bhina, abhagasi na abhaana bhatabharirwe. 39Mmbe, Yeesu ˆnaaraga abhaanu bhayo, ˆneengira mu-bhwato, ˆnaagenda mu-kyaro kinu ꞉kyatogwaga ati Magadani.

Currently Selected:

Mataayo 15: kya

Highlight

Copy