Mataayo 28

Okusuuka kwa Yeesu

(Maariko 16:1-10; Ruuka 24:1-12; Yowana 20:1-10)

1Bhunu Insabhaato ꞉yaawooye, niibha mu-ruguru Ekya obhwoyo,#28:1 Ekya obhwoyo. Abhayawudi bheeki abhooya ekya Akasansabha. Ekya obhwoyo ni rusuku rwebhwe orwa okwamba orwa obhwoyo. Maryamu Magidarena na Maryamu owundi wurya, mbagenda okuringira imbiiyira.

2Mbataka era, riinyamutikima enene nditura, kwa okubha maraayika wa Raatabhugenyi Nyamuwanga ꞉eekire okusooka mu-rwire. Maraayika uyo ˆnaaja ku-mbiiyira ayo, ˆnaasiringisisha riigina rirya ku-mbarika, ˆnaariikara-ko. 3Maraayika uyo ꞉aariga ˆnaangʼarabhya rwa orumesho, gingibho gyaye ꞉gyariga nyeru pee rwa amagaafu. 4Bhunu abhasirikare bhanu ꞉bhaariga bhari ayo ꞉bhaarorere gayo, mboobhaya muno, mbayarara, kimwi mbabha rwa abhafuuye.

5Niwe maraayika uyo ˆnaabhwira abhagasi bhayo ati, “Musige okuubhaya! Nimenyere ati omwagara Yeesu unu ꞉aasungirwe ku-musarabha. 6Atariwo anu! Aasuukire, rwa kutyo ꞉aariga abhabhwiriiye. Muuje murore anu ꞉bhaariga bhamumaamiishe. 7Mmbe, mugende bhwangu, mubhwire abheeyigira bhaaye ati, ‘Asuukire okusooka mu-bhafuuye, aabhatangatira okugenda Gariraaya. Eyo niyo muraamurore!’ Ambe, naamara okubhabhwira!”

8Niwe abhagasi bhayo mbasooka mu-mbiiyira ayo bhwangubhwangu bhayayire, enu bhajomeeywe muno. Mbabhirima mbagenda okubhwira abheeyigira bha Yeesu ganu maraayika aabhabhwira. 9Mmbe, bhunu ꞉bhaariga mbagenda, mbataka era mbanyookana na Yeesu. Yeesu ˆnaabhakeesha ati, “Mwawongera-mo!” Mbamufugerera mbamugwata amaguru, mbamuramya. 10Niwe Yeesu ˆnaabhabhwira ati, “Musige okuubhaya. Mugende mubhwire abheeyigira bhaani bhagende Gariraaya. Eyo niyo kiraarorane.”

Abhariisi bha imbiiyira ya Yeesu abhayindura amangʼana

11Mmbe, bhunu abhagasi bhayo ꞉bhaariga mbagenda, abhasirikare abhandi ku-bhanu ꞉bhaariga mbaangarira imbiiyira ya Yeesu ꞉bhaagendere Yerusareemu mu-musi, okubhwira abhashengesi abhakuru goone kutyo ganu ꞉gaabhanyoorere.

12Niwe abhashengesi abhakuru mbanyookana na abhakaruka bha Abhayawudi mbaaikana, mbaramura erya okukora. Niwe mbayaana abhasirikare bhayo amasooya, giri yera nyafu. 13Mbabhabhwira ati, “Omuunu akabhabhuusha, mwaike era ati, ‘Mu-ngeta bhunu kyakiwongeeye, abheeyigira bhaaye bhaaja, mbamwibha.’ 14Raabhe Piraato akoongwa, eswe kiraarome nawe, insonga emwe mwasiga okubha na kikayo ku-riyo.” 15Niwe abhasirikare mbagega giiyera mbakora rwa kutyo ꞉bhaabhwiriiywe na abhakuru bha Abhayawudi. Iingʼana iyo niiswerana mu-Bhayawudi na reero.

Amaragiriro ga Yeesu aga obhuteero ku-bheeyigira bhaaye

(Maariko 16:14-18; Ruuka 24:36-49; Yowana 20:19-23; Ebhikorwa bhya Abhatumwa 1:6-9)

16Abheeyigira bha Yeesu ekumi na wumwi mbagenda Gariraaya ku-kiima kinu Yeesu ꞉aariga abharagiriiye. 17Mu-kiima eyo mbamurora. ꞉Bheejire bhaamurora, mbamuramya, nawe abhandi mbeetimaata. 18Mmbe Yeesu ˆnaabhaaja-ko, ˆnaabhabhwira ati, “Nyamuwanga anaaye obhuturo bhwone kutyo mu-rwire na mu-kyaro. 19Mmbe woori, mugende mu-bhyaro bhyone kutyo, mukore abhaanu bhabhe bheeyigira bhaani, mubhabhatiishaga kw-isiina rya Raata, na Omwana, na Mwoyo Omutaakatiifu, 20mubheeyigishaga okugwatira amangʼana goone kutyo ganu ꞉naabharagiriiye. Mwitegeereshe, anye niri amwi na emwe, nsiku gyone kutyo, okuyikira ku-bhuteero bhwa ekyaro.”

Currently Selected:

Mataayo 28: kya

Highlight

Copy