Maariko 3
3
Okukora amajomu ku-rusuku rwa Insabhaato
(Mataayo 12:9-14; Ruuka 6:6-11)
1Orusuku orundi rwa Insabhaato, Yeesu ˆneengira kweki mw-isunagoogi. Mw-isunagoogi muyo ꞉aariga ariwo omuunu unu ꞉aariga afuuye okubhoko. 2Abhafarisaayo ꞉bhaariga bheetegaaniiye Yeesu, bharore raabhe araawoshe omuunu uyo, ku-rusuku ruyo, bhanyoore riingʼana rya okumusitaakisha-ko. 3Yeesu ˆnaabhwira omuunu unu ꞉aariga afuuye okubhoko ati, “Nuuje, uyambaare agati anu.” 4Niwe Yeesu ˆnaabhuusha Abhafarisaayo ati, “Okuriingʼaana na ebhiraagiro bhya Musa, ni riiya riisire okukorwa ku-rusuku rwa Insabhaato, ni okukora amajomuu, ni kukora amabhiibhi? Orusuku ruyo kiwonʼye emyoyo, kiite?” Abheene mbajibhira.
5Yeesu ˆnaabhamogorera ameeso bhoone kutyo abhiiyiiywe, ˆnaasurumbara mu-mutima gwaye ku-nsonga ya obhukomeeye bhwa emitima gyebhwe. Kimwi ˆnaabhwira omuunu uyo ati, “Iimusha okubhoko kwawo.” Woone ˆnaakwimusha, ˆnaawora ayoayo! 6Niwe Abhafarisaayo mbawuruka anja, mbanyookana na abhasakisi bha omukama Yerode Antipa.#3:6 Abhasakisi bha omukama Yerode Antipa. Mu-Kiyunaani ikaamirwe ati, Abhayerode. Abhaanu bhayo ꞉bhaariga mbeekirisha obhutungi bhwa Abharuumi mu-kyaro kyebhwe. Mbaamba okwagara injira ya okwita Yeesu.
Bhaanu bhaafu abhagenda ku-Yeesu
7Yeesu ˆneemuka na abheeyigira bhaaye mbagenda ku-mwaro. Bhaanu bhaafu okusooka Gariraaya na Ebhuyawudi, 8na Yerusareemu, Idumaya, ngʼambu ya oruuji rwa Yorodaani na mu-misi ginu giri ayeeyi na Tiiro na Sidooni, bhunu ꞉bhoonguuywe amangʼana ganu ꞉aariga ˆnaakora, mbamuseeta. 9Yeesu ˆnaabhwira abheeyigira bhaaye ati bhatuurega ayeeyi obhwato, insonga abhaanu bhakamusamba ariinye-mo, kwa okubha abhaanu ꞉bhaariga bhari bhaafu. 10Abhaanu bhaafu ꞉bhaariga mbawora, na abharwaye ꞉bhaariga mbarwanirira nyakara bhamukuunʼye-ko era. 11Abhaanu bhanu ꞉bhaariga bhawungirwe na ebhiwi bhunu ꞉bhaamuroraga, ꞉bhaariga mbamwifukamira, mbaamura obhuraka mbaaika ati, “Ni awe Omwana wa Nyamuwanga!” 12Nawe omwene ˆnaagaanyaga ebhiwi bhiyo bhisige okubhwira ku-bhaanu ati omwene nniga.
Yeesu kaasora abhatumwa ekumi na bhabhiri
(Mataayo 10:1-4; Ruuka 6:12-16)
13Yeesu ˆnaariinya mu-kiima. ˆNaabhirikira bhanu ꞉aariga eendere omwene, mbamuseeta. 14ˆNaawura abhaanu ekumi na bhabhiri insonga bhabhe amwi nawe, abhatumega okuraasha Amangʼana Amajomu, 15na bhabhe na obhuturo bhwa okubhirimya ebhiwi mu-bhaanu.
16Ganu nigo amasiina ga abhaanu ekumi na bhabhiri bhanu ꞉aasorere, Simooni, unu Yeesu ayaaye riisiina erindi ati, Peetero,#3:16 Peetero. Riisiina Peetero ni nyaaika ya Ekiyunaani. Insonga ya riisiina riyo ni, etare. 17Yakobho na Yowana, abhamura bha Jebhedaayo, bhanu Yeesu ꞉aayaaye riisiina rya Bhoonege, insonga yeende-ko iri ati, ꞉bhaariga bhari rwa amabharuka, 18Ndereya, Firipo, Bhatoromayo, Mataayo, Tomaaso, Yakobho omwana wa Arufwayo, Tadaayo, Simooni owumwi wa mu-bhaanu bha ekyama kya Abhajeroti,#3:18 Simooni owumwi wa mu-bhaanu bha ekyama kya Abhajeroti. Simooni ꞉aariga ari na amasiina gabhiri, erya okwamba Simooni Omujeroti, erindi ni Simooni Omukananaayo. Amasiina ganu ꞉bhaabhirikiraga omuunu unu ꞉aariga arwanire riiremo rya okunyoora obhwiyagaaro okusooka mu-bhutungi bhwa Ekiruumi. 19na Yuuda Esikariyooti, unu ꞉aariiye Yeesu injeejemo.
Obhuturo bhwa Yeesu obhukira obhwa omukuru wa ebhiwi
(Mataayo 12:22-32; Ruuka 11:14-23, 12:10)
Kimwi Yeesu ˆnaasubha iika, ˆneengira mu-nyumba. 20Bhaanu bhaafu kweki mbasangira iika ayo, Yeesu na abheeyigira bhaaye bhataaturire na okurya. 21Bhunu nyiramwene na bhaawaamuwaabho ꞉bhoonguuywe amangʼana gayo, mbagenda okumugwata, kwa okubha abheene ꞉bhaaikaga ati asarire.
22Abheeyigisha bha ebhiraagiro bhya Musa bhanu ꞉bhaariga bhasookere Yerusareemu, mbaaika ati, “Ari na Bherijebhuri!#3:22 Bherijebhuri. Ni riisiina erindi rya Sitaani. Kaabhirimya ebhiwi okuturira ku-bhuturo bhwa Bherijebhuri, omukuru wa ebhiwi.”
23Mmbe, Yeesu ˆnaabhabhirikira, ˆnaamba okubhabhuusha okuturira ku-bhirengekanyo ati, “Sitaani kaatura kutiki okubhirimya Sitaani weejaabho? 24Raabhe abhaanu mu-bhukama obhumwi bhakarema okuungwana, obhukama bhuyo obhugwa. 25Na, abhaanu bha mu-nyumba eyimwi bhakarema okuungwana, abhaanu bhayo abhataana. 26Raabhe Sitaani akabhirimya Sitaani, obhukama bhwaye obhubha bhwatikire, bhutakutura kugenderera okubha-wo, tari obhubha bhuwooye-wo kimwi. 27Omuunu atakutura okwingira mu-nyumba ya omuunu unu ari na amanaga okumuteesha ebhiinu bhyaye, akyari okumubhoya okwamba. Akamara okumubhoya kujomu, niwe woori kaatura okumuteesha ebhiinu bhyaye bhyone kutyo.
28“Enibhabhwira ekimari ati, abhaanu bharyabhirwa ebhikayo bhyebhwe bhyone kutyo, na amangʼana geebhwe aga injabhuro. 29Nawe, omuunu unu aryaika amangʼana ga injabhuro ku-Mwoyo Omutaakatiifu, ataryabhirwa wuri. Kaabha ari na ekikayo kya kajaanende.” 30Yeesu ꞉aabhabhwiriiye kutyo kwa okubha abheene ꞉bhaariga mbaaika ati, “Ari na ekiwi.”
Nyiramwene Yeesu na bhaawaamuwaabho
(Mataayo 12:46-50; Ruuka 8:19-21)
31Niwe bhaawaamuwaabho, na nyiramwene Yeesu mbayika, mbayambaara anja. Mbatuma omuunu abhabhirikirire Yeesu. 32꞉Ryariga ririwo riisangi rya abhaanu bhanu ꞉bhaariga bheekaaye, bheeyindirega Yeesu. Niwe Abhafarisaayo mbamubhwira ati, “Rora, nyakumwana na bhaawaamuwaanyu bhari anja, abhakwagara.”
33Yeesu ˆnaabhasubhya ati, “Maayi na bhaawaamuwaasu ni bhaaga?” 34Yeesu ˆnaaringira abhaanu bhanu ꞉bhaariga bheekaaye, bhamwiyindire. ˆNaaika ati, “Ringira, bhanu nibho bhaamaayi, na bhaawaamuwaasu. 35Omuunu woonewoone unu kaakora ganu Nyamuwanga keenda, uyo niwe omumura waasu, uyo niwe maayi, na omusubhaati waani.”
Currently Selected:
Maariko 3: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
