Matius 13

Kapalendano mie meꞌewino wine

13:1-23

Mrk 4:1-20; Luk 8:4-15

1Ne oleo anaꞌa Yesus nolimba we simbalino lambu maka nokala nengkoha we wiwino teꞌi. 2Mie bhahi dopohato-hatomo toha dolibu-libue, sampe nosawimo ne bhangka maka nengkoha. Mie bhahi tadeehe-ehe te wite. 3Nobhahi kafoinaꞌuno Yesus nepakeanda kapalenda. Ambano, “Nandoo seemie mekaampono nokala neꞌewi wine. 4Tangasano neꞌewi, nandoo wine mondawuꞌano ne kaangkaꞌa. Gahaꞌa dohatomo kaꞌuhi lumola, dopadae dohumaaꞌe. 5Nandoo dua mondawuꞌano ne kamoꞌali, witeno miina naokapaa. Wine aitu nopikitumbu mbaꞌinomo nonifi witeno. 6Tamaka hato nopana oleo, tumbuno noleleumo maka nomate mbaꞌinomo pahakano miina nakumamaa. 7Nandoo dua wine mondawuꞌano we wuntano kahoku kokihi. Kahoku aitu nodhulu kabhala, maka noꞌontiꞌi kantisa naꞌa ampa nomate. 8Sigaoꞌano nondawu ne wite menowu, sampe nokobhake. Bhakeno nandoo moꞌono onu sewili, nandoo nomo fulu, nandoo dua tolu fulu onu. 9Ane dokotingala beano dametingke.”

10Pada aitu domaimo anaguhuꞌino, dofeenae ambado, “Noafa gahaꞌa ingka fofoinaꞌuꞌao mepake kapalenda?” 11Notobhoosimo Yesus ambano, “Hintimiu nowaꞌangkoomu kadawu Lahataꞌala pandeꞌaanemoomu rahasiano Kafopahintaꞌano, tamaka mie sigaoꞌano miina. 12Kapaꞌamo kokanandoono datumubhahiane ampa napontalabhi-labhi, tamaka tapa kokanandoono, o ae maka dua kanandoono damadae damalaꞌie. 13Pedamo anaꞌa kaepakeꞌaku kapalenda ne andoa, hampano mahingga daꞌumondo paise dakoniwoha, mahingga dametingke paise dakonilosangi. 14Aini noposahataamo bhe nekosuahaꞌaono anabii Yesaya peda aini,

‘Hintimiu safeti-fetingke tamaka pae melosangieomu,

sawoha-woha tamaka pae konipandeꞌaoꞌomua.

15Kapaꞌamo totono lalondo mie andoa ini nofekontumo,

tingalando nopoꞌopimo, matando nopilomo.

Kanandooꞌano peda anaꞌa keana dofowohaꞌao matando,

keana dofofetingkeꞌao tingalando,

keana dua dolosangiꞌao totono lalondo,

bhaha sala dodoli se idi maka amekaꞌosada.’ #Yes 6:9-10

16Tamaka kakodawuamiu, matamiu nofowoha, tingalamiu nofofetingke. 17Amohatokoomu, kotu-kotuꞌu dobhahi anabii bhe mie lumebe endefiꞌini, gaondo damoha newohamiu aitu, tamaka miina daohaea; gaondo dametingke nefetingkemiu aitu tamaka miina dametingkeea.

18Dadiꞌanomo fetingkeomu maꞌanano kapalenda meꞌewino wine saꞌituini. 19Kotika mie metingkeno bhoasao Kafopahintaꞌano Lahataꞌala tamaka miina nalumosangiea, nomaiꞌie Kafeompuꞌando seetani norampasi bhoasao kaneꞌo neꞌewi weo totono lalondo maitu. Aitumo maꞌanano wine mondawuꞌano ne kaangkaꞌa. 20Wine neꞌewi ne kamoꞌali, maꞌanano mie metingkeno bhoasaono Lahataꞌala, lasao dotahimae bhe doꞌiaꞌane. 21Ampamo kaowu bhoasao aitu miina nakopahakaa weo totono lalondo sampe miina natumahaa. Sadeꞌawa kasabhano tawa kakadee-dee mbaꞌinomo doangkafi bhoasao maitu, lasao dohunsa kaparasaeando. 22Wine mondawuꞌano weo kahoku kokihi, maꞌanano mie metingkeno bhoasaono Lahataꞌala, tamaka nobhahi dofekihi so kadadiꞌando bhe nobhohe-bhoheꞌida kahangkaeano dhunia. Kosasawiꞌae naꞌa nopesua weo totono lalondo noꞌontiꞌi bhoasaono Lahataꞌala sampe miina nakohasilia. 23Wine mondawuꞌano ne wite menowu, maꞌanano mie metingkeno bhoasaono Lahataꞌala bhe dolosangie. Dadiꞌanomo nokobhake, nandoo moꞌono lentuꞌa, nandoo nomo fulu lentuꞌa, nandoo dua tolu fulu lentuꞌa hasilino.”

Kapalendano dana ne wuntano gandum

13:24-30

24Yesus nefohatoandamo dua kapalenda sigaoꞌano. Ambano, “Kafopahintaꞌano Lahataꞌala tapedamo seemie meꞌewino wine metaa te kaampono. 25Gahaꞌa sealo, tangasano doodo mie, nomaimo kaewano lasao neꞌewiane dana ne olotano gandum naꞌa maka nokala. 26Hato notumbu bhe nokowunamo gandum naꞌa, notiwohamo dua dana saꞌituini. 27Bhatuano lasao domai ne kafeompuꞌando, ambado, ‘Waompu, ingka wine metaa neꞌewimu te kaampo, tamaka nomaiꞌao ne amai bhahaa dana tatua?’ 28Ambano kafeompuꞌando, ‘Kahadhaano kaewa itua.’ Ambado dua bhatua naꞌa, ‘Bhahaa gaomu tabunatiemo dana maitu?’

29Tamaka ambano kafeompuꞌando, ‘Koise, kapaꞌamo ane bunatieꞌomu dana itu, kunanomo gandum natibunati dua. 30Hunsaꞌanomo kohaahondaꞌae daꞌumende ampa metobheꞌa. Nahumato metobheꞌa, amugaumo ne tumobheno, ‘Foꞌonuomu kadeki dana itu, obho-obhoeꞌomu maka tawueꞌomu. Mada aitu foꞌonuomu gandum weo lambu kaenteiꞌano otiku.’ ’ ”

Kapalendano onuno wonoita bhe ragi

13:31-35

Mrk 4:30-34; Luk 13:18-21

31Pada anaꞌa nefohatoandamo dua kapalenda sigaoꞌano, ambano, “Kafopahintaꞌano Lahataꞌala tapedamo dua onuno sau wonoita seꞌonu #13:31 Onuno sau wonoita, sakotuꞌuno: onuno sawi. noalae seemie maka nohooꞌe te kaampono. 32Onuno sau wonoita ini foliuno kahobu ne olotano sabhaha wine, tamaka ane notumbu kaowu, noꞌende noliuda sabhaha kantisa. Nembali puꞌuno sau bhalano, sampe kaꞌuhi lumola domai dofekaufe ne haꞌano” .

33Nosunsumiane dua kapalenda aini. “Kafopahintaꞌano Lahataꞌala tapedamo ragi nealano seemie hobhine mbali kaefoꞌendeꞌano roti. Ragi aini nokunsaloe bhe tariguno fato fulu baa ampa noꞌende kosasawiꞌae.”

34Yesus nofohatoanda kosasawiꞌae naꞌa ne mie bhahi, nepakeanda kapalenda. Anoa miina sepaliꞌa namoinaꞌuda ane miina naepalendaanda. 35Aini mbali nokoꞌulaꞌao bhoasaono Lahataꞌala nefosampeno anabii,

“Abhoka wambaku aepalenda,

amohatoanda tifebuniꞌano mpini pakatandano dhunia.” #Mzm 78:2

Maꞌanano kapalendano dana ne olotano gandum

13:36-43

36Pada anaꞌa Yesus nohunsamo mie bhahi, nopesuamo weo lambu. Domaimo anaguhuꞌino maka ambado, “Fohato kainsami maꞌanano kapalendano dana te kaampo saꞌituini.” 37Notobhoosidamo ambano, “Mie meꞌewino wine metaa, maꞌanano Anano Manusia - Idimo ini. 38Kaampono, maꞌanano dhunia ini. Wine metaa, maꞌanano umatino Kafopahintaꞌano Lahataꞌala; dana nokomaꞌanaꞌao mie tumaino ne Kafeompuꞌando seetani. 39Kaewa meꞌewino dana, maꞌanano Kafeompuꞌando seetani. Tempono metobheꞌa nokomaꞌanaꞌao kafetompaino dhamani bhe tumobheno naꞌa o malaꞌekati. 40Peda dana dofoꞌonue maka dotawue ne efi, namedamo dua naꞌa nahumato kafetompaino dhamani. 41Anano Manusia natumudu malaꞌekatino damoꞌonu sabhaha mie mekakodhosano manusia bhaindo bhe mie humabu modaino weo Kafopahintaꞌano. 42Kosasawindo naꞌa daꞌumohofida weo efino narakaa; ne naꞌa taꞌo kangkoꞌae bhe kuꞌino wangka. 43Wakutuu anaꞌa mie mongkilo dakotilanga nada oleo weo Kafopahintaꞌano Amando. Ane dokotingala, beano dametingke!”

Kapalendano arataa tikantanono bhe muntia moꞌali

13:44-46

44“Kafopahintaꞌano Lahataꞌala tapedamo dua arataa tikantanono te kaampo. Gahaꞌa nandoo seemie umawae, maka suli nokantanoe. Kaꞌosano kaꞌiano nokalamo noasopi kosasawiꞌae kanandoono maka noꞌoli kaampo anaꞌa.

45Pedamo dua anaꞌa, Kafopahintaꞌano Lahataꞌala peda seemie daga meꞌondofino muntia mokesa. 46Nopoꞌawaꞌao kaowu muntia foliuno kakesa bhe kaꞌali, nokalamo noasopi kosasawiꞌae kahangkaeano maka nosuli noꞌoli muntia naꞌa.”

Kapalendano puka

13:47-52

47“Kafopahintaꞌano Lahataꞌala tapedamo dua puka nelabu we teꞌi, notikaiane sabhaha kenta. 48Kentano notahusu, domaimo mie dohelae te kaꞌotiꞌa maka dengkoha dofepili kenta naꞌa. Metaaꞌano doteiꞌe weo kaenteiꞌa, tapa metaaꞌano doꞌohofie. 49Namedamo anaꞌa nahumato kafetompaino dhamani; malaꞌekati damai dapogaatiꞌao mie modai bhe mie metaa. 50Mie modai daꞌumohofida weo efino narakaa, ne naꞌa taꞌo kangkoꞌae bhe kuꞌino wangka.”

51Nofeenamo Yesus ambano, “Losangieꞌomu bhahaa kosasawiꞌae ini?” Anaguhuꞌino dotobhoosi ambado, “Uumbe.” 52Ambano toha Yesus, “Dadiꞌanomo kotika pande Kitabi metahimano kafoinaꞌuno Kafopahintaꞌano Lahataꞌala, tapedamo kolambuno molimbano kahangkaeano maiꞌao ne kaenteiꞌano, nabuꞌou nangkodau.”

Yesus dobansie we Nasaret

13:53-58

Mrk 6:1-6; Luk 4:16-30

53Nopalusi nofohatoanda sabhaha kapalenda naꞌa, Yesus nokalamo. 54Sahatono we liwu kamaiꞌaoꞌano, nofofoinaꞌumo weo lambu kasambaheaꞌa. O mie tadomente bhe dopugau ambado, “Nomaiane ne amai bhahaa sabhaha kapande bhe kuasano nehabu giu timenteꞌaono maitu? 55Ingka anoa ini anano tuka. Inano ingka Maria bhe bhahitieꞌino ndo Yakobus, Yusuf, Simon bhe Yudas. 56Ingka bhahitieꞌino hobhine deate dua bhe intaodiomu. Kaowu ne amai noalae sabhaha kapande bhe kuasano maitu?” 57Mie andoa naꞌa nondidiki lalondo sampe dokiidoemo. Gahaꞌa nopugaumo Yesus ne andoa maitu ambano, “Seemie anabii dofosibhalae ne amai liwu. Ampamo kaowu ne liwu kamaiꞌaoꞌano bhe ne lambuno wutono miina damosibhalaea.” 58Dadiꞌanomo Yesus miina nabhahia nehabu giu timenteꞌaono ne itu, mbaꞌinomo miina damarasaeaꞌa.

Currently Selected:

Matius 13: mnbSD

Highlight

Copy