Matius 22

Kapalendano hame-hameno kakawi

22:1-14

Luk 14:15-24

1Pada anaꞌa Yesus nopugau toha nepakeanda kapalenda. 2Ambano, “Kafopahintaꞌano Lahataꞌala tapedamo seemie omputo nehabu hame-hame kakawino anano. 3Netudumo bhatuano dasumunsumi mie nebhasino so maino se hame-hameno naꞌa, tamaka mie andoa naꞌa dokiido damai. 4Fendua toha netudu bhatua sigaoꞌano bhe nopugauanda ambano, ‘Fohatodaomu mie nebhasi naꞌa, ‘Ingka oti padamo ataganae, sapiku moꞌane bhe anano sapi kampuhobuku padamo dosumbeleda. Kosasawiꞌae notokamo, maimoomu se hame-hameku ini.’ ’ 5Tamaka mie nebhasi naꞌa miina daoheruanda, tadokala. Nandoo kumalano te kaampono, nandoo kumalano gumiuno. 6Nandoo dua sigaoꞌano dohako bhatuano, dofodee-deeda maka dopongkoda. 7Omputo anaꞌa noꞌamaha sepaliꞌa, maka notudumo tantarano dakumala damobinasa fopongkono naꞌa, dasumulae bhe liwundo.

8Pada anaꞌa nopugaumo ne bhatuano ambano, ‘Hame-hameno kakawi notokamo, tamaka mie nebhasi miina damantasia. 9Dadiꞌanomo kalaomu ne amai sala bhalano saliꞌidaomu kotika mie nepoꞌawaꞌaomiu damai se hame-hameku ini.’ 10Bhatuano naꞌa dokalamo maka sabhaha mie nepoꞌawaꞌaondo we sala dopadada dofohompuda, namie modai namie metaa. Mie andoa itu dowowoꞌoda sampe boloku kahame-hameꞌa naꞌa noponoꞌao mie humato.

11Pada anaꞌa nopesuamo omputo napoꞌawaꞌao mie humatono maitu. Gahaꞌa nowohamo seemie tapa mepakeno pakeano hame-hame. 12Nopugaumo ambano, ‘Sabhangka, peda ae dua tapesuamo ne ini miina mepake pakeano hame-hame?’ Tamaka mie anaꞌa miina nakodiua. 13Nopugaumo omputo anaꞌa ne mieno ambano, ‘Tapuomu limano bhe aꞌeno maka ohoeꞌomu we simbali, weo doloma mposo. Ne naꞌa taꞌo kangkoꞌae bhe kuꞌino wangka. 14Kapaꞌamo nobhahi tibhasino tamaka seendai kaowu tipilino.’ ”

Tanduaꞌano sewa ne Omputo Kaisar

22:15-22

Mrk 12:13-17; Luk 20:20-26

15Pada anaꞌa miendo Farisi dokalamo dopugau-gau bhahaꞌi nada amai dameena ne Yesus so dametandoꞌao alano wambano. 16Dotudumo anaguhuꞌindo dapoowa-owa bhe mieno kolaki Herodes dofeena ne Yesus ambado, “Guru, tapandeꞌaane nelaa lalomu. Weo kalaano lalomu fofoinaꞌuꞌao sala metaano Lahataꞌala so manusia. Miina koniengatia, hampano miina poꞌala-alaanda manusia. 17Soba fohato kainsami, peda ae fekihimu, weo tubhono agamantoomu, naembali bhahaa datumanduao sewa ne Omputo Kaisar kaa paise?”

18Tamaka Yesus nopandeꞌaane kadaino isikadhindo, dadiꞌanomo nopugaumo ambano, “Mie mehaaꞌulano, noafa solo-solo kanauꞌomu? 19Fotiwoha kanauꞌomu kupa so sumewaꞌaoꞌomu itu.” Deowaanemo sewoka dhoi pera. 20Nofeenadamo ambano, “Gambarano ula bhe nea laꞌae gahaꞌa inia?” 21Dotobhoosi ambado, “Ula bhe neano Omputo Kaisar.” Ambano toha Yesus, “Bahangka peda naꞌa, fehebuaꞌano Omputo Kaisar waꞌaneomu Omputo Kaisar, fehebuaꞌano Lahataꞌala waꞌaneomu Lahataꞌala.” 22Dofetingke peda naꞌa, tadomente. Lasao dokukundo Yesus kokala-kalando.

Miendo Saduki dofeenaꞌao kawanuꞌando mie mate

22:23-33

Mrk 12:18-27; Luk 20:27-40

23Ne oleo anaꞌa domaimo dua miendo Saduki. Andoa ini miina damarasaeaꞌa kawanuꞌando mie mate. Andoa dofeenamo ne Yesus ambado, 24“Guru, ambano anabii Musa, ane o moꞌane nomate tamaka hobhineno miinaꞌo nakoanaa, maka kakutano moꞌane tetewei nagumaa bhe bhihinandano naꞌa, neanomo anano dakumonae sampuꞌano mateno maitu. #Ul 25:5 25Ne olota mani nandoo dopipitu dosekakutaꞌa sanea moꞌane. Titiisa nogaa tamaka nomate miinaꞌo nakoanaa. Mbaꞌinomo miinaꞌo nakosampuꞌa katuluno nogaa bhe bhihinandano. 26Gahaꞌa nomate dua miinaꞌo nakoanaa. Pedamo dua aitu aino tuluꞌano. Pedamo anaꞌa kansuhu sampe kopipitundo domate, sanea tapa koanano. 27Panda-pandano nomate dua hobhine naꞌa. 28Nahumato oleo kawanuꞌando mie mate, so mieno lambu laꞌae hobhine amaitua? Ingka kopipitundo sanea gumaaꞌane.”

29Yesus notobhoosida ambano, “Ingka noꞌala fekihimiua, mbaꞌinomo miina mandeꞌaaneomua wambano Kitabi, miina dua mandeꞌaaneomu kuasano Lahataꞌala. 30Kapaꞌamo nahumato kawanuꞌando mie mate, andoa dadumadi nada malaꞌekati te surugaa: paemo dagumaa, paemo dua damogaada. 31Ane kawanuꞌando mie mate, miinaꞌo basaeꞌomua bhahaa bhoasaono Lahataꞌala peda aini, 32‘Idimo ini Lahataꞌalano Abraham, Lahataꞌalano Ishak bhe Lahataꞌalano Yakub.’ #Kel 3:6 Maꞌanano Ompu Lahataꞌala suano Lahataꞌalando mie mate tamaka Lahataꞌalando mie dumadi.” 33Dofetingke kafoinaꞌuno naꞌa, mie bhahi tadomente.

Pahinta fofoliuno kabhala

22:34-40

Mrk 12:28-34; Luk 10:25-28

34Miendo Farisi dofetingke putae miendo Saduki miinamo dakowobhaa dowiseki Yesus. Dadiꞌanomo dopofoꞌo-foꞌonumo. 35Seemie pande Kitabi ne olotando naꞌa nofeenamo nomansoꞌalai Yesus. 36Ambano, “Guru, pahinta medando amai gahaꞌa fofoliuno kabhala weo Kitabino Musa?” 37Ambano Yesus, “Moasiane Ompu Lahataꞌalamu sampuu-mpuuno lalomu, sampuu-mpuuno alusumu, sampuu-mpuuno fekihimu. #Ul 6:5 38Ainiꞌaemo pahinta kabhao-bhaono bhe fofoliuno kabhala. 39Pahinta katuluno nopototo bhe anaꞌa: moasiꞌao manusia bhaimu peda kaasimu ne wutomu. #Im 19:18 40Kosasawiꞌae pahinta weo Kitabino Musa bhe Kitabindo ana-anabii nengkohamo ne pahinta haa hondano ini.”

Pokaiꞌano Yesus bhe Daud

22:41-46

Mrk 12:35-37; Luk 20:41-44

41Tangasano miendo Farisi dopohompu-hompu, Yesus nofeenadamo ambano, 42“Peda amai fekihimiua ne Mesias Omputo Fosalamatino maitu? Sampuꞌa laꞌae bhahaa?” Ambado, “Sampuꞌano Daud.” 43Ambano Yesus, “Ane peda naꞌa noafa gahaꞌa Daud weo kuasano Rohino Lahataꞌala, nokona Omputo Fosalamatino maitu Ompuno? Ingka nopugau peda aini,

44‘Ompu Lahataꞌala nokowambamo ne Ompuku,

Mengkoha ne suanaku sampe kaewamu amolongkoda ne wawono aꞌemu.’ #Mzm 110:1

45Dadiꞌanomo ane nokonae Ompuno, noafaꞌao dua nembali sampuꞌano?” 46Bhe naseemie miina bhe mandeno tumobhoosie; notanda oleo aitu bhe seemie miinamo dua bhe mokadono so meenae.

Currently Selected:

Matius 22: mnbSD

Highlight

Copy