Matius 24

Lambuno Lahataꞌala damohansurue

24:1-2

Mrk 13:1-2; Luk 21:5-6

1Pada peda maitu Yesus nolimbamo maiꞌao weo Lambuno Lahataꞌala maka nokala. Domaiꞌiemo anaguhuꞌino bhe dosusupiane lambu weo kadeteno Lambuno Lahataꞌala. 2Nopugaumo Yesus ambano, “Ingka wohaeꞌomu itua? Amohatokoomu, kotu-kotuꞌu bhe nasepoi kontu pae bhe so tumapiꞌano te wawono kontu bhaino, kosasawiꞌae damadae damohansurue.”

Katandaꞌano kakadee-dee

24:3-14

Mrk 13:3-13; Luk 21:7-19

3Dohato te kabhawono Zaitun Yesus nengkohamo ne itu. Domaimo anaguhuꞌino dopuga-pugau domoisa kaowu. Ambado, “Fohato kainsami bhahaꞌi naefie nakumadhadhia naꞌa? O ae bhahaa katandaino so kahatoꞌamu bhe tandano pandano dhamani?” 4Yesus notobhoosida ambano, “Kodhagaomu, bhahaa dofokolilino totono lalomiu! 5Kapaꞌamo dabhahi mie so maino damake neaku bhe dapugau ambado, ‘Idimo ini Mesias’, maka dabhahi mie so tibhohe-bhoheꞌino. 6Ane metingkeomu nduuno popahisaꞌa bhahaꞌi meꞌawaomu bhihitano popahisaꞌa, koemo notikenda handamiu. Ingka kosasawiꞌae maitu tetewei nakumadhadhia, tamaka suanoꞌo kafetompaino dhamani. 7Liwu dapoewangi bhe liwu, kakolakiꞌa dapoewangi bhe kakolakiꞌa. Neꞌamai-neꞌamai nandumandoo gaba bhe luali. 8Ampamo kaowu kosasawiꞌae naꞌa kafetompunaꞌino dhamani buꞌou, nopototo bhe kaleano so koanano.

9Humato anaꞌa dahumakokoomu, maka damowakoomu ne limando mie so modee-deekoomu maka damongkokoomu. Kosasawindo bansano liwu dabansikoomu mbaꞌinomo membaliomu anaguhuꞌiku. 10Dabhahi so humunsano kaparasaeando, daposungku-sungkuꞌao ne kokuasano bhe dapobansi-bansi. 11Dabhahi mpahaana-anabiino sampe dabhahi mie so mokolilinono totono lalo. 12Kadaino diundo manusia sadhulu-dhulumo sampe dabhahi mie mosalino kanini kaasi ne mie bhaindo. 13Tamaka andoa kosabahano dopotaami sampe namalusi, dasumalamati. 14Bhihita Metaano Kafopahintaꞌano Lahataꞌala ini damolelee ne kosekaꞌewaꞌae dhunia, neanomo sabhaha bansano liwu dametingkee. Mada anaꞌa kaneꞌomo nahumato kafetompaino dhamani.”

Fofekabinasano Timohakuno

24:15-28

Mrk 13:14-23; Luk 21:20-24

15“Weo kasabha maitu mohaomu Fofekabinasano Timohakuno naeehe-ehe ne Lambuno Lahataꞌala peda bhoasaono Lahataꞌala nefosampeno anabii Daniel. (Hintimiu mebasano tabeano motindaeꞌomu maꞌanano!) #Dan 9:27, 11:31, 12:11 16Maka mie we kadieno Yudea tabeano damilei te kokabhawoꞌano so dasumalamatiꞌao. 17Mie we tambi koemo dopesua dakoniala weo lambu. #24:17 Sakotuꞌuno: ndumandoono te ato ⸤ potateꞌano⸥ koemo dosampu damesua dakoniala weo lambu. 18Mie te kaampo koemo dosuliki pakeando we liwu. 19Kadaino maka kolaundo hobhine fowoowano tawa fofotitino ne wakutuu anaꞌa. 20Sambaheaꞌomu tempono so kafileiꞌamiu naꞌa koe nokantibha wulano use tawa oleono Sabat. 21Wakutuu anaꞌa nandumandoo kasabha foliuno kabhibhiisa. Kasabha pedando anaꞌa miinaꞌo nakopototoꞌa mpini pakatandano dhunia ampa haꞌoleo ini, pakade paemo dua namendua nakumadhadhia. 22Ane ibahano Ompu pae nakumuhangi tempono, kotika dumadino pae bhe so sumalamatino. Tamaka mbaꞌinomo nandoo umati tipilino, Ompu nakumuhangi tempono.

23Wakutuu anaꞌa ane bhe so mugauangko, ‘Ondoe, ainiꞌae Mesias, Omputo Fosalamatino’ tawa, ‘Ondoe, atatuꞌae Mesias’, koe parasaeaꞌomua. 24Kapaꞌamo dabhahimo mabhino wutono Mesias, gahaꞌaitu suano. Dabhahi dua mpahaana-anabiino. Andoa naꞌa daehabu tanda-tanda tapa mentela bhe giu timenteꞌaono, patudhundo ane naembali damokolilino dua totono lalondo umati tipilino. 25Tandaiꞌeomu! Kosasawiꞌae padamo afohatoangkoeꞌomu wawo inia. 26Dadiꞌanomo ane mie dapugau ne hintimiu, ‘Bhe Mesias Omputo Fosalamatino te pandaso bhalano’, koe kalaomua; tawa, ‘Mesias nekaꞌuko weo boloku’, koise parasaeaꞌomua. 27Kapaꞌamo kahatoꞌano Anano Manusia - Idimo ini - napototo bhe bhibhito, nakosilaka te mata oleo nasumela ampa we kansoopa. 28Ne amai kobhangkeꞌano ne itumo kaefoꞌonuꞌano kaa.”

So kahatoꞌano Anano Manusia bhe kapalendano puꞌuno ara

24:29-36

Mrk 13:24-32; Luk 21:25-33

29“Sapalusino kasabha anaꞌa oleo nahohondomo, wula paemo nakotilangaa, kulipopo dapondawuti damaiꞌao te lani bhe kosasawiꞌae waweno alamu naohungga. 30Wakutuu anaꞌa natiwohamo katandaino Anano Manusia te lani bhe sabhaha bansano liwu te dhunia ini daekangkoꞌae bhe daguguhu. Andoa daoha Anano Manusia te olu natiwoha weo kakalabhiano bhe kuasa bhalano. 31Duhulele bhalano nakondii. Anano Manusia natumudumo malaꞌekatino dalumimba dahumompunao umati tipilino namaiꞌao ne kofatowalaꞌae alamu, maiꞌao we tompano lani sewetano ampa we sewetano.

32Soba poguhuomu ne puꞌuno wohaꞌa. #24:32 Sakotuꞌuno: puꞌuno ara. Ane haꞌaꞌino notawomo ingka pandeꞌaaneomu nomaꞌomo nakoꞌoleo. 33Pedamo anaꞌa ane mohaemoomu kosasawiꞌae kadhadhia nepulaoꞌaoku saꞌituini pandeꞌaanemoomu, nomaꞌomo sepaliꞌa tempono, ingka te wisenomo fointo. 34Amohatokoomu! Kotu-kotuꞌu mie dhamani aini paeꞌo daopulia damate, nakumadhadhiamo kosasawiꞌae naꞌa. 35O lani bhe dhunia naosali, tamaka wambaku ini pae bhe kasalia. 36Ampamo kaowu oleono bhe tempono bhe seemie miina bhe mandeꞌaanea. O malaꞌekati te surugaa miina, Anano Manusia miina dua, mpahinomo wutono Amaku mandeꞌaane.”

Katangahi so dakodhagaꞌao

24:37-44

Luk 17:26-30, 34-36

37“Peda koeatendo manusia ne dhamanino anabii Nuh, namedamo dua anaꞌa ne oleo kahatoꞌano Anano Manusia. 38Ne dhamani anaꞌa, miinaꞌo nahumatoda luano oe bhalano, o mie dohumaa dofohoꞌu, dogaa bhe dofofogaa sampe ne oleono anabii Nuh nopesua weo bhangka bhalano. 39Andoa miina sepaliꞌa damandeꞌaanea o ae so kumadhadhiano, sampe nofonisidamo luano oe bhalano naꞌa. Nadamo dua anaꞌa ne oleono so kahatoꞌano Anano Manusia. #Kej 6-8 40Wakutuu anaꞌa ane dahodua mie kumahadhaano te kaampo, seemie dawowoꞌoe, seemie dahumunsae. 41Ane dahodua hobhine tangasano megilino kahitela, #24:41 Sakotuꞌuꞌano: o gandum. seemie dawowoꞌoe, seemie dahumunsae.

42Dadiꞌanomo kodhagaomu, kapaꞌamo miina mandeꞌaaneomua oleo so kahatoꞌano Ompumiu. 43Tandaiꞌeomu! Ane kolambuno namandeꞌaane naafaꞌi alo nahumatoe kasoꞌo teteweimo nakodhaga, pae tanakumatahomoa lambuno dalumeloe. 44Dadiꞌanomo mantaa-ntaaꞌomu, kapaꞌamo Anano Manusia nahumato ne wakutuu tapa nepotu-potuluꞌao.”

Kapalendano bhatua motuhuno lalo bhe modaino isikadhi

24:45-51

Luk 12:41-48

45“Laꞌae bhahaa bhatua motuhuno lalo bhe mandeno maitu? Anoamo maitu nesangkeno kafeompuꞌano so neangkando bhatua bhaino, naetaganaanda daomaa napobutu bhe tempono. 46Nokodawua mpuu bhatua naꞌa ane nohatofie kafeompuꞌano tangasano noalaꞌi gunano. 47Amohatokoomu, kotu-kotuꞌu kafeompuꞌa naꞌa nasumangke bhatua aitu somo mandeꞌaono sabhaha fehebuaꞌano. 48Tamaka ane bhatua naꞌa mie modai sampe nakoduku we lalono, 49‘Ingka kafeompuꞌaku nandoo naompona maka nasumuli’, maka namepeki bhatua bhaino bhe naomaa naohoꞌu napoowa bhe mie mololanuno. 50Gahaꞌa kafeompuꞌano tambaꞌomo nahumato, ne oleo tapa nepotu-potuluꞌao, ne tempo tapa nenamu-namu. 51Bhatua anaꞌa namehaakebhae, kahukumuno napototoane bhe mie mehaaꞌulano. Ne naꞌamo taꞌo kangkoꞌae bhe kuꞌino wangka.”

Currently Selected:

Matius 24: mnbSD

Highlight

Copy