Matius 26

Patudhu damongko Yesus

26:1-5

Mrk 14:1-2; Luk 22:1-2; Yoh 11:45-53

1Palusi nofofoinaꞌuꞌao kosasawiꞌae naꞌa, Yesus nopugaumo ne anaguhuꞌino ambano, 2“Ingka pandeꞌaaneomu hohaeaꞌano Paska tanaefua. Ne naꞌa Anano Manusia damowae ne kokuasano maka dakumantaiꞌe te sau salipu.” 3Wakutuu aitu neangkaꞌindo imamu bhe kamungkulaꞌindo Yahudi dopohompu-hompu we lambuno Imamu Bhalano koneaꞌano Kayafas. 4Andoa dopokana-kanagau deꞌondofi akala dahumako Yesus maka damongkoe. 5Tamaka ambado, “Koise dohakoe ne matano hohaeaꞌa, bhahaa tadohialele raꞌeati.”

Yesus nominakie seemie hobhine

26:6-13

Mrk 14:3-9; Yoh 12:1-8

6Yesus nohato we liwuno Betania, ne lambuno Simon kokuli modaino ⸤ endefiꞌini⸥ . 7Gahaꞌa tanosihatoꞌamo seemie hobhine neowa kabuto-butolo kani #26:7 Sakotuꞌuno o kabuto-butolo ini nomaiꞌao ne kontu kapute nekonando pualam. noponoꞌao mina-mina kawondu moꞌaliꞌano sepaliꞌa. Sahatono mina-mina kawondu naꞌa nosungkae ne fotuno Yesus. Wakutuu anaꞌa Yesus tangasano nohumaa. 8Dowoha peda maitu anaguhuꞌino nohehewu lalondo sampe dopugau ambado, “So ae gahaꞌa mina-mina aitu dopokadai-daiane? 9Kapaꞌamo mina-mina aitu noꞌali sepaliꞌa, feꞌemo naembali damasoe maka olino damaꞌandae mie mokae.” 10Tamaka Yesus nopandeꞌaane fekihindo sampe nopugau ambano, “Noafa gahaꞌa hobhine aini fekasabhaaneomu? Ingka anoa ini nohabu metaa ne Idi. 11Mie mokae sadhia dapobhai bhe hintimiu, tamaka Idi ini pae aeate kansuhu bhe hintimiua. 12Hobhine aini nominakiemo wawo mbadhaku ini, somo katokano humato dakumobuhu kanau. 13Amohatokoomu, kotu-kotuꞌu ne amai maka dua so katifoleleꞌano Bhihita Metaa ne kosekaꞌewaꞌae dhunia ini, habuno hobhine ini dasumambilie dua somo kafeꞌulaino.”

Isikadhi modaino Yudas

26:14-16

Mrk 14:10-11; Luk 22:3-6

14Pada anaꞌa seemie maiꞌao ne anaguhuno ompulu hoduano koneaꞌano Yudas Iskariot, nokalamo ne meangkaꞌindo imamu. 15Nopugaumo, “Maꞌa kanauꞌomu ae ane aowaangkoomu Yesus?” Lasao deꞌeapiane tolu fulu woka pera maka dowaꞌane. 16Notandamo ne naꞌa Yudas neꞌondofi katolala metaa so namowaꞌao Yesus ne andoa.

Yesus nopoharoaꞌao Paska bhe anaguhuꞌino

26:17-25

Mrk 14:12-21; Luk 22:7-14, 21-23; Yoh 13:21-30

17Nohatomo oleo katandaꞌano hohaeaꞌano Roti Pata Koragiꞌano. Domaimo anaguhuꞌino dofeena ambado, “Taefotoka ne amai bhahaa gaomua so dapoharoaꞌaoꞌomu Paska?” 18Notobhoosimo Yesus ambano, “Kalaomu we kota maka fohatoomu mie popandeꞌaku, putae ambano guru, ‘Tempoku nomaꞌomo nahumatoa, gaoku apoharoaꞌao Paska bhe anaguhuꞌiku we lambumu.’ ” 19Pada aitu anaguhuꞌino dokalamo doangkafi katuduꞌaono Yesus, defotoka haroano Paska.

20Nohondo oleo Yesus nengkohamo nohumaa nopombali-mbali bhe anaguhuno ompulu hoduano. 21Tangasano dohumaa nopugaumo ambano, “Amohatokoomu, kotu-kotuꞌu seemie ne olotamiu ini namowa kanau ne limando kaewa.” 22Nokompeaha sepaliꞌa lalondo sampe seemie-seemie dofeenamo ambado, “O idi bhahaa Waompu?” 23Ambano Yesus, “Metandano roti weo pihi poowa bhe Idi, anoamo itu so mowa kanau ne limando kaewa. 24Daanumo Anano Manusia - Idimo ini - tetewei namate peda tibuhino weo Kitabino anabii. Tamaka nobalaamo mie so mowano Anano Manusia ne limando kaewa. Mie anaꞌa netaamo koemo nolentea.” 25Yudas so mowano Yesus ne kaewa nofeenamo dua, “O idi bhahaa Guru?” Ambano Yesus, “Pedamo pugaumu itu.”

Haroano Ompu

26:26-29

Mrk 14:22-25; Luk 22:15-20; 1Kor 11:23-25

26Tangasano dohumaa, Yesus nealamo roti maka nefoampe katumpuno lalo ne Lahataꞌala. Roti anaꞌa nobhebhehaemo maka nowaꞌandae anaguhuꞌino bhe nopugau ambano, “Alaeꞌomu maka humaaꞌeomu, mbadhakumo inia.” 27Palusi anaꞌa nealamo dua kampohoꞌuꞌa, nefoampe dua katumpuno lalo ne Lahataꞌala maka nowaꞌandae anaguhuꞌino. Ambano, “Fohoꞌuomu kosasawimiu maiꞌao ne kampohoꞌuꞌa aini. 28Heakumo inia. Heaku ini damotuhue so mie bhahi, somo mekatangkano podhandino Lahataꞌala bhe manusia, somo dua katiꞌamponiꞌano dhosando. 29Amohatokoomu, notanda aitu paemo aohoꞌua angguru ampa oleono aohoꞌu angguru buꞌou, apoowa-owa bhe hintimiu weo Kafopahintaꞌano Amaku.”

Petrus nagumaga miina dapopandeꞌao bhe Yesus

26:30-35

Mrk 14:26-31; Luk 22:31-34; Yoh 13:36-38

30Pada delagu-lagu dopudhi Lahataꞌala, dokalamo te kabhawono Zaitun. 31Nopugaumo Yesus ne anaguhuꞌino ambano, “Alo aini naohungga kaparasaeamiu mbaꞌinomo Idi, sampe humunsa kanauꞌomu. Kapaꞌamo nandoo tibuhino weo Kitabino anabii, ‘Dhagano dhumba amongkoe, gulumano dhumbano datigasa.’ #Zak 13:7 32Tamaka amanu kaowu maiꞌao ne mate amaꞌindulukikoomu we Galilea.” 33Petrus notobhoosimo ambano, “Mahinggamo kosasawindo naohungga kaparasaendo mbaꞌinomo Hintu sampe dahumunsako, o idi paise.” 34Ambano Yesus, “Amohatoko, kotu-kotuꞌu alo aini dua paeꞌo nakumakuhua manu, natolu pakumo gumaga miina mandeꞌa kanau.” 35Ambano dua Petrus, “Mahinggamo amate bhe Hintu, pae sepaliꞌa agumagaa.” Anaguhuꞌino sigaoꞌano sanea dua dopugau peda naꞌa.

Yesus nosambahea te kaendeano Getsemani

26:36-46

Mrk 14:32-42; Luk 22:39-46

36Yesus bhe anaguhuꞌino dohatomo te kaendea koneaꞌano Getsemani. Nofohatomo anaguhuꞌino ambano, “Mengkoha-ngkohaomu ne ini nandoo akumala asumambahea ne tatu.” 37Petrus bhe kohoduaꞌindo anano Zebedeus, nowowoꞌoda. Notandamo ne itu nokompeaha sepaliꞌa lalono bhe nokakenda-kenda handano. 38Nopugau ne anaguhuꞌino totoluno maitu, “Nokompeaha sepaliꞌa laloku, kao-kaomo amatemo. Mengkoha-ngkohaomu ne ini, mekambotoomu bhe kodhagaomu pobhai kanauꞌomu.” 39Yesus nopansuhu seendai te wise maka nolongko ne wite nosambahea ambano, “Ama, ane naembali fogampi kanaꞌe kasabha so netompaloiku itu, #26:39 Sakotuꞌuno: fogampi kanau kampohoꞌuꞌa so kafohoꞌuꞌaku ini. ampamo kaowu koise angkafi kapoindaloku tamaka taꞌampamo kapoindalomu.”

40Pada anaꞌa nosulimo se anaguhuꞌino, gahaꞌa nohatofida doodomo. Nopugaumo ne Petrus ambano, “Pae tumahaomu bhahaa mekambotoomu nasedhamu pobhai kanauꞌomu? 41Mekambotoomu bhe sambaheaꞌomu, keana nokantibhakoomu kasoba. Daanumo totono lalo neangka, tamaka o mbadha nonale.” 42Fendua toha nokala nosambahea ambano, “Ama, ane kasabha aini pae naembali mogampie, tamaka tetewei atumompaloiꞌe, taꞌampamo kapoindalomu so kumadhadhiaꞌano.”

43Nosuli se anaguhuꞌino nohatofida toha doodo mbaꞌinomo dempaumo sepaliꞌa. 44Miinamo nadumiu-diuda, tanokalamo toha nosambahea, kakapono tolu paku. Sambaheano nopototo bhe saꞌituini.

45Pada anaꞌa nosulikimo anaguhuꞌino maka nopugauanda, “Nandoo dua moodoomu bhe mewuleomu bhahaa? Ingka nohatomo tempono Anano Manusia daowae ne limando mie kodhosa. 46Wanumoomu dokalaanaomu! Woha itu, mie so mowa kanau nomaꞌomo.”

Yesus dohakoe

26:47-56

Mrk 14:43-50; Luk 22:47-53; Yoh 18:1-11

47Tangasano Yesus nopugau, nohatomo Yudas, seemie maiꞌaono ne anaguhuno ompulu hoduano. Yudas maitu nohato nopoowa bhe mie bhahi metaguno kampue bhe kawangku. Mie bhahi naꞌa dotududa neangkaꞌindo imamu bhe kamungkulaꞌindo Yahudi. 48Yudas padamo nofohatoanda tanda peda aini, “Mie so newonoku, anoamo itu. Hakomoomu.” 49Yudas lasao nomaꞌoti Yesus bhe nopugau ambano, “Peda ae itua guru?” poowa nowonoe. 50Yesus nofeenamo ambano, “Sabhangka, aituꞌaemo kahatoꞌamu?” Mie bhahi lasao dodhulupi Yesus maka dohakoe.

51Gahaꞌa seemie pobhaiꞌano Yesus nokoalemo limano nobuna kampueno maka notowe bhatuano Imamu Bhalano, nondawu bhe tingalano. 52Ambano Yesus ne mie anaꞌa, “Pusoloe kampuemu itu, kapaꞌamo kotika mepakeno kampue namateꞌao dua kampue. 53Ingka naembali aetondala ne Amaku naetudu malaꞌekati datumulumi kanau, mahingga nakolabhi naompulu haa tagua. 54Taꞌampamo kaowu ane nada naꞌa, ingka pae nakoꞌulaa tibuhiꞌano weo Kitabindo anabii putae tetewei nakumadhadhia peda aini.”

55Pada aitu Yesus nopugau ne mie bhahi ambano, “Kona kanauꞌomu mie modai gahaꞌa sampe metaguomu kampue bhe kawangku maka humako kanauꞌomua? Ingka seꞌo-seꞌoleo aengkoha-ngkoha afofoinaꞌu weo Lambuno Lahataꞌala, tamaka miina humako kanauꞌomu. 56Ampamo kaowu kosasawiꞌae ini nokadhadhia so nokoꞌulaꞌao tibuhiꞌano weo Kitabindo ana-anabii.” Pada aitu kosasawindo anaguhuꞌino dofileimo tadohunsae nomoisa.

Yesus ne wisendo Sahano Agama

26:57-68

Mrk 14:53-65; Luk 22:54-55, 63-71; Yoh 18:12-14, 19-24

57Pada dohakoe, Yesus dowowoꞌoemo te wiseno Imamu Bhalano koneaꞌano Kayafas. Ne itu dohompumo pande-pande Kitabi bhe kamu-kamungkulaꞌi miendo Yahudi. 58Petrus noangka-angkae we kodoꞌono sampe nohato we kadeteno lambuno Imamu Bhalano. Hato nopesua nengkohamo bhe dhumagano, patudhuno naꞌumondo-ondo kapalusiꞌaono kosasawiꞌae maitu. 59Neangkaꞌindo imamu bhe kosasawindo Sahano Agama deꞌondofi tingku pata kumotuꞌu, nomudaꞌao dabhotusi damongko Yesus. 60Tamaka miina daeꞌawaa, mahingga dobhahi sakusii mepaha-pahano. Panda-pandano doehemo dohodua, 61ambado, “Mie aini nopugau namondoiꞌe nahumungga Lambuno Lahataꞌala, maka ne katolu oleono namooliemo dua namoehee.”

62Imamu Bhalano noehemo maka nopugau ne Yesus, ambano, “Pae tumobhoosiea gahaꞌa kasangkatindo ne hintu ini?” 63Tamaka Yesus miina nakodiua. Nopugaumo dua Imamu Bhalano ne Yesus ambano, “Aitu bhe Lahataꞌala foꞌondo-ondono, fohato kainsami, hintumo ini Omputo Fosalamatino Anano Lahataꞌala bhahaꞌi suano!” 64Ambano Yesus, “Ingka pedamo pugaumu itu. Ampamo kaowu amohatoko, notanda aitu mohaomu Anano Manusia naengkoha ne suanano Lahataꞌala kokuasano, mohaeꞌomu namai te wunta-wuntano olu te lani.” #Mzm 110:1; Dan 7:13

65Nofetingke peda naꞌa Imamu Bhalano lasao nopobhensiꞌao pakeano bhe nopugau ambano, “Aitumaka! Mie aini ingka nofekaꞌaebumo Lahataꞌala, nopototoꞌao wutono bhe Lahataꞌala! So dua ae gahaꞌa daeꞌondofi sakusii? Ingka fetingkeemoomu naꞌa. 66Peda amai fekihimiu?” Dotobhoosimo ambado, “Anoa ini nokokaꞌala, tetewei damongkoe!” 67Pada aitu dokapehasi ulano bhe dotumbusie; sigaoꞌano dohambisie, bhe dopugau ambado, 68“Alee Omputo Fosalamatino, soba bhoto, nohambisiko laꞌae itua?”

Petrus nogagaiꞌe miina namandeꞌao Yesus

26:69-75

Mrk 14:66-72; Luk 22:56-62; Yoh 18:15-18, 25-27

69Tangasano Petrus nengkoha-ngkoha we kadete, nomaimo seemie bhatua hobhine ambano, “Ingka hintu ini dua sadhia pobhai bhe Yesus, mieno Galilea maitu.” 70Tamaka Petrus nogaga ne wisendo kosasawindo maitu ambano, “Miina amandeꞌaanea maꞌanano pugaumu naꞌa.” 71Hato nokala se fointono kadete, nowohaemo dua bhatua hobhine sigaoꞌano. Bhatua naꞌa nopugaumo ne mie meehe-eheno ne itu ambano, “Mie aini nopobhai bhe Yesus miendo Nasaret maitu.” 72Petrus nopugaumo toha bhe nofemata, “Mie amaitu miina amandeꞌaanea.” 73Miina naompona domaimo dua mie meehe-eheno ne itu dopugau ne Petrus, ambado, “Teteweimo hintu ini seemie dua sabhangkaꞌindo, notipandeꞌao ne wambamu.” 74Petrus nofemata bhe nobhatataꞌiao wutono, “Miina amandeꞌaanea mie anaꞌa!” Gahaꞌa nopobutu nokakuhuamo manu. 75Petrus nofeꞌulaimo pugauno Yesus, “Paeꞌo nakumakuhua manua, natolu pakumo gumaga miina mandeꞌa kanau.” Pada anaꞌa nolimbamo bhe noꞌae, nokompeaha sepaliꞌa lalono.

Currently Selected:

Matius 26: mnbSD

Highlight

Copy