Markus 1

Yohanes Fokadiuno

1:1-8

Mat 3:1-6, 11-12; Luk 3:3-6, 15-17; Yoh 1:19-28

1Ainimo Bhihita Metaa metula-tulaꞌaono Yesus Kristus, Anano Lahataꞌala. 2Kafetompunaꞌino Bhihita Metaa ini peda tibuhino weo Kitabino anabii Yesaya peda aini,

“⸤ Ambano Lahataꞌala⸥ ‘Anoamo ini katuduku,

atudue namaꞌinduluangko, naebhongkaangko kaangkaꞌa.’

3Nandoo suaha mekei-keino we pandaso bhalano ambano,

‘Mebhongkaomu kaangkaꞌa so Ompu;

fekalaaꞌeomu so kaangkaꞌano.’ ” #Mal 3:1; Yes 40:3

4Pedamo tibuhino naꞌa Yohanes Fokadiuno notiumba we pandaso bhalano bhe nopugau ambano, “Fetompaꞌao dhosamiu, doliomu ne Lahataꞌala bhe mefekadiuꞌomu maka Lahataꞌala naꞌumamponikoomu.” 5Pada aitu kosekadieꞌae Yudea bhe miendo kotano Yerusalem dosipumpumo dokala we Yohanes. Detula-tulamo doꞌakui dhosando maka nokadiuda Yohanes we umeleno Yordan.

6Pakeano Yohanes ini wuluno unta, kagegeno o kuli. #1:6 Pakeano Yohanes nopototo bhe pakeano anabii Elia; 2Raj 1:8 Nehumaano o kapunda bhe golano kainiua. 7Nefolele bhihita peda aini, “Namada idi nahumato seemie moliu kanau kuasa; alumongko alumense katapuno kaampini ne aꞌeno paise amantasia. 8O idi akadiuangkoomu oe, tamaka ane nahumato Anoa nakumadiuangkoomu Rohino Lahataꞌala.”

Yohanes nokadiu Yesus

1:9-11

Mat 3:13-17; Luk 3:21-22; Yoh 1:32-34

9Wakutuu aitu nohatomo Yesus nomaiꞌao we liwuno Nasaret, we kadieno Galilea, maka nokadiuꞌe Yohanes we umeleno Yordan. 10Safonino nomaiꞌao weo umele, Yesus nowohamo lani nomoengka, maka Rohino Lahataꞌala nosampu te potalaꞌano nokatu futeꞌo. 11Notifetingkemo dua suaha nomaiꞌao te lani ambano, “Hintumo Anaku timoasiꞌaono, Hintumo mekaꞌiano laloku.”

Yesus nosobae Kafeompuꞌando seetani we pandaso bhalano

1:12-13

Mat 4:1-11; Luk 4:1-13

12Pada aitu Yesus lasao nofokalae Rohino Lahataꞌala we pandaso bhalano. 13Fato fuluꞌa kaomponano neate we pandaso bhalano naꞌa bhe nosobae Kafeompuꞌando seetani. Anoa neate ne naꞌa nopobhai bhe sabhaha kadadi fohumaano, tamaka dodambaꞌaane malaꞌekati.

Yesus noumba we Galilea

1:14-15

Mat 4:12-17; Luk 4:14-15

14Notitohongku kaowu Yohanes, Yesus nokalamo we Galilea. Nefolele Bhihita Metaa maiꞌaono ne Lahataꞌala. 15Ambano, “Nohatomo tempono, nomaꞌomo Kafopahintaꞌano Lahataꞌala. Fetompaꞌao dhosamiu, doliomu ne Lahataꞌala bhe parasaeaꞌomu ne Bhihita Metaa!”

Pakatandano Yesus nesaliꞌi anaguhuno

1:16-20

Mat 4:18-22; Luk 5:1-11

16Tangasano Yesus nekala-kala nosohaki wiwino teꞌino Galilea, gahaꞌa nowohamo Simon bhe Andreas kakutaꞌano. Andoa maitu tangasano debuani mbaꞌinomo andoa ini pande kenta. 17Yesus nosaliꞌidamo ambano, “Maimoomu angkafi kanauꞌomu, amoguhukoomu so mebuanino manusia.” 18Andoa maitu lasao dohunsa buanindo maka doangkafi Yesus.

19Miinaꞌo nakodoꞌo nokala, Yesus nowohamo dua Yakobus bhe Yohanes anaꞌino Zebedeus tangasano dofekataaꞌi pukando weo bhangka. 20Yesus lasao nosaliꞌida dua. Kohoduando tadohunsamo amando Zebedeus bhe mie gumadhino weo bhangka maka doangkafie.

Yesus nofolimba seetani weo lambu kasambaheaꞌa we Kapernaum

1:21-28

Luk 4:31-37

21Yesus bhe mie mangkafie dohatomo we liwuno Kapernaum. Sahatono oleono Sabat, Yesus lasao nopesua weo lambu kasambaheaꞌa maka nofofoinaꞌu. 22Mie metingkeno kafoinaꞌuno domente sepaliꞌa, mbaꞌinomo nofoinaꞌuda peda seemie kokuasano, nopoꞌala bhe pande-pande Kitabi.

23Gahaꞌa weo lambu kasambaheaꞌa naꞌa tanonandoomo dua seemie nepesuakino seetani. O mie aitu nokeimo ambano, 24“O Yesus miendo Nasaret, o ae patudhumu ne insaodi ini? Mai mobinasa kainsami gahaꞌa? Apandeꞌaangko, Hintu itu mie mongkilono katuduno Lahataꞌala.” 25Tamaka Yesus nohandapi seetani maitu ambano, “Koise mohobhoa, limbaꞌo toha maiꞌao ne mie aini!” 26Seetani nogegohao mie aitu maka nolimba bhe nopokakei-kei. 27Kosasawindo mie nopuli mentendo, sampe dopofee-feena ambado, “O ae gahaꞌa inia? Seꞌise kafoinaꞌu buꞌou. Pugauno noponoꞌao kuasa. Mahingga o seetani deangka ne pahintano.” 28Pada aitu bhihitano ini nehimba sepaliꞌa nolele ne kosekaꞌewaꞌae kadieno Galilea.

Yesus nofekaꞌosa ponia hobhineno Simon bhe mie sigaoꞌano dua

1:29-34

Mat 8:14-17; Luk 4:38-41

29Salimbando domaiꞌao ne lambu kasambaheaꞌa, Yesus, Yakobus bhe Yohanes dokala se lambudo Simon bhe Andreas. 30Ponia hobhineno Simon nandoo nendole-ndole mbaꞌinomo nosodoe. Sapesuano weo lambu, Yesus lasao dofohatoane sakino kamungkula amaitu. 31Yesus nokalamo se kaodoꞌano, nointahamo limano maka nofowanue. Gahaꞌa sodono tanosipadaꞌamo. Hobhine aitu lasao netaganaanda daomaa.

32Kamaꞌoleomo dua anaꞌa, nosoo kaowu oleo, dehatoanemo mie mosakino bhe mie nepesuakino seetani weo liwu. 33Dadiꞌanomo mieno liwu dowolo dofoꞌonu wutondo ne wiseno fointo. 34Alo amaitu dobhahi sepaliꞌa mie meepesino sabhaha saki nefekaꞌosano, dobhahi dua seetani nefolimbano. Seetani andoa naꞌa miina namotolalada dopugau, mbaꞌinomo andoa dopandeꞌaane laꞌae Yesus maitu.

Yesus nofofoinaꞌu we liwu sigaoꞌano

1:35-39

Luk 4:42-44

35Sanimentae sepaliꞌa, nandoo nohohondo, Yesus nowanumo maka nolimba we simbalino liwu. Nokalamo nosambahea te molinoꞌano. 36Gahaꞌa Simon bhe sabhangkaꞌino dokalamo doꞌondofie. 37Hato dopoꞌawaane dopugaumo ambado, “Guru! Kosasawindo mie doꞌondofiko.”

38Yesus tanotobhoosida ambano, “Dopansuhuanaomu we liwu sigaoꞌano ne owano ini, neanomo aefolele dua Bhihita Metaa ne watu, kapaꞌamo aituꞌaemo patudhuno kahatoꞌaku.”

39Pada aitu Yesus nolilimo we kadieno Galilea, nefolele Bhihita Metaa weo lambu-lambu kasambaheaꞌando bhe nefolimba seetani.

Yesus nefekaꞌosa kokuli modaino

1:40-45

Mat 8:1-14; Luk 5:12-16

40Nandoo seemie kokuli modaino nomai notaohao sombano ne wiseno Yesus. Mie aitu nefetulumi ambano, “Ane umunda, tetewei naembali mekaꞌosa kanau.”

41Hampano nobhela lalono, Yesus nofonsoho limano maka nofedampae bhe nopugau, “O Idi aꞌunda, moꞌosaꞌo toha.” 42Ne olotano namu-namu tanosimoꞌuhiꞌamo kuli modaino, uluno nonggelamo. 43Mie aitu lasao notudue nakumala bhe nofodhagae ambano, 44“Tandaiꞌe fekataa-taa, koise mekapu-kapunaa ne laꞌae-laꞌaemoa, ampamo kaowu, kalamo fotiwoha wutomu ne imamu. Namada anaꞌa, kapaꞌamo moꞌosamo, kalamo meowa dua kapopanga so Lahataꞌala peda neowiliꞌaono anabii Musa, so netandaindo mie bhahi putae hintu moꞌosamo.” #Im 14:1-32

45Tamaka mie aitu nolili netula-tulaꞌao kadhadhia amaitu, sampe Yesus miinamo naembali namesua weo liwu ane dowohae mie bhahi. Yesus taneatemo we molinoꞌano. Tamaka mie bhahi maiꞌaono ne sabhaha liwu sadhia domaiꞌie dua.

Currently Selected:

Markus 1: mnbSD

Highlight

Copy