Markus 14

Dopokanagau so damongkoꞌao Yesus

14:1-2

Mat 26:1-15; Luk 22:1-2; Yoh 11:45-53

1Hohaeaꞌano Paska bhe hohaeaꞌano Roti Pata Koragiꞌano tana haa oleo. Neangkaꞌindo imamu bhe pande-pande Kitabi dopokanagau deꞌondofi akala dahumako Yesus. Tamaka patudhundo pae damandeꞌaane mie bhahia, maka damongkoe. 2Dadiꞌanomo ambado, “Koise dohakoeꞌomu ne oleono hohaeaꞌa, bhahaa dohialele raꞌeati.”

Yesus nominakie seemie hobhine

14:3-9

Mat 26:6-13; Yoh 12:1-8

3Wakutuu anaꞌa Yesus tangasano nohumaa we lambuno Simon kokuli modaino ⸤ endefiꞌini⸥ , we liwuno Betania. Gahaꞌa tanosihatoꞌamo seemie hobhine. Hobhine anaꞌa newowoꞌo seewua butolo kani #14:3 Sakotuꞌuno o kabuto-butolo ini nomaiꞌao ne kontu kapute nekonando pualam. noponoꞌao mina-mina mowonduꞌano sepaliꞌa pakade noꞌali, dokonae minano warasituu. Wuꞌuno butolo naꞌa nokebhae, maka mina-minano nosungkae te fotuno Yesus. 4Mie mohae nandoo umamahano, maka dopugau sapada-pada andoa ambado, “So ae gahaꞌa dopokadai-daianea mina-mina amaitu? 5Ane damasoe, ingka nakolabhi tolu moꞌono woka pera, maka olino naꞌa naembali dadumawu-dawuandae mie mokae.” Dadiꞌanomo doꞌamahakimo hobhine anaꞌa.

6Tamaka Yesus nopugaumo ambano, “Hunsaꞌanomo! Noafa gahaꞌa fekasabhaaneomu? Anoa ini nehabu kanau giu metaaꞌano. 7Ingka o mie mokae sadhia deate bhe hintimiu, ane moindaloomu sadhia naembali tumulumidaomua. Tamaka Idi ini pae aeate kansuhua bhe hintimiu. 8Hobhine aini nehabumo ampa nepoo-poolino. Mbadhaku ini nominakiemo wawo, somo katokano humato dakumobuhu kanau. 9Amohatokoomu! Kotu-kotuꞌu ne amai maka dua so katifoleleꞌano Bhihita Metaa te dhunia ini, nehabuno hobhine aini sadhia daetula-tulaane dua, somo kafeꞌulaino.”

Isikadhi modaino Yudas

14:10-11

Mat 26:14-16; Luk 22:3-6

10Pada aitu Yudas Iskariot nokalamo nopoꞌawaꞌao neangkaꞌindo imamu, patudhuno namowaanda Yesus. Yudas ini seemie maiꞌao ne anaguhuno ompulu hoduano. 11Kaꞌiando maka neangkaꞌindo imamu dofetingke peda naꞌa, lasao dopodhandi damaꞌane dhoi. Notanda ne naꞌa, Yudas neꞌondofi katolala metaa namowaanda Yesus.

Haroano Paska

14:12-21

Mat 26:17-25; Luk 22:7-14, 21-23; Yoh 13:21-30

12Nohatomo oleo katandaꞌano hohaeaꞌa Roti Pata Koragiꞌano. Ne oleo anaꞌa kaneando miendo Yahudi desumbele dhumba Paska. Dadiꞌanomo anaguhuꞌino Yesus dofeenamo ambado, “Guru, ne amai bhahaa gaomua taefotoka so dapoharoaꞌao Paska?” 13Maka Yesus netudu dohodua anaguhuno, ambano “Kalaomu we kota, ne watu poꞌawaꞌaoꞌomu seemie bhe kasodano kaiꞌino. Angkafieꞌomu! 14Namesua kaowu ne lambu, pugauꞌomu ne kolambuno putae, ‘O guru nofeenaꞌao bhahaꞌi boloku amai so napoharoaꞌao Paska bhe anaguhuꞌino?’ 15Anoa namosusuangkoomu boloku bhalano te wawo. Boloku anaꞌa nosangkamo katokanoa. Fotokaemoomu ne itu haroano Paskantoomu!”

16Anaguhuno hoduano maitu dokalamo. Dohato we kota dopoꞌawaꞌaomo peda pugauno Yesus saꞌituini. Lasao defotoka haroano Paska. 17Nohondo oleo, Yesus nohatomo bhe anaguhuꞌino ompulu hoduano. 18Tangasano dengkoha-ngkoha dohumaa, Yesus nopugaumo ambano, “Amohatokoomu! Naseemie ne olotamiu momaano bhe Idi ini, namowa kanau ne limando kaewa.”

19Dofetingke pugauno naꞌa, dosabhamo maka see-seemie dofeenaemo, “O idi bhahaa?” 20Tanotobhoosida ambano, “O mie anaꞌa seemie ne olotamiu ompulu hoduano ini. Metandano roti weo pihi poowa bhe Idi, anoamo itu. 21Daanumo Anano Manusia - Idimo ini - tetewei namate peda tibuhino weo Kitabino anabii, tamaka so mowa kanau ne kaewa maitu natolau kadaino kolauno. Naetaa koemo nolentea te dhunia ini.”

Haroano Ompu

14:22-25

Mat 26:26-29; Luk 22:15-20; 1Kor 11:23-25

22Tangasano dohumaa maitu, Yesus nealamo roti maka nefoampe katumpuno lalo ne Lahataꞌala. Pada aitu roti naꞌa nokekebhaemo maka nowaꞌandae anaguhuꞌino poowa nopugau, “Alaeꞌomu maka humaaꞌeomu, mbadhakumo inia.”

23Pada anaꞌa nealamo kampohoꞌuꞌa, nefoampe toha katumpuno lalo maka nowaꞌandae anaguhuꞌino. Kosasawindo dofohoꞌu angguru ne kampohoꞌuꞌa aitu. 24Yesus nopugaumo toha ambano, “Heakumo inia. Hea aini damotuhue so mie bhahi, somo mekatangkano podhandino Lahataꞌala bhe manusia. 25Amohatokoomu! Kotu-kotuꞌu paemo aohoꞌu angguru ampa oleono aohoꞌu angguru buꞌou, weo Kafopahintaꞌano Lahataꞌala.”

Petrus nagumaga miina namandeꞌao Yesus

14:26-31

Mat 26:30-35; Luk 22:31-34; Yoh 13:36-38

26Pada delagu-lagu dopudhi Lahataꞌala, dokalamo te kabhawono Zaitun. 27Yesus nofohatodamo ambano, “Kosasawimiu itu naohungga kaparasaeamiua sampe humunsa kanauꞌomu, kapaꞌamo nandoo tibuhino weo Kitabino anabii peda aini, ‘Dhagano dhumba amongkoe, maka gulumano dhumbano datigasa.’ #Zak 13:7 28Tamaka amanu kaowu maiꞌao ne mate, amaꞌindulukikoomu we Galilea.”

29Ambano Petrus, “Mahingga kosasawindo ini naohungga kaparasaeandoa sampe dahumunsako, tamaka o idi paise.”

30Tamaka Yesus nofohatoe ambano, “Amohatoko! Kotu-kotuꞌu alo aini dua, paeꞌo nahaa paku nakumakuhua manu, natolu pakumo gumaga miina mandeꞌa kanaua.”

31Sedhuluꞌa dua kakampuu-mpuuno lalono Petrus nopugau, “Mahingga amate bhe hintu, pae sepaliꞌa agumagaa.” Anaguhuꞌino sigaoꞌano sanea dua dopugau peda naꞌa.

Yesus nosambahea te kaendeano Getsemani

14:32-42

Mat 26:36-46; Luk 22:39-46

32Yesus bhe anaguhuꞌino dohatomo te kaendea koneaꞌaono Getsemani. Nofohatomo anaguhuꞌino ambano, “Mengkoha-ngkohaomu ne ini, nandoo akumala asumambahea.” 33Petrus, Yakobus bhe Yohanes nosaliꞌida damangkafie. Notandamo ne itu nosabha sepaliꞌa bhe nokakenda-kenda handano. 34Ambano, “Nokompeaha sepaliꞌa laloku, kao-kaomo amatemo. Mengkoha-ngkohaomu ne ini, mekambotoomu bhe kodhagaomu!” 35Yesus nopansuhu te wise seendai maka nolongko ne wite bhe nosambahea. Nesalo ane naembali tempono kakadee-dee amaitu tanalumaloiꞌe. 36Ambano, “O Aba, #14:36 Aba maitu wamba Ibrani; maꞌanano “ama”. Amaku, sanea membaliꞌano so Hintu. Fogampi kanau kampohoꞌuꞌa so kafohoꞌuꞌaku ini. Ampamo kaowu koise angkafi kapoindalokua, tamaka taꞌampamo kapoindalomu.”

37Pada anaꞌa nosulimo se anaguhuꞌino, gahaꞌa nohatofida doodomo. Nopugaumo ne Petrus ambano, “Simon, moodo gahaꞌa? Pae tumahamiea bhahaa mekamboto nasedhamua? 38Mekambotoomu bhe sambaheaꞌomu, keana nokantibhakoomu kasoba. Daanumo totono lalo neangka, tamaka o mbadha nonale.”

39Nofendua nokala maka nosambahea toha, nopototo bhe sambaheano saꞌituini. 40Hato nosuli gahaꞌa nohafotida doodomo toha, hampano dempaumo sepaliꞌa. Miinamo damandeꞌaanea damugauꞌao ae ne Yesus. 41Tolu paku kaowu nosulikida, nopugaumo ambano, “Moodomoomu bhe fewulemoomu. Netaamo! Nohatomo tempono. Anano Manusia - Idimo ini - damowaemo ne limando mie kodhosa. 42Ehemoomu, dokalaanaomu. O mie mowa kanau ne limando kaewa nomaꞌomo nahumato.”

Yesus dohakoe

14:43-52

Mat 26:47-56; Luk 22:47-53; Yoh 18:1-11

43Tangasano Yesus nopugau, nohatomo Yudas, seemie maiꞌaono ne anaguhuno ompulu hoduano. Yudas maitu nohato nopoowa bhe mie bhahi metaguno kampue bhe kawangku. Mie bhahi naꞌa dotududa neangkaꞌindo imamu, pande-pande Kitabi bhe kamungkulaꞌi. 44Yudas padamo nofohatoanda tanda peda aini, “O mie so newonoku, anoamo itu. Hakomoomu, wowoꞌoeꞌomu tamaka fekataa dhaganieꞌomua.”

45Sahatono, Yudas nomaꞌotimo Yesus bhe nopugau ambano, “Guru!”, poowa nowonoe. 46Mie bhahi lasao dointaha Yesus maka dotapue. 47Nandoo seemie ⸤ anaguhuno⸥ nobuna kampueno maka notowe bhatuano Imamu Bhalano, nondawu bhe tingalano. 48Yesus nofeenadamo ambano, “Kona kanauꞌomu mie modai gahaꞌa? Noafa gahaꞌa tabeano metaguomu kampue bhe kawangku maka humako kanauꞌomu? 49Ingka seꞌo-seꞌoleo afofoinaꞌu weo Lambuno Lahataꞌala ne wisemiu, tamaka miina humako kanauꞌomu. Kapedaꞌano naꞌa somo nakoꞌulaꞌao tibuhino weo Kitabino anabii.” 50Pada aitu anaguhuꞌino dopuli dofilei, dohunsae tanomoisa.

51Nandoo dua seemie anaꞌi moꞌane noangkafi Yesus. Pakeano tanewaweꞌimo setuwu kamoohu. Patudhundo anoa ini dahumakoe dua. 52Gahaꞌa tanofosipuli pakeano naꞌa maka nofilei kalembi-lembi.

Yesus ne wiseno Sahano Agama

14:53-56

Mat 26:57-68; Luk 22:54-55, 63-71; Yoh 18:12-14, 19-24

53Pada anaꞌa Yesus doowaemo we lambuno Imamu Bhalano. Kosasawindo neangkaꞌindo imamu, kamungkulaꞌi bhe pande-pande Kitabi dohompu ne itu. 54Petrus noangka-angka ngkodoꞌo Yesus, ampa nopesua weo kadeteno lambuno Imamu Bhalano. Ne itu nengkoha-ngkoha bhe dhumagano poowa nehana. 55Neangkaꞌindo imamu bhe kosasawindo Sahano Agama deꞌondofi sakusii so sumangkatie, nomudaꞌao dabhotusie damongkoe, tamaka miina daeꞌawaa. 56Dobhahi mie depaha-paha dosangkatie, tamaka pugaundo miina napokanti-kantibhaa.

57Pada anaꞌa doehemo dua seemie hodua maka depaha-paha dosangkatie ambado, 58“Insaodi padamo tafetingkee nopugau, ‘Ahumunggae lambuno Lahataꞌala kahabuꞌando manusia ini, maka natolu oleo aefoehemo sigaoꞌano, suano kahabuꞌando manusia.’ ” 59Mahinggamo peda naꞌa pugaundo daa-daaꞌe miina napokanti-kantibhaa.

60Nopalusi anaꞌa noehemo Imamu Bhalano ne wunta-wuntando, maka nofeena Yesus ambano, “Pae tumobhoosiea gahaꞌa kasangkatindo ne hintu ini?”

61Tamaka Yesus miina nakodiua, miina sepaliꞌa natumobhoosia. Imamu Bhalano maitu nofendua nofeenae ambano, “Nokotuꞌu hintumo ini Mesias, anano Lahataꞌala tipudhino?” 62“Anoamo,” ambano Yesus, “maka mada kaowu, mohaomu Anano Manusia - Idimo ini - naengkoha ne suanano Lahataꞌala kokuasano, mohaeꞌomu dua namai te wunta-wuntano olu te lani.” #Mzm 110:1; Dan 7:13

63Imamu Bhalano lasao nopobhensiꞌao pakeano bhe nopugau, “So dua ae deꞌondofiꞌao sakusii gahaꞌa? 64Ingka dofetingkeemoomu nopototoꞌao wutono bhe Lahataꞌala. Peda amai fekihimiu?” Maka kosasawindo dosesuahamo, dobhotusiemo tetewei damongkoe.

65Pada aitu sigaꞌa dokapehasiemo, dodampu matano maka dotumbusie poowa dofeenae ambado, “O anabii, soba bhoto notumbuko laꞌae!” Sampe mie dhumagano detofalimo dua.

Petrus nogagaiꞌe miina namandeꞌao Yesus

14:66-72

Mat 26:69-75; Luk 22:56-62; Yoh 18:15-18, 25-27

66Tangasano Petrus nengkoha-ngkoha ne kadete, nomaimo seemie hobhine bhatuano Imamu Bhalano. 67Sanowoha Petrus nehana, nofoti-fotindamo ulano maka nofeenae ambano, “Ingka hintu ini sadhia pobhai bhe Yesus, miendo Nasaret maitu?”

68Tamaka Petrus nogaga ambano, “Miina amandeꞌaanea, miina alumosangiea pugaumu naꞌaa.” Pada aitu nogampimo se fointono kadete. [Nopobutu nokakuhua manu.]

69Nowohae toha ne itu, o bhatua hobhine saꞌitu nopugaumo ne mie meehe-eheno ne itu, “Mie aini seemie dua sabhangkando.” 70Tamaka Petrus nogaga toha. Miina naomponaa mie ne itu dopugaumo, ambado, “Nokotuꞌu hintu ini sabhangkaꞌindomo, kapaꞌamo hintu ini mieno Galilea.” 71Petrus nofemata bhe nobhatataꞌiao wutono ambano “Kotu-kotuꞌu miina sepaliꞌa amandeꞌaanea mie nesambi-sambilimiu itua!” 72Gahaꞌa nopobutu nokakuhua toha manu. Petrus lasao nofeꞌulai pugauno Yesus ne anoa, “Paeꞌo nahaa paku nakumakuhua manu, natolu pakumo gumaga miina mandeꞌa kanaua.” Maka noꞌae, tanokansodu-nsodumo.

Currently Selected:

Markus 14: mnbSD

Highlight

Copy