Markus 4

Kapalendano meꞌewino wine

4:1-9

Mat 13:1-9; Luk 8:4-8

1Yesus nofofoinaꞌu toha we wiwino teꞌino Galilea. Dobhahi sepaliꞌa humatono dolibu-libue. Dadiꞌanomo, nosawimo ne seꞌonu bhangka ⸤ melanto-lantono ne itu⸥ maka nengkoha, tamaka mie bhahi deehe-ehe te wite. 2Nobhahi kafoinaꞌuno nepakeanda kapalenda. Ambano peda aini.

3“Soba fetingkeomu! Nandoo seemie mekaampono nokala neꞌewi wine. 4Tangasano neꞌewi, nandoo wine mondawuꞌano ne kaangkaꞌa. Gahaꞌa dohatomo kaꞌuhi lumola, dopadae dohumaaꞌe. 5Nandoo dua mondawuꞌano ne kamoꞌali, witeno miina naokapaa. Wine aitu nopikitumbu, mbaꞌinomo nonifi witeno. 6Tamaka hato nopana oleo, tumbuno noleleumo, lasao nomate, kapaꞌamo pahakano miina nakumamaa. 7Nandoo dua wine mondawuꞌano weo kahoku kokihi. Kahoku kokihi aitu nodhulu kabhala maka noꞌontiꞌi kantisa anaꞌa sampe miina nakobhakea, tanomate. 8Tamaka nandoo dua mondawuꞌano ne wite menowu. Nokesa endeno, maka hasilino nobhahi sepaliꞌa. Nandoo tolu fulu onuno sewili, nandoo nomo fulu, nandoo dua moꞌono onu.”

9Ambano toha, “Ane dokotingala, beano dametingke.”

Tingkuno Yesus nepake kapalenda

4:10-12

Mat 13:10-17; Luk 8:9-10

10Tangasano Yesus tanomoisa, domaimo mie mangkafie bhe anaguhuꞌino ompulu hoduano, dofeenaꞌao maꞌanano kapalenda saꞌituini. 11Yesus notobhoosida ambano, “Hintimiu nowaꞌangkoomu dawua Lahataꞌala pandeꞌaanemoomu rahasiano Kafopahintaꞌano. Tamaka mie sigaoꞌano aepakeanda kapalenda, 12neanomo

‘mahingga daꞌumondo-ondoe, paise damohae;

mahingga dametingke paise dalumosangiea.

Kanandooꞌano peda anaꞌa keana dodoli ne Lahataꞌala,

keana dua noꞌamponida.’ ” #Yes 6:9-10

Maꞌanano kapalenda meꞌewino wine

4:13-20

Mat 13:18-23; Luk 8:11-15

13Yesus nopugaumo toha, “Miinaꞌo mandeꞌaaneomua gahaꞌa maꞌanano kapalenda saꞌituinia? Ane peda anaꞌa, nada amai gahaꞌa melosangiomu kapalenda sigaoꞌano? 14Meꞌewino wine naꞌa, maꞌanano o mie mefoleleno bhoasaono Lahataꞌala. 15O wine mondawuꞌano ne kaangkaꞌa, maꞌanano mie metingkeno bhoasaono Lahataꞌala maitu. Tamaka kaneꞌo pada dofetingkee, nomaimo Kafeompuꞌando seetani, lasao noala bhoasao kaneꞌo neꞌewi weo totono lalondo maitu. 16Wine mondawuꞌano ne kamoꞌali, maꞌanano mie metingkeno bhoasaono Lahataꞌala, lasao dotahimae bhe doꞌiaꞌane. 17Ampamo kaowu bhoasao aitu miina nakopahakaa weo totono lalondo, sampe miina natumahaa. Sadeꞌawa kasabha bhahaꞌi kakadee-dee mbaꞌinomo doangkafi bhoasao aitu, lasao dohunsae kaparasaeando. 18Wine mondawuꞌano weo kahoku kokihi, maꞌanano mie metingkeno bhoasaono Lahataꞌala. 19Tamaka nobhahi dofekihi so kadadiꞌando, nobhohe-bhoheꞌida dua kahangkaeano dhunia, pakade nobhahi kapoindalondo sigaoꞌano. Kosasawiꞌae maitu nopesua weo totono lalondo, noꞌontiꞌi bhoasaono Lahataꞌala, sampe miina nakohasilia. 20Maka o wine mondawuꞌano ne wite menowu, maꞌanano mie metingkeno bhoasaono Lahataꞌala bhe dotahimae weo totono lalondo, sampe nokohasili. Nandoo tolu fulu, nandoo nomo fulu, sampe nandoo dua moꞌono lentuꞌa hasilino.”

Kapalendano kantalea

4:21-25

Luk 8:16-18

21Pada anaꞌa Yesus nofeenamo ambano, “Pada wohaomu bhahaa mesulano kantalea maka dosongkowiane kaiꞌi bhahaꞌi dohunsae we pandano kaodoꞌa? Ingka o kantalea tetewei dohunsae te melangkeꞌano. 22Kapaꞌamo kosasawiꞌae tifebuniꞌano sanea damotiumbae; sabhaha rahasia damekantaleaꞌie. 23Dadiꞌanomo, ane dokotingala, beano dametingke.”

24Yesus notudumi toha pugauno ambano, “Tandaiꞌeomu nefetingkemiu ini! Ampa kawaꞌaoꞌamu ne mie bhaimu, aitu dua so neꞌawamu maiꞌao ne Lahataꞌala, tadua natumubhahiangkomo. 25Kapaꞌamo mie kokanandoono datumubhahiane, tamaka pata kokanandoono, o ae maka dua kanandoono damalae.”

Kapalendano tumbuno wine

4:26-29

26Ambano toha Yesus, “Kafopahintaꞌano Lahataꞌala naembali dapototoane bhe mie meꞌewino wine te kaampono. 27Nohondo oleo giagi tanoodomo, nomentaea tanowanumo. O wine neꞌewino maitu tanodhampakamo, maka tanodhulu-dhulumo kabhala. Peda ae noꞌende miina namandeꞌaane. 28O kantisa tanotumbuꞌaomo wutono maiꞌao ne wite; kabhao-bhaono laano, pada naꞌa kunsalono maka onuno. 29Pada aitu nokuni kaowu, dotobheemo mbaꞌinomo nohatomo metobheꞌa.”

Kapalendano onuno sau wonoita

4:30-34

Mat 13:31-35; Luk 13:18-19

30Yesus nopugaumo toha ambano, “Kafopahintaꞌano Lahataꞌala maitu dapototoane bhe ae bhahaa? Damalendaane ae bhahaa so metaaꞌanoa? 31Kafopahintaꞌano Lahataꞌala tapedamo onuno sau wonoita seꞌonu #4:31 Sakotuꞌuno: onuno sawi. nehoo ne wite. Onuno wonoita ini wine foliunomo kahobu ne dhunia ini. 32Tamaka ane dohooꞌe, noꞌende nembali kantisa foliuno kabhala. Kabhalaꞌino haꞌano, sampe kaoluno nembali dofekaufeane kaꞌuhi lumola.”

33Nobhahi kapalenda medando saꞌituini nepakeno Yesus weo kafoinaꞌuno, ampa hatoꞌano fekihindo mie bhahi. 34Dadiꞌanomo ane nefoinaꞌu mie bhahi, sadhia nepalendaanda. Tamaka ane tanomoisa bhe anaguhuꞌino, kosasawiꞌae nofohatoandae bhe maꞌanano.

Yesus nefoonto kawea moꞌosa

4:35-41

Mat 8:23-27; Luk 8:22-25

35Ne oleo anaꞌa, nepanda kaowu oleo, Yesus nopugaumo ne anaguhuꞌino, “Maimo dopolimbaanaomu we sewetano.”

36Dadiꞌanomo anaguhuꞌino dohunsamo mie bhahi te wite, dosawimo ne bhangka kaengkoha-ngkohaꞌano Yesus saꞌituini, maka dobhose. Nandoo dua bhangka sigaoꞌano mangkafida. 37Miina naomponaa dobhose, gahaꞌa nomaimo kawea moꞌosa. Bhangkando nohambi-hambitaanemo ewo, sampe noiꞌi, nomaꞌo naopono. 38Yesus nandoo noodo we wana, nepake kanduula. Anaguhuꞌino dofowanue ambado, “Guru, nada amai inia? Pae moheruane gahaꞌa dabinasaa?” 39Yesus nowanumo, maka nowambaki kawea maitu bhe nopugau ne oeno teꞌi, “Koe mohobhoa! Feontoꞌo toha!” Kawea lasao nofeonto, oeno teꞌi suli nolinto. 40Pada aitu nopugaumo ne anaguhuꞌino, “Noafa moteꞌiꞌaoꞌomu? Miinaꞌo marasaea kanauꞌomu gahaꞌa?”

41Maka andoa doteꞌi sepaliꞌa bhe dopugau sapada-pada andoa ambado “Laꞌae bhahaa anoa ini? Mahingga o kawea bhe teꞌi doangkafi pahintano!”

Currently Selected:

Markus 4: mnbSD

Highlight

Copy