Mateo 14

Juan Bautista jukaharã vekua

1Hokava arape Herode, mburuvisharã ẽẽshu 4 tenta'õre, kuaretare heiva hendu jyve mbaivara Jesús japo. 2Hãrã jokuereare heishu: Hoka kuimbai rãnga Juan Bautista, manovare pãũvi pũãjy vekua, hãrã ĩmere mbaikatu, japo verã mbaikavi heshaha verã. 3Herode rãnga pysykashu Juan hãrã mbyperesoka shara Herode omendahe Herodia, tyvy Felipe hyrekorãrerã. 4Hãrã Juan heishu Herodes: Katuã rãnga Herodia ndyrekõrãryre. 5Herodes pota jukareshu Juan. Tẽvã kuaretare kyjeshirãmimba japõã, shara haire heihe Juan haiva Tũpa ĩñee mbeu'ia. 6Herode ñy'ãño mbotyrã mby'aretemba, hãrã Herodia memby kuña vãhe jyroky verã Herode hareka opaite haipe'õre hỹnonde. Hãma Herode pya ohoitehe ko kuñatãĩ jyrokyva rãĩmi, 7hãrã Herodes ĩñee meẽshu, opa mbai meẽshu verã hai jurureshua. 8Kuñatãĩ ishy mboihe jurureshu verã Juan ñakãkue, verushu verã pente yape. 9Hokava mbypy'ã mburuvisha vasu Herode, shara meẽ ĩñee hetavare hỹnonderã katuã pyrõhe ĩñe'ẽkue, hãrã japo kuñataĩ jurureshua. 10Haipe karselpe Juan jasyjahakashi ñãka, 11hãrã veru reta ñakãkue pente yaperã, meẽshu reta kuñataĩ, hai raha meẽshu ishy. 12Haivi Juan mboireare jyraha hupi Juan hetekuerã raha ñoty reta, hãrã jyraha mbeushu reta Jesús ko ikova.

Jesús myngaru kuaretare jaheva

13Kuaama Jesús Juan ikohearã, oho haivi kanoape hã'ẽĩ yvy ikoambaipi. Hãrã kuimbaire kuamarã jyraha hipii reta yvyipĩ. 14Jesús vejy kanoaivirã hesha hetava kuimbai retarã parekoshu reta, hãrã mynguera ñymbairasyva haire verushuare. 15Ka'aru pyntumapo'ia, Jesús mboireare ou ẽvãperã heishu reta: Ka'aruitema rãnga, mba'etyvãĩjy koipi ikova. Mondo ko kuimbaire tenta retaipi tova ijupe reta hou verã. 16Jesús heishu reta: Tekotẽvea rãnga jyraha, peiipo pymyngarushu. 17Haire heishu: Mba'ẽa rãnga ĩmerekoa kope. Koñeĩ pandepo pãhã hareka mokue pira. 18Jesús heishu reta: Perushe kope. 19Opa mbyvapyka reta kapi'atarerã, haipe heky pandepo pãhã hareka mokue pira, maĩ vaterã jurureshu Tũpa ohovasa verã. Hãrã pyseã pãhãrã meẽshu mboirea retape, meẽ verã opavape. 20Opaiteva hou hareka hỹvãta reta. Hemby vekuaivi mbatyjyrã mynyhẽjy reta 12 kanãta. 21Haipe karu vareta rãnga 5000 kuimbai retãi, papahambateã taupe hareka sanjayre ryheve.

Jesús vata yy ĩãrẽ

22Haivi Jesús hei mboirea retape jupi verãre kanoape hareka hasashi verãre tynonde yy hyvaisho kyty, hokape hei verã opavape ohojy verã hentape. 23Opajyma mondo reta hentaperã, Jesús jupi pente ita vate'õre jurure verã hã'ẽĩ'õpe. Pyntumarã Jesús ĩmeĩteri'i haipe hã'ẽĩ. 24Kanoany yy mbyteipima oho hareka yy ñarõva hỹnatu ñunũpa kanoa intire, yvytu hỹvãĩti jyraharã. 25Kõĩma ourã, Jesús ñymbojahe reta yy ĩãrẽĩ vata ohovape. 26Mboirea reta heshama yy ĩãrẽ vata ohorã, kyjeiterã sapukejyrerã hei: Jykuamba'ia rãnga hokava! 27Jesús ijetashu retarã hei: Avy pykyje! She rãnga. 28Haipe Pedro ijetashurã hei: Sheja, ãñete nde hairã, ma'ẽĩ shyrehe taha yy ĩãrẽ rẽĩvapeve. 29Jesús heishu: Ei. Haipe Pedro vejy kanoaivirã õñepyrõ vata yy ĩãrẽ, oho verã Jesús jykoty. 30Ñanduma yvytu ñakua ouvarã kyjepy hãrã õñepyrõ opa iche yypy. Haipe hỹnatu sapuke: Sheja, shymondojepe. 31Haipe Jesús pysyrã heishu: Sa'itemba riroja! Marã'ĩrãra rypyhu? 32Haire jupima kanoaperã yvytu pyta'ẽ. 33Kanoape'iare opa ĩñesu Jesús hỹnonderã heishu: Nde rãnga ãñete Tũpa Tay.

Jesús mynguera hasyvare tenta Genesaretpe

34Hasa reta yy hyvaisho kytyrã, vahẽ jyraha Genesaretpe. 35Haipe'õre kuama Jesús hai vãhẽ ohovarã opa mbeushu reta juri'õvãre. Hãrã verushu reta opa ñymbairasy vekua. 36Hãrã jurureshu reta mondeva hymbeyrei poko verãre, haipe opaiteva pokoheare, kuera.

Currently Selected:

Mateo 14: TPJ

Highlight

Copy