Ap'u 14
14
A Epram ilev'lei a Lut arna der
1Arna naran Amravel, iv'i mlin a Sinar, m'ei Ariuh, iv'i mlin a Elasar, m'ei Heturlaumer, iv'i mlin a Elam, m'ei a Taital, iv'i mlinar v'anu kinkin, 2hir udlani avan naur m'ei a Pera, iv'i mlin a Satam, m'ei a Pirsa, iv'i mlin a Kamara, m'ei a Sainap, iv'i mlin Atma, m'ei a Semeper, iv'i mlin a Sepuim, m'ei a mlin a Pela (v'anu lera iv'i nut a Suar). 3Hir udlani lera avp'lt kavrama a m'ihual a Sitim (iv'i nata iamk, nahan iv'i Sul). 4A Heturlaumer iv'i mlinar pai inal lman iru, sarei avmlani arna lman itl na pai.
5Arna lman iv'a na pai, a Heturlaumer m'er armlin, la avsapei ha, avrama kavrpr ardu a Rivaim arna nut Astarut Karnaim, kavrpr ardu a Susim arna nut a Ham, kavrpr ardu a Emim arna m'lden a Kiriataim, 6kavrpr ardu a Hur arna pthar, nahan iv'i a Seir, dav'a dav'a ier nut a Elparan, la iter mima asn nut kaka ha. 7Sarei, kavm'alet kavrama asn nut a Enmispat, iv'i nut a Kates, kavrp v'anuar ardu Amalek udlani m'er ardu Amur, la avlak a Hasesuntamar ha.
8Laha, a mlin a Satam, a mlin a Kamara, a mlin Atma, a mlin a Sepuim, m'ei a mlin a Pela (iv'i nut a Suar), avrav'a kavp'lt kavan naur a m'ihual a Sitim. 9Kavmlen a Heturlaumer, iv'i mlin a Elam, m'ei a Taital, iv'i mlinar v'anu kinkin, m'ei Amravel, iv'i mlin a Sinar, m'ei Ariuh, iv'i mlin a Elasar. Arna naran lera, mlin arv'a avan naur m'er mlin arlm'. 10Arna m'ihual a Sitim tah istudau iak, ilini a kulta. Laha, armlin a Satam m'ei a Kamara avruh. Hir kinkin avrars al tah lera, duanar avruh kavrav'a asn ptha. 11Sarei, avlev' si udlaniar ardu a Satam m'ei a Kamara, m'a tim'ah nar udlani, kavrahau m'ei. 12Kavlev' a Lut, iv'i a mrin a Epram, la ilak a Satam ha, m'a si udlanian kavv'el kavln nut lera.
13Laha, dui iamk iruh asnr kadav'a kavr an a Epram, iv'i dui a Eper, sena ti ilak asnr pla neieran a Mamrei, iv'i dui Amur, kav'i tv'alr Eskul m'ei Aner, la avp'lt m'ei a Epram ha. 14Laha, naran a Epram irn ti atvuada sera tv'aln, ilev' m'rnuran inelnal iv'atl pln inal lman isatl (318), la aviak al nmahan ha, kavtp'av'r dav'a avier asn nut a Tan. 15Katupapr m'rnuran udlani kavan naur m'er arki lera lihat. Hir m'er arm'ertu na m'akarienan avrpr kavtp'av'r dav'a kavier a Hupa, la iter arna Nut, asn nut a Tamaskas ha. 16Kauirhaum'alet si udlani, m'a tv'aln, iv'i a Lut, m'a sian udlani, m'er tav'et, m'er arm'ertu.
A Melkisetek imhmah an a Epram
(Isrel 7:1-2)
17Naran a Epram itrp sarei a Heturlaumer m'er armlin avp'lt m'ei, a mlin a Satam iv'a kap'lt m'ei al m'ihual a Savei, la iv'i m'ihualan a mlin ha.
18 #
Isrel 7:1-10. Sarei, a Melkisetek, iv'i mlin a Selem, iuirv'a tim'ah m'a naui m'iel asnn. Hin iv'i prisan Atua Eia Dau. 19Kamhmah ani, kavr ti a, “Atua ipamhmah an Epram, iv'i m'ertuan Atua Eia Dau, kan nut eia m'a nadep'. 20Npatei Atua Eia Dau, la ittu sera m'ertu avlep'lah al lm'am ha.” Sarei, a Epram itu nki iamk arna nki inal ani arna si udlani.
21Laha, a mlin a Satam ivr an a Epram kavr ti a, “Nakm patu kana arm'ertu, sarei nakm kaua ultin udlani apavv'i nkam.”
22V'eti a Epram ivr an a mlin a Satam kavr ti a, “Ntah sera lm'ak arna nahn a Mlin Eia, iv'i Atua Eia Dau, kan nut eia m'a nadep', 23a ti nkalev' si kinkin asnm, ipav'i tret ipamk, v'aha sitrav na sus ipamk. Nkalev' si kinkin asnm iv'i nkam. Imahei ti nakm pavr ti a, ‘Kana nani ti sian a Epram istudau.’ 24V'eti p'elev' sei uaki armalakal atvhan sarei, m'a sei iviviln a ti Aner, a Eskul, m'ei a Mamrei apavuei. Hir apavua sei uaki iviviln anr.”
Currently Selected:
Ap'u 14: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
