Ap'u 16
16
A Heka m'ei a Ismail
1A Sarai, a naun a Epram, idalev' sei. V'eti vitar na m'akarien iamk ilak asnn, iv'i vitar a Itsip, nahan iv'i a Heka. 2Laha, a Sarai ivr an a Epram kavr ti a, “Palei, a Mlin Eia itukar kana a ti nkalev' sei. Nmiman anh a ti pav'a kam'atr m'a vitar na m'akarienak. Nsarei a natk ipaiak asnn.” Laha, a Epram iv'rn a v'nenan a Sarai kan sei ivri. 3Sarei, a Sarai, a naun a Epram, ilev' a Heka, iv'i vitar na m'akarienan kav'i vitar a Itsip, katau an a naun, iv'i a Epram, a ti ipav'i tav'etan, naran a Epram itlak sarei pai itnal arna nut a Kenan. 4Laha, a Epram im'atr m'ei a Heka dav'a itkar. Sarei, naran a Heka ila ti hin itkar, iv'ah stu a tav'et lil hin im'akaran (iv'i a Sarai) arna nln.
5Sarei, a Sarai ivr an a Epram kavr ti a, “Der la ier kana ha iv'i pariam uaki. Kana nttu sera vitar na m'akarienak a ti nakm parn ip'as aranan, v'eti naran hin ila ti itkar isip'len kana arna nln. Nrn ti a Mlin Eia ipalak arna p't nut nad kav'ana hua m'a nakd.”
6V'eti a Epram ivr an a Sarai kavr ti a, “Palei, vitar na m'akarienam ilak al lm'am. Pani ipanep'a nut krn ti pan ani ipanap'ei.” Laha, a Sarai iutakm an a Heka dav'a v'ahienan iv'a a nadep', dav'a iruh asnn.
7V'eti Enselan a Mlin Eia ipaslei asn naui pa iamk idan al tah kararev' arna nut kaka, iv'i nauei iter asn navanel iv'a a Sur. 8Kavr ani, kavr ti a, “?Heka, vitar na m'akarienan a Sarai, kdan ip'i? ?Pav'a ip'i?” Ivr ti a, “Nruh asn tav'et lilak, la nm'akaran ha, iv'i a Sarai.”
9Laha, Enselan a Mlin Eia ivr ani, kavr ti a, “Pam'alet kadahau ml asn tav'et lilam, la kam'akaran ha, kalak a nv' nut huan.” 10Laha, Enselan a Mlin Eia ivr ani ml kavr ti a, “P'ani ti a natm apavstudau, akaspanr.” 11Sarei, Enselan a Mlin Eia ivr ani ml kavr ti a, “Palei, ktkar sarei. Nakm palev' dui pa ipamk. Patu nahan ipav'i a Ismail, sena ti a Mlin Eia itrndu sera der, la iarh ha. 12Hin ipav'i m'ertu didi. Hin ipamlen nelnal, nelnal apavmlani. Hin ipalak a p't nut nar tv'aln udlani.”
13Laha, a Heka itu nahan a Mlin Eia, la iv'ana m'ei ha, kavr ti a, “Atua--Nakm--Kla--Kana”, sena ti ivr ti a, “?Nsarei kana nlei Atua la ila kana ha?” 14Sena si lera atu naha tah na nauei lera, kavr ti iv'i, “Tah--Na--Nauian--Atua--La--Isilv'--Kala--Kana--Ha.” Palei, iter arna p't nut na nut a Kates m'a nut a Peret.
15 #
Kalesia 4:22. Sarei, a Heka ilev' a natn a Epram iamk, iv'i dui. A Epram itu nahan a natn, la a Heka ilav'i ha, iv'i a Ismail. 16A Epram paian inelsatl pln ilm'sei (86), naran a Heka ilev' a Ismail asnn.
Currently Selected:
Ap'u 16: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
