Sun 21
21
A Iesu iv'iv'en Hin anr m'ertuan avsaru
1Itauatah a si lera a Iesu iv'iv'en Hin ml anr m'ertuan asn naui lil a Kalili, tv'el nahan iv'i Taipirias. Iv'iv'en Hin inap'i laha. 2Hin a Saimun P'ita m'ei a Tumas, la avr m'alev' ani ha, m'ei a Nataniel, iv'i dui a Keina a Kalili, m'er a natn a Sep'eti m'er m'ertuan arru uraur ml, avp'lt atlera. 3#Luk 5:5.A Saimun P'ita ivr anr kavr ti a, “Kana p'av'a kasran nit.”
Hir avvr ani kavvr ti a, “Kam'em' p'vsapah.” Avrav'a auei ilahml sarei kavrav'a arna nauak, v'eti arna lihat lera ahavlev' tilau kinkin al nit. 4V'eti naran neiel ittpeia sarei, a Iesu ip'tir a p'ak naui lil, v'eti arm'ertuan ahavrndu ti iv'i a Iesu. 5Laha, a Iesu ivr anr kavr ti a, “?Natk, kvrv' tilu nam'i kinkin?”
Avvrprani kavvr ti a, “Si ihei.”
6 #
Luk 5:6. Ivr anr kavr ti a, “Pavsran nit arna m'ldu nauak, sarei, pavrv' tilau.” Laha, avsran nit, v'eti akavrv'dri ml sena ti ilini a tilau.
7Laha, m'ertuan a Iesu, la ilap'as ani ha, ivr an a P'ita kavr ti a, “Aulera iv'i a Mlin Lilad.” Naran a P'ita irn ti iv'i a Mlin Lilad, ilev' klusan kauei kav'uda sitrav aranan, sena ti ithsla sera klusan kataui, sarei kasihavs al nauei. 8V'eti m'ertuan a Iesu uraur avrama arna nauak pa kavrv' nit ilini a tilau. Sena ti avlak mima uaki asn p'ak nauei, iv'i mita inelnal iv'amk (100 m) 9Naran avrav'a aut, avla nap' pa iamk iv'en kavla tilau iter arna tih nap' m'a p'ret. 10A Iesu ivr anr kavr ti a, “Pavlev' tilu kinkin kp'hvrv'i.”
11A Saimun P'ita iv'a al nauak karv' nit kauirma aut. Nit lahara ilini a tilu lilil, avv'i 153. Inelnal istudau inap'i lera, v'eti nit iamaur. 12A Iesu ivr anr kavr ti a, “Pavrama kavhatat.” V'eti m'ertuan kinkin iahamk irn ti ipamimani, kavr ti a, “?Kv'i a hin ak?” Sena ti avrndu ti iv'i a Mlin Lilad. 13Laha, a Iesu ima kalev' p'ret katau anr, inap'i lera ml m'a tilau.
14Naran lera iv'i nitla naran a Iesu iv'iv'en Hin anr arm'ertuan, naran itthal sarei arna m'ien.
A Iesu imhmah an a P'ita
15Dav'a, naran atvhatat sarei, a Iesu ivr an a Saimun P'ita kavr ti a, “?Saimun, kv'i a natn a Sun, klap'as a Kana kasiv'r m'ertu lera?”
Ivr ani, kavr ti a, “Aau, Mlin, Nakm krndu ti nlap'as anh.”
A Iesu ivr ani, kavr ti a, “Pamsnen net sivsivak.” 16Laha, ivr ani ml, iv'i v'aru nen, kavr ti a, “?Saimun, kv'i a natn a Sun, klap'as a Kana?”
Ivr ani, kavr ti a, “Aau Mlin, Nakm krndu ti kana nlap'as anh.”
A Iesu ivr ani, kavr ti a, “Pamsnen sivsivak.” 17Laha, ivr ani ml, iv'i v'atl nen, kavr ti a, “?Saimun, kv'i a natn a Sun, klap'as a Kana?” A P'ita irn istu sena ti ivr ani ml, iv'i v'atl nen, kavr ti a, “?Klap'as a Kana?”
Laha, ivr ani, kavr ti a, “Mlin, Nakm krndu si udlani. Nakm krndu ti nlap'as anh.”
A Iesu ivr ani, kavr ti a, “Pamsnen sivsivak. 18Nvrdaui nvr anh, naran kdv'i malakal uam, klev' klusam kav'uda sitravam a ti pav'el kadav'a arna nut nakm krni uaki, v'eti naran nakm pav'i m'ertarep', nakm palmlm lm'am a ti m'ertu uraur ipalev' klusam kav'uda sitravam kalav'h a ti pav'a arna nut nakm kaarn ti pav'a.” 19Ivr si lera kavrp'ep'a nut a P'ita ipam'a ipanap'ei, kavrp'ep'a nut ipani ti nahan Atua ipav'a eia sanan ipanap'ei. Ivr si lera sarei, kavr ani, kavr ti a, “Pasapa Kana.”
M'ertuan a Iesu la ilap'as ani ha, m'a puk iulul ani
20 #
Sun 13:25. Laha, a P'ita iklup'la kala m'ertuan a Iesu, la ilap'as ani ha, isapar. Aulera iv'i nki iv'er arna mrn a Iesu naran avhatat hara kavri kavr ti a, “?Mlin, hin ak ipatauh al lm'ar m'ertu avlep'lah?” 21Naran a P'ita ilei, ivr an a Iesu kavr ti a, “?Mlin, aulera ipan v'ata?”
22A Iesu ivr ani, kavr ti a, “Ipavr ti Kana p'ern ti hin ipalak dav'a ipaier naran p'amam'alet ml, iav'i pariam. Nakm pasapa Kana uaki.”
23Sena si lera, m'ertuan a Iesu avvri nakl kavr ti m'ertuan a Iesu lera ikahm'a. V'eti a Iesu iavr ti ikahm'a, v'eti ivr ti a, “Ipavr ti Kana nrn ti ipalak ipaier naran Kana p'amam'alet ml, iav'i pariam.”
24M'ertuan a Iesu lera iv'i m'ertu ivrp'ep'a si lera udlani kulul ani. Kam'em' nvrndu ti v'nenan lera iv'i v'nen dau.
25A Iesu ien si uraur ml istudau. Ipavr ti m'ertu apavulul ani udlani, nsarei puk udlani apavulul ani m'lnen ikahei arna nadep' ka. Amen.
Currently Selected:
Sun 21: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
