Luk 17
17
Si udlani la iani ti m'ertu ipars kan si stu ha
(Matiu 18:6,7; Mak 9:42)
1Laha, Hin a Iesu ivr anr arm'ertuan kavr ti a, “Sei ipani ti m'ertu ipan si stu, ikama pr, v'eti, usa, nrn istu a m'ertu la ipani ti ipatu hin ra. 2Ip'as mau a ti apahuda nav'et lil arna natavnan kasrani al nata, isiv' ti hin ipani ti m'ertu laha kinkin iamk la avsusupa ha, ipars. 3#Mat 18:15.Pavv'ah kam'i. Ipavr ti tv'alm ipan si stu anh, pav'ana hua m'ei, v'eti ipavr ti ipavav nln, pamhmah ani. 4V'aha ipavr ti ipan si stu anh ipav'asaru arna napn ipamk, v'eti kam'alet ml asnm ipav'asaru arna napn ipamk kavr ti a, ‘Nrn istu sena si stuak’, pamhmah ani pr.”
V'ahien p'as m'a pari p'as
5Laha, apusel udlani avvr an a Mlinad kavvr ti a, “Pani ti v'ahien p'asam'em' ipama kahua mau.”
6V'eti a Mlinad ivr ti a, “Ipavr ti v'ahien p'asam'i ipasusupa kanep'a m'et na m'adak varavar, pavrndu ti pavvr a nai laha, iv'i nahatapul, kavvr ti a, ‘Nakm paduahlah kalauh al nata’, sarei, ipan sei kvvri. 7?Hin ak asnm'i ml, m'ertu na m'akarienan iamk ien pitvetan nakl, v'aha ip'aur sivsivan, naran ipandan arna nut im'akar, ipavr ani, kavr ti a, ‘Pama asn tiv' kahatat.’? 8V'eti nsarei ipavr ani, kavr ti a, ‘Pandedp' tim'ah nak kav'uda klusam katu tim'ah a kana, dav'a ti p'ehatat kam'nm'n, sarei, ti nakm pahatat kam'n sei.’ 9?Naran iten sera sei itvr sarei ani, kvv'ah ti hin ipavr ip'as a dui na m'akarienan lera sanan? Nsarei ikahei. 10Inap'i lera kam'i, naran ktvan sera si udlani Atua itvr sarei a kam'i, pavvr ti a, ‘Nvv'i m'ertu stu na m'akarien. Nvan sei uaki iviviln a ti p'vani.’ ”
A Iesu ien mamh m'ertu inal lep'ersi iuar
11Sarei, naran iv'el kadav'a a Serusalem, iv'el arna p't nut na nut a Sameria m'ei a Kalili. 12Naran ier asn v'anu pa iamk, dui arnal lep'ersi iuar, avv'el kavv'av'ahi kavp'tir au. 13Kavv'ara eia kavvr ti a, “Iesu, Tisa, parn istu a kam'em'.”
14 #
Livai 14:1-32. Naran ilar, ivr anr kavr ti a, “Pavrav'a kavv'iv'en p'akm'i asnr arpris.” Sarei, naran avv'el, p'akr ima kap'as ml.
15Laha, hir kinkin iamk, naran ila ti p'akn ima kap'as, im'alet, kav'ara eia kapatei Atua. 16Kasisihpu kaiaul asn tln a Iesu kavr ip'as ani. V'eti aulera iv'i dui a Sameria.
17Laha, a Iesu iv'ana kavr ti a, “?Inap'i? ?Ntmhmah sarei a dui arnal, v'eti nki arsav'et (9) hiri? 18Dui uraur ml ihei im'alet kapatei Atua, v'eti v'anudl laha uaki.” 19Laha, ivr ani, kavr ti a, “Pap'tir kadahau. V'ahien p'asam iani ti kp'as ml.”
V'anuan Atua ipama
(Matiu 24:23-28; 24:37-41)
20Naran arvarisi kinkin avmiman ani naran v'anuan Atua ipama, Hin ivrpranr kavr ti a, “M'ertu akavp'a si kinkin a ti ipav'iv'en naran v'anuan Atua ipama. 21Akavvr ti a, ‘Pavlei, hilaha,’ v'aha ‘pavlei, atlahatu,’ Sena ti pavrni, v'anuan Atua itater sarei a nlm'i.”
22Sarei, ivr anr arm'ertuan kavr ti a, “Napn ipama uam a ti pavrn nam'er a ti pavla napnak ipamk, la nv'i Net M'ertu ha, v'eti mkavlei. 23Laha, apavr a kam'i kavr ti a, ‘Pavlei, hin laha,’ v'aha, ‘Pavlei, hin atlahatu,’ v'eti kam'i mavsapar v'aha mavv'ahr. 24Sena ti arna napnak, Kana, nv'i Net M'ertu, p'enep'a nav'l ilev' m'aten, la iendan a tv'eliel na p'knaran ker ier a tv'eliel ha. 25V'eti ipatauamu der ipastudau ikier Kana pr, laha, m'ertu avsilv' hilaha apavsran Kana. 26#Ap'u 6:5-8.Kana, nv'i Net M'ertu, napnak ipanep'a sera napnan a Nua. 27#Ap'u 7:6-24.Arna naran lera, avhatat kavm'nm'n kavul tav'etar kavtlanr ier napn a Nua iv'a al nauak dav'a nauei ilinkar nadep', laha, hir udlani avtpl kavram'a. 28#Ap'u 18:20—19:25.Inap'i lera ml arna napnan a Lut. Avhatat kavm'nm'n kavul sei kavulul a sei kavlu sei kavhl nmah. 29V'eti arna napn a Lut iln nut a Satam, nep'v'en m'a salva irs dan eia, kutakm anr udlani. 30Ipanap'i lera naran Kana, nv'i Net M'ertu, p'etpeia.
31 #
Mat 24:17,18; Mak 13:15,16. Arna napn lera, ipavr ti m'ertu kinkin ipalak arna nmahan eia, v'eti sian udlani ipater eim, imasisi kadama a nadep' kalev'la sian. V'aha m'ertu la ipalak al pitvet ha, imahhau ml. 32#Ap'u 19:26.Pavv'ahur a naun a Lut. 33#Mat 10:39; 16:25; Mak 8:35; Luk 9:24; Sun 12:25.M'ertu irn ti ipauada silv'ienan, hin silv'ienan ipamln, v'eti m'ertu silv'ienan ipamln, hin ipauadei uam. 34Nvr a kam'i, arna lihat lera, m'ertu aparru aparm'atr arna pas ipamk. Apalev'la tv'aln kaln tv'aln. 35Tav'et aparru aparlak a nut ipamk karan tim'ah. Apalev'la tv'aln kaln tv'aln. 36Dui aparru aparlak al pitvet. Apalev'la tv'aln kaln tv'aln.”
37Sarei, avvr ani kavvr ti a, “?Ip'i, Mlin?” Laha, ivr anr kavr ti a, “Arna nut p'ak sei im'a iter, trvn apavp'lt atlera.”
Currently Selected:
Luk 17: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
