Luk 19

A Iesu iv'a al nmahan a Sakias

1Sarei, a Iesu iv'el dav'a kaier v'anu a Seriku. 2Laha, pavrni, dui iamk ilak atlera, nahan iv'i a Sakias, hin iv'i mlinar ardu avlev' takis, sian istudau. 3Irn ti ipalei a Iesu iv'i m'ertu inap'i, v'eti iarndu ti ipalei, sena ti ip'hp'hdau, m'ertu istudau avvtvkari. 4Sarei, ivrvr katauamu anr kahap'r a nai nahan iv'i sikamu iamk a ti ipalei, sena ti a Iesu ipav'siau arna nut lera. 5Naran a Iesu ier asn nut nen, ip'a nut eia kalei, kavr ani, kavr ti a, “Sakias, pasisi ipalahml, sena ti p'elak pr a utam dika.” 6Laha, isisi ilahml kadama a nadep', kav'av'ei karv'a a utan karn ip'as sanan istudau. 7V'eti naran nelnal avlei, avvrvr a hir kavsip'lani, kavvr ti a, “Aulera itav'a kathatat m'a dui na si stu.”

8Laha, a Sakias ip'tir kavr an a Mlinad, kavr ti a, “Mlin, parni. Pna si udlaniak, p'etau anr m'ertu siar ihei. Idvr ti m'thap'il katlev' sera si kinkin asn m'ertu kinkin, p'etum'alet ani ml ipav'av'a.”

9Laha, a Iesu ivr ani, kavr ti a, “Dika Atua itlev'la sera nelnal al nmah laha arna si stuar, sena ti dui lera iv'i a natn a Epraham. 10#Mat 18:11.Sena ti Kana, nv'i Net M'ertu, ntama sena ti p'etala a m'ertu atvmln sarei kalev'lar arna si stuar.”

A Iesu isran v'nen kavrur mlin itu milian iamamk (1,000,000 vt) anr m'ertu na m'akarien inal a ti apavp'auri

11Naran avv'rn a si lera, a Iesu isran v'nen ml sena ti ilak mima asn nut a Serusalem, sena ti avv'ah ti m'ertu apavla v'anuan Atua ipalahml sarei. 12Sena si lera, ivr ti a, “Mlin iamk irn ti ipav'a arna v'anu iamk iv'iv'a, a ti apani ti hin ipaua v'anuan kav'i mlin lil nen, sarei, ti ipam'alet ml. 13Iv'ara a m'ertu na m'akarienan arnal katu milian iamamk (1,000,000 vt) anr hir udlani p'sev' kavr anr kavr ti a, ‘Pavm'akarak ipaier naran p'ama ml.’ 14V'eti arm'ertu a utan avlep'lei kavtep'a m'ertu iua v'nenar iv'a kavr ani, kavr ti a, ‘Kam'em' navrn ti dui laha ipav'i mlin lilam'em'.’

15V'eti m'ertu au avani ti iv'i mlin, laha hin im'alet ml katu v'nen a ti apav'ara anr m'ertu la ittu sera nav'et anr hara, a ti apavrama asnn, sena ti irn ti iparndu nut m'ertuan udlani avm'akar ani inap'ei. 16Nki itauamu ima kavr ti a, ‘Mlin, milian iamk (1,000,000 vatu) la ktu kana hara, nlev' milian inal (10,000,000 vatu) ml aranan.’ 17Laha, a mlin ivr ani, kavr ti a, ‘Pariam ip'as istudau. Naran kp'aur si pa, kp'auri ip'as. Pav'i mlin na v'anu lil ipanal.’ 18Sarei, nki isapei ima kavr ti a, ‘Mlin, milian iamk (1,000,000 vatu) la ktu kana hara, nlev' milian ilm' (5,000,000 vatu) ml aranan.’ 19Laha, ivr ani ml inap'i lera kavr ti a, ‘Nakm pav'i mlin na v'anu lil ipalm'.’

20Sarei, nki uraur ima, kavr ti a, ‘Mlin, milian iamk (1,000,000 vatu) hara hilah. Kana nnpakari al kaliku iter. 21Sena ti ndedrn anh, a ti nakm kv'i dui hua iamk. Nakm krndu ti palev' sei arna si vn karndu ti palev' tim'ah al pitvet, naran kaalaui.’ 22Sarei, a mlin lera ivr ani, kavr ti a, ‘Nakm kv'i dui stu na m'akarienak. Kana p'ev'ana hua m'ah arna v'nenam uaki. Ktrndu sarei a ti nv'i dui hua karndu ti p'elev' sei arna si vn kalev' tim'ah al pitvet naran nalaui. 23?Inap'i hin kaatu vatuak al pam a ti, naran p'ama ml, p'erndu ti p'elav'i ml m'a nav'et ml kinkin apataui aranan?’

24Laha, ivr anr m'ertu avlak mima asnn kavr ti a, ‘Pavlev'la milian iamk (1,000,000 vatu) hara asnn, kavtau a dui la iua milian inal (10,000,000 vatu) ha.’ 25V'eti avvr ani kavvr ti a, ‘Mlin, hin vatuan itv'i sera milian inal.’ (10,000,000) 26#Mat 13:12; Mak 4:25; Luk 8:18.Sena ti Kana nvr a kam'i ti m'ertu udlani siar itiak sarei, apatu nki aranan ml, v'eti m'ertu sian ihei, apalev'la si kinkin la idater uam asnn ha. 27#Mat 25:14-30.‘V'eti pavlev'lar m'ertu lahara avlep'la kana hara kavvr ti ahavrn ti kana p'ev'i mlinar, kavuirmar atlaha kavtrp'nr atlaha arna nahk.’ ”

Nelnal avpatei a Iesu naran iv'a arna v'anu a Serusalem

(Matiu 21:1-11; Mak 11:1-11; Sun 12:12-19)

28Ivr sera si lera, kav'el ml kadav'a eia a Serusalem. 29Dav'a, naran ihih nut a Petvas m'ei a P'etani avier asn ptha iamk, nahan iv'i Uliv, a Iesu itep'a m'ertuan kinkin arru, 30kavr ti a, “Parv'a arna v'anu lahatu krlei ha. Naran parier nut lera, parla net tuki ipamk attiten sarei. M'ertu idalak aranan naran kinkin. Parulullei karuirma atlaha. 31Laha, ipavr ti m'ertu kinkin ipamiman a kam'i kavr ti a, ‘?Krulullei sena v'ata?’ parvr ani karvr ti a, ‘Sena ti a Mlinad irni.’ ”

32Laha, m'ertuan arru la itap'er hara, arv'el karla si udlani inep'a nut ivr anr inap'ei. 33Sarei, naran arululla net tuki lahara, ardu nen avvr anr kavvr ti a, “?Krulullei sena v'ata?”

34Arvrpranr karvr ti a, “A Mlinad irni.” 35Sarei, aruirma asn a Iesu, kartu klusar kinkin arna tuki karani ti a Iesu ilak aranan. 36Laha, naran iv'el, avv'lien klusar arna navanel.

37Naran ihih nut navanel isiris arna Ptha na Nai iv'i Uliv lahara, m'ertuan udlani avnelnal avrn ip'as kavpatei Atua a nadl lil, sena pari lilan udlani atvla sarei, kavvr ti a, 38#Npin 118:26.“P'vpatei a Mlin Lilad la ima arna nahan a Mlin Eia ha. Tamat iter arna nut eia. Si p'sp'asan Atua iter arna nut eia dau.”

39V'eti arvarisi kinkin la avlak m'er nelnal atlera ha, avvr ani kavvr ti a, “Tisa, pavrkar m'ertuam.”

40V'eti ivrpranr kavr ti a, “Nvr a kam'i, ipavr ti hir akavvr sei, v'eti ipav'amk m'a ti nav'et apavv'ara eia.”

A Iesu itakal sena nut a Serusalem

41Dav'a, naran ima kihih v'anu lil, ip'ei katakal sanan, kavr ti a, 42“U, nrn ti dika, kam'i kvlak a Serusalem pavrndu sei ipan tamat asnm'i, v'eti hilaha mkavla sei, itutuah arna v'ahienam'i. 43Sena ti naran nen ipama aranam'i a ti m'ertu avlep'la kam'i apavlaktalu a v'anu kavhl naml ipamlden kam'i, kavtukar kam'i arna nut udlani al v'anu. 44Kavutakm a kam'i m'er a netm'i udlani pavrars a nadep'. Akavm'ahu a ti nav'et na nmah ikahmk ipap'tir uam a m'lnen, sena ti kam'i kaavrndu naran Atua ima kalak m'a kam'i.”

A Iesu itp'ev' m'ertu stu al nmah tamat

(Matiu 21:12-17; Mak 11:15-19; Sun 2:13-22)

45Laha, a Iesu iv'a al naml na nmah tamat kasrandina m'ertu avulul a sei atlera kavr anr kavr ti a, 46#Aisaia 56:7; Seremaia 7:11.“Paivul ivr ti a, ‘Nmahak iv'i nmah na tamat,’ v'eti kam'i kvani ti ima kav'i nut na m'ertu na v'nv'nahien.”

47 # Luk 21:37. Laha, iv'iv'en v'nen p'as al nmah tamat arna napn udlani. V'eti arpris lil m'er tisa na v'nen hua m'er ardu lilil kinkin uraur avtala a navanel a ti apavutakm ani. 48V'eti ahavpasla navanel kinkin sena ti m'ertu udlani avrn nam'er a v'nenan.

Currently Selected:

Luk 19: nmb

Highlight

Copy