Ebhikorwa bhya Jitumwa 1
1
Omurago gwa Mwoyo Mweru
1Tewofiiro owa echibharo, mu‑chitabho chaani cha okwamba,#1:1 Mu‑chitabho chaani cha okwamba. Echitabho echo ni Misango ja Ekisi ja Ruuka. ꞉naakukaamiiye inguru ya emisango joone jinu Yeesu ꞉aakorere na okwiyigisya, okusookerera ku‑bhwambiro bhwa emirimu jaaye, 2okukingira orusuku runu ꞉aagegerwe okugenda mu‑rwire. Achaari okugegwa, ꞉aasoosiisye amaragiriro okutura ku‑Mwoyo Mweru, ku‑tumwa jaaye jinu ꞉aawuuwe, inguru ya emirimu jinu abhaja okukora. 3Ejire aasuuruka okusooka mu‑fwa, ꞉aamarire siku makumi gana, ˆneebhuurisya ku‑tumwa ejo kwiya kaafu. Mu‑bhibharikisyo bhyafu aabheeresyaga abhwerubhweru ati ni muwanga na aabheeyigisyaga emisango ja obhukama bhwa Nyamuwanga.#1:3 Obhukama bhwa Nyamuwanga. Ku‑meeresyo amaafu, ringira mu‑Meeresyo inguru ya Emisango Emikomeeye.
4Rusuku rumwi, bhunu Yeesu aariga ˆnaarya aamwi na jitumwa#1:4 Jitumwa. Ku‑meeresyo amaafu, ringira mu‑Meeresyo inguru ya Emisango Emikomeeye. ejo, ꞉aabharagiriiye ati, “Mwasiga okusooka mu‑musi gwa Yerusareemu. Tari, murindirire omwoomwo, okukingira omwanya gunu omuja okuramira omurago gunu Raata ꞉aabharagire rwa kutyo ꞉naabhabhwiriiye. 5Okubha, Yowana ꞉aabhatiijiisye abhaanu mu‑manji, nawe jisiku jitari nyafu emwe omuja okubhatiijibhwa kwa Mwoyo Mweru.”
Yeesu keengʼengibhwa na Nyamuwanga okugenda mu‑rwire
6Ku‑mwanya gunu jitumwa ejo bhaariga bhari aamwi na Yeesu, ꞉bhaamubhuusiisye ati, “Raatabhugenyi, omwanya gunu nigwo owuja okusubhisya Abhayisirayeeri obhukama bhwebhwe?”
7ˆNaabhabhwira ati, “Jisiku ja emisango ejo, jitari inguru yeemwe okujimenya, kwa okubha ni Raata omwene era, ku‑bhuturo bhwaye niwe aramuuye ati, jirikorekana rusuku ri. 8Nawe muriramira amanaga omwanya gunu Mwoyo Mweru ariija kw‑imwe, muribha abhabhambaasi bhaani mu‑Yerusareemu na mu‑mbaara ejindi joone ja echaaro cha Yuudeya na echa Samaariya, na okukingira ku‑bhuteero bhwa echaaro choone.”
9Yeesu ejire aamara okwayika ejo ku‑tumwa jaaye, ˆneengʼengibhwa okugenda mu‑rwire. Eriire nirimuswikira, ꞉bhataamurorere rindi. 10Omwanya gunu bhaariga bhachaaroreerera ku‑rutumba nekeneke, awoawo, nibheemereeguru abhaanu bhabhiri yeeyi nabho, bhanu bhaariga bhafwaye emyenda emyeru pee! 11Nibhaayika ati, “Emwe abhaanu bha Gariraaya, ni kurwa ki mwimereeguuyu anu keenu omuroreerera ku‑rutumba? Yeesu unu aagegwa okusooka kw‑imwe okugenda mu‑rwire, arisubha rindi, rwa kutyo mwamurora ˆnaagenda.”
Maatiya kaawurwa okubha itumwa
12Nibheeya jitumwa nibhasooka ku‑chiima chinu chaatogwaga ati Emijeyituuni, nibhasubha mu‑musi gwa Yerusareemu. Rwariga wuti, rugendo rwa matambo chiwumbi chimwi kutya. 13Bhejire bhaakinga mu‑musi gwa Yerusareemu, nibhagenda nibhariinya mu‑chisago cha mu‑bhutingo munu bhaariga bheekaaye kwa siku nooto. Jitumwa ejo nibho bhanu, Peetero, Yowana, Yakobho, Andereya, Firipo, Tomaasi, Bhatoromaayo, Mataayo, Yakobho omwana wa Arufwayo, Simooni unu aariga ari Omujeroote#1:13 Simooni unu aariga ari Omujeroote. Aariga ari na amasiina gabhiri, erimwi ni Simooni Omukananaayo, erindi ni Simooni Omujeroote. Goone ago gari na obhugajuro bhumwi, omuunu unu aariga arwanire riremo rya obhwitaage okusooka mu‑bhutungi bhwa Echiruumi. Ringira Mataayo 10:4; Maariko 3:18; Ruuka 6:15. na Yuuda omwana wa Yakobho. 14Abho bhoone bhaariga nibheekomeesya okwikofyanya aamwi okusabhwa Nyamuwanga. Aamwi na abho, bhaariga bhari‑wo abhagasi abhandi na Maryamu nyiramwene Yeesu na abhamura bhaabho Yeesu.
15Ku‑mwanya ogwo, abheekirisya bha Yeesu nibheekofyanya, obhukumi bhwebhwe bhwariga wuti egana rimwi na makumi gabhiri (120) kutya. Niwo Peetero ˆneemereeguru agatigati yeebhwe, ˆnaabhabhwira ati, 16“Abhayiri bhaasu mu‑riikirisya, emisango jinu ꞉jaakaamirwe mu‑Bhikaame Ebhyeru inguru ya Yuuda jaariga jiri bhusibhusi jikuumire. Ejo ꞉jaaragirwe na Mwoyo Mweru okutura mu‑kanwa aka omukama Dawudi inguru yaaye, unu ꞉aatangasiisye bhanu ꞉bhaagwatire Yeesu. 17Ka wone, Yuuda aariga ari tumwa yeejaasu, ꞉aayaanirwe obhukosi bhunu aamwi na eswe.”
18Yuuda ꞉aagurire risambu ku‑pirya jinu ꞉aabhwene okuruubhana na echikorwa chaaye echibhiibhi. Omwo nimwo ꞉aaguuwe bhwifumbike, orubhunda rwaye nirwatika, na obhura bhwone nibhusukuka anja. 19Omusango ogwo nigumenyekana ku‑bheekasi bhoone bha Yerusareemu. Kurwa ejo nibhatoga risambu eryo risiina rya Akeeri Daama mu‑nyaayika yeebhwe,#1:19 Mu‑nyaayika yeebhwe. Inyaayika inu Abhayawudi bhaayikaga omwanya gwa Yeesu yaariga iri Echiyaraamu. Echiyaraamu echisusana na Echiyebhuraniya. obhugajuro bhwaryo Risambu rya Isagama.
20Mbe, Peetero ˆnaagenderera okwayika ati, “Emisango ejo ejimenyekana mu‑chitabho cha Ijabhuri ati,
‘Inju yaaye ribhe etongo,
aasiga okubha‑wo omuunu unu arisigara omwo.’#1:20a Ringira Ijabhuri 69:25.
“Ka wone, ikaamirwe ati,
‘Omurimu gwaye gwa okutangasya,
ayaanwe omuunu owundi.’#1:20b Ringira Ijabhuri 109:8.
21“Kurwa ejo, jiiyire aawurwe omuunu owundi unu aayengyanyaga na eswe omwanya gwone gunu Raatabhugenyi Yeesu aariga ari na eswe, 22okusookerera omwanya gunu Yeesu ꞉aabhatiijiibhwe na Yowana okukingira orusuku runu ꞉aagegerwe okugenda mu‑rwire. Unu kaja okwawurwa, jiiyire asangire aamwi na eswe okubha omubhambaasi wa obhusuuruko bhwa Yeesu bhunu ꞉chaarorere.”
23Awo, nibhata‑wo amasiina ga abhaanu bhabhiri. Owumwi aariga ari Jejefu unu aatogwaga Bharisabha, risiina ryaye erindi aariga ari Yuusito. Na owa kabhiri, aatogwaga Maatiya. 24Nibhasabhwa Nyamuwanga nibhaayikaga ati, “Raatabhugenyi, naawe owumenya emyoyo ja abhaanu bhoone. Kurwa ejo, echikusabhwa ucheeresye, ni wuuya agati ya abhabhiri bhanu unu usorere 25agege omugabho gwa obhukosi bhunu Yuuda ꞉aasigire, omwanya gunu ꞉aafuuwe na okugenda orubhaara runu rumwiyire.” 26Bhejire bheeya, nibheetongya, ikuura niigwira Maatiya, ˆnaagwatanyibhwa na jitumwa jirya ekumi na umwi.
Currently Selected:
Ebhikorwa bhya Jitumwa 1: jit
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
