Yowana 3

Nikodeemu kaagosorera Yeesu

1Aariga ari‑wo omutangasya umwi wa Abhayawudi wa echise cha Abhafarisaayo, risiina ryaye aatogwaga Nikodeemu. 2Rusuku rumwi mu‑ngeta, Nikodeemu ˆnaagenda ku‑Yeesu, ˆnaamubhwira ati, “Omwiyigisya, chimenyere ati awe ni mwiyigisya unu utumirwe na Nyamuwanga, kwa okubha atari‑wo omuunu unu kaatura okukora ebhibharikisyo bhinu owukora, araabha Nyamuwanga atari aamwi nage.” 3Yeesu ˆnaamusubhya ati, “Ni chimari enikubhwira ati, atari‑wo omuunu unu kaatura okwingira mu‑bhukama bhwa Nyamuwanga#3:3a Mu‑bhukama bhwa Nyamuwanga. Ku‑meeresyo amaafu, ringira Obhukama bhwa Nyamuwanga mu‑Meeresyo inguru ya Emisango Emikomeeye. araabha ateebhuuywe rwa kabhiri.”#3:3b Ringira Yowana 1:13. 4Nikodeemu ˆnaabhuusya Yeesu ati, “Omuunu kaatura kutiki okwibhurwa rwa kabhiri keenu aakokoowe? Angu, kaatura okwingira rindi mu‑nda ya nyiramwene korereki eebhurwe rindi?”

5Yeesu ˆnaamusubhya ati, “Ni chimari enikubhwira ati, atari‑wo omuunu unu kaatura okwingira mu‑bhukama bhwa Nyamuwanga araabha ateebhuuywe mu‑manji na kwa Mwoyo Mweru. 6Omuunu keebhurwa na abheebhusi bhaaye echinyamubhiri, nawe Mwoyo Mweru niwe kaakora omuunu okubha omuyaaya echinyamwoyo. 7Waasiga okuruguura kwa okubha naakubhwira ati, ‘Mwenderwe mwibhurwe rwa kabhiri.’ 8Mwoyo Mweru kaasusana na omuyaga gunu oguyemba okurosya enu ogwenda. Owutura okuungwa okuwutuutura kwagwo, nawe utakumenya anu ogusookerera na anu ogugenda. Nikwo kutyo jiri ku‑muunu woonewoone unu Mwoyo Mweru amukorere okubha omuyaaya echinyamwoyo.”

9Nikodeemu ˆnaabhuusya Yeesu ati, “Angu, eyiturikana kutiki Mwoyo Mweru okukora omuunu okubha omuyaaya kutyo?” 10Yeesu ˆnaamusubhya ati, “Awe uri mwiyigisya unu uri na echibharo muno mu‑chaaro cha Yisirayeeri, ka utakumenya emisango ejo? 11Ni chimari enikubhwira ati, eswe echaayika jinu chimenyere, na echisoosya obhubhambaasi ku‑jinu chirorere. Nawe emwe mutakwikirisya obhubhambaasi bhweswe. 12Naabhabhwira emisango jinu ejikorekena ku‑chaaro anu, nawe emwe mutakwikirisya. Woori omutura kutiki okunyikirisya araabha nikabhabhwira emisango jinu ejikorekena mu‑rwire? 13Atari‑wo omuunu woonewoone unu arajiiye mu‑rwire. Nawe anye Omwana wa Omuunu, naanye ꞉neejire okusooka mu‑rwire.

14“Omwanya gunu Abhayisirayeeri bhaariga bhari mw‑ibhara, Muusa ꞉aakonjere risusano rya injoka ya isyabha na okurisunga kw‑iti, korereki bhawone.#3:14 Ringira Obhukumi 21:4‑9. Nyabhuriko na anye Omwana wa Omuunu niryendwa okusungwa, 15korereki bhuri muunu unu kaanyikirisya, abhe na obhuwanga bhwa akajaanende koone.”

16Nyamuwanga eendere muno abhaanu bhoone bha ku‑chaaro kunu. Nikwo okukora ꞉aatumire Omwana waaye wenyere aaje ku‑chaaro kunu, korereki bhuri muunu unu keekirisya Omwana oyo aasiga okusimagira, tari abhe na obhuwanga bhwa akajaanende koone. 17Nyamuwanga ꞉ataatumire Omwana waaye ku‑chaaro kunu, korereki aramure abhaanu, tari ꞉aamutumire korereki abhaanu bhachungurwe okutura ku‑mwene. 18Nyamuwanga atakuramura abhaanu bhanu abheekirisya Omwana waaye. Nawe abhaanu bhanu bhatakumwikirisya, bharamuuywe kwa okubha bhateekirisiisye Omwana eenyere wa Nyamuwanga. 19Isonga ya okuramurwa kwebhwe ni ati, obhweru bhwijire ku‑chaaro kunu,#3:19 Ringira Yowana 1:4‑5. nawe abhaanu bheendere okubha mu‑chisuute okukira okubha mu‑bhweru, kwa okubha ebhikorwa bhyebhwe ni bhijabhi. 20Abhaanu bhoone bhanu abhakora ebhikorwa ebhijabhi, abhabhiyiririrwa obhweru obhwo. Bhatakwenda okuuja mu‑bhweru, korereki ebhikorwa bhyebhwe ebhijabhi bhyasiga okutuurwa abhweru. 21Nawe abhaanu bhoone bhanu abhakora ebhikorwa bhya obhurengeresi, abhaaja mu‑bhweru obhwo, korereki imenyekane ati, Nyamuwanga niwe kaabhayaana obhuturo bhwa okubhikora.

Yowana Omubhatiija kaasoosya obhubhambaasi inguru ya Yeesu

22Mbe, ejo jejire jaawa, Yeesu na abheeyigisibhwa bhaaye, nibheeyinda mu‑mukoowa gwa Yuudeya. ˆNaabha nabho eyo ku‑mwanya omurebhe, ˆnaabhatiijaga abhaanu. 23Yowana Omubhatiija wone aariga ˆnaabhatiija abhaanu mu‑rubhaara rwa Ayinooni, ayeeyi na oruguuyo rwa Saarimu. Eyo niyo gaariga gari amanji maafu, na abhaanu bhaamujaaga‑ko korereki abhabhatiije. 24Ku‑mwanya ogwo, Yowana aariga achaari okugwatwa na okutuurwa mw‑ibhoyero.

25Rusuku rumwi, abheeyigisibhwa bha Yowana nibhaamba okubhambasyanya na Omuyawudi umwi inguru ya itungwa ya okwiyesya. 26Niwo nibhagenda ku‑Yowana, nibhamubhwira ati, “Omwiyigisya, owichuka omuunu unu waariga uri aamwi nage ku‑ngego ya omusima gwa Yorodaani, na ꞉waasoosiisye obhubhambaasi inguru yaaye? Woori omuunu oyo wone kaabhatiija, na abhaanu bhoone abhawererera ku‑mwene!” 27Yowana ˆnaabhasubhya ati, “Omuunu atakutura okubhona echiinu choonechoone, araabha atayaaywe na Nyamuwanga. 28Emwe abheene muri bhabhambaasi bhaani ku‑jinu ꞉naayikire ati, ‘Anye nitari Kirisito, nawe Nyamuwanga ꞉aantumire korereki nitangatire Kirisito.’ 29Omumura unu ari na omwenga niwe omutwasi. Anye niri rwa omusaani wa omutwasi, niimereeguuyu ku‑mbari yaaye, na enikonderwa okuungwa jinu omutwasi kaayika. Chimari musango gunu gwankondisya muno. 30Jeenderwe Yeesu ayaanwe echibharo cha inguru muno, nawe anye niyaanwe echibharo cha emwaro muno.”

Emisango ja unu asookere mu‑rwire

31Unu asookere mu‑rwire, ari na obhuturo okukira abhaanu bhoone. Omuunu woonewoone wa ku‑chaaro, kaayika emisango ja ku‑chaaro kunu. Nawe unu asookere mu‑rwire, ari na obhuturo okukira abhaanu bhoone. 32Omwene kaasoosya obhubhambaasi inguru ya emisango jinu ꞉aarorere na okuungwa, nawe atari‑wo omuunu unu keekirisya obhubhambaasi bhwaye obhwo. 33Omuunu woonewoone unu keekirisya obhubhambaasi bhwaye, keeresya ati jinu Nyamuwanga kaayika ni ja chimari, 34kwa okubha Nyamuwanga ꞉aatumire Yeesu korereki aayike emisango jaaye. Nyamuwanga amuyaaye Mwoyo Mweru okurenga wuri. 35Raata Nyamuwanga eendere Omwana waaye, ka wone amuyaaye obhuturo inguru ya ebhiinu bhyone. 36Omuunu woonewoone unu keekirisya Omwana wa Nyamuwanga, oyo ari na obhuwanga bhwa akajaanende koone. Nawe woonewoone unu kaarema okumwikirisya, atari na obhuwanga obhwo, ka wone risungu rya Nyamuwanga erigenderera okubha inguru yaaye.

Currently Selected:

Yowana 3: jit

Highlight

Copy