Ruuka 7
7
Eriikirisya rya omwangarisi wa abhasirikare
(Mataayo 8:5‑13)
1Yeesu ejire aamara okubhwira echise cha abhaanu emisango ejo joone, ˆneengira mu‑musi gwa Kaperinaawumu. 2Mu‑musi ogwo, aariga ari‑mo omwangarisi wa abhasirikare bha Echiruumi. Omwangarisi oyo, aariga ari na omugaya waaye amwenderega muno. Nawe omugaya oyo aariga arwaye, ari yeeyi okufwa.
3Mbe, omwangarisi oyo, ejire oongwa emisango inguru ya Yeesu, ˆnaatuma abhakuru bha Abhayawudi ku‑Yeesu ati, “Mugende okumusabhwa ati, aaje awosye omugaya waani.” 4Abhakuru abho, bhejire bhaakinga ku‑Yeesu, nibhamwirembeeresya muno, nibhamubhwiraga ati, “Omwangarisi oyo, eeyire umuwosisye, 5kwa okubha keenda echaaro cheeswe, ka wone niwe ꞉aachuumbakiiye inju ya eriikofyanyo.”
6Mbe, Yeesu ˆneemuka aamwi na abhakuru abho, ˆnaagenda iika wa omwangarisi oyo. Bhejire bhaarebherera iika, omwangarisi oyo ˆnaatuma abhasaani bhaaye ku‑Yeesu, bhamubhwire ati, “Raatabhugenyi, siga okwinyaasya era. Anye niteeyire awe okwingira mu‑nju yaani. 7Nikwo okukora naarora ati, nitari na obhurambu noorwo niije kw‑awe. Nawe yayika omusango era, omugaya waani kaja okuwora. 8Noorwo anye wone, niri emwaro ya obhuturo bhwa abhaanu abhandi, niri na abhasirikare bhanu bhari emwaro ya obhuturo bhwani. Nikabhwira owumwi ati, ‘Nuugende,’ awoawo kaagenda. Ka wone, nikabhwira owundi ati, ‘Iija,’ wone awoawo kaaja. Omugaya waani wone, nikamubhwira ati, ‘Kora omurimu gunu,’ nyabhuriko kaakora.”
9Yeesu ejire oongwa emisango ejo, ˆnaaruguura muno. ˆNeekebhuukira, ˆnaaringira echise cha abhaanu ˆnaayika ati, “Ni chimari enibhabhwira ati, noorwo mu‑Bhayisirayeeri, nichaariga okurora omuunu owa eriikirisya enene rwa rinu.”
10Mbe, abhasaani bhanu bhaariga bhatumirwe bhejire bhaasubha iika wa omwangarisi oyo, nibhasongʼana omugaya waaye aaworere.
Yeesu kaasuurura omwana wa omutumbagasi
11Mwejo yende‑ko, Yeesu ˆnaagenda mu‑musi gwa Naayini, ari aamwi na abheeyigisibhwa bhaaye na abhaanu abhandi bhaafu. 12Ejire aarebherera mw‑irango rya omusi, ˆnaabhugana na abhaanu bhayangirega omutumbi. Omutumbi ogwo aariga ari musigaji umwi era ku‑nyiramwene, na nyiramwene aariga ari mutumbagasi. Omugasi oyo aamwi na abhaanu abhandi bha mu‑musi ogwo, bhaariga nibhagenda okusiika omutumbi ogwo.
13Raatabhugenyi ejire aarora omutumbagasi oyo, ˆnaamufwira echigongo, ˆnaamubhwira ati, “Siga okurira.” 14Yeesu ˆnaafogera kw‑iraro rinu ryariga riri‑ko omutumbi, ˆnaarikuunʼya‑ko. Abhaanu bhanu bhaariga bhayangire omutumbi ogwo, nibheemereeguru. Yeesu ˆnaabhwira omutumbi ogwo ati, “Mumura awe, enikubhwira ati, iimuka!” 15Awoawo omumura oyo ˆneemuka, ˆneenyanja, ˆnaamba okuroma rindi. Niwo Yeesu ˆnaamusubhya ku‑nyiramwene.
16Abhaanu abho bhoone, nibharuguura muno, nibhaamba okukusya Nyamuwanga, nibhaayikaga ati, “Omuragi omukuru unu eebhuka okusooka mw‑iswe!” Nibhaayika rindi ati, “Nyamuwanga aaja okusakira eswe abhaanu bhaaye!” 17Emisango ejo, nijimenyekana muno mu‑mukoowa gwone gwa Yuudeya, na mu‑mikoowa ejindi jinu jaariga jisiijeene nagwo.
Yeesu keeyigisya inguru ya Yowana Omubhatiija
(Mataayo 11:2‑19)
18Omwanya gunu Yeesu aariga ˆnaakora joone ejo, abheeyigisibhwa bha Yowana Omubhatiija, nibhareetera Yowana emisango ejo joone. 19Yowana wone ˆnaabhirikira abheeyigisibhwa bhaaye bhabhiri ˆnaabhatuma bhagende okubhuusya Raatabhugenyi Yeesu ati, “Chimenyere ati, Kirisito kaja okuuja. Angu, naawe, tere chirindirire owundi?”
20Abheeyigisibhwa abho, bhejire bhaakinga ku‑Yeesu, nibhamubhwira ati, “Yowana Omubhatiija aachituma kw‑awe, chikubhuusye ati, ‘Angu naawe unu kaaja, tere chirindirire owundi?’”
21Ku‑mwanya ogwoogwo, Yeesu aariga ˆnaawosya abhaanu bhaafu amarwara geebhwe. Aariga ˆnaawosya abhaanu bhanu bhaariga bhawungirwe na amasambwa. Ka wone ˆnaayaana abhawofu bhaafu obhuturo bhwa okurora.
22Niwo, Yeesu ˆnaabhasubhya ati, “Mugende mubhwire Yowana joone jinu mwarora na okuungwa. Mumubhwire ati abhawofu abharora, abharema abharibhata, abhagenge abheesibhwa, bhanu bhasibhirwe amatwi abhoongwa, abhafuuwe abhasuururwa, na abhataka abharaasibhwa Emisango ja Ekisi ja Nyamuwanga.#7:22 Omuragi Iisaya ꞉aaragire ati, Kirisito ariija okukora emisango ejo. Ringira Iisaya 35:5‑6, 61:1‑2. 23Ari na ribhando omuunu woonewoone unu atari na echiitimaato mu‑mwoyo gwaye inguru yaani!”
24Abheeyigisibhwa bha Yowana bhejire bhaasubha‑yo, Yeesu ˆnaamba okubhwira ebhise bhya abhaanu inguru ya Yowana. ˆNaabhabhuusya ati, “Omwanya gunu ꞉mwagendere ibhara, niki chinu ꞉mwagendere okuringira? Tere, ꞉mwagendere okuringira omuunu unu keekirisya emisango joone rwa orufunjo runu omuyaga ogusira enu na erya? Wuri! 25Mbe, ꞉mwagendere okuringira ki? Tere, ꞉mwagendere okuringira omuunu unu afwaye emyenda ja ekisi ja obhugusi obhurambu? Wuri! Ringira, abhaanu bhanu abhafwaraga emyenda ja ekisi ja obhugusi obhurambu na okwikondya ku‑bhwafu bhwa ebhiinu bhinu bhari nabhyo, abheekaraga mu‑nju ja echikama.
26“Woori, niki chinu ꞉mwagendere okuringira? Si, ꞉mwagendere okuringira omuragi omurebhe? Yee! Enibhabhwira ati Yowana ni muragi unu kaakira omuragi woonewoone. 27Mu‑Bhikaame Ebhyeru, Nyamuwanga kaasimura inguru ya Yowana, ˆnaabhwiraga Kirisito ati, ‘Ringira, enituma itumwa yaani imbere yaawo, akutangatire na okukwiraabhira injira.’#7:27 Ringira Maraaki 3:1.”
28Yeesu ˆnaayika rindi ati, “Anye enibhabhwira ati, mu‑bhaanu bhoone, atari‑wo mukuru okukira Yowana. Noorwo kutyo, mu‑bhukama bhwa Nyamuwanga, omutooto okukira abhandi, niwe omukuru okumukira.”
29Mbe, abhaanu abho bhoone, aamwi na abhatobhesya bha rigooti, bhejire bhoongwa emisango ejo, nibheekirisya ati obhutinge bhwa Nyamuwanga ku‑bheene bhwariga bhuri bhwa ekisi. Abhaanu abho nibho bhanu Yowana Omubhatiija ꞉aabhatiijiisye. 30Nawe Abhafarisaayo na abheeyigisya bha ebhiraagiro bhya Muusa, nibharema jinu Nyamuwanga aariga ˆneenda, kwa okubha ꞉bhaaremere okubhatiijibhwa na Yowana.
31Yeesu ˆnaayika rindi ati, “Abhaanu bha riyimbo rinu, nibhasusanye na ki? Ni bhaanu bha mbaga ki? 32Abhasusana na abhaana bhanu bheenyanjire mw‑iguriro, nibhabhirikira nibhaayikaga ati,
‘꞉Chaabhabhumiiye jikuri, nawe ꞉mutaabhinire!
꞉Chaabhembiiye jinyimbo ja obhusurumbaaye, nawe ꞉mutaaririre!’
33“Okubha, bhunu Yowana Omubhatiija ꞉eejire, omwene aariga atakurya emikaate, noorwo okunywa echifuufu.#7:33 Atakurya emikaate, noorwo okunywa echifuufu. Echifuufu na emikaate bhyariga bhiri bhiryo bhya bhuri rusuku ku‑Bhayawudi. Emwe nimwayika ati, unu awungirwe risambwa. 34Mbe woori, anye Omwana wa Omuunu niijire, enirya ebhiryo na eninywa echifuufu, ka abhaanu abhaayika ati, ‘Ringira! Unu ni munanamba na omukorwa, ka wone ni musaani wa abhatobhesya bha rigooti na abha ebhibhiibhi abhandi!’ 35Nawe noorwo kutyo, abhaanu bhanu abhayaana Nyamuwanga echibharo, abheeresya ati, obhwengeeso bhwaye ni bhwa echimari.”
Yeesu kaafwira echigongo owa ebhibhiibhi
36Aariga ari‑wo Omufarisaayo umwi, unu aariga ˆnaatogwa ati, Simooni. ꞉Aakumire Yeesu aaje arye ebhiryo. Niwo, Yeesu ˆneengira mu‑nju ya Omufarisaayo oyo, ˆneenyanja ku‑nenda. 37Mu‑musi ogwo, aariga ari‑mo omugasi umwi, unu aariga amenyekeene ati, ni owa ebhibhiibhi. Mbe, omugasi oyo, ejire oongwa ati Yeesu ari mu‑nju ya Omufarisaayo kaarya, omugasi oyo ˆnaaja ˆneengira omwo ari na ichupa ya arabhasita. Mu‑chupa eyo, gaariga gari‑mo amafuta ga ebhirange. 38ˆNeemereeguru ayeeyi ku‑maguru ga Yeesu. ˆNaamba okurira, amasiga gaaye gaariga nigatonyikira ku‑maguru ga Yeesu. Aamufwafuutaga amasiga ago na jifwiri jaaye, ˆnaabhuusu amaguru ga Yeesu na okugabhambaga amafuta aga ebhirange.
39Omufarisaayo oyo, ejire aarora ejo, ˆneeganirisya mu‑mwoyo gwaye ati, “Omuunu unu akabheeye ari muragi, akamenyere ati, omugasi unu kaamukuunʼya‑ko ni muunu wa mbaga ki. Akamenyere ati, omwene ni owa ebhibhiibhi!”
40Yeesu ˆnaabhwira Simooni ati, “Simooni awe, niri na omusango eneenda okukubhwira.” Simooni ˆnaamusubhya ati, “Omwiyigisya waani, nuumbwire.” Yeesu ˆnaayika ati, 41“Bhaariga bhari‑wo abhaanu bhabhiri, bhoone ku‑bhubhiri bhwebhwe bhaariga nibhatongwa jipirya na omuunu unu aariga abhabhanjire. Owumwi weebhwe, aatongwaga jidinaari#7:41 Jidinaari. Idinaari imwi yaariga niyingana na omuyeero gwa orusuku rumwi ku‑mukosi umwi wa emirimu. magana gataanu (500). Owundi, aatongwaga jidinaari makumi gataanu. 42Abhabhiri abho, bhejire bhaabhurwa jipirya ja okuriya amabhanja geebhwe, omubhaanji weebhwe ˆnaabhafwira echigongo. Angu mu‑bhabhiri abho, niga unu ꞉aamwendere muno okukira oweejaabho?” 43Simooni ˆnaamusubhya ati, “Eniiganirisya ati, ni urya ꞉aafwiriiywe echigongo ribhanja rinene.” Yeesu ˆnaamubhwira ati, “Waasubhya kisi.”
44Yeesu ˆneekebhuukira ˆnaaringira omugasi oyo, ˆnaabhwira Simooni ati, “Owurora omugasi unu? Omwanya gunu neengira mu‑nju yaawo munu, waankuma utanaana amanji ga okwosya amaguru gaani. Nawe omwene, oosya amaguru gaani na amasiga gaaye, na okugafwafuuta kwa jifwiri jaaye. 45Omwanya gunu waankeesya, utaambuusu wuri. Nawe omugasi unu, okusookerera neengira munu, achaari kusiga okubhuusu amaguru gaani. 46Utaabhambaga amafuta ku‑mutwe gwani okweresya echibharo. Nawe omwene, abhambaga amaguru gaani ebhirange. 47Kurwa ejo, enikubhwira ati, kwa okubha eryenda ryaye omugasi oyo kw‑anye ni ryafu, eyeeresya ati, ebhibhiibhi bhyaye bhyafu bhyafwiriiywe echigongo. Nawe, omuunu woonewoone unu afwiriiywe echigongo ebhibhiibhi bhitooto, oyo keeresya eryenda etooto era.”
48Yeesu ˆnaabhwira omugasi oyo ati, “Ebhibhiibhi bhyawo, bhyafwirwa echigongo.”
49Abhagenyi bhanu bhaariga bhari aamwi nage ku‑nenda, nibhaamba okubhuusyanya ati, “Unu niga, kaafwira echigongo noorwo ebhibhiibhi?”
50Awo, Yeesu ˆnaabhwira omugasi oyo ati, “Waachungurwa kwa okubha weekirisya! Nuugende na omurembe.”
Currently Selected:
Ruuka 7: jit
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
