Mataayo 17
17
Obhukuru bhwa Yeesu obhubhonekana inguru ya echiima
(Maariko 9:2‑13; Ruuka 9:28‑36)
1Jejire jaatura siku etaanu na rumwi, Yeesu ˆnaagega Peetero, Yakobho na Yowana omumura waabho. ˆNaariinya nabho ku‑chiima echireera muno, anu abhaanu bhaariga bhatari. 2Omwanya gunu bhaariga bharya‑wo, Yeesu ˆnaayinduka orususo rwaye imbere yeebhwe. Obhusu bhwaye nibhungʼarabhya rwa risuubha kutyo eriseekaana na emyenda jaaye nijingʼarabhya muno rwa omuumwi. 3Awoawo, abharagi Muusa na Yeeriya, nibhabhasoromokera, nibhasimuraga na Yeesu.
4Niwo Peetero ˆnaabhwira Yeesu ati, “Raatabhugenyi, ni kisi eswe okubha anu. Ukeekirisya, enija okuumbaka ebhiwuuna bhisatu. Echimwi chibhe chaawo, echindi chibhe cha Muusa na echindi chibhe cha Yeeriya.”
5Omwanya gunu Peetero aariga achaaroma, awoawo eriire rinu ryariga niringʼarabhya niriija na okubhafundikira. Nibheeya nibhoongwa obhuraka okusooka mu‑riire eryo nibhwayika ati, “Unu niwe Omwana waani omwendwa, niwe kaankondisya. Mumutegeresyega!”
6Abheeyigisibhwa bhaaye bhejire bhoongwa emisango ejo, nibhoobhaya muno, nibhagwa aasi bhwifumbike. 7Yeesu ˆnaabhaja‑ko, ˆnaabhakuunʼya‑ko, ˆnaabhabhwira ati, “Mwimereeguru, musige okuubhaya!” 8Bhejire bheenamusya ameeso geebhwe, ꞉bhataarorere omuunu, tari Yeesu eenyere.
9Omwanya gunu bhaariga bhachooromoka okusooka ku‑chiima okwo, Yeesu ˆnaabharagirira ati, “Mutarija okubhwira omuunu woonewoone jinu mwarora, okukingira omwanya gunu anye Omwana wa Omuunu, nirisuuruka okusooka mu‑bhafuuwe.”
10Abheeyigisibhwa bhaaye nibhamubhuusya ati, “Kurwa ki abheeyigisya bha ebhiraagiro bhya Muusa abhaayika ati, ni bhusibhusi Yeeriya atangate okuuja okwamba, Kirisito achaari okuuja?” 11Yeesu ˆnaabhabhwira ati, “Ni chimari Yeeriya aritangata okuuja, korereki achumechume emisango joone. 12Enibhabhwira ati Yeeriya areejire, nawe abhaanu ꞉bhataamusombookeeywe, nibhamukorera kubhiibhi rwa kutyo bheendaga. Nikwo kutyo anye wone Omwana wa Omuunu, bharinnyaasya.” 13Niwo abheeyigisibhwa bhaaye nibhasombookerwa ati Yeesu aariga ˆnaasimura inguru ya Yowana Omubhatiija.
Yeesu kaawosya omwana unu awungirwe risambwa
(Maariko 9:14‑29; Ruuka 9:37‑43)
14Yeesu na abheeyigisibhwa abhasatu abho bhejire bhaasubha ku‑chise chirya cha abhaanu, omuunu umwi ˆnaaja ku‑Yeesu, ˆnaamwifukamira. 15ˆNaabhwira Yeesu ati, “Raatabhugenyi, enisabhwa ufwire echigongo omwana waani! Okubha kaagwa echitwe na obhurwaye obhwo obhumunyaasya muno. Okwiya kaafu kaagwaga mu‑muriro amwi mu‑manji. 16꞉Naamusirire ku‑bheeyigisibhwa bhaawo korereki bhamuwosye, nawe ꞉bhaataamiibhwe.”
17Yeesu ˆnaayika ati, “Emwe muri bhaanu bha riyimbo rinu ritari na eriikirisya na rinu rinyamukire! Niribha na emwe okukingira rusuku ri? Niribheegumiirisya okukingira omwanya ki? Mureete omwana oyo anu!” 18Bhejire bhaamukingya, Yeesu ˆnaagonya risambwa rinu ryariga riri mu‑mubhiri gwaye, nirisooka‑mo. Awoawo, omwana oyo ˆnaawora.
19Nibheeya abheeyigisibhwa bha Yeesu nibhamujaa‑ko bhwitebhe, nibhamubhuusya ati, “Kurwa ki eswe, ꞉chaataamiibhwe okusoosya‑ko risambwa rirya?” 20Yeesu ˆnaabhasubhya ati, “Kwa okubha eriikirisya ryemwe ni tooto. Ni chimari enibhabhwira ati, araabha mukabha na eriikirisya rwa akaro ka iyaradaari, mwakaturire okubhwira echiima chinu ati, ‘Sooka anu, uje erya,’ echeene chikagendere. Kurwa ejo, chitaribha‑wo echiinu chinu chitariturikana kw‑imwe. [21Aamwi na ejo, risambwa rwa eryo mutakutura okurisoosya‑mo, tari kwa okusabhwa Nyamuwanga na okwiyima ebhiryo.]”
Yeesu kaayika rindi inguru ya okufwa na okusuuruka kwaye
(Maariko 9:30‑32; Ruuka 9:43‑45)
22Omwanya gunu Yeesu aariga ari aamwi na abheeyigisibhwa bhaaye Gariraaya eyo, ꞉aabhabhwiriiye ati, “Anye Omwana wa Omuunu, nirituurwa mu‑mabhoko ga abhaanu na bhariinyita. Nawe ku‑rusuku rwa kasatu, Nyamuwanga arinsuurura.” 23Abheeyigisibhwa bhaaye bhejire bhoongwa ejo, nibhasurumbara muno.
Yeesu kaatobha rigooti rya Riyekaru
24Yeesu na abheeyigisibhwa bhaaye bhejire bhaakinga Kaperinaawumu, abhaanu abharebhe bhanu bhaariga nibhatobhesya rigooti inguru ya Riyekaru rya Nyamuwanga,#17:24 Rigooti inguru ya Riyekaru rya Nyamuwanga. Omwanya ogwo, bhuri musigaji wa Echiyawudi unu aariga akingiisye emiguuga makumi gabhiri amwi ambusiisye awo, ꞉aakenerwe okusoosya rigooti bhuri muguuga inguru ya okuumbaka Riyekaru rya Nyamuwanga. Jipirya ejo, jaariga nijingana na omuyeero gwa emirimu gwa siku ebhiri. Ringira Okwimuka 30:13‑16; 2 Emisango ja Emyanya 24:9‑14; Neemiya 10:32. nibhaaja ku‑Peetero. Nibhamubhuusya ati, “Angu, omwiyigisya weemwe wone kaatobhaga rigooti rya Riyekaru rya Nyamuwanga?” 25ˆNaamusubhya ati, “Cha, kaatobhaga.”
Niwo Peetero ˆneengira mu‑nju. Nawe achaari okwayika omusango gwonegwone, Yeesu ˆnaamba okumubhuusya ati, “Simooni, angu awe owurora kutiki? Abhakama bha echaaro chinu abhatobhesya rigooti ku‑bhaana bheebhwe, amwi abhatobhesya ku‑bhandi era?” 26Peetero ˆnaamusubhya ati, “Abhatobhesya ku‑bhandi.” Yeesu ˆnaamubhwira ati, “Araabha nikwo kutyo, mbe abhaana bheebhwe bhafwiriiywe echigongo okutobha rigooti. 27Nawe chaasiga okufuruurusya abhaanu bhanu, genda ku‑nyanja weese rirobho mu‑manji. Iiswi inu uritangata okukoma, uyaasamye omunwa gwayo, owuja okusongʼana‑mo ipirya. Ugege ipirya eyo, ugende untobhere rigooti utobhe na eryawo.”
Currently Selected:
Mataayo 17: jit
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
