Mataayo 19
19
Okutwarana na okutaana
(Maariko 10:1‑12)
1Yeesu ejire aamara okwayika emisango ejo, ˆnaasooka Gariraaya eyo, ˆnaatura ku‑chaaro chinu chiri ku‑ngego ya omusima gwa Yorodaani ˆnaagenda mu‑mukoowa gwa Yuudeya. 2Ebhise bhyafu bhya abhaanu nibhamuruubha eyo, omwene ˆnaawosya abharwaye bheebhwe.
3Niwo Abhafarisaayo abharebhe nibhaaja ku‑Yeesu korereki bhamuregeeje. Nibhamubhuusya ati, “Angu ebhiraagiro bhya Muusa ebhiikirisisya omurume okutaana na omugasi waaye ku‑songa yooneyoone irya?” 4Yeesu ˆnaabhasubhya ati, “Muchaariga okusoma mu‑Bhikaame Ebhyeru ati okusookerera ku‑bhwambiro bhwa obhubhumbi, ‘Nyamuwanga ꞉aabhumbire omurume na omugasi’?#19:4 Ringira Obhwambiro 1:27. 5Nyamuwanga ˆnaayika ati, ‘Ku‑songa eyo, omumura arisiga esemwene na nyiramwene, arigwatana na omugasi waaye, abho ku‑bhubhiri bhwebhwe bharibha omubhiri gumwi.’#19:5 Ringira Obhwambiro 2:24. 6Kurwa ejo, bhataribha bhabhiri rindi, tari bharibha omubhiri gumwi. Mbe, abhaanu bhanu Nyamuwanga agwatanyiisye aamwi, omuunu woonewoone aasiga okubhataaganya.”
7Abhafarisaayo abho, nibhamubhuusya rindi ati, “Kurwa ki Muusa ꞉aaragiriiye ati omurume ayaane omugasi waaye inyarubha ya obhutaani na okumusiga?” 8Yeesu ˆnaabhasubhya ati, “Muusa ꞉aabheekirisisiisye ati mutaane na abhagasi bheemwe kwa okubha emyoyo jeemwe ni mikomeeye okwiyigisibhwa, nawe okusookerera ku‑bhubhumbi, obhwo bhwariga bhutari obhukarariiye bhwa Nyamuwanga. 9Enibhabhwira ati omurume woonewoone unu kaataana na omugasi waaye, itari ku‑songa ya okumugwata echiroogi, neeya ˆnaatwara omugasi owundi, omurume oyo kaakora obhuromesi. Omurume unu kaatwara omugasi unu aasigwa, wone kaakora obhuromesi.”
10Niwo abheeyigisibhwa bhaaye nibhaayika ati, “Araabha emisango ja omurume na omugasi waaye nikwo kutyo jiri, ni akiri kusiga okutwara!” 11Yeesu ˆnaabhasubhya ati, “Bhatari abhaanu bhoone bhanu abhatura okwikirisya omusango gunu omwayika, tari bhanu Nyamuwanga ayaanire obhuturo bhwa okusiga okutwara. 12Enaayika kutyo, kwa okubha bhari‑wo abharume abhandi bhanu bhatakutwara kwa okubha bheebhuuywe bhari bhajigaru. Abhandi bhatakutwara kwa okubha abhaanu bhabhakonere korereki bhasige okwibhura. Ka wone, bhari‑wo abhandi bhanu bhatakutwara inguru ya obhukama bhwa mu‑rwire. Omuunu woonewoone unu kaatura okwikirisya omusango ogwo, agwikirisye.”
Yeesu kaayaana abhaana abharera amabhando
(Maariko 10:13‑16; Ruuka 18:15‑17)
13Mbe, abhaanu abharebhe nibhareetera Yeesu abhaana abharera, korereki abhakuunʼye ku‑mitwe na okubhasabhirwa amabhando. Nawe abheeyigisibhwa bhaaye nibhagonya abhaanu abho.
14Yeesu ˆnaabhwira abheeyigisibhwa bhaaye ati, “Musige abhaana abharera bhaaje kw‑anye! Musige okubhagaanya, kwa okubha obhukama bhwa mu‑rwire ni bhwa abhaanu bhoone bhanu bhari rwa abhaana bhanu.” 15Yeesu ˆnaakuunʼya‑ko abhaana abho, ˆnaabhasabhirwa amabhando, neeya ˆnaasooka awo.
Obhukomeeye bhwa omuniibhi okwingira mu‑bhukama bhwa Nyamuwanga
(Maariko 10:17‑31; Ruuka 18:18‑30)
16Niwo omusigaji umwi ˆnaaja ku‑Yeesu, ˆnaamubhuusya ati, “Omwiyigisya, angu, nikore musango ki gwa ekisi korereki nibhone obhuwanga bhwa akajaanende koone?” 17Yeesu ˆnaamusubhya ati, “Kurwa ki owumbuusya inguru ya omusango gwa ekisi? Rora, Nyamuwanga wenyere niwe wa ekisi! Nawe araabha oweenda okwingira mu‑bhuwanga bhwa akajaanende, ugayukega ebhiraagiro bhya Nyamuwanga.” 18Omusigaji oyo ˆnaamubhuusya ati, “Ebhiraagiro ebhyo ni bhiiya?” Yeesu ˆnaamusubhya ati, “Waasiga okwita, waasiga okukora obhuromesi, waasiga okwibha, waasiga okusoosya obhubhambaasi bhwa orubheeyi, 19uyaane esomwana na nyokomwana echibharo, wendega oweejaanyu rwa kutyo owiyenda omwene.”#19:18‑19 Ringira Okwimuka 20:12‑16; Orwichuko rwa Ebhiraagiro 5:16‑20; Abharaawi 19:18.
20Omusigaji oyo ˆnaayika ati, “Nigayukire ebhiraagiro ebhyo bhyone. Ni chiinu ki echindi chinu nigerukiiywe?” 21Yeesu ˆnaamubhwira ati, “Araabha oweenda okubha omuunu unu akuumiiye, genda ugusye ebhiinu bhyone bhinu uri nabhyo, jipirya jinu uribhona, ugabhire abhataka. Urikora kutyo uribhiikira ebhibhiikwa mu‑rwire. Urimara, uuje unduubhe.” 22Omusigaji oyo ejire oongwa omusango ogwo, ˆnaagenda asurumbaaye, kwa okubha aariga ari muniibhi muno.
23Niwo Yeesu ˆnaabhwira abheeyigisibhwa bhaaye ati, “Ni chimari enibhabhwira ati, jiribha bhikomeeye muno omuniibhi okwingira mu‑bhukama bhwa mu‑rwire. 24Enibhabhwira rindi ati, ni bhwangu ingamiya okwiyiganya mw‑iwundu rya isinga, okukira omuniibhi okwingira mu‑bhukama bhwa Nyamuwanga!”
25Abheeyigisibhwa bhaaye bhejire bhoongwa kutyo, nibharuguura muno, nibhamubhuusya ati, “Mbe niga unu kaatura okuchunguka?” 26Yeesu ˆnaabharoreerera nekeneke, ˆnaabhabhwira ati, “Ku‑bhaanu ogwo gutakuturikana, nawe ku‑Nyamuwanga joone ejiturikana.”
27Peetero ˆnaamubhwira ati, “Ringira, eswe chisigire bhuri chiinu chikuruubhire awe! Mbe, eswe chiribhona ki?” 28Yeesu ˆnaabhasubhya ati, “Ni chimari enibhabhwira ati, anye Omwana wa Omuunu niriinyanja rwa omukama ku‑chitebhe chaani cha rikusyo mu‑chaaro echiyaaya. Niwo emwe wone bhanu munduubhire, muriinyanja ku‑bhitebhe bhya obhutungi ekumi na bhibhiri, okuramura jingʼanda ekumi na ebhiri ja Abhayisirayeeri.#19:28 Ringira Danyeeri 7:9‑14; Iisaya 65:17. 29Mbe, omuunu woonewoone unu asigire inju yaaye, amwi abhamura bhaabho, amwi abhayara bhaabho, amwi esemwene, amwi nyiramwene, amwi abhaana bhaaye, amwi amabhwi inguru yaani, ariramira bhyone ku‑bhwafu muno. Aamwi na ejo, aribhona obhuwanga bhwa akajaanende koone. 30Nawe abhaanu bhaafu bhanu bhatangatire woori, bharisingirira. Ka wone, abhaanu bhaafu bhanu bhasingiriiye woori, bharitangata.”
Currently Selected:
Mataayo 19: jit
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
