Zãn 4

Yiezu àá Samari hṹnu dɔ̀ bòo

1Ɛ́ Yiezu dũnɛ kɛ́ ɓɛ́ Farizĩɛɓɛ ɛ́ ɲɛ́ hɔ́ lɛ kɛ́ ɓɛ́ kɛ̀ránzɛ̀ɓɛ̀ lɛ á hṹn yí ɛ̀ líiníkɛ hɔ ɲumu hũn ɛ́ buò pɔ a Zãn bán. 2Kɛ́ á yí Yiezu míte ǹ ɛ́ te ɓɛ nìnbirìe ɛ́ líiníkɛ hɔ́ ɲumu hũn, kɛ́ ɓɛ́ iè piè kɛ̀ránzɛ̀ɓɛ̀. 3Ɛ́ hɔ́ lɛ ɛ́ Yiezu ɲɛ́ hɔ́ lɛ ɓɛ́ nìnbirìe ɛ́ bie piè bòo hũn, á lɔ́ hɔ́ Zudee pɛ̃̀hɛ̃ hũn ɛ́ khũ̀a vaá-vɛ hɔ Kalile pɛ̃̀hɛ̃. 4Kɛ́ á den fɔ́ɓán à zɔ cánkɛ́ hɔ́ Samarí ɛ̀ dàá lé vɛ yán. 5Á van dɛ̃un Samari lóo dɔ̀ lɛ yèrè ɓɛ́ nɛ Sisaare, lɛ ɛ́ lúwi à Zakɔɔbu mún lɛ á hàarí lɛ́ mí zuú Zozɛɛfu ǹ. 6Hɔ̀ iè yán ápe Zakɔɔbu buì ɛ́ wi nin. Ɛ́ lé wṹn benlɔ́ tànɓiì ɛ́ lɛ́ ɛ́ Yiezu van kɛsí lépe buì sɔ ɲunù. Hɔ́rɔsí ɛ̀ lè wurù ɛ́ yòó wi le sí tĩ́ihṹ.

7Ɛ́ Samari hṹnu dɔ̀ van ɓɛrɛ ɛ́ mii ɓen hĩ́ ɲumu. Ɛ́ Yiezu ɛ́ zɔn bie lɛ́ à ǹ nɛ làa: «Hɛ̃ mi àá ɲumu nɛ n ɲu.» 8Hɔ̀pe sí ɛ́ wé kɛ́ Yiezu kɛ̀ránzɛ̀ɓɛ̀ ɛ́ van zɔ̀n lè lóo hũn nɛ ɓɛ́ vɛ zɔ yɛ̀ bɔ̀díe. 9Á Samari hṹnu zɔn bie lɛ́ Yiezu ǹ nɛ làa: «Hɔ̀ kɛ wiɛ ɛ́ kɔ́pe lɛ iè ɔ̀ Zuifu ɛ́ dàa ɓɛrɛ ɛ́ hɔ̀ ɲumu lɛ ɛ́ ɲu ɛ̀ hɛ̃un ǹpe lɛ iè ɔ̀ Samari hṹnu viì?» — Ɓɛ̀ Zuifuɓɛ ɛ́ den yáà kóo ɓánlɔ̀n à ɓɛ́ Samari siè hùúu#4.9 Vɛ màaní le viì lɛ àá Liike 9.52-53.. 10Ɛ́ Yiezu zɔn bie lɛ́ à ǹ nɛ làa: «Kɛ́ kɔ́ hṹn dũ hɔ bòo lɛ ɛ́ Dɔfĩn mii hɛ̃ àá ɓɛ́ nìnbirìe, ɛ̀ kɔ̀ lò hṹn dũ ape lɛ ɛ́ bie àá kɔ nɛ kɔ hɛ̃mí àá ɲumu nɛ mí ɲú, ɛ́ kɔ́pe kɔ̀te ǹ ɛ́ hṹn ɓén hɛ̃un hɔ̀ ɲumu piè viì, á hṹn ɓén lɛ́ hɔ́ ɲumu lɛ wóò lɛ́ lé mɛkɛ̃nì kɔ ǹ.» 11Á hṹnu zɔn nɛ làa: «Kɛ̀ránlɔ, kɔ́ lò yí dàa ɲumu hĩ́nlán puì, ɛ̀ le buì lò ni. Ɛ́ hɔ́ ɲumu lɛ wóò lɛ́ lé mɛkɛ̃nì ɛ́ kɔ́ wo kɔ́ lé àá yí? 12Kɔ́ wìe pɔ a pe kè zĩkĩ́n Zakɔɔbu lɛ te le buì sɔ lɛ ɛ́ lɛ́ kiè ǹ? Àpe kùusɔ ɲun pelè ɲumu àá mí nìɛ àá mí bìlaàsiè.» 13Ɛ́ Yiezu ɛ́ zɔn kɔ̃́niɛ ɔ̀ nɛ làa: «Nìnbírɔ yée nìnbírɔ lɛ ɲun hɔ̀pe ɲumu lɛ, ɛ́ ɲɛ-hĩní ɛ́ ɓen bĩní ɛ́ ɓé. 14Kɛ́ álɛ ɛ́ ɲun hɔ̀ ɲumu lɛ ɛ́ nin lɛ́ à ǹ, ɛ́ ɓàasɔ ɛ́ ɲɛ-hĩni ɛ́ yá bĩní ɓé yá mi wɛ̀. Ɛ̀ hɔ̀ ɲumu lɛ nin lɛ́ ɓàasɔ ǹ ɛ́ ɓén dĩ̀ń kɛ̀a ɲun-kɛ̃nù ɓàasɔ viì, lèpe lɛ lé mɛkɛ̃nì lɛ yá vé ɛ́ wóò zɔ lé hũn.» 15Á hṹnu ɛ́ zɔn bie lɛ́ à ǹ nɛ làa: «Ɲunsɔ, lɛ́ hɔ́ ɲumu sɔ mi ǹ, bòo lɛ ɛ́ wé ɛ̀ ɲɛ-hĩni bí bĩní ɓé mi wɛ̀. Ɛ̀ ǹ wo bí bĩní ɓen hĩ́ ɲumu hũ̀nún wɛ̀.» 16Ɛ́ Yiezu zɔn khɛ́ lɛ́ à ǹ nɛ làa: «Vɛ ve mì bɛ́rɔ ɛ̀ kɔ̀ khũ̀á ɓen lé hũ̀nún.» 17Á hṹnu zɔn nɛ mí yí dàa bɛ́rɔ wɛ̀. Ɛ́ Yiezu zɔn bie lɛ́ à ǹ nɛ làa: «Kɔ̀ bòo tĩ ɛ̀ kɔ̀ bie nɛ kɔ́ yí dàa bɛ́rɔ wɛ̀. 18Iè hɔ̀ lɛ ɛ́ kɔ́ yan báa hùanú khieniɛ, àpe lɛ ɛ́ kɔ́ dàa kɛsí kɛ̀a sáalɛ ɛ́ yí mì bɛ́rɔ wɛ̀. Ɛ́ kɔ́ munkɛa bɔ̀berà.» 19Á hṹnu zɔn wũama nɛ làa: «Ɲunsɔ, ń loo kɛ́ kɔ́ iè Dɔfĩn bɔ̀háanírɔ.» 20Kìe zĩkĩ́nɓɛ̀ Samari siè ɛ́ ɓàaniɛ hɔ̀pe Dɔfĩn lè ɓúkìe sɔ lɛ lɔ̀n#4.20 Ɓɛ̀ Samari siè ɛ́ den hàarí yí Zuifuɓɛ hɛ̀lɛ̀lɛ̀ wɛ̀. Ɛ́ ɓɛ́ wo hàarí yóò van wɔ́ ɓɛ́ Dɔfĩn ɓàanílén lè ɓúkìe lɛ ɓɛ́ wóò nɛ Karizim lɔ̀n. Ɛ́ lé ie pe ɓúkìe sɔ ápe hṹnu ɛ́ nɛ̀., kɛ́ mípe Zuifuɓɛ ɛ́ den wo nɛ le dáanú lɛ ɛ́ ké fɔ́ɓán ɛ̀ kè wóò ɓàaní hɔ́pe Dɔfĩn hũn ɛ́ wi àá Zerizalɛɛmu. 21Ɛ́ Yiezu zɔn kɔ̃́niɛ ɔ̀ nɛ làa: «Dɛsĩ̀ mi ǹ, lè yìi dɔ̀ ɛ́ vaá-ɓen, ɛ̀ lè yá ɓén wé lépe ɓúkìe sɔ lɛ lɔ̀n, tàá Zerizalɛɛmu hũn ɛ́ mí wóo ɓén ɓàaní-ɛ Yàá Dɔfĩn nin wɛ̀. 22Mìpe Samari siè, mí wóò ɓàaní Dɔfĩn kɛ́ mí lò yí dũ Hɔ wɛ̀. Ɛ̀ kèpe Zuifuɓɛ, ké wóò ɓàaní hɔ̀ ǹ kɛ́ ké dũ hɔ, iè hɔ̀ lɛ ɛ́ hɔ́ fuerɛ̀ ɛ́ lɔ́ àá képe Zuifuɓɛ viì. 23Kɛ́ yìi dɔ̀ vaá-ɓen, ɛ́ lé lò yɛ̀rɛ́ ɓɛrɛ dɛ̃un vɔ́, lɛ ɛ́ Dɔfĩn ɓàaníriè àá bɔ̀bín ɛ́ wóo ɓén ɓàaní-ɛ pe Yàá Dɔfĩn kɛ́ pehɔ̀ Mɛkɛ̃ni ɛ́ te peɓɛ̀ híɛhɔ́ ɛ́ dú hɔ̀ bɔ̀berà hũn. Iè hɔ̀ lɛ ɛ́ sí iè ɓɛ̀pe Dɔfĩn ɓàaníriè lɛ ápe Yàá Dɔfĩn ɛ́ cɛ̀. 24Dɔfĩn iè Mɛkɛ̃ni, ɛ́ ɓɛ́lɛ ɛ́ ɔ̀ ɓàanínin ɛ́ fɔ́ɓán ɛ̀ ɓɛ̀ wóo ɓàaní-ɛ̀ ǹ kɛ́ piè Mɛkɛ̃ni ɛ́ te peɓɛ̀ híɛhɔ́ dú hɔ́ bɔ̀berà hũn.» 25Á hṹnu zɔn bie lɛ́ à ǹ nɛ làa: «Ń dũ kɛ́ á Masiya lɛ iè ɔ̀ fuenírɔ ɛ́ vaá-ɓen, à iè ɔ̀pe lɛ ɛ́ ɓɛ́ wóò ve nɛ Kirisa. Kɛ́ á ɓen ɓɛrɛ, á ɛ́ munkɛ hɔ bòo míkùi ɲún ɛ́ lɛ́ kiè ǹ.» 26Ɛ́ Yiezu zɔn kɔ̃́niɛ ɔ̀ nɛ làa: «Ǹpe lɛ ɛ́ bie àá kɔ ɛ́ iè ɔ̀pe.»

27Hɔ́rɔsí ɛ̀ Yiezu kɛ̀ránzɛ̀ɓɛ̀ ɛ́ van khũ̀a lɔ́ lé lóo hũn ɛ́ ɓɛrɛ dɛ̃un. Ɛ́ hɔ́ lɛ ɛ́ ɓɛ́ ɓɛrɛ yú-o kɛ́ àá bie àá hṹnu, ɛ́ hɔ́ hɛ̀ yòokɛa peɓɛ̀ lɔ̀n. Kɛ́ ádɔ̀ ɛ́ yí hĩ̀ mí tĩì ɛ̀ zɔ̀ dìe ɔ̀ ǹ nɛ: «Hɔ ńɓùo ɛ́ kɔ́ nɛ a wé?» Tàá «Hɔ ńɓùo ɛ́ kɔ́ ɛ́ bie àá ɔ́?» 28Á hṹnu sɔ wo fùrɛ̀sí mí ńcúin ǹ à zɔ van zɔn lè lóo hũn, ɛ́ zɔn bie lɛ́ ɓɛ́ nìnbirìe ǹ nɛ làa: 29«Mì ɓen lé húi ɔ́ nùún dɔ̀ lɛ ɛ́ bie niǹ bòo lɛ ɛ́ ń wɔ́ míkùi; kɛ́ á hɛ̀ yí-e pe Masiya?» 30Ɛ́ ɓɛ́ nìnbirìe ɛ́ zɔ́n lɔ́ lé lóo hũn ɛ́ lɔ́ kã́a Yiezu.

31Hɔ̀pe sí pɛ̃̀hṹ wé kɛ́ piè kɛ̀ránzɛ̀ɓɛ̀ ɛ́ ɔ̀ pɛ̀ ɛ́ nɛ làa: «Kɛ̀ránlɔ, síɛ dí bòo.» 32Kɛ́ Yiezu den zɔn nɛ làa: «Ń dàa dínlɔ́ dɔ̀ lɛ ɛ́ nín dí lɛ ɛ́ mípe ɛ́ yí dũ wɛ̀.» 33Ɛ́ piè kɛ̀ránzɛ̀ɓɛ̀ ɛ́ wo khie bie ɓán hũn nɛ làa: «À dɔ̀ iè wìe ɛ́ ɓɛrɛ lɛ́ bòo lɛ ɛ́ dí ɔ̀ ǹ yée?» 34Ɛ́ Yiezu zɔn bie lɛ́ ɓà ǹ nɛ làa: «Niǹ dínlɔ́ iè hɔ̀ lɛ ɛ̀ ǹ wí-e lɛ te nin tɔrɛ tĩì bòo, ɛ̀ ǹ wé hɔ́ bòo lɛ á dɔ́ niǹ núnú hũn nɛ n wé, ɛ̀ tíiní ɲunù. 35Mí wóò bie nɛ: “Hũ̀nún àá ńpĩ́ihɛ̃̀ bɔ̀nbɔ̀ nɛ́ ɛ̀ hɔ̀ bòo mìirɔ́ ɛ́ wo dɛ̃un.” Kɛ́ ńpe ɛ́ bie nɛ mi húi hɔ́ múuhɛ̃ sãàní: hɔ̀ bɔ̀díe ɛ́ wo bɔn, ɛ́ wo fɔ́ɓán àá hɔ́ mìirɔ́. 36Àlɛ ɛ́ hɔ̀ bòo ɛ̀ mìí ɛ́ wóò yí mí sàanín, ɛ̀ hɔ̀pe bòo lɛ á ɛ́ mìí ɛ́ iè ɓɛ̀ nìnbirìe lɛ á wóò cɛ̀ ɛ̀ kóo ɓánlɔ̀n, nɛ ɓɛ yí lé mɛkɛ̃nì lɛ yá vé. Ɛ́ kɛ̀amu, álɛ ɛ́ hɔ̀ bòo ɛ̀ zì àá ɔ́lɛ ɛ́ hɔ̀ mìí ɛ́ dàa ɓɛ páaní wɛní ɓɛ́te. 37Ɛ́ sí iè hɔ̀pe ɛ́ lé wĩ̀i lɛ ɛ́ ɓɛ́ wóò wĩ̀ nɛ: “Àdɔ̀ wóò zì, àdɔ̀ ɛ̀ ɓen mìí” ɛ́ dàa bɔn. 38Ń tɔrɛ miɛ nɛ mi vɛ mìí hɔ́ bòo lè mún lɛ ɛ́ mí yí tɛ́ tɔnlɔ́ hũn wɛ̀. Ɓɛ̀dɔ̀ temu tɛ́ lé mún sɔ hũn, ɛ́ mípe ɛ́ ɓɛrɛ zɔn peɓɛ̀ tɔnlɔ́ hũn, ɛ́ páaníɛ zɔn yú pehɔ̀ tũ̀nú àá ɓɛ́.»

39Ɛ́ ɓɛ́ Samari siè lɛ wi hɔ́ lóo sɔ hũn cɛ̀rìɛɛ ɛ́ dũmuasɛ̃̀ Yiezu ǹ iè hɔ̀ lɛ ápe hṹnu sɔ ɛ́ bie lɛ́ ɓà ǹ ɛ́ nɛ làa: «À bie niǹ bòo lɛ ɛ́ ń wɔ́ míkùi ɛ́ lɛ́ mi ǹ.» 40Ɛ́ bòo lɛ ɛ́ ɓɛ́ Samari siè sɔ ɛ́ ɓen lɔ́ yú-o, ɛ́ ɓɛ́ ɓɔ́nɓɔ́niɛ ɔ̀ ǹ nɛ a kansí àá ɓɛ́. Ɛ́ Yiezu wɔ́ wihĩ́ bɔ̀nbɔ̀ ɲu yán. 41Ɛ́ nìnbirìe bìkuì ɛ́ bĩniɛ dũmuasɛ̃̀-a ǹ piè bòo lɛ á hṹn bie bòo hũn. 42Ɛ́ ɓɛ́ khíe ɛ́ bie lɛ́ á hṹnu ǹ ɛ́ nɛ: «Hɔ̀ wo bĩniɛ yí hɔ́ bòo lɛ ɛ́ kɔ́ bie lɛ́ kiè ǹ temu lɛ́ ɛ́ ké dàa dũmuasɛ̃̀ wɛ̀. Kɛ́ hɔ́ iè hɔ̀ lɛ ɛ́ képe kète ǹ ɛ́ ɲɛ́ piè bòo, ɛ́ ké wo dũ kɛ́ á iè pe dímíɲɛ́ Fuenírɔ àá bɔ̀bín.»

Bɛ́zuú tɔntɛ́ nì-bɛhɔ́ dɔ̀ zuú wiɛnírɔ́

43Ɛ́ hɔ́ lɛ ɛ́ Yiezu wɔ́ wihĩ́ bɔ̀nbɔ̀ ɲu lè viì mu hũn vɔ́, á hĩ́nà cɔ́ van Kalile pɛ̃̀hɛ̃ hũn. 44Àpe Yiezu míte ǹ ɛ́ bie nɛ Dɔfĩn bɔ̀háanírɔ ɛ́ ɓà kùrú cɛ̃̀mɛ̀nɛ́ siè ɛ́ yáà mɛ̀ndɛ̃ wɛ̀. 45Kɛ́ hɔ́ lɛ á van dɛ̃un Kalile, ɛ́ ɓɛ́ Kalile siè ɛ́ perɛ a ǹ sãàniɛ, iè hɔ̀ lɛ ɛ́ ɓɛ́ ɓiɛ̀ hṹn van lè Nyiewɛlɔn sɛ́rí hɔ̀ Zerizalɛɛmu hũn ɛ́ ɓɛ́ mɔn hɔ̀ bòo lɛ á wɔ́ míkùi lè sérí mu hũn. 46Ɛ́ Yiezu ɛ́ sĩ̀n khie van hɔ̀ Kanan lóo, hɔ̀ Kalile pɛ̃̀hɛ̃ hũn, lè viì lɛ á zɔn zɛ̀niɛ hɔ̀ ɲumu ɛ́ wɔ́ àá hɔ́ divɛ̃n hũn. Ɛ́ bɛ́zuú tɔntɛ́ nì-bɛhɔ́ dɔ̀ ɛ́ hṹn wi Kapɛrɛnayiimu lóo hũn kɛ́ pie zuú ɛ́ dɔ cɛ̃̀un. 47Á ɲɛ́ ɛ̀ ɓɛ̀ nɛ Yiezu lɔ́ hɔ́ Zudee pɛ̃̀hɛ̃ ɛ́ ɓɛrɛ hɔ̀ Kalile pɛ̃̀hɛ̃ hũn, á yòó van yú-o à ɓɔ́nɓɔ́niɛ ɔ̀ ǹ nɛ a ɓen síɛ hɔ́ Kapɛrɛnayiimu, ɛ́ síɛ wiɛní mí zuú lɛ dɔ dɔ ɛ́ mii hí. 48Ɛ́ Yiezu zɔn bie lɛ́ à ǹ nɛ làa: «Mí wiɛ dàa ɓen yí mi yéréké bòo, àá bòo lɛ ɲɛùn yí wé yí mi ɛ̀ mì yá dɛsĩ̀?» 49Ápe bɛ́zuú tɔntɛ́ nì-bɛhɔ́ sɔ ɛ́ zɔn nɛ làa: «Ɲunsɔ, ɓen síɛ dɛ̃ nin yíe kɛ́ niǹ zuú ɲɛùn yí hí wɛ̀.» 50Ɛ́ Yiezu zɔn bie lɛ́ à ǹ nɛ làa: «Lan ɓɔ, kɔ̀ zuú ɛ́ wan.» Á nùún sɔ ɛ́ dũmuasɛ̃̀ Yiezu bienù sɔ ǹ, á khie cɔ́. 51Ɛ́ bòo lɛ á lɔ́ wi le wṹn lɔ̀n ɛ́ vaá-ɓɔ, ɛ́ piè tɔntɛ́riè ɛ́ ɓɛrɛ sɛ̃́ piè híɛhɔ́ ɛ̀ ɓɛ̀ bie lɛ́ à ǹ nɛ làa: «Kɔ̀ yɛ̀nù ɛ́ wan.» 52Á zɔn ɓɛ̀ dìenin nɛ hɔ iè waàwurù á dàa yòó dɛ̃̀ sãa? Ɛ́ ɓɛ́ zɔn nɛ hɔ iè ɲuhṹ, kɛ́ lé wurù ɛ́ wo háa khie fĩ́i ɛ́ piè tɛkɛ-benlè dàa yòó lɔ́ piè lɔ̀n. 53Á yàá ɛ́ wo dũnɛ kɛ́ lé iè pe yìi sɔ hũn ɛ́ Yiezu dàa bie lɛ́ à ǹ nɛ piè zuú ɛ́ yìe wi. Ápe àá mí zũnù nìɛ ɓɛ́kùi ɛ́ wo dũmuasɛ̃̀ Yiezu ǹ. 54Lɛ iè Yiezu yéréké bòo ńɲuunín lɛ á wɔ́ hɔ́ Kalile pɛ̃̀hɛ̃ hũn, lè yìi lɛ á dàa van lɔ́ hɔ́ Zudee pɛ̃̀hɛ̃ ɛ́ ɓɛrɛ hɔ̀pe Kalile pɛ̃̀hɛ̃ hũn.

Currently Selected:

Zãn 4: bwj

Highlight

Copy