Liike 18

Lè wĩ̀i lɛ ɛ́ Yiezu ɛ́ wɛ̃̀ à lìe lèrɔ dɔ̀ àá ɔ́ mɛ-hṹnu dɔ̀ bòo hũn

1Ɛ́ Yiezu ɛ́ bĩniɛ khie wɛ̃̀ lè wĩ̀i lɛ ɛ̀ lɛ́ mí kɛ̀ránzɛ̀ɓɛ̀ ǹ ɛ́ dàa mii zɛ̃́ní lɛ́ ɓà ǹ nɛ ɓɛ fɔ́ɓán ɛ̀ ɓɛ̀ wóò hɛ̃un Dɔfĩn fúu ɛ́ bí tɛ mi wɛ̀. Á zɔn nɛ làa: 2«Lìe lèrɔ dɔ̀ lɛ yá Dɔfĩn ɛ̀ zán à lò yá kànɓi nìnbírɔ ɛ́ hàarí wi lóo dɔ̀ hũn. 3Ɛ̀ mɛ-hṹnu dɔ̀ ɛ́ ɓiɛ̀ hàarí wi lepe lóo sɔ hũn. Ápe mɛ-hũnu sɔ ɛ́ hàarí wóò ɓen ɔ̀pe lìe lèrɔ sɔ viì fúu ɛ̀ ɓen bie lɛ́ à ǹ nɛ a sɛ mí ɲunù ɓá ńbíyanle lɛ wɔ́ khɔn àá mí núnú hũn. 4Kɛ́ fúu, à lìe lèrɔ den wóò pĩ́ nɛ mí yá wé hɔ́ wɛ̀. Á wɔ́ yú á nɛ: “Hɔ̀ bɔn kɛ́ ń yá Dɔfĩn ɛ̀ zán ɛ̀ ǹ lò yáà kànɓi nìnbírɔ wɛ̀. 5Kɛ́ hɔ́ lɛ ápe mɛ-hṹnu sɔ lɛ ɛ́ wóò ɓen dìń tiɛní mi fúu, ɛ́ nin tɛ leń piè bòo yìe, bòo lɛ ɛ́ wé à bí wóo ɓen tiɛní wɛ̀.”» 6Ɛ́ Ɲunsɔ Yiezu ɛ́ zɔn bie sĩiniɛ ɛ́ nɛ làa: «Ɛ́ mí húi hɔ́ bòo lɛ ápe lìe lèrɔ lɛ yá cã̀aní ɛ́ bie lò! 7Ɛ́ hɔ́ ɓen kɛ́ Dɔfĩn, ɛ̀ mì dũń saàní kɛ́ Hɔ́ ɓén sɛ mí nìɛ ɲunù, ɓɛ̀pe lɛ ɛ́ wóò bénkɛ Hɔ̀ ǹ sṹnúhṹn àá wiɛhɔ. Mì dũń sãàní kɛ́ Hɔ̀ yá ɓén míi ɛ́ dàá sĩiní ɓɛ́ wɛ̀. 8Nin khɛ́ hɔ́ lɛ́ miɛ ǹ nɛ Hɔ ɓén sɛ peɓɛ̀ ɲunù fùa fùa. Kɛ́ á nìnbírɔ Zuú ɛ́ den ɓen ɓɛ̃́nkie khũ̀a vaá-ɓen, á iè wìe ɛ́ ɓén ɓén yí nìnbirìe lɛ dũmuasɛ̃̀ à ǹ lè sṹsùnù?»

Farizĩɛ dɔ̀ àá lànpó-férɔ dɔ̀ Dɔnfín hɛ̃nnɛ̀

9Ɛ́ Yiezu ɛ́ bĩniɛ khie wɛ̃̀ lè wĩ̀i dɔ̀ ɛ̀ nɛ̀ ɓɛ̀ nìnbirìe lɛ wóò nùún ɛ̀ ɓɛ̀ nɛ ɓɛ́pe ɛ́ cã̀aní Dɔfĩn híɛhɔ́, lɛ yìe yáà tí ɓɛ́lɛ kɛ́ ɛ́ nɛ làa: 10«Nìnbirìe bìɛ ɲu dɔ̀ ɛ́ van yòó lé Dɔfĩn zũ-bɛhɔ́ hũn ɛ́ ɓɛ yòó vɛ hɛ̃un Dɔfĩn. À wìcóoní iè Farizĩɛ à sí kɛ́ iè lànpó-férɔ. 11Á Farizĩɛ ɛ́ van dɛ̃̀ dɛ̃̀nlɔ́ ɛ́ dàa ɛ́ Dɔfĩn ɛ̀ hɛ̃nnin nɛ: “Dɔfĩn nín kɔ̀ bɛrikɛ ɛ̀ dé iè hɔ̀ lɛ ɛ́ ǹ yí kɛ kɛ̀a ɓɛ́ nìnbirìe lɛ kɛ́ wɛ̀. Ɓɛ̀pe lɛ iè ɓɛ̀ kɛ̃̀múa àá bɔ̀konwériè àá ɓɛ́ hɛ̃́fériè. Nín kɔ̀ bɛrikɛ ɛ̀ dé iè hɔ̀ lɛ ɛ́ ǹ yí kɛ kɛ̀a ɔpe lànpó-férɔ lɛ wɛ̀. 12Ń wóò lì niǹ ɲunù yìɛhɛ̃̀ ɲu sítĩnlɔ́ hùuɲu hũn. Niǹ bòo lɛ ń wóò yí míkùi, ɛ́ pehɔ̀ bòo pírúlán ɛ́ ǹ wóò leń ɛ̀ lɛ́ kɔ̀ ǹ.” 13À lànpó-férɔ pe khɛ̃̀nɛ van dɛ̃̀, à yɛ̀rɛ́ yí tɛ̀ nɛ mí yòó húi àá hóohũn, kɛ́ á den fɛ̃́nɛsí mí ɲún ɛ́ dàá mí ńwékemù ɛ̀ zɛ̃́ní lɛ́ Dɔfĩn kɛ́ á ɛ́ bie ɛ́ nɛ: “Dɔfĩn, mi niǹ miinɛ̀, ǹpe lɛ iè ɔ̀ bɔ̀konwé.”» 14Ɛ́ Yiezu zɔn khɛ́ sĩiniɛ ɛ́ nɛ làa: «Ɛ́ nin khɛ́ hɔ́ lɛ́ miɛ ǹ nɛ ape lànpó-férɔ ɛ́ Dɔfĩn ɛ̀ tɛ̀ bòo á dàa khũ̀a síɛ van mí yíe kɛ́ hɔ́ yí tɛ̀ à Farizĩɛ bòo wɛ̀. Iè hɔ̀ lɛ ɛ́ nìnbírɔ lɛ wóò ɓàaní míte ǹ ɛ́ ɓɛ́ ɓén síɛnínin, àlɛ ɛ́ wóò síɛní míte ǹ ɛ́ ɓɛ́ ɓén hóoní.»

Dɔfĩn bɛ́záanú ɛ́ bòo sɛ̃̀ ɓɛ̀lɛ ɛ́ kɛ́ kɛ̀a ɓɛ zĩncãahɛ̃

Mat 19.13-15; Mar 10.13-16

15Ɛ́ ɓɛ́ nìnbirìe dɔ̀ ɛ́ van dàa ɓɛ zĩncɛ́-cíini ɛ́ dàa ɓɛrɛ nɛ Yiezu bè mí níhĩ́ peɓɛ̀ lɔ̀n, à dúɓɛ́ ɓà ǹ. Ɛ́ piè kɛ̀ránzɛ̀ɓɛ̀ ɛ́ mɔn hɔ̀, ɛ́ ɓɛ́ khie ɛ́ fi àá ɓàasiè sɔ. 16Kɛ́ Yiezu den nɛ ɓɛ dàá ɓɛ́pe zĩncãahɛ̃ sɔ dàá ɓen à khie bie lɛ́ mí kɛ̀ránzɛ̀ɓɛ̀ ǹ nɛ làa: «Mì fùansí ɓɛ́ zĩncãahɛ̃ ǹ nɛ ɓɛ ɓen niǹ viì, ɛ̀ mì bí si ɓɛ wɛ̀. Iè hɔ̀ lɛ ɛ́ Dɔfĩn bɛ́záanú ɛ́ bòo sɛ̃̀ ɓɛ̀pe nìnbirìe lɛ kɛ kɛ̀a ɓɛ ǹ. 17Nín bie hɔ lɛ́ miɛ ǹ àá bɔ̀bín nɛ nìnbírɔ kɛ́ á yí tɛ̀ Dɔfĩn bɛ́záanú bòo kɛ̀a zĩncáahɔ́ bòo sí, á yí dɛ̀ yán yá zɔ wɛ̀.»

Zufìɛ bòo ɓàasɔ dɔ̀ bòo

Mat 19.16-30; Mar 10.17-31

18Ɛ́ Zuifuɓɛ hándí dɔ̀ ɛ́ zɔn ɛ́ Yiezu dìenin ɛ́ nɛ làa: «Kɛ̀ránlɔ sãanù, hɔ ńɓùo iè pe ɛ́ ń fɔ́ɓán ɛ̀ ǹ wé ɛ̀ dàá yí lé mɛkɛ̃nì lɛ yá vé?» 19Ɛ́ Yiezu ɛ́ zɔn ɔ̀ dìenin nɛ làa: «Kɔ wiɛ dàa ɛ́ nìn ve nɛ nìsãanù? Nìnbírɔ dɔ̀ lɛ sãa ɛ́ mí kɛ́ Dɔfĩn mí dòonún ɓen bòo mí. 20Kɔ́ dũ hɔ bòo lɛ ɛ́ Dɔfĩn nɛ a nìnbírɔ ɛ́ fɔ́ɓán à wé lò: “Bí fé hã́a tàá báa wɛ̀; bí ɓé nìnbírɔ wɛ̀; bí kɛ̀mɛkɛ bòo wɛ̀; bí ɓúu ɓúo ɛ̀ bè nìnbírɔ dɔ̀ lɔ̀n wɛ̀; mɛ̀ndɛ̃ mì yàá àá mì nín.”» 21Á biɛ̀ sɔ ɛ́ zɔn kɔ̃́niɛ nɛ làa: «Hɔ̀pe sí míkùi ɛ́ nín wé ɛ̀ dàá vɛ mìí niǹ zĩncɛmu fúu ɛ̀ ɓen dɛ̃̀ zoòni.» 22Ɛ́ hɔ́ lɛ ɛ́ Yiezu ɲɛ́ hɔ́pe sí, á zɔn bie lɛ́ à ǹ nɛ làa: «Bɔ̀cóoní dɔ̀ ɛ́ kɛ́ wi yán iè pe ɛ́ kɔ́ fɔ́ɓán ɛ̀ kɔ̀ bĩní wé: vɛ yìɛní kɔ́ yírɛ́ míkùi, ɛ̀ sankɛ màa ɛ̀ lɛ́ ɓɛ́ nìkherà ǹ, ɛ́ kɔ́ den ɓén yí yírɛ́ bɔ̀kuì hɔ̀ hóohũn. Ɛ̀ pehɔ̀ máahṹ, ɛ̀ kɔ̀ ɓen bè niǹ máahṹ.» 23Ɛ́ hɔ́ lɛ á biɛ̀ ɛ́ ɲɛ́ hɔ́, ɛ́ piè híɛhɔ́ ɛ́ hɛ̀ yòó yàá míkùi, iè hɔ̀ lɛ á dàa bòo cɛ̃̀un. 24Ɛ́ Yiezu ɛ́ mɔn hɔ̀ lɛ ɛ́ piè híɛhɔ́ yàá á zɔn bie nɛ làa: «Hɔ̀ hɛ̀ hie ɛ̀ ɓɛ̀ bòo ɓàasiè ɛ̀ zɔ Dɔfĩn bɛ́záanú. 25Lɛ ɛ̀ ɲúkṹmì ɛ̀ zɔ khíi àá mísĩ́mí kṹun ɛ́ den pɛ́ wuawi pɔ hɔ lɛ ɛ̀ bòo ɓàasɔ ɛ̀ zɔ Dɔfĩn bɛ́záanú.» 26Ɛ́ ɓɛ́lɛ ɛ́ hṹn ɔ̀pe Yiezu bòo lɛ á bie ɲí, ɛ́ khie ɛ́ bie ɛ́ nɛ: «Á wo iè wieni ɛ́ temu dɛ̀ ɓén fueń?» 27Ɛ́ Yiezu zɔn kɔ̃́niɛ ɓɛ̀ nɛ: «Hɔ̀ bòo lɛ ɛ́ nìnbirìe ɛ́ yí dɛ̀ yá wé ɛ́ Dɔfĩn ɛ́ pe dɛ̀ wóò wé lò.» 28Ɛ́ Piɛre ɛ́ wo zɔn nɛ làa: «Ɛ́ kɔ́ húi, lɛ iè kèpe ɛ́ wo fùɛrɛ̀sí ké bòo míkùi ǹ, ɛ̀ kè bɔ̀ kɔ̀ máahṹ.» 29Ɛ́ Yiezu ɛ́ zɔn bie lɛ́ ɓá ǹ ɛ́ nɛ làa: «Nín bie hɔ lɛ́ miɛ ǹ àá bɔ̀bín nɛ nìnbírɔ kɛ́ á lɔ́ à fùɛrɛ̀sí mí zũnù ǹ, tàá ɓá hṹnu, tàá ɓá zɛ̀ɓɛ̀, tàá ɓá yàá àá ɓá nín, tàá mí zĩncãahɛ̃ Dɔfĩn bɛ́záanú yènsénín, 30á ɓén yí hɔ́ ɓà ńmaà yìe bɔ̀kuì hɔ̀pe zoòni wihĩ́ lɛ hũn, kɛ́ yìrí máahṹ à ɛ́ bĩní yí lé mɛkɛ̃nì lɛ yá vé.»

Yiezu ɛ́ mí húmu àá mí vìerɔ́ bòo bie kɛ̀a yìehɛ̃̀tĩ́lán

Mat 20.17-19; Mar 10.32-34

31Ɛ́ Yiezu ɛ́ vɔn mí kɛ̀ránzɛ̀ɓɛ̀ pírú àá nìɛ ɓɛ̀ ɲu ɛ́ khɛ̀nɛ khie van ɛ́ bie lɛ́ nin nɛ làa: «Mí loo, lɛ iè kèpe ɛ́ wo yòó vaá-vɛ hɔ́ Zerizalɛɛmu, ɛ́ hɔ́ bòo lɛ ɓɛ́ Dɔfĩn bɔ̀háaníriè ɛ́ wɛ̃́ míkùi á nìnbírɔ Zuú bòo hũn ɛ́ ɲunù mii yòó vɛ tí. 32Ɓɛ̀ Zuifuɓɛ ɓén yòó vɛ́ dí-e ɓɛ̀ nìnbirìe lɛ yí ɓɛ́ Zuifuɓɛ núnú hũn, ɛ́ ɓàasiè ɛ́ fí-e ɛ́ khíi yáakɛ, ɛ́ tòokɛ, ɛ̀ ɓɛ̀ ɛ́ khàaníkɛ ɛ́ kóo lɔ̀n. 33Ɓɛ̀ ɓén nàa ɔ àá hɔ́ ńhùiehĩ́, ɛ̀ ɓɛ̀ ɛ́ khíi ɓí-e. Kɛ́ pehɔ̀ wihĩ́ bɔ̀nbɔ̀tĩlán zɔn, á ɛ́ vìé.» 34Kɛ́ ɓɛ́ kɛ̀ránzɛ̀ɓɛ̀ ɛ́ den yí dũń bòo dɔ̀ hɔ̀pe lɛ á bie hũn wɛ̀. Hɔ̀ biehĩ́ sɔ ɲún ɛ́ tànkɔ̀niɛ ɓà ǹ ɛ́ ɓɛ́ yí dũń bòo lɛ ɛ́ Yiezu nɛ̀ wɛ̀.

Mui dɔ̀ wiɛnírɔ́ Zeriko lóo hũn

Mat 20.29-34; Mar 10.46-52

35Ɛ́ Yiezu ɛ́ van Zeriko lóo ɛ̀ lúwinínin. Ɛ̀ mui dɔ̀ ɛ́ kɛsí lé wṹn ɲunù ɛ́ hɛ̃nkɛ. 36Á ɲɛ́ ɓɛ́ nìzã̀amáa lɛ ɛ́ khíi tɛmu ǹ, á dìe nɛ hɔ iè ńɓùo? 37Ɛ́ ɓɛ́ nɛ a iè Nazarɛɛte nùún Yiezu temu ɛ́ khíi. 38Á zɔn ɓerɛ nɛ: «Daviide Zuú Yiezu, mi niǹ miinɛ̀.» 39Ɛ́ ɓɛ́lɛ wi hɔ́ híɛhɔ́ ɛ́ khie fi àá ɔ nɛ a hĩì. Kɛ́ á den wookɛa zɔn ɛ́ bénkɛ cɛ̃̀un ɛ́ nɛ: «Daviide Zuú, mi niǹ miinɛ̀.» 40Ɛ́ Yiezu ɛ́ dɛ̃̀ à nɛ ɓɛ dàá ɔ́ dàá ɓen. Ɛ́ bòo lɛ á mui ɛ́ van dɛ̃un Yiezu viì, ɛ́ Yiezu ɛ́ zɔn ɔ̀ dìenin nɛ: 41«Hɔ ńɓùo ɛ́ kɔ́ wɛ nɛ ǹ wé lɛ́ kɔ̀ ǹ?» Á zɔn nɛ: «Ɲunsɔ, lɛ́ nɛ n bĩní wóo mi bòo.» 42Ɛ́ Yiezu zɔn nɛ: «Ɛ́ kɔ wo mi bòo! Kɔ̀ ńdɛsìnlɔ́ ɛ́ wiɛniɛ kɔ.» 43Ɛ́ mí laà hũn, ɛ́ piè yìe ɛ́ yòó loo bòo. Á wo khie bɔ̀ Yiezu máahṹ ɛ́ Dɔfĩn ɛ́ ɓàanínin. Ɛ́ ɓɛ́ nìzã̀amáa ɛ́ mɔn hɔ̀, ɛ́ ɓɛ́ ɓiɛ̀ khie ɛ́ Dɔfĩn ɓàaníniǹ.

Currently Selected:

Liike 18: bwj

Highlight

Copy