Liike 2

Yiezu tenlɔ́ bòo

Mat 1.18-25

1Ɛ́ pehɔ̀ yìi hũn, á Rɔmu bɛ́zu-bɛhɔ́ Okiise ɛ́ lerɛ lè vɛhṹ dɔ̀ ɛ́ nɛ ɓɛ́ mì mí bɛ́záanú nìɛ ɓɛ́kùi. 2Ɛ́ hɔ́pe hán nìɛ mìnlɔ́ sɔ ɛ́ wɔ́ kɛ́ á Kiriniyiise ɛ́ temu iè Kuvɛrɛnɛɛre hɔ̀ Sírí cɛ̃̀mɛ̀nɛ́ ɲún hũn. 3Ɛ́ ɓɛ́ nìnbirìe ɓɛ́kùi, ɛ́ hɔrɔ wóò hĩ́ní vɛ ɓá lóo hũn, ɛ̀ vɛ lɛ́ mí yèrè ɛ̀ ɓɛ̀ wĩ́. 4Á Zozɛɛfu ɛ́ zɔn lɔ́ hɔ́ Kalile pɛ̃̀hɛ̃ lóo dɔ̀ lɛ ɛ́ ɓɛ́ nɛ Nazarɛɛte ɛ́ yòó van hɔ̀ Zudee pɛ̃̀hɛ̃ lóo dɔ̀ lɛ ɓɛ́ nɛ Bɛtilehɛɛmu, à bɛ́zuú Daviide ɓà lóo hũn, iè hɔ̀ lɛ ápe Zozɛɛfu kùusɔ iè Daviide hũn yɛ̀nù dɔ̀. 5Á van lɛ́ mí yèrè ɛ́ ɓɛ́ wɛ̃́ àpe àá ɓán ńtɛ̃́un Maari lɛ póo wi. 6Ɛ́ hɔ́ lɛ ɛ́ ɓɛ́ wi hɔ Bɛtilehɛɛmu hũn, á Maari tenlɔ́ ɛ́ van dɛ̃un. 7Á tɔn mí hán yɛ̀nù ɛ́ ɓúrɛ nin àá lé pɔnkɔ̀rɔ́ ɛ́ síɛ daaniɛ ɓɛ̀ bìlaàsiè díe dìɛ hũn iè hɔ̀ lɛ ɛ́ ɓɛ́ yí yí danlén ɓɛ̀ nɛ̀hãà làalén wɛ̀.

Bòo lɛ ɛ́ mɛlɛkɛ dɔ̀ ɛ́ dàa zɛ̃́niɛ míte ɓɛ̀ pisieriè dɔ̀ ǹ

8Ɛ́ pisieriè dɔ̀ ɛ́ hàarí wi hɔpe pɛ̃̀hɛ̃ sɔ hũn; ɓɛ̀ hàarí wóò cãakɛ hɔ maa ɛ̀ sie ɓɛ́ pirìe. 9Ɛ́ Ɲunsɔ mɛlɛkɛ dɔ̀ ɛ́ ɓɛrɛ zɛ̃́niɛ míte ɓà ǹ, ɛ́ Ɲunsɔ ɓàarɔ́ ɛ́ siɛ cieniɛ ɓà ǹ àá ńpiemu, ɛ́ ɓɛ́ hɛ̀ zɛ́rɛ cɛ̃̀un. 10Á mɛlɛkɛ ɛ́ zɔn bie lɛ́ ɓà ǹ ɛ́ nɛ làa: «Mì bí Zãn wɛ̀ iè hɔ̀ lɛ ɛ́ lé iè Bentĩnu ɛ́ nin ɓen khɛ́ lɛ́ miɛ ǹ, lè Bentĩnu sɔ ɛ́ ɓén wiɛni ɓɛ́ nìnbirìe ɓɛ́kùi tĩɛ̀ cɛ̃̀un: 11hɔ̀pe zoòni sṹnúhṹn lɛ, à Daviide ɓà lóo hũn, ɛ́ mí fuenírɔ ɛ́ tɔn; à iè Kirisa, à iè Ɲunsɔ. 12Ɛ́ lɛ iè bòo lɛ ɛ́ temu mii lɛ́ ɛ̀ mì dàá dũń ɔ́: mí ɓén vɛ tɛ̀rɛ́ ńdìdí dɔ̀ kɛ́ ɓɛ́ híɛkɛa ɔ̀ ǹ àá hɔ́ pɔnkɔ̀-níhĩ́ ɛ́ siè daaniɛ ɓɛ̀ bìlaàsiè díe dìɛ hũn.» 13Ɛ́ mí laà hũn, ɛ́ ɓɛ́ pisieriè ɛ́ ɓɛ́ húi ɛ̀ hóohũn mɛlɛkɛɓɛ bìkuì dɔ̀ ɛ́ paaniɛ ɛ́ Dɔfĩn ɛ̀ ɓàanínin àá ɔ́pe mɛlɛkɛ lɛ ɛ́ ɓen zɛ̃́niɛ míte ɓà ǹ ɛ́ nɛ làa:

14«Nɛ Dɔfĩn yèrè ɓàaní hɔ́ hóohũn lɛ sɔ́n sɔ́n hũn,

ɛ̀ nɛ ɓɛ nìnbirìe lɛ ɛ́ Hɔ́ wɛ ɛ̀ yí lé hũn-wiɛ̀ le sṹsùnù lɔ̀n!»

15Ɛ́ hɔ́ lɛ ɛ́ ɓɛ́ mɛlɛkɛɓɛ ɛ́ khũ̀a yòó cɔ́ van hɔ̀ hóohũn, ɛ́ ɓɛ́ pisieriè ɛ́ khie ɛ́ biekɛ ɛ̀ lɛ́kɛ́ ɓá ǹ ɛ́ nɛ làa: «Mì nɛ ke vɛ hɔ Bɛtilehɛɛmu, ɛ̀ vɛ mi hɔpe bòo lɛ wɔ́, hɔ̀pe lɛ á Ɲunsɔ ɛ́ zɛ̃́niɛ kie ǹ.» 16Ɛ́ ɓɛ́ hĩ́nà lìɛkɛasí cɔ́ van yán, ɛ́ van tɛ̀rɛa ɔ̀ Zozɛɛfu àá Maari àá ɔ́pe ńdìdi lɛ ɛ́ ɓɛ́ daaniɛ ɓɛ̀ bìlàasiè díe dìɛ hũn. 17Ɛ́ hɔ́ lɛ ɓɛ́ mɔn ɔ̀, ɛ́ ɓɛ́ bie hɔ̀ bòo lɛ á mɛlɛkɛ ɛ́ hṹn khɛ́ lɛ́ ɓà ǹ àpe zĩncáahɔ́ sɔ bòo hũn. 18Ɛ́ ɓɛ́ nìnbirìe ɓɛ́kùi lɛ ɲɛ́ hɔ́pe bòo lɛ ɛ́ ɓɛ́ pisieriè ɛ́ hṹn bie, ɛ́ hɛ̀ bɔ̀dũmunù vũnun míkùi. 19Kɛ́ á Maari ɛ́ pe den bɔ̀ hɔ́pe sí míkùi mí tĩì lɔ̀n, ɛ́ mí hũn ɛ̀ vɛ̀ pehɔ̀ lɔ̀n. 20Ɛ́ ɓɛ́ pisieriè ɛ́ khie khũ̀a cɔ́, ɛ́ lɔ́ ɛ́ Dɔfĩn ɛ̀ ɓàanínin hɔ̀ bòo lɛ ɛ́ ɓɛ́ ɲɛ́ àá hɔ́ lɛ ɛ́ ɓɛ́ mɔn bòo hũn, iè hɔ̀ lɛ ɛ́ hɔ́ ɛ́ wɔ́ kɛ̀a bòo lɛ á mɛlɛkɛ ɛ́ dàa khɛ́ hɔ́ lɛ́ ɓà ǹ.

Yiezu yèrè cénlɔ́

21Ɛ́ hɔ́ lɛ á zĩncáahɔ́ ɛ́ tɔn ɛ́ pehɔ̀ wihĩ́ hùutĩ ɲunù van tú, lɛ á wo sãawi à ɛ̀ fĩ̀, ɛ́ ɓɛ́ cɔ́ piè yèrè nɛ Yiezu, lèpe yèrè lɛ á mɛlɛkɛ zɛ̃́niɛ kɛ́ piè póo ɛ́ ɲɛùn yí tì wɛ̀.

Ɓɛ̀ dàa Yiezu ɛ́ van ɛ́ zɛ̃́ní Dɔfĩn zũ-bɛhɔ́ hũn

22Ɛ́ hɔ́ lɛ ɛ́ Zozɛɛfu àá Maari te tiɛrɔ sítĩnlɔ́ ɲunù ɛ́ van tú, lɛ ɛ́ ɓɛ́ wo sãawi ɛ̀ ɓɛ̀ vɛ leń ɓɛ́ te tiɛrɔ bòo kɛ̀a bòo lɛ á Moyiize làndɛ́ dàa bie hɔ̀, ɛ́ ɓɛ́ dàa ɔ̀ zĩncáahɔ́ ɛ́ dàa yòó van hɔ̀ Zerizalɛɛmu ɛ́ ɓɛ́ vɛ zɛ̃́ní Ɲunsɔ Dɔfĩn, 23kɛ̀a bòo lɛ ɛ́ hɔ́ dàa wɛ̃́ ápe Ɲunsɔ làndɛ́ vɛ̃̀hṹ hũn ɛ́ nɛ ápe Ɲunsɔ ɛ́ nɛ a hán wiè lɛ tɔn lɛ iè ńbɛ́rɔ ɛ́ bòo ɛ́ sɛ̃̀ mí ǹ, 24ɛ̀ ɓɛ̀ wo leń ńɲípɔhĩ́ bìɛ ɲu tàá ńmɛǹɓóohɛ̃ bìfùa bìɛ ɲu ɛ̀ wé àá miyiɛ́, kɛ̀a bòo lɛ ɛ́ hɔ́ dàa wɛ̃́ ápe Ɲunsɔ làndɛ́ vɛ̃hṹ hũn.

25Hɔ́rɔsí ɛ̀ nùún dɔ̀ ɛ́ hàarí wi hɔpe Zerizalɛɛmu lóo hũn lɛ yèrè ɓɛ́ nɛ Simiɲɔn. Àpe nùún sɔ ɛ́ hàarí ɛ́ cã̀aní à lò ɛ́ Dɔfĩn ɛ̀ mɛ̀ndɛ̃; à hàarí ɛ́ Yizarayɛɛle fuenírɔ ɛ̀ hìé, ɛ̀ lè Mɛkɛ̃n-Sãanu ɛ́ hàarí wi piè lɔ̀n. 26Lèpe Mɛkɛ̃n-Sãanu ɛ́ den hàarí zɛ̃́niɛ lɛ́ à ǹ nɛ a yá ɓén hí kɛ́ yí bòo lɛ á mɔn ɔ̀ Kirisa vɔ́, àpe fuenírɔ lɛ ɛ́ Ɲunsɔ Dɔfĩn ɛ́ tɔrɛ. 27Ɛ́ lé Mɛkɛ̃n-Sãanu ɛ́ wo lɛ́ á Simiɲɔn ɛ́ ɓɛrɛ lè Dɔfĩn zũ-bɛhɔ́ hũn. Ɛ́ hɔ́ lɛ á zĩncáahɔ́ Yiezu ɓà nìɛ ɛ́ van dàa ɔ̀ ɛ́ dàa ɓɛrɛ ɛ́ ɓɛ ɓen wé hɔ́ bòo lɛ á Moyiize làndɛ́ khɛ́, 28ɛ́ Simiɲɔn ɛ́ fɔ́-a ɛ́ yòó dàanin mí bàanì hũn, à zɔn ɛ́ Dɔfĩn bɛrikɛ ɛ̀ dé ɛ́ nɛ làa:

29«Ɲunsɔ, kɛ̀a sáalɛ ɛ́ kɔ́ tíiniɛ kɔ̀ bienù ɲunù;

Ɛ́ kɔ́ wo fùansí kɔ́ tɔntɛ́ Simiɲɔn nɛ a lan àá hũn-wiɛ̀.

30Iè hɔ̀ lɛ ɛ́ niǹ yìe ɛ́ mɔn hɔ̀ fuenírɔ lɛ ɛ́ lɔ́ àá kɔ́ viì,

31Hɔ̀pe fuenírɔ́ lɛ ɛ́ kɔ́ sɛ́sɛ́a hɔ̀ dàa míkùi nìɛ bòo hũn.

32Hɔ̀pe fuenírɔ́ sɔ ɛ́ iè ńpiemu lɛ ɛ́ mii ciení hɔ́ dàa míkùi nìɛ ǹ,

Ɛ̀ hɔ̀ lɛ́ ɓàarɔ́ kɔ̀ nìɛ Yizarayɛɛle nìɛ ǹ.»

33Ɛ́ Simiɲɔn bòo lɛ á ɛ́ bie ɔ zĩncáahɔ́ bòo hũn ɛ́ hɛ̀ yòokɛ̀a ɓà yàá àá ɓà nín lɔ̀n. 34Ɛ́ Simiɲɔn ɛ́ wo dúɓɛ́a ɓà ǹ à zɔn bie lɛ́ á Yiezu ɓà nín Maari ǹ ɛ́ nɛ làa: «Dɔfĩn ɛ́ munɛ àpe zĩncáahɔ́ sɔ lɛ ɛ́ mii dàá kùení nìnbirìe bìkuì, à lò ɓiɛ̀ hóoní nìnbirìe bìkuì Yizarayɛɛle hũn; à ɓén wé Dɔfĩn bòo zɛ̃́nílán lɛ ɛ́ ɓɛ́ nìnbirìe bìkuì ɛ́ ɓén pĩ́ bòo. 35Ɛ́ ɓɛ́ nìnbirìe bìkuì hũn bòo á ɓén leń ɛ́ líení hɔ́ yíe. Ɛ̀ kɔ̀pe Maari, hɔ̀ víɛ ɛ́ ɓén zɔ ɲí kɔ̀ ǹ kɛ̀a ie khɛ̃́nlé lɛ cú kɔ́ tĩì ǹ bòo sí.»

36Ɛ̀ hṹnu dɔ̀ ɛ́ lò ɓiɛ̀ hàarí wi yán kɛ́ á iè Dɔfĩn bɔ̀háanírɔ; piè yèrè ɛ́ ɓɛ́ hàarí nɛ Aanɛ, ɛ̀ ɓà yàá yèrè ɛ́ ɓɛ́ nɛ Fanuyɛle, lɛ hàarí iè Azɛɛre ɓà dàa nùún dɔ̀. Àpe Aanɛ ɓà ńyentímu bɛ́rɔ ɛ́ hàarí kɛrɛ ɓánlɔ̀n àá ɔ́ lɔ́líe hùuɲu hũn à khie húrun. 37Á wo khie kɛsí ɛ́ wɔ́ á mɛ-hṹnu fúu ɛ́ piè lɔ́líe ɛ́ van yú kìmí àá bɔ̀nbɔ̀ nɛ́. À hàarí ɛ́ yáà lé lépe Dɔfĩn zũ-bɛhɔ́ hũn wɛ̀, à hàarí ɛ́ Dɔfĩn tɔnlɔ́ ɛ̀ tɛ́ sṹnúhṹn àá wiɛhɔ́: à hàarí wóò lì mí ɲunù, à hɛ̃un Dɔfĩn. 38Á ɓiɛ̀ van ɓɛrɛ pehɔ̀ yìi hũn ɛ́ ɓɛrɛ ɛ́ Dɔfĩn bɛrikɛ ɛ̀ dé kɛ́ á ɛ́ Yiezu bòo ɛ̀ bie ɛ̀ lɛ́ ɓɛ́ nìnbirìe ɓɛ́kùi lɛ hṹn ɛ́ hìé nɛ Dɔfĩn fuení Zerizalɛɛmu ǹ.

39Ɛ́ hɔ́ lɛ ɛ́ Yiezu ɓà nìɛ ɛ́ wɔ́ hɔ́ bòo míkùi lɛ ɛ́ Ɲunsɔ làndɛ́ nɛ ɓɛ fɔ́bán ɛ̀ ɓɛ̀ wé ɛ́ vɔ́, ɛ́ ɓɛ́ khũ̀a ɓɔn ɓá lóo Nazarɛɛte hɔ̀ Kalile pɛ̃̀hɛ̃ hũn. 40Á zĩncáahɔ́ ɛ́ hṹn tí, kɛ́ piè pànkɛ́ ɛ́ wé; à hàarí tú àá bɔ̀dũmunù, ɛ̀ Dɔfĩn hiì ɛ́ lò hàarí wi àá ɔ́.

Yiezu zɔn lè Dɔfĩn zũ-bɛhɔ́ kɛ́ piè lɔ́líe ɛ́ iè pírú àá bɔ̀nbɔ̀ ɲu

41Lóo hṹn wóo ɓen lɔ́, ɛ̀ Yiezu ɓà nìɛ ɛ́ wòó yòó vɛ Zerizalɛɛmu ɛ̀ vɛ dí lé Nyiewɛlɔn sɛ́rí. 42Ɛ́ hɔ́ lɛ ɛ́ Yiezu yú lɔ́líe pírú àá bɔ̀nbɔ̀ ɲu, ɛ́ ɓɛ́ sĩ̀n yòó van hɔ̀ Zerizalɛɛmu kɛ̀a bòo lɛ ɛ́ ɓɛ́ dàa wóò wé hɔ́. 43Ɛ́ bòo lɛ ɛ́ lé sɛ́rí dú vɔ́, ɛ́ Yiezu ɓà nìɛ ɛ́ khũ̀a mɔ̀ lè wṹn ɛ́ vaá-ɓɔ, kɛ́ ɓɛ́ yí dũ kɛ́ Yiezu ɛ́ khie kɛsí hɔ́ Zerizalɛɛmu hũn wɛ̀. 44Ɓɛ̀ tĩì ɛ̀ ɓɛ̀ nɛ a bɔ̀ɓán àá ɓɛ́ wṹ-bèriè dɔ̀, ɛ́ ɓɛ́ van wu-kùi ɛ̀ ɓɛ̀ khie ɔ̀ cɛ̀ ɓá nìɛ àá ɓá dũnliè tĩ́ihṹ. 45Ɛ́ hɔ́ lɛ ɛ́ ɓɛ́ cɛ̀ tan, ɛ́ ɓɛ́ khie khũ̀a kã́a hɔ̀ Zerizalɛɛmu kɛ́ ɓɛ̀ ɛ́ ɔ̀ cɛ̀. 46Ɛ́ wihĩ́ bɔ̀nbɔ̀ tĩ ɛ́ van khie, ɛ̀ ɓɛ̀ den van tɛ̀rɛa ɔ̀ kɛ́ á kɛsí lé Dɔfĩn zũ-bɛhɔ́ hũn, ɓɛ̀ làndɛ́ kɛ̀ránliè tĩ́ihṹ ɛ́ ɲí àá peɓɛ̀ viì, kɛ́ á ɓɛ̀ dìekɛnin. 47Ɛ́ ɓɛ́ nìnbirìe lɛ hṹn piè bòo lɛ á ɛ́ bie ɛ̀ ɲí ɓɛ́kùi ɛ́ piè bɔ̀dũmunù àá piè bòo lɛ á ɛ́ kɔ̃́níkɛ àá ɓɛ́ ɛ́ hɛ̀ yòokɛa peɓɛ̀ lɔ̀n. 48Ɛ́ hɔ́ lɛ ɛ́ ɓà nìɛ ɛ́ mɔn ɔ̀, ɛ́ hɔ́ hɛ̀ yòokɛa peɓɛ̀ lɔ̀n cɛ̃̀un; ɛ́ ɓà nín ɛ́ zɔn bie lɛ́ à ǹ nɛ: «Niǹ yɛ̀nù, kɔ́ wiɛ dàa wɔ́ hɔ́pe bòo lɛ àá kie? Húi, mì yàá àá ńpe ɛ́ hṹn kɔ̀ cɛ̀ kɛ́ ké hũn ɛ́ yèrè míkùi.» 49Ɛ́ Yiezu zɔn bie lɛ́ ɓà ǹ nɛ: «Mí wiɛ dàa nìn cɛ̀? Mí yí dũ kɛ́ ń fɔ́ɓán ɛ̀ ǹ húi kìe Yàá zũnù bòo?» 50Kɛ́ ɓɛ́ den yí dũń bòo lɛ á nɛ̀ wɛ̀. 51Ɛ́ Yiezu ɛ́ hĩ́nà bɔ̀ɓán àá ɓɛ́ ɛ́ ɓɛ́ dàa khũ̀a siɛ van hɔ̀ Nazarɛɛti, à hṹn wóò ɲí peɓɛ̀ bòo. Ɛ́ ɓà nín ɛ́ pe hṹn bɔ̀ hɔ̀pe bòo lɛ ɛ́ wé míkùi mí tĩì lɔ̀n. 52Ɛ́ Yiezu ɛ́ wo hṹn tí yòó kɛ́ piè bɔ̀dũmunù ɛ́ ɓiɛ̀ ɛ́ sĩiní, ɛ́ piè bòo ɛ́ hṹn tĩ Dɔfĩn àá ɓɛ́ nìnbirìe ǹ.

Currently Selected:

Liike 2: bwj

Highlight

Compare

Copy