Liike 20

Yiezu pànkɛ́ lénlén bòo

Mat 21.23-27; Mar 11.27-33

1Ɛ́ sí dɔ̀ zɔn, ɛ́ Yiezu zɔn ɓɛ̀ nìnbirìe ɛ̀ kɛ̀rán lé Dɔfĩn zũ-bɛhɔ́ hũn, kɛ́ á ɛ́ lè Bentĩnu buie lɛ́ ɓà ǹ. Ɛ́ ɓɛ́ khɛ̃́ndàariè hándíe, àá ɓɛ́ làndɛ́ kɛ̀ránliè, ɛ́ van bɔ̀ɓán àá ɓɛ́ lóo nìkĩ́ɛ, 2ɛ́ ɓɛrɛ ɔ̀ dìenin nɛ làa: «Kɔ́ yú hɔ́ pànkɛ́ àá yí ɛ́ dàa ɛ́ hɔ̀pe bòo lɛ ɛ́ kɔ́ ɛ́ wé ɛ̀ wé? À iè wieni ɛ́ te le ɲunù ɛ́ lɛ́ kɔ ǹ ɛ́ kɔ́ dàa ɛ́ hɔ̀ wé?» 3Ɛ́ Yiezu zɔn kɔ̃́niɛ ɓɛ̀ nɛ làa «Ń ɓiɛ̀ nin dìe miɛ ǹ ɛ̀ mì kɔ̃́ní mi: 4À iè wieni ɛ́ ti-e Zãn tɔrɛ nɛ a ɓen líinikɛ ɓɛ nìnbirìe hɔ ɲumu hũn? Hɔ̀ iè Dɔfĩn yée kɛ́ ɓɛ́ iè ɓɛ̀ nìnbirìe?» 5Ɛ́ ɓɛ́ khie van wũaní ɓán hũn ɛ́ nɛ: «Kɛ́ ké nɛ hɔ iè Dɔfĩn, á zɔ́ dìe kie ǹ nɛ ké wiɛ dàa yí dɛsĩ̀-ɛ ǹ? 6Ɛ̀ kè ɓen nɛ ɓɛ iè ɓɛ̀ nìnbirìe, ɛ́ ɓɛ́ nìzã̀amáa ɛ́ táa kie ɛ́ ɓé, iè hɔ̀ lɛ ɛ́ ɓɛ́ dũ ɓɛ́ tĩɛ̀ hũn kɛ́ ápe Zãn ɛ́ iè Dɔfĩn bɔ̀háanírɔ.» 7Ɛ́ ɓɛ́ zɔn nɛ ɓɛ́ yí dũ alɛ ti-e pe Zãn tɔrɛ nɛ a ɓen líinikɛ ɓɛ nìnbirè hɔ̀ ɲumu hũn wɛ̀. 8Ɛ́ Yiezu ɓiɛ̀ zɔn bie lɛ́ ɓà ǹ nɛ làa: «Ãa! Ɛ́ ń ɓiɛ̀ yí nin zɛ̃́ní-ɛ pe sɔ lɛ te le ɲunù lɛ́ mi ǹ ɛ́ ń dàa ɛ́ hɔ̀pe bòo sɔ lɛ wé wɛ̀.»

Lè wĩ̀i lɛ ɛ́ Yiezu wɛ̃̀ ɓɛ̀ tɔntɛ́riè dɔ̀ lɛ mɛkɛnɲiì wi bòo hũn

Mat 21.33-46; Mar 12.1-12

9Ɛ́ Yiezu khie lè wĩ̀i lɛ ɛ̀ wĩ̀ ɛ̀ lɛ́ ɓɛ́ nìnbirìe ǹ ɛ́ nɛ làa: «Nùún dɔ̀ hàarí lerɛ divɛ̃n vɛ̃̀hɛ̃ mún, à khie dɔ́ lé ɓɛ̀ tɔntɛ́riè dɔ̀ núnú hũn nɛ ɓɛ húi bòo, à cɔ́ van wṹn lɔ̀n ɛ́ mii vɛ míì. 10Ɛ́ hɔ́ lɛ ɛ́ hɔ́ bòo mìirɔ́ pɛ̃hṹ van dɛ̃un, á tɔrɛ mí tɔntɛ́ dɔ̀ nɛ a vɛ mí tɔntɛ́riè sɔ viì ɛ̀ vɛ fé mí hɔ́n vɛ̀nù bòo. Ɛ́ ɓɛ́ tɔntɛ́riè sɔ ɛ́ van ɓaa ɔ̀ han, ɛ̀ ɓɛ̀ khũ̀aniɛ ɔ̀ ǹ viɛniɛ àá mí nínkíemáa. 11Á mún ɓàasɔ ɛ́ bĩniɛ tɔrɛ mí tɔntɛ́ ɓuɛ̀ dɔ̀. Ɛ́ ɓɛ́pe tɔntɛ́riè ɛ́ sĩ̀n van han ɔ̀, ɛ̀ ɓɛ̀ tookɛa ɔ̀, ɛ̀ ɓɛ̀ khũ̀aniɛ ɔ̀ ǹ kɛ́ ɓɛ́ yí lɛ́ bòo dɔ̀ ɔ̀ ǹ wɛ̀. 12Á sĩ̀n khie tɔrɛ àdɔ̀ kɛ̀a nìɛ ɓɛ̀ tĩlán. Ɛ́ ɓɛ́ van han ɔ̀ ɛ́ wũmɛkɛa ɛ̀ ɓɛ̀ ɲɛun ɔ̀. 13Ápe mún ɓàasɔ ɛ́ wo ɛ́ bie mí tĩì hũn ɛ́ nɛ làa: “Ɛ́ hɔ́ wo iè ńɓùo ɛ́ nin bĩní wé? Nin tɔn niǹ zuú lɛ ń wɛ nɛ a vɛ ɓɛpe tɔntɛ́riè sɔ viì. Wiɛ wiɛ ɛ́ ɓɛ́ ɓén vɛ́ mɛ̀ndɛ̃ ape.” 14Ɛ́ hɔ́ lɛ ɛ́ ɓɛ́ tɔntɛ́riè ɛ́ van mɔn ɔ̀, ɛ́ ɓɛ́ khie ɛ́ bie ɓán hũn nɛ: “Lɛ iè ɔ̀pe lɛ ɛ́ lé mún bòo ɛ́ ɓén yìrí sĩ̀ nin. Mì hĩ́ní nɛ ke ɓí-e, ɛ́ lé wo bòo ɛ́ sĩ̀ kie ǹ.” 15Ɛ̀ ɓɛ̀ hĩ́nà ɓaa ɔ̀ ɛ́ dàa lɔ́ van lé mún máahṹ ɛ́ van lɔ́ ɓɔ́.»

Ɛ́ Yiezu ɛ́ wo zɔn dìe nɛ làa: «Ɛ́ kɛ̀a sáalɛ, ɛ́ hɔ́ wo iè ńɓùo ápe mún ɓàasɔ ɛ́ wo ɓén wé àá ɓɛ́pe tɔntɛ́riè sɔ? 16À ɓén hĩ́ní ɓen, ɛ́ ɓén ɓé ɓɛ́, à khíi lɛ́ lé mún sɔ tɔntɛ́riè bìɓuà ǹ.» Ɛ́ hɔ́ lɛ ɛ́ ɓɛ́ nìnbirìe ɲɛ́ hɔ́ ɛ́ ɓɛ́ zɔn nɛ: «Pĩi! nɛ hɔ́pe sí ɓà ńmaà ɛ̀ bí wé wɛ̀!» 17Kɛ́ Yiezu den huie ɓɛ̀ à zɔn nɛ làa: «Ɛ́ mí ɓen nɛ hɔ́pe sí ɓà ńmaà ɛ̀ bí wé, ɛ̀ hɔ̀ bòo lɛ ɛ́ Dɔfĩn bie mí bienù vɛ̃hṹ hũn ɛ́ den ɲún iè hɔ̀ hɔ́sɔ? Hɔ̀ den nɛ làa:

“Lè sɛ̃̀nlè lɛ ɛ́ ɓɛ́ zũteriè ɛ́ lerɛ tɛ́viɛniɛ,

Ɛ́ temu khũ̀a wɔ́ lé sɛ̃̀nlè lɛ bòo hie, lɛ te lepe zũnù ɛ́ zɛ̃nkɛanin.”

18Ɛ́ nìnbírɔ yée nìnbírɔ kɛ́ á kùerɛ síɛ lèpe sɛ̃̀nlè sɔ lɔ̀n, á síɛ háakɛ, ɛ̀ kɛ́ lé kùerɛ́ síɛ ɔ̀lɛ lɔ̀n, ɛ́ lé síɛ fɛ̀cɛ́kɛ a.»

19Ɛ́ ɓɛ́ làndɛ́ kɛ̀ránliè àá ɓɛ́ khɛ̃́ndàariè hándíe ɛ́ hṹn cɛ̀ ɛ̀ ɓɛ̀ ɓaà Yiezu pehɔ̀ yìi hũn iè hɔ̀ lɛ ɛ́ ɓɛ́ dũnɛ kɛ́ ɓɛ́ iè ɓɛ̀pe á nɛ̀ àá lé wĩ̀i sɔ sí, kɛ́ ɓɛ́ den ɓɛ̀ nìnbirìe ɛ̀ zán.

Hɔ̀ lànpóo lɛ wóò sàaní lɛ́ á Romù Bɛ́zu-bɛhɔ́ ǹ bòo

Mat 22.15-22; Mar 12.13-17

20Ɛ́ ɓɛ́pe làndɛ́ kɛ̀ránliè àá ɓɛ́ khɛ̃́ndàariè hándíe ɛ́ wo khie ɛ́ Yiezu ɛ̀ nii, ɛ̀ ɓɛ̀ khie tɔrɛ ɓɛ̀ nìnbirè dɔ̀ nɛ ɓɛ vɛ wé ɓɛ́te àá nìtentiè, ɛ̀ ɓɛ̀ yí-e vĩ mí biehĩ́ hũn, bòo lɛ ɛ́ wé ɛ̀ ɓɛ̀ dàá dàń ɔ́ dí-e Kuvɛrɛnɛɛre lɛ dàa le núnú àá hɔ́ pànkɛ́ núnú hũn. 21Ɛ́ ɓɛ́pe nìnbirìe lɛ ɛ́ ɓɛ́ tɔrɛ ɛ́ van ɛ́ bie àá Yiezu ɛ́ nɛ làa: «Kɛ̀ránlɔ, ké dũ kɛ́ hɔ́ bòo lɛ ɛ́ kɔ́ wóò bie àá hɔ́ lɛ ɛ́ kɔ́ wóò kɛ̀rán àá ɓɛ́ nìnbirìe ɛ́ iè bòo lɛ ɛ́ cã̀aní. Kɔ́ yáà kɛ̀ nìnbírɔ dɔ̀ yìe, kɛ́ Dɔfĩn wṹn iè pe ɛ́ kɔ́ wóò kɛ̀rán àá bɔ̀berà. 22Ɛ́ kɔ́pe kɔ̀ viì, ɛ̀ hɔ̀ sũǹ te mí yìe ɛ̀ kè wóo sàaní hɔ́ lànpóo ɛ̀ lɛ́ á Rɔmu bɛ́zu-bɛhɔ́ Sezaare ǹ yée kɛ́ ńɓùé?» 23Kɛ́ Yiezu den dũnɛ kɛ́ ɓɛ́ iè biè ɛ́ cɛ̀ ɛ̀ ɓɛ̀ vĩ-ɛ, á zɔn bie lɛ́ ɓà ǹ nɛ làa: 24«Mì dàá lépe vɛ̃n-zuú dɔ̀ ɛ̀ dàá ɓen nɛ ń húi.» À zɔn ɓɛ̀ dìenin nɛ làa: «Á wieni híɛhɔ́ àá mí yèrè ɛ́ temu wi pelè lɔ̀n?» Ɛ́ ɓɛ́ nɛ a iè ɔ̀ Rɔmu bɛ́zu-bɛhɔ́ Sezaare. 25Ɛ́ Yiezu zɔn bie lɛ́ ɓà ǹ ɛ́ nɛ làa: «Ɛ́ hɔ́ bòo lɛ bòo sɛ̃̀ à Sezaare ɛ́ mí lɛ́ á Sezaare ǹ, ɛ̀ hɔ̀lɛ bòo sɛ̃̀ Dɔfĩn ɛ́ mí ɓiɛ̀ lɛ́ hɔ́pe Dɔfĩn.» 26Ɛ́ ɓɛ́ yí dàń ɔ́ yí vĩ mí biehĩ́ hũn ɓɛ̀ nìnbirìe yìe hũn, kɛ́ piè bòo lɛ á bie ɛ́ hɛ̀ yòokɛa peɓɛ̀ lɔ̀n, ɛ́ ɓɛ́ wo yòó dɛ̃̀ cɔũn.

Sadusĩɛɓɛ bòo lɛ ɓɛ́ dìe àá Yiezu ɓɛ̀ nìhiè vìerɔ́ bòo hũn

Mat 22.23-33; Mar 12.18-27

27Ɓɛ̀ Sadusĩɛɓɛ ɛ́ iè ɓɛ̀pe lɛ wóò nɛ ɓɛ nìhiè yá ɓén vìé wɛ̀. Ɛ́ peɓɛ̀ nìɛ dɔ̀ ɛ́ van ɓɛrɛ Yiezu viì ɛ̀ ɓɛ̀ ɔ̀ dìenin ɛ́ nɛ làa: 28«Kɛ̀ránlɔ, lɛ iè hɔ̀ bòo lɛ á Moyiize ɛ́ hàarí wɛ̃́ ɛ́ lɛ́ kie ǹ nɛ ke wóo wé: “Kɛ́ nìnbírɔ dɔ̀ ɓà zuú ɛ́ húrun à kɛ́ ɓá hṹnu kɛ́ á yí yí yɛ̀nù àá ɔ́, àpe lɛ húrun ɓà zuú sɔ ɛ̀ khíi mìí ɔ́pe hṹnu sɔ ɛ̀ yɛ̀ ɛ̀ dàá lɛ́ máahṹ ɓá zùú lɛ húrun.” 29Ɛ́ zɛ̀ɓɛ̀ hùuɲu dɔ̀ hàarí wi yán. Á kĩ́ì ɛ́ yan ɓá hṹn à khie húrun kɛ́ á yí yí zĩncáahɔ́ wɛ̀. 30Á ńɲúunín ɛ́ khie mɔ̀ àpe hṹnu sɔ ɛ́ yan, á ɓiɛ̀ khie húrun kɛ́ á yí yí zĩncáahɔ́ wɛ̀. 31Á tĩinín ɛ́ khie sɛ̃̀. Ɛ́ hɔ́ wɔ́ kɛ̀amu fúu ɛ́ ɓɛ́pe zɛ̀ɓɛ̀ hùuɲu sɔ ɓɛ́kùi ɛ́ húrunkɛ van vɔ́ kɛ́ ádɔ̀ ɛ́ yí yí zĩncáahɔ́ àá ɔ́pe hũnù sɔ wɛ̀. 32Ɛ́ pehɔ̀ máahṹ à hṹnu ɛ́ ɓiɛ̀ khie húrun. 33Ɛ́ ɓɛ́ nìhiè vìerɔ́ zɔn, ápe hṹnu sɔ ɛ́ wo ɓén wí-e hɔ́sɔ ɓà hṹnu? Ɓɛ̀pe zɛ̀ɓɛ̀ hùuɲu sɔ ɓɛ́kùi ɛ́ lò wo yánkɛ à.» 34Ɛ́ Yiezu ɛ́ zɔn bie lɛ́ ɓà ǹ nɛ làa: «Lèpe dímíɲɛ́ sɔ lɛ hũn, ɛ́ ɓɛ́ báa àá ɓɛ́ hã́a ɛ́ pe wo wóò yɛ ɓán. 35Kɛ́ ɓɛ́pe nìnbirìe lɛ ɛ́ Dɔfĩn ɓén lɛ́ ɛ́ ɓɛ́ vìé ɛ́ khíi kań lé dímíɲɛ́ lɛ vaá-ɓen hũn, ɛ́ pe yá wóo ɓén yɛ ɓán wɛ̀. 36Ɛ́ ɓɛ́ yí dɛ̀ yá bĩní hí, iè hɔ̀ lɛ ɛ́ ɓɛ́ kɛ kɛ̀a ɓɛ mɛlɛkɛɓɛ, ɓɛ̀ iè Dɔfĩn nìɛ, ɛ́ Dɔfĩn dàa vìeniɛ ɓɛ̀. 37Kɛ́ hɔ́ ɓen iè ɓɛ̀pe nìhiè vìerɔ́ bòo, àpe Moyiize ɛ́ lò ɛ́ zɛ̃́niɛ hɔ̀ wìée nɛ ɓɛ ɓén vìé. Lè Dɔfĩn bienù vɛ̃hṹ hũn, ɛ́ lé dáanú lɛ ɛ́ hɔ́ wɛ̃́ nin nɛ le vĩ̀n-cíi ɛ́ cĩ̀, ápe Moyiize ɛ́ Ɲunsɔ ɛ̀ ve nɛ “Abarahaamu Dɔfĩn àá Yizaake Dɔfĩn àá Zakɔɔbu Dɔfĩn.” 38Kɛ́ Dɔfĩn ɛ́ ɓen iè peɓɛ̀ Dɔfĩn, ɛ̀ hɔ̀ iè bòo lɛ ɛ́ zɛ̃́ní kɛ́ ɓɛ́pe ɛ́ pɛ́wi yìe ɛ́ wi. Iè hɔ̀ lɛ ɛ́ Dɔfĩn ɛ́ yí nìnbirìe lɛ húrun Dɔfĩn, kɛ́ Hɔ́ iè ɓɛ́lɛ yìe wi Dɔfĩn. Ɛ́ Dɔfĩn viì ɛ̀ ɓɛ̀pe ɓɛ́kùi ɛ́ yìe wi.» 39Ɛ́ ɓɛ́ làndɛ́ kɛ̀ránliè dɔ̀ ɛ́ zɔn bie lɛ́ à ǹ nɛ làa: «Kɛ̀ránlɔ, kɔ̀ bienù tĩ.» 40Ɛ́ ɓɛ́ nìnbirìe ɛ́ wo yí bĩní híení ɓɛ́ tĩɛ̀ ɛ̀ zɔn diè ɔ̀ ǹ àá bòo dɔ̀ bòo wɛ̀.

Àpe Kirisa sũǹ iè Daviide hũn zuú?

Mat 22.41-46; Mar 12.35-37

41Ɛ́ Yiezu ɛ́ khie ɛ́ bie àá ɓɛ́ nìnbirìe ɛ́ nɛ làa: «Hɔ̀ wo kɛ wiɛ ɛ́ ɓɛ́ nìnbirìe dàa wóo nɛ à Kirisa iè ɔ̀ bɛ́zuú Daviide zuú? 42Àpe Daviide míte ǹ ɛ́ bie piè bòo lè Dɔfĩn bienù vɛ̃hṹ lɛ ɛ́ ɓɛ́ wóo ve nɛ Yánbehĩ́ vɛ̃hṹ hũn ɛ́ nɛ làa:

“Ɲunsɔ Dɔfĩn ɛ́ bie lɛ́ niǹ Ɲunsɔ ǹ ɛ́ nɛ làa:

Ɓen Síɛ kansí niǹ ńdóonín,

43 Nin lɛ́ ɛ̀ mì ńbíyanliè ɛ̀ wé kɔ́ zehĩ́ bènlén wànlè.”

44Kɛ́ á Daviide ɛ́ wo ɓen ɛ́ ɔ̀pe Kirisa ɛ̀ ve nɛ mí Ɲunsɔ, ɛ́ piè Ɲunsɔ ɛ́ wo wiɛ dàa dɛ̀ ɛ́ bĩní wé piè yɛ̀nù?»

Yiezu nɛ mí kɛ̀ránzɛ̀ɓɛ̀ ɛ̀ pɛ ɓɛ́te bòo àá ɓɛ́ làndɛ́ kɛ̀ránliè

Mat 23.1-36; Mar 12.38-40

45Ɛ́ hɔ́ lɛ ɛ́ ɓɛ́ nìzã̀amáa ɓɛ́kùi ɛ́ tɛ́ ɓɛ́ ɲɛkɛ̃̀a ɛ́ Yiezu biehĩ́ ɛ̀ ɲí, á zɔn bie lɛ́ mí kɛ̀ránzɛ̀ɓɛ̀ ǹ nɛ: 46«Mì pɛ míte ɛ̀ mí bí wé kɛ̀a ɓɛ làndɛ́ kɛ̀ránliè lɛ wɛ hɔ tĩ̀-bɛ̃hɛ̃ zɔnlɔ́ ɛ̀ dàá múakɛ. Ɓɛ̀ wɛ nɛ ɓɛ nìnbirìe den wóo fòoníkɛ ɓɛ́ hɔ̀ fɔ́hĩ́ hũn, ɛ̀ hɔ̀ kaǹsílénɓɛ̀ lɛ ɛ́ ɓɛ́ nìnbirè ɓɛ́kùi loo iè pe ɓɛ́ wɛ ɓɛ Zuifuɓɛ ńkóoɓánlɔ̀n zĩhĩ́ɛ hũn, ɛ̀ ɓɛ̀ lò bĩniɛ wɛ hɔ hán vuò hɔ̀ sɛ́-bɛhɛ̃ díe dínlén. 47Ɓɛ̀ mɛ-hã́a zĩhĩ́ɛ ɛ́ ɓɛ́ te wóò dí míkùi, kɛ́ ɓɛ́ lò den ɓen ɓɛ hɛ̃un Dɔfĩn, ɛ̀ ɓɛ̀ temu dìń hɛ̃un míi, bòo lɛ ɛ́ wé ɛ̀ ɓɛ̀ nìnbirìe ɛ̀ mi ɓɛ. Ɛ́ hɔ́pe sí bòo hũn, ɛ́ Dɔfĩn ɛ́ ɓén vɛ́ peɓɛ̀ ɲɛkɛ̃̀a cɛ̃̀un.»

Currently Selected:

Liike 20: bwj

Highlight

Copy