Liike 9

Lè tɔrɛ̀ bienù lɛ ɛ́ Yiezu ɛ́ lɛ́ mí kɛ̀ránzɛ̀ɓɛ̀ pírú àá nìɛ ɓɛ̀ ɲu ǹ

Mat 10.5-15; Mar 6.7-13

1Ɛ́ Yiezu ɛ́ vɔn mí kɛ̀ránzɛ̀ɓɛ̀ pírú àá nìɛ ɓɛ̀ ɲu ɛ́ ɓen koo ɓánlɔ̀n à lɛ́ hɔ́ pànkɛ́ àá lé ɲunù ɓà ǹ nɛ ɓɛ dàá ɲɛ ɓɛ ńɲíkĩ́nìɛ ɛ̀ ɓɛ̀ wiɛní hɔ́ duò. 2À tɔrɛ ɓɛ̀ nɛ ɓɛ vɛ buie le Dɔfĩn bɛ́záanú bòo ɛ̀ ɓɛ̀ wiɛní ɓɛ́ dɔriè. 3À bie lɛ́ ɓà ǹ nɛ làa: «Mì bí mìí bòo dɔ̀ ɛ̀ dàá lé bè lè wṹn wɛ̀: mì bí dàá lànlè tàá lɔ̀kɔ̀ tàá díe tàá màa, ɛ̀ mì bí dàá pɔnkɔ̀nìɛ bɔ̀nbɔ̀ ɲuɲu wɛ̀. 4Ɛ̀ viì yée viì lɛ mii vɛ zɔ hũn, kɛ́ ɓɛ́ perɛ miɛ ǹ zũnù lɛ hũn, ɛ̀ lèpe iè pe ɛ́ mí kań hũn fúu ɛ̀ mì zɔ lé lé viì sɔ lɔ̀n. 5Ɛ̀ viì yée viì lɛ ɛ́ nìnbirìe ɛ́ van pɛ̃́ miɛ hũn, ɛ̀ mì zɔ lé peɓɛ̀ lóo hũn ɛ̀ lé ɓánɓɛ́ mí zehĩ́ khũnkhũnù ɛ̀ kóosí yán ɛ̀ dàá zɛ̃́ní lɛ́ ɓà ǹ kɛ́ ɓɛ́ wɔ́ khɔn.» 6Ɛ́ ɓɛ́ kɛ̀ránzɛ̀ɓɛ̀ ɛ́ hĩ́nà cɔ́ ɛ́ van bɔ̀ hɔ̀ lóoniɛ̀ ǹ míkùi ɛ́ lè Bentĩnu ɛ̀ buie kɛ́ ɓɛ́ ɛ́ ɓɛ̀ dɔriè ɛ̀ wiɛní viì míkùi.

Herɔɔde bɔ̀dũmunù vṹnun Yiezu bòo hũn

Mat 14.1-12; Mar 6.14-29

7Ɛ́ Kalile bɛ́zuú Herɔɔde ɛ́ ɲɛ́ hɔ́pe bòo lɛ ɛ́ wé míkùi ɛ́ bòo lɛ á mii bie á wo yí dũ wɛ̀; iè hɔ̀ lɛ ɛ́ ɓɛ́ dɔ̀ ɛ́ wóò nɛ Zãn Batiisi ɛ́ vìé. 8Ɛ̀ ɓɛ̀dɔ̀ nɛ a iè Dɔfĩn bɔ̀háanírɔ Elii ɛ́ temu khũ̀a ɓɛrɛ, ɛ̀ ɓɛ̀dɔ̀ ɛ́ nɛ ɓɛ́ iè ɓɛ̀pe hàarí Dɔfĩn bɔ̀háaníriè lɛ khie hũn ádɔ̀ ɛ́ temu vìé. 9Kɛ́ Herɔɔde ɛ́ pe den ɛ́ bie ɛ́ nɛ làa: «À ɓen iè Zãn, ɛ̀ ǹpe niǹteǹ ɛ́ lɛ́ ɛ́ ɓɛ́ ɓúo ɔ̀ ɲún. Ápe lɛ sĩ̀n iè ɔ̀ hɔ́sɔ ɛ́ niǹ bòo ɲí kiɛ́?» À wo hṹn cɛ̀ ɛ́ mii mi Yiezu.

Bòo lɛ ɛ́ Yiezu dàa díiniɛ nìnbí-dũmu

Mat 14.13-21; Mar 6.30-44; Zãn 6.1-14

10Ɛ́ ɓɛ́ tɔnkɛriè ɛ́ van khũ̀a ɓɛrɛ ɛ́ ɓen bie hɔ̀ bòo lɛ ɛ́ ɓɛ́ van wɔ́ míkùi ɛ́ lɛ́ Yiezu ǹ. Ɛ́ Yiezu ɛ́ hĩ́nà fɔ́ ɓɛ́ ɛ́ dàa cɔ́ ɓɛ́ dòonún ɛ́ van lè lóo lɛ ɛ́ ɓɛ́ wòó nɛ Bɛtesayida pɛ̃̀hɛ̃ hũn. 11Kɛ́ ɓɛ́ nìnbí-dũmu ɛ́ den ɲɛ́ hɔ́ ɛ́ ɓɛ́ hĩ́nà bɔ̀ piè máahṹ. Ɛ́ Yiezu ɛ́ khie fɔ́ ɓɛ́ à khie ɛ́ Dɔfĩn bɛ́záanú bòo ɛ̀ bie àá ɓɛ́, à lò wiɛniɛ ɓɛ̀lɛ ɛ́ dɔkɛ. 12Ɛ́ bòo lɛ ɛ́ lé wurù ɛ́ van mii tè, ɛ́ ɓɛ́ kɛ̀ránzɛ̀ɓɛ̀ pírú àá nìɛ ɓɛ̀ ɲu ɛ́ ɓɛrɛ lúwiniɛ Yiezu ǹ ɛ̀ ɓɛ̀ bie lɛ́ à ǹ ɛ́ nɛ làa: «Bie lɛ́ ɓɛ́ nìzã̀amáa ǹ nɛ ɓɛ lan vɛ zɔ hɔ lóoniɛ̀ àá hɔ́ mɛhɛ̃ hũn ɛ̀ vɛ zɔ làakɛ yán ɛ̀ ɓɛ̀ cɛ̀ hɔ̀ bɔ̀díe iè hɔ̀ lɛ ɛ́ lépe viì lɛ ɛ́ ké wi hũn ɛ́ iè maa lɛ ɛ́ bòo dɔ̀ ɛ́ mínɛ hũn wɛ̀.» 13Ɛ́ Yiezu zɔn bie lɛ́ ɓà ǹ ɛ́ nɛ làa: «Mìpe mìte ǹ ɛ̀ lɛ́ hɔ́ bɔ̀díe ɓà ǹ nɛ ɓɛ dí.» Ɛ́ ɓɛ́ zɔn kɔ̃́niɛ ɔ̀ nɛ làa: «Hɔ̀ iè búrú hùanú àá ciè bìɛ ɲu ɛ́ ké dàa mí dòonún. Íé kɛ́ kɔ́ iè wìe nɛ ke lan vɛ yɛ̀ bɔ̀díe ɛ̀ ɓen lɛ́ ɓɛ́pe nìzã̀amáa lɛ ǹ ɓɛ́kùi?» 14Ɓɛ̀ nìnbirìe lɛ hàarí wi yán ɛ́ ɓɛ́ báa ɛ́ hàarí ɛ́ dɛ̃ muasíe hɔ̀nú (5 000). Ɛ́ Yiezu ɛ́ bie lɛ́ mí kɛ̀ránzɛ̀ɓɛ̀ ǹ nɛ ɓɛ bie nɛ ɓɛ nìnbirìe siɛ kankɛsí àá ɲúuhɛ̃ dɛ̀wɛ́ àá pírú pírú. 15Ɛ́ ɓɛ́ khie wɔ́ hɔ́ kɛ̀amu, ɛ́ ɓɛ́ nìnbirìe ɓɛ́kùi ɛ́ wo siɛ kɛkɛsí. 16Ɛ́ Yiezu khie fɔ́ hɔ́ búrú hùanú àá ɓɛ́ ciè bìɛ ɲu sɔ à yòo ɛ́ húi àá hɔ́ hóohũn, à dɔ́ Dɔfĩn bɛrikɛ hɔ̀pe díe sɔ bòo hũn, à ɓùenkɛa hɔ̀ ɛ́ khie lɛ́ mí kɛ̀ránzɛ̀ɓɛ̀ ǹ nɛ ɓɛ khíi sankɛ lɛ́ ɓɛ́ nìnbirìe ǹ. 17Ɛ́ ɓɛ́pe ɓɛ́kùi ɛ́ dú tù, ɛ̀ hɔ̀ bɔ̀ɲúuhɛ̃ lɛ kɛ́ ɛ́ khue tú sìkíe pírú àá bɔ̀nbɔ̀ ɲu.

Piɛre ɛ́ dũnɛ zɛ̃́niɛ kɛ́ Yiezu ɛ́ iè Kirisa

Mat 16.13-21; Mar 8.27-31

18Wurù dɔ̀ zɔn ɛ́ Yiezu ɛ́ van Dɔfĩn ɛ̀ hɛ̃nnin mí dòonún kɛ́ piè kɛ̀ránzɛ̀ɓɛ̀ ɛ́ wi yán àá ɔ̀. Á zɔn ɓɛ̀ dìenin ɛ́ nɛ làa: «Ɓɛ̀ nìzã̀amáa ɛ́ wóò nɛ npe iè wieni?» 19Ɛ́ ɓɛ́ zɔn kɔ̃́niɛ ɔ̀ nɛ làa: «Ɓɛ̀dɔ̀ ɛ́ wóò nɛ kɔ́ iè Zãn Batiisi, ɛ̀ ɓɛ̀dɔ̀ wóò nɛ kɔ́ iè Elii, ɛ̀ ɓɛ̀dɔ̀ nɛ kɔ́ iè ɓɛ̀ hàarí Dɔfĩn bɔ̀háaníriè lɛ khie hũn ádɔ̀ ɛ́ temu vìé.» 20Ɛ́ Yiezu zɔn nɛ làa: «Ɛ̀ mìpe lò, mí wóo nɛ niǹ wieni?» Ɛ́ Piɛre ɛ́ zɔn nɛ làa: «Kɔ́ iè ɔ̀ Kirisa, àpe fuenírɔ lɛ ɛ́ Dɔfĩn ɛ́ tɔrɛ.» 21Ɛ́ Yiezu ɛ́ bie lɛ́ ɓà ǹ hièniɛ nɛ ɓɛ bí lɛ́ nɛ nìnbírɔ dɔ̀ ɛ̀ ɲí hɔ́ wɛ̀.

22À bĩniɛ zɔn bie nɛ làa: «À nìnbírɔ Zuú ɛ́ fɔ́ɓán à lɔ̀n be cɛ̃̀un, ɛ̀ ɓɛ̀ nìkĩ́ɛ àá ɓɛ́ khɛ̃́ndàariè hándíe àá ɓɛ́ làndɛ́ kɛ̀ránliè ɛ̀ pĩ́ piè bòo, ɛ̀ ɓɛ̀ khíi ɓí-e, kɛ́ pehɔ̀ sítĩnlɔ́ bɔ̀nbɔ̀tĩlán zɔn à vìé.»

Yiezu máahṹ bènlɔ́ bòo

Mat 16.24-28; Mar 8.34–9.1

23À khie ɛ́ bie àá ɓɛ́ nìnbirìe ɓɛ́kùi ɛ́ nɛ làa: «Nìnbírɔ kɛ́ á nɛ mii bè niǹ máahṹ, ɛ̀ ɓàasɔ ɛ̀ nɛ mí hũn ɓé mí kùrú yɛ̀rɛ́ tĩì bòo ǹ, à mìí mí ɓáalén dãanù tìé àá sítĩnlɔ́ míkùi ɛ̀ dàá bè niǹ máahṹ. 24Iè hɔ̀ lɛ ɛ́ nìnbírɔ lɛ ɛ́ nɛ mii fuení mí mɛkɛ̃nì ǹ ɛ́ ɓén vĩ́iní lé, àlɛ kɛ́ á vĩ́iniɛ mí mɛkɛ̃nì ńpe yènsénín á ɓén yí lé mɛkɛ̃nì lɛ ɛ́ yá vé. 25Nìnbírɔ kɛ́ á hṹn yú lé dímíɲɛ́ bòo míkùi kɛ́ á vĩ́iniɛ mí mɛkɛ̃nì ɛ̀ pehɔ̀ tũ̀nú ɛ́ wi àá yí? 26Kɛ́ nìnbírɔ dɔ̀ ɛ́ ǹpe àá niǹ biehĩ́ ɛ́ lùwiè ɓaa, ɛ́ ɓàasɔ lùwiè ɓiɛ̀ ɓén ɓaà ǹpe nìnbírɔ Zuú pɛ̃̀hṹ lɛ kɛ́ ń vaá-ɓen niǹ ɓàarɔ́ hũn àá kìe Yàá Dɔfĩn àá ɓɛ́ mɛlɛkɛɓɛ tentiè ɓàarɔ́ hũn. 27Nin khɛ́ hɔ́ lɛ́ miɛ ǹ àá bɔ̀bín nɛ ɓɛ́pe lɛ dɛ̃̀ hũ̀nún ɛ́ ɓɛ́dɔ̀ ɛ́ yá ɓén hí kɛ́ ɓɛ́ yí mi Dɔfĩn bɛ́záanú vé wɛ̀.»

Yiezu tɛkɛ̀a zɛ̀nírɔ́ bòo

Mat 17.1-8; Mar 9.2-8

28Ɛ́ bòo lɛ ɛ́ Yiezu ɛ́ bie hɔ́pe biehĩ́ sí vɔ́, ɛ́ wihĩ́ hùutĩ ɓà ńmàa ɛ́ van khie, á fɔ́ Piɛre àá Zãn àá Zaake ɛ́ dàa van yòó lé ɓúkìe dɔ̀ lɔ̀n ɛ́ mii yòó vɛ hɛ̃un Dɔfĩn. 29Ɛ́ hɔ́ lɛ ɛ́ Yiezu ɛ́ Dɔfĩn ɛ̀ hɛ̃nnin, ɛ́ piè híɛhɔ́ ɛ́ yòó zɛ̀niɛ ɛ̀ piè tĩ̀ɛ ɛ́ yòó zɛ̀niɛ wɔ́ bɔ̀può pánpán. 30Ɛ́ nìnbirìe bìɛ ɲu dɔ̀ ɛ́ ɓɛrɛ ɛ́ dìkìmú àá ɔ́: à iè Moyiize àá Elii, 31ɛ́ te ɓɛ́te ɛ́ ɓɛrɛ zɛ̃́niɛ Dɔfĩn ɓàarɔ́ hũn. Ɓɛ̀ hṹn dìkìmú àá Yiezu bòo lɛ á mii dàá hí hɔ́ Zerizalɛɛmu lóo hũn, ɛ̀ dàá tíiní mí tɔnlɔ́ ɲunù. 32Hɔ́rɔsí ɛ̀ Piɛre àá ɓá ńkɔhĩ́ ɛ́ hṹn dũmua; ɛ́ ɓɛ́ yìe siɛ fɛ́, ɛ́ ɓɛ́ mɔn Yiezu ɓàarɔ́ àá ɓɛ́ nìnbirìe bìɛ ɲu lɛ hṹn dɛ̃̀ àá ɔ́. 33Ɛ́ pɛ̃̀hṹ lɛ ɛ́ ɓàasiè fùɛrɛ̀sí Yiezu ǹ ɛ̀ ɓɛ̀ khie vaá-lan, ɛ́ Piɛre ɛ́ zɔn bie lɛ́ Yiezu ǹ ɛ́ nɛ làa: «Kɛ̀ránlɔ, hɔ̀ sãa ɛ̀ kè kań hũ̀nún; ké ɓɔn kùdàahɛ̃ bɔ̀nbɔ̀ tĩ, dìcóoní ɛ́ kɔ́pe ɛ́ te, ɛ̀ dìcóoní iè Moyiize, ɛ̀ dìcóoní iè Elii.» Hɔ̀pe bòo lɛ á bie á den yí dũ wɛ̀. 34Ɛ́ hɔ́ lɛ á ɛ́ bie kɛ̀amu, ɛ́ dùndùí dɔ̀ van ɓɛrɛ hiɛ ɓà ǹ. Ɛ́ hɔ́ lɛ ɛ́ ɓɛ́ kɛ̀ránzɛ̀ɓɛ̀ ɛ́ ɓɛ húi ɛ̀ lè dùndùí ɛ́ ɓɛrɛ ɛ́ ɓɛ̀ hiɛnin, ɛ́ ɓɛ́ zɛ́rɛ. 35Ɛ́ tɛmu dɔ̀ ɛ́ zɔn tɛ̀ lèpe dùndùí sɔ hũn ɛ́ nɛ làa: «Àpe lɛ iè niǹ Zuú lɛ ń munɛ. Ɛ́ mí ɲí piè bòo.» 36Ɛ́ bòo lɛ ɛ́ lé tɛmu sɔ ɛ́ tɛ̀ vɔ́, á wɔ́ Yiezu mí dòonún ɛ́ temu dɛ̃̀. Ɛ́ ɓɛ́ kɛ̀ránzɛ̀ɓɛ̀ ɛ́ lù ɓɛ́ hũn ɛ́ yí bie bòo lɛ ɛ́ ɓɛ́ mɔn ɛ́ yí lɛ́ nìnbírɔ dɔ̀ ǹ pehɔ̀ yìi hũn wɛ̀.

Zĩncáahɔ́ dɔ̀ lɛ ɛ́ ńɲíkĩ́rɔ ɛ́ lɔ̀n ɛ̀ biení wiɛnírɔ

Mat 17.14-18; Mar 9.14-27

37Ɛ́ pehɔ̀ sí lɛ ɛ́ tĩ, ɛ́ bòo lɛ ɛ́ ɓɛ́ van yòó lɔ́ lé ɓúkìe lɔ̀n ɛ́ síɛ, ɛ́ ɓɛ́ nìzã̀amáa ɛ́ ɓɛrɛ sɛ̃́ Yiezu híɛhɔ́. 38Ɛ́ nùún dɔ̀ ɓɛ̀ nìzã̀amáa tĩ́ihṹ ɛ́ zɔn ɛ́ bérɛ́ ɛ́ nɛ làa: «Kɛ̀ránlɔ, wé ɓɔ́nɓɔ́n ɛ̀ kɔ̀ húi niǹ zuú, àpe ɛ́ temu iè niǹ zuú mí dòonún. 39Ńɲíkĩ́rɔ dɔ̀ ɛ́ wi-è ǹ; à ɓen hĩ́nà ɔ̀ ǹ, à pɛpɛ á zɔn wãamɛ, à ńɲíkĩ́rɔ sɔ ɛ̀ zɛ̀kɛ̀ní-ɛ àá pànkɛ́ ɛ̀ piè ńɲɛntíní ɛ̀ khùɓán lé, à ɲínkɛa cɛ̃̀un; à yá vṹn tɛ̀ lé piè lɔ̀n fùa fùa wɛ̀. 40Ɛ́ ń hɛ̃nnɛ kɔ̀ kɛ̀ránzɛ̀ɓɛ̀ ǹ nɛ ɓɛ ɲɛ a ńɲíkĩ́rɔ sɔ líení-ɛ ǹ kɛ́ ɓɛ́ den yí dàń hɔ́ ɛ́ yí wé wɛ̀.» 41Ɛ́ Yiezu ɛ́ zɔn bie lɛ́ mí kɛ̀ránzɛ̀ɓɛ̀ ǹ nɛ làa: «Mí wiɛ dàa yáa kɛ̀amu? Mí wiɛ dàa ńdɛsĩ̀nlɔ́ mí kɛ̀amu? Nin kan àá miɛ fúu ɛ̀ vɛ dɛ̃ wuàwurù? Nin hè niǹ hũn àá miɛ fúu ɛ̀ vɛ dɛ̃ wuàwurù?» À khie bie lɛ́ á zĩncáahɔ́ ɓà yàá ǹ ɛ́ nɛ làa: «Dàá ɔ́pe kɔ̀ zuú sɔ ɛ̀ dàá ɓen hũ̀nún.» 42Ɛ́ hɔ́ lɛ á zĩncáahɔ́ ɛ́ van ɓen, á ńɲíkĩ́rɔ ɛ́ mɔ̀ a siɛ lɔ̀rɛ̀sí à zɛ̀kɛ̀niɛ ɔ̀ àá pànkɛ́. Ɛ́ Yiezu ɛ́ zɔn tĩ́nɛ́ àpe ńɲíkĩ́rɔ ɲún hũn à wiɛniɛ ɔ̀ zĩncáahɔ́ ɛ́ khie lɛ́ ɓà yàá ǹ. 43Ɛ́ Dɔfĩn pànkɛ́ bɔ̀bɛhɔ́ lɛ ɛ́ ɓɛ́pe ɓɛ́kùi ɛ́ mɔn ɛ́ hɛ̀ yòokɛa ɓɛ̀pe lɔ̀n ɓɛ́kùi.

Yiezu sĩ̀n mí húmú àá mí vìerɔ́ bòo ɛ̀ bie

Mat 17.22-23; Mar 9.30-32

Ɛ́ hɔ́ lɛ ɛ́ Yiezu bòo lɛ á hṹn wé míkùi ɛ́ wo hṹn ɓɛ̀pe ɓɛ́kùi lɔ̀n ɛ̀ yòokɛ kɛ̀amu, ápe Yiezu ɛ́ zɔn bie lɛ́ mí kɛ̀ránzɛ̀ɓɛ̀ ǹ ɛ́ nɛ làa: 44«Mì tɛ́ mí ɲɛkɛ̃̀a sãaní ɛ̀ mì ɲí hɔ́ bòo lɛ ɛ́ nin bie lɛ́ miɛ ǹ kɛ̀a sáalɛ: À nìnbírɔ Zuú ɛ́ ɓɛ́ ɓén dé ɓɛ́ nìnbirìe núnú hũn.» 45Kɛ́ ɓɛ́ kɛ̀ránzɛ̀ɓɛ̀ hṹn yí dũ lepe bienù sɔ ɲún wɛ̀. Lèpe bienù sɔ ɛ́ hṹn tànkɔniɛ ɓà ǹ bòo lɛ ɛ́ wé ɛ̀ ɓɛ̀ bí dũń pelè ɲún wɛ̀; ɛ̀ ɓɛ̀ lò den hṹn Zãn ɛ̀ ɓɛ̀ dìe Yiezu ǹ pehɔ̀ bòo hũn.

À nìnbírɔ lɛ ɲún lì ɛ́ pɔ ɓɛ́ lɛ kɛ́ bòo

Mat 18.1-5; Mar 9.33-37

46Ɛ́ ɓɛ́ kɛ̀ránzɛ̀ɓɛ̀ ɛ́ khie ɛ́ wũ̀aní ɓán hũn ɛ́ nɛ ɓɛ ɛ̀ dũń ɔ́lɛ ɲún lì ɛ́ pɔ ɓɛ́lɛ ɓɛ́kùi ɓɛ́ tĩ́ihṹ. 47Ɛ́ Yiezu ɛ́ dũnɛ peɓɛ̀ bòo lɛ ɛ́ ɓɛ́ ɛ́ lieníkɛ á khie mɔ̀ zĩncáahɔ́ dɔ̀ ɛ́ ɓen bɔ̀sí mí sɛnù, 48à zɔn ɛ́ bie àá ɓɛ́ ɛ́ nɛ làa: «Nìnbírɔ kɛ́ á perɛ àpe zĩncáahɔ́ lɛ ńmaà ǹ niǹ yèrè lɔ̀n, ɛ̀ hɔ̀ iè ǹpe ɛ́ ɓàasɔ ɛ́ perɛnin, àlɛ kɛ́ á perɛ mi ǹ ɛ̀ hɔ̀ iè ɔ̀lɛ tɔrɛ mi á perɛnin. Álɛ mìniɛ pɔ miɛ mìkùi ɛ́ temu iè ɔ̀lɛ ɛ́ ɓàń pɔ miɛ mìkùi.»

Àlɛ yí pĩ́ ké bòo ɛ́ wi ɓánlɔ̀n àá kie

Mar 9.38-40

49Ɛ́ Zãn zɔn bie nɛ làa: «Kɛ̀ránlɔ ké mɔn nùún dɔ̀ kɛ́ á ɛ́ ɓɛ̀ ńɲíkĩ́nìɛ ɲɛ kɔ yèrè lɔ̀n, ɛ́ ké pɛ̃́ nɛ a bí wè hɔ́ iè hɔ̀ lɛ á mí ɓánlɔ̀n àá kie wɛ̀.» 50Ɛ́ Yiezu ɛ́ zɔn kɔ̃́niɛ ɔ̀ ɛ́ nɛ làa: «Mì bí si ɓàasɔ wɛ̀; iè hɔ̀ lɛ ɛ́ nìnbírɔ lɛ ɛ́ yí pĩ́ ké bòo ɛ́ wi ɓánlɔ̀n àá kie.»

Samari lóo dɔ̀ nìɛ ɛ́ pɛ̃́ nɛ ɓɛ́ yá pen Yiezu wɛ̀

51Ɛ́ hɔ́ lɛ ɛ́ lé pɛ̃̀hṹ lɛ ɛ́ Dɔfĩn ɛ́ mii leń Yiezu lé lé dímíɲɛ́ hũn ɛ̀ yòó viɛní hɔ́ hóohũn ɛ́ ɓen lúwi, ɛ́ Yiezu nɛ mí hɛ̀ fɔ́ɓán ɛ̀ mí yòó vɛ hɔ Zerizalɛɛmu. 52Á tɔrɛ mí nìnbirìe dɔ̀ nɛ ɓɛ dí mí híɛhɔ́. Ɛ́ ɓɛ́ wo cɔ́ van zɔn Samari lóo dɔ̀ ɛ́ nɛ ɓɛ́ vɛ zɔ sɛ́sɛ́ piè làalén kɛ́ á ɛ́ ɓen. 53Ɛ́ lé lóo sɔ nìɛ ɛ́ van zɔ pɛ̃́ nɛ ɓɛ́ yá pen Yiezu ǹ, iè hɔ̀ lɛ á khie vaá-vɛ àá Zerizalɛɛmu. 54Ɛ́ hɔ́ lɛ ɛ́ piè kɛ̀ránzɛ̀ɓɛ̀ Zaake àá Zãn ɛ́ ɲɛ́ hɔ́, ɛ́ ɓɛ́ zɔn bie ɛ́ nɛ làa: «Ɲunsɔ, kɔ́ wɛ nɛ ke bie nɛ hɔ hóohũn dṹn ɛ̀ lé ɓen síɛ cĩ̀ní lépe lóo sɔ nìɛ ɛ̀ víení?» 55Ɛ́ Yiezu bĩniɛ míte ɛ́ khie ɛ́ fi àá ɓɛ́ ɛ́ nɛ làa: [«Mí yí dũ hɛciri lɛ wi miɛ ǹ wɛ̀. 56Iè hɔ̀ lɛ á nìnbírɔ Zuú ɛ́ yí ɓen ɛ́ mii ɓen vĩ́iní nìnbirìe bɔ́hĩ́, kɛ́ á ɓɛrɛ ɛ́ mii ɓen fuení hɔ̀ ǹ.»] Ɛ́ ɓɛ́ wo khie cɔ́ van àá lɔ́-ɓuɛ̀.

Ɓɛ̀ nìnbirìe lɛ ɛ́ cɛ̀ nɛ ɓɛ́ bè Yiezu máahṹ bòo

Mat 8.19-22

57Ɛ́ hɔlɛ ɛ́ ɓɛ́ wi le wṹn lɔ̀n ɛ́ vɛ cɔ́, ɛ́ nìnbírɔ̀ dɔ̀ ɛ́ zɔn bie lɛ́ Yiezu ǹ ɛ́ nɛ làa: «Nin bè kɔ̀ máahṹ fúu ɛ̀ dàá vɛ viì lɛ ɛ́ kɔ́ vaá-vɛ hũn míkùi.» 58Ɛ́ Yiezu ɛ́ zɔn kɔ́niɛ ɔ̀ ɛ́ nɛ làa: «Ɓɛ̀ ńbɛ́hooni ɛ́ dàa ɓɛ́ kúuhɛ̃ ɛ̀ ɓɛ̀ ńɲíizàani ɛ́ dàa ɓɛ́ ńwíɛhɛ̃ kɛ́ ńpe nìnbírɔ Zuú ɛ́ den yí dàa niǹ ɲún bènlén wɛ̀.» 59À khie bie lɛ́ nìnbí-ɓuɛ̀ ǹ nɛ làa: «Ɓen bè niǹ máahṹ.» Kɛ́ ɓàasɔ ɛ́ den zɔn nɛ làa: «Ɲunsɔ, fùansí nɛ n vɛ wũ̀ún kìe yàá vé.» 60Ɛ́ Yiezu ɛ́ zɔn bie lɛ́ à ǹ nɛ làa: «Fùansí ɓɛ́ nìhiè nɛ ɓɛ wũ̀ún ɓɛ́ nìhen; ɛ̀ kɔ̀pe lan vɛ bie Dɔfĩn bɛ́záanú bòo ɛ̀ lɛ́ ɓɛ́ nìnbirìe ǹ.» 61Ádɔ̀ ɛ́ sĩ̀n zɔn nɛ làa: «Ɲunsɔ, ǹpe wɛ nin bè kɔ̀ máahṹ kɛ́ kɔ́ fùansí nɛ ǹ vɛ fòoní kìe zũnù nìɛ vé.» 62Ɛ́ Yiezu zɔn bie lɛ́ à nɛ làa: «Nìnbírɔ lɛ ɛ́ zɛ̃nkɛa lè nɛ̀ɓɛ̀ liinù ǹ à bĩniɛ khie húi àá mí máahṹ ɛ́ bòo mí Dɔfĩn bɛ́záanú hũn wɛ̀.»

Currently Selected:

Liike 9: bwj

Highlight

Copy