Matiye 16
16
Farizĩɛɓɛ àá Sadusĩɛɓɛ ɛ́ nɛ Yiezu ɛ̀ wé bòo dɔ̀ lɛ ɛ́ zɛ̃́ní kɛ́ á lɔ́ Dɔfĩn viì
Mar 8.11-13; Lik 12.54-56
1Ɛ́ ɓɛ́ Farizĩɛɓɛ àá ɓɛ́ Sadusĩɛɓɛ ɛ́ van yú Yiezu ɛ̀ ɓɛ̀ wɛ nɛ ɓɛ ɛ̀ hàaní-ɛ húi. Ɛ́ ɓɛ́ nɛ a wé yéréké bòo dɔ̀ lɛ ɛ́ zɛ̃́ní kɛ́ á lɔ́ àá Dɔfĩn viì. 2Ɛ́ Yiezu ɛ́ zɔn kɔ̃́niɛ ɓɛ̀ ɛ́ nɛ làa: «Wurù ɛ́ ɓen van siɛ ɛ́ lí, lɛ kɛ́ lé sí ɛ́ iè dɛ̀miì, ɛ̀ mì wóò bie nɛ hóo ɛ́ yáa ɓén tè wɛ̀. 3Ɛ̀ ɲɛǹbín, kɛ́ hɔ́ dùnduó ɛ́ ɓen dú cíkícíkí, ɛ̀ mì bie nɛ hóo ɛ́ ɓén tè zoòni. Ɛ́ hɔ́ hóohũn bòo lɛ ɛ́ hɔ́ te dàa wi ɛ́ mí dũ ɛ́ wóò wiekɛ, kɛ́ mí den yí dũ hɔpe zoòni sɔ lɛ bòo lɛ ɛ́ wé ɲún wɛ̀! 4Ɓɛ̀pe zoòni nìɛ lɛ iè ɓɛ̀ nìkoohɛ̃ ɛ̀ ɓɛ̀ lò ɲúuhɛ̃ yá cã̀aní àá Dɔfĩn, ɛ́ cɛ̀ ɛ́ nɛ yéréké bòo lɛ ɛ́ Dɔfĩn pànkɛ́ ɛ̀ zɛ̃́ní, iè pe ɛ́ ɓɛ́ wɛ ɛ́ nɛ ɓɛ ɛ̀ mi. Kɛ́ yéréké bòo dɔ̀ ɛ́ yí mii wé lɛ́ ɓà ǹ, kɛ́ á Zonaasi bòo lɛ hàarí wɔ́ à ǹ ɛ́ ɓen bòo mí.» Ɛ̀ Yiezu ɛ́ fùɛrɛ̀sí ɓà ǹ à khie cɔ́.
Ɓɛ̀ Farizĩɛɓɛ àá ɓɛ́ Sadusĩɛɓɛ ɲɛfĩni bòo
Mar 8.14-21
5Ɛ́ hɔ́ lɛ ɛ́ Yiezu àá mí kɛ̀ránzɛ̀ɓɛ̀ ɛ́ hɔ̀ ɲumu ɛ̀ cánkɛ́, ɛ́ ɓɛ́ kɛ̀ránzɛ̀ɓɛ̀ ɛ́ den hũn ɓɔ́ ɛ́ yí dàá búrú wɛ̀. 6Ɛ́ Yiezu zɔn bie lɛ́ ɓà ǹ nɛ làa: «Mì pɛ míte sãaní àá ɓɛ́ Farizĩɛɓɛ àá ɓɛ́ Sadusĩɛɓɛ ɲɛfĩni.» 7Ɛ́ ɓɛ́ kɛ̀ránzɛ̀ɓɛ̀ ɛ́ khie ɛ́ khɛ́ ɓá ń hũn ɛ́ nɛ làa: «À ɛ́ bie kɛ̀amu iè hɔ̀ lɛ ɛ́ ké hũn ɛ́ ɓɔ́ ɛ́ yí dàá búrú wɛ̀.» 8Ɛ́ Yiezu ɛ́ dũnɛ hɔ̀ bòo lɛ ɛ́ ɓɛ́ bie á zɔn nɛ: «Mí wiɛ ɛ́ dàa khɛ́ ɓá ń hũn hɔ̀ bòo lɛ ɛ́ mí hũn ɓɔ́ ɛ́ yí dàá búrú bòo hũn? Mì ńdɛsìnlɔ́ hɛ̀ mìniɛ. 9Mí pɛ́wi ɲɛùn yí dũ pehɔ̀ ɲún? Mí ɲɛùn yí síɛ liení hɔ́ búrú hùanú lɛ ɛ́ ń sankɛa lɛ́ ɓɛ́ báa muasíe hɔ̀nú ǹ (5 000) àá hɔ́ sìkíe lɛ ɛ́ mí khuie tíiniɛ àá hɔ́ bɔ̀ɲúuhɛ̃ lɛ ɛ́ kɛ́ bòo? 10Ɛ̀ mì ɲɛùn yí síɛ liení hɔ́ búrú hùuɲu lɛ ɛ́ ń sankɛa lɛ́ ɓɛ́ báa muasíe naa ǹ (4 000) àá hɔ́ sìkíe lɛ ɛ́ mí khuie tíiniɛ àá hɔ́ bɔ̀ɲúuhɛ̃ lɛ kɛ́ bòo? 11Ɛ́ mí wiɛ dàa pɛ́ yí dũ kɛ́ hɔ́ yí búrú bòo ɛ́ ń hṹn khɛ́ àá miɛ lɛ ń dàa nɛ mi pɛ mite sãàní àá ɓɛ́ Farizĩɛɓɛ àá ɓɛ́ Sadusĩɛɓɛ ɲɛfĩni?» 12Ɛ́ ɓɛ́ kɛ̀ránzɛ̀ɓɛ̀ ɛ́ den wo dũnɛ kɛ́ á yí wìe ɛ́ hṹn bie nɛ ɓɛ pɛ ɓɛ́te àá hɔ́ ɲɛfĩni lɛ ɛ́ ɓɛ́ wóò wé àá hɔ́ búrú, kɛ́ á iè wìe nɛ ɓɛ pɛ ɓɛ́te àá ɓɛ́ Farizĩɛɓɛ àá ɓɛ́ Sadusĩɛɓɛ kɛ̀ránlɔ́.
Piɛre ɛ́ dũnɛ zɛ̃́niɛ kɛ́ Yiezu iè Kirisa
Mar 8.27-30; Lik 9.18-21
13Ɛ́ Yiezu ɛ́ khie kã́a hɔ̀ looniɛ̀ lɛ lúwi lè viì lɛ ɛ́ ɓɛ́ wóò ve nɛ Filiipu Sezaree. Á khie ɛ́ mí kɛ̀ránzɛ̀ɓɛ̀ ɛ̀ dìenin ɛ́ nɛ làa: «Ɓɛ̀ nìnbirìe ɛ́ wóo nɛ npe nìnbírɔ Zuú iè wieni?» 14Ɛ́ ɓɛ́ zɔn nɛ: «Ɓɛ̀dɔ̀ ɛ́ wóo nɛ kɔ́ iè Zãn Batiisi, ɛ̀ ɓɛ̀dɔ̀ ɛ́ wóo nɛ kɔ́ iè Dɔfĩn bɔ̀háanírɔ Elii, ɛ̀ ɓɛ̀dɔ̀ ɛ́ bĩniɛ wóo nɛ kɔ́ iè Dɔfĩn bɔ̀háanírɔ Zeremi tàá ɓɛ̀ Dɔfĩn bɔ̀háaníriè lɛ khie vɔ́ dɔ̀.» 15Ɛ́ Yiezu ɛ́ zɔn nɛ làa: «Ɛ̀ mìpe lò, mìpe ɛ́ wóo nɛ ń iè wieni?» 16Ɛ́ Simɔn Piɛre ɛ́ zɔn nɛ: «Kɔ́ iè Kirisa, mɛkɛ̃nì ɓàasɔ Dɔfĩn Zuú.» 17Ɛ́ Yiezu ɛ́ zɔn khɛ́ lɛ́ à ǹ nɛ làa: «Simɔn, Zonaasi yɛ̀nù, kɔ̀ ɲún ɛ́ tĩ; iè hɔ̀ lɛ á yí nìnbírɔ ɛ́ te hɔ pe bɔ̀berà sí ɛ́ zɛ̃́niɛ lɛ́ kɔ̀ ǹ, kɛ́ hɔ́ iè kiè Yàá Dɔfĩn lɛ van yòó wi hɔ hóohũn ɛ́ te hɔ zɛ̃́niɛ lɛ́ kɔ̀ ǹ. 18Ɛ́ nin bie lɛ́ kɔ̀ ǹ nɛ kɔ́ iè Piɛre iè bòo ɛ́ ɓɛ́ nɛ lɛnù, ɛ́ lé iè pe lɛnù ɛ́ niǹ ńdɛsĩ̀riè ɛ́ ń ɓén fɛ́sí ɛ́ dĩ̀ní lɔ̀n. Ɛ́ hɔ́ húmú àá mí pànkɛ́ míkùi ɛ́ yí dɛ̀ bòo dɔ̀ ɛ́ yáa ɓén wé àá ɓɛ́ wɛ̀. 19Ɛ́ ń ɓén lɛ́ Dɔfĩn bɛ́záanú zĩínù ɲunù hĩì kɔ ǹ; ɛ́ bòo yée bòo lɛ ɛ́ kɔ́ pɛ̃́ bòo lé sṹsùnù ɛ́ Dɔfĩn ɓén yòó pĩ́ bòo hɔ́ hóohũn; ɛ̀ bòo yée bòo lɛ ɛ́ kɔ́ tɛ̀ bòo lè sṹsùnù ɛ́ Dɔfĩn ɓén yòó tɛ̀ bòo hɔ̀ hóohũn.» 20À khie bie lɛ́ mí kɛ̀ránzɛ̀ɓɛ̀ ǹ ɛ́ hièniɛ nɛ ɓɛ bí bie lɛ́ nìnbírɔ dɔ̀ ǹ nɛ mípe temu iè pe Kirisa wɛ̀.
Yiezu ɛ́ mí húmú àá mí vìerɔ́ bòo ɛ̀ bie
Mar 8.31-34; Lik 9.22-27
21Ɛ́ pehɔ̀ zɔn, ɛ́ Yiezu ɛ́ wo ɛ́ ɓɛ́ hɔ́ fìi ɛ́ khɛ́ wìée ɛ́ lɛ́ mí kɛ̀ránzɛ̀ɓɛ̀ ǹ nɛ mí sãawi ɛ̀ mí vɛ hɔ Zerizalɛɛmu ɛ̀ lɔ̀n ɛ̀ vɛ be cɛ̃̀un ɓɛ̀ nìkĩ́ɛ àá ɓɛ́ khɛ̃́ndàariè hándíe àá ɓɛ́ làndɛ́ kɛ̀ránliè núnú hũn, ie ɓɛ̀ ɓén ɓé mí kɛ́ pehɔ̀ wihĩ́ bɔ̀nbɔ̀tĩlán zɔn, ɛ̀ mí ɛ́ vìé. 22Ɛ́ Piɛre ɛ́ khie vɔn ɔ̀ ɛ́ khie van ɛ́ wũ̀aní ɛ́ nɛ: «Ɲunsɔ, Dɔfĩn wi yán, hɔ̀pe sí ɛ́ yá wé kɔ ǹ yá mi wɛ̀!» 23Ɛ́ Yiezu ɛ́ bĩníɛ míte ɛ́ khie bie lɛ́ Piɛre nɛ làa: «Vĩ́ lé niǹ máahṹ, Situanɛ lɛ! Kɔ́ cɛ̀ ɛ́ kɔ si niǹ wṹn, iè hɔ̀ lɛ ɛ́ kɔ́ nùnlé ɛ́ yí Dɔfĩn nùnlé kɛ́ hɔ́ iè ɓɛ̀ nìnbirìe nùnlé.»
24Ɛ̀ Yiezu ɛ́ khie ɛ́ bie àá mí kɛ̀ránzɛ̀ɓɛ̀ ɛ́ nɛ làa: «Nìnbírɔ kɛ́ á nɛ mii bè niǹ máahṹ, ɛ̀ ɓàasɔ ɛ̀ nɛ mí hũn ɓé mí kùrú yɛ̀rɛ́ tĩì bòo ǹ, à mìí mí kùrú ɓáalén dãanù ɛ̀ tìé ɛ̀ dàá bè niǹ máahṹ. 25Iè hɔ̀ lɛ ɛ́ nìnbírɔ lɛ ɛ́ nɛ mii fuení mí mɛkɛ̃nì ǹ ɛ́ ɓén vĩ́iní lé, àlɛ ɛ́ tɛ̀ vĩ́iniɛ mí mɛkɛ̃nì niǹ yènsénín ɛ́ ɓén khũ̀á ɛ́ yí lé mɛkɛ̃nì lɛ yá vé. 26Kɛ́ nìnbírɔ ɛ́ yɛ̀rɛ́ hṹn yú hɔ́ dímíɲɛ́ bòo míkùi à ɓiɛ̀ khɔn lè mɛkɛ̃ni lɛ ɛ́ yá vé ǹ, ɛ̀ hɔ̀ iè ńɓuò tũ̀nú á yú? Hɔ̀ iè ńɓùo á nìnbírɔ ɛ́ dɛ̀ ɛ́ lɛ́ ɛ́ dàá fuení mí mɛkɛ̃nì ǹ? 27Á nìnbírɔ Zuú ɛ́ ɓén khũ̀á ɓen ɓá yàá ɓàarɔ́ hũn àá mí mɛlɛkɛɓɛ, á ɓén ɓen ɛ̀ sàaní ɓɛ́ nìnbirìe ɓɛ́kùi, hɔ́rɔ ɛ́ wóo ɓén yí ɛ́ ɓáaníɓán àá hɔ́ bòo lɛ á wɔ́. 28Niǹ bie hɔ lɛ́ miɛ ǹ àá bɔ̀bín nɛ ɓɛpe lɛ ɛ́ wi hũ̀nún ɛ́ ɓɛ́dɔ̀ ɛ́ yá ɓén hí kɛ́ ɓɛ́ yí mi-ɛ nìnbírɔ Zuú kɛ́ á ɛ́ ɓén mí bɛ́záanú hũn wɛ̀.»
Currently Selected:
Matiye 16: bwj
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
