Matiye 21

Yiezu lɛ ɛ́ yòo ńnɛ̀kɛ̃́nɓiì ɛ́ dàa vaá-zɔ Zerizalɛɛmu lóo

Mar 11.1-11; Lik 19.28-40; Zãn 12.12-19

1Ɛ́ bòo lɛ ɛ́ ɓɛ́ ɛ́ van lúwi Zerizalɛɛmu lòo ǹ, lɛ ɛ́ ɓɛ́ van dɛ̃un Bɛtefaaze lóo, hɔ̀ Olive vɛ̃̀hɛ̃ ɓúkìe viì, ɛ́ Yiezu ɛ́ khie tɔrɛ mí kɛ̀ránzɛ̀ɓɛ̀ nìɛ ɓɛ̀ ɲu dɔ̀, 2à bie lɛ́ ɓà ǹ ɛ́ nɛ làa: «Mì lan vɛ zɔ hɔ lóo lɛ wi mi híɛhɔ́. Ɛ́ mí ɓen van dɛ̃un, ɛ́ fùa fùa, ɛ́ mí ɓén mi ńnɛ̀kɛ̃́nɓi-hṹnu dɔ̀ kɛ́ á can dɛ̃̀ àá mí ńnɛ̀kɛ̃́nɓi-fìɛ. Ɛ̀ mì fuen ɓɛ̀ ɛ̀ ɓen lɛ́ mi ǹ. 3Kɛ́ nìnbírɔ dɔ̀ ɛ́ khie ɛ́ bòo dɔ̀ ɛ̀ bie àá miɛ, ɛ̀ mì bie lɛ́ ɓàasɔ ǹ nɛ làa: “À Ɲunsɔ ɛ́ mɛ̀kóo wi ɓà ǹ. Ɛ́ pe hɔ̀ lɔ̀n, á ɛ́ fùansí miɛ ǹ ɛ́ mí ɛ́ lan àá ɓɛ́.”»

4Hɔ̀ wɔ́ kɛ̀amu, á Dɔfĩn bɔ̀háanírɔ bienù ɛ́ dàa ɲunù ɛ́ tú. À den hàarí bie ɛ́ nɛ làa:

5 «Mì bie lɛ́ ɓɛ́ Siyɔn # 21.5 Siyɔn ɛ́ iè Zerizalɛɛmu yèrè dɔ̀. siè ǹ nɛ làa:

Mì húi, mì bɛ́zuú ɛ́ vaá-ɓen mì viì,

À síɛniɛ míte ǹ ɛ́ síɛ yòo ńnɛ̀kɛ̃́nɓi-hṹnu

À yòo ńnɛ̀kɛ́nɓi-fìɛ lɛ iè ńnɛ̀kɛ̃́nɓiì zuú.»

6Ɛ́ ɓɛ́ kɛ̀ránzɛ̀ɓɛ̀ ɛ́ cɔ́ van wɔ́ hɔ́ bòo lɛ ɛ́ Yiezu ɛ́ bie lɛ́ ɓà ǹ. 7Ɛ́ ɓɛ́ van dàa ɔ̀ ńnɛkɛ̃́nɓi-hṹnu àá ɔ́ ńnɛkɛ̃́nɓi-fìɛ ɛ́ dàa ɓɛrɛ, ɛ̀ ɓɛ́ yòó bɛ́ ɓɛ́ tĩ̀ɛ peɓɛ̀ lɔ̀n, ɛ́ Yiezu yòó kɛsí lɔ̀n. 8Ɛ́ ɓɛ́ nìnbí-kuì ɓɛ̀ nìzã̀amáa tĩ́ihṹ ɛ́ síɛ bɛ́ ɓɛ́ tĩ̀ɛ lè wṹn lɔ̀n; ɛ̀ ɓɛ̀dɔ̀ ɛ́ zɔn khã̀akɛa hɔ̀ vɛ̃̀hɛ̃ ńnɛ́hɛ̃ ɛ́ lɔ́ bɛ́ lé wṹn lɔ̀n. 9Ɛ́ ɓɛ́ nìzã̀amáa lɛ ɛ́ dú Yiɛzu híɛhɔ́ àá ɓɛ́lɛ ɛ́ dú piè máahṹ ɛ́ bénkɛ ɛ́ nɛ làa: «Nɛ a Daviide Zuú yèrè ɛ̀ ɓàaní! Nɛ Ɲunsɔ Dɔfĩn ɛ̀ dúɓɛ́ ápe lɛ ɛ́ ɓen pehɔ̀ yèrè lɔ̀n! Nɛ Ɲunsɔ yèrè ɛ̀ ɓàaní hɔ́ hóohũn lɛ van yòó ni hũn.»

10Ɛ́ hɔ́ lɛ ɛ́ Yiezu ɛ́ van zɔn Zerizalɛɛmu, ɛ́ lépe lóo míkùi ɛ́ hɛ̀ hĩ́nà tɛ́ dɛ̃̀. Ɛ́ ɓɛ́ nìnbirìe ɛ́ dìekɛ ɓá ń ɛ́ nɛ: «Àpe nùún sɔ lɛ ɛ́ iè wieni?» 11Ɛ́ ɓɛ́ nìzã̀amáa lɛ hũn bɔ̀ Yiezu máahṹ ɛ́ wóò zɔ bie nɛ làa: «À iè Dɔfĩn bɔ̀háanírɔ Yiezu lɛ ɛ́ lé Nazarɛɛte lóo hɔ̀ Kalile pɛ̃̀hɛ̃ hũn.»

Yiezu ɛ́ ɓɛ̀ bɔ̀yìɛníriè ɛ̀ ɲɛ líení lé Dɔfĩn zũ-bɛhɔ́ dànkɔ̀ hũn

Mar 11.15-19; Lik 19.45-48; Zãn 2.13-22

12Ɛ́ Yiezu ɛ́ khie van zɔn lè Dɔfĩn zũ-bɛhɔ́ dànkɔ̀ hũn, ɛ́ zɔn ɲɛun ɓɛ̀lɛ ɛ́ hɔ̀ bòo ɛ̀ yìɛní yán àá ɓɛ́lɛ ɛ́ yɛ̀ yànlɔ́ ɓɛ́kùi ɛ́ líeniɛ, à khie súukɛa ɓɛ̀lɛ ɛ́ hɔ̀ màa ɛ̀ zɛ̀ní tɛ̀bɛ́hĩ́ àá ɓɛ́lɛ ɛ́ ɓɛ̀ ńmɛǹɓóohɛ̃ ɛ̀ yìɛní wànlɛ̀a ɛ́ kóokɛasí. 13À zɔn bie ɛ́ lɛ́ ɓà ǹ ɛ́ nɛ làa: Dɔfĩn ɛ́ bie mí bienù vɛ̃hṹ hũn ɛ́ nɛ làa: Niǹ zũnù ɛ́ ɓɛ́ wóo ɓén ve nɛ Dɔfĩn hɛ̃ǹlén zunù. Kɛ́ mípe ɛ́ den wɔ́ lé àá kɛ̃̀múa te tànkɔ̀níkɛlén viì.

14Ɛ́ ɓɛ́ muaɓɛ̀ àá ɓɛ́ lóohĩ́ dɔ̀ ɛ́ van ɓɛrɛ ɛ́ ɓen yú Yiezu lè Dɔfĩn zũ-bɛhɔ́ dànkɔ̀ hũn á wiɛniɛ ɓɛ̀.

15Ɛ́ ɓɛ́ kɛ̃́n-dàariè hándíe àá ɔ́ Moyiize làndɛ́ kɛ̀ránliè ɛ́ mɔn hɔ̀ yéréké bòo lɛ ɛ́ Yiezu hṹn wé, ɛ́ ɓɛ́ yí wɛní ɓɛ́te pehɔ̀ bòo hũn wɛ̀. Ɛ̀ ɓɛ̀ lò pɛ́ yí wɛní ɓɛ́te ɓɛ̀ zĩncãahɛ̃ lɛ hṹn bénkɛ le Dɔfĩn zũ-bɛhɔ́ dànkɔ̀ hũn bòo hũn wɛ̀. Ɓɛ̀ zĩncãahɛ̃ ɛ́ den hṹn bénkɛ yán ɛ́ nɛ: «Nɛ Daviide Zuú yèrè ɛ̀ ɓàaní!» 16Ɛ́ ɓɛ́ khie ɛ́ bie àá Yiezu ɛ́ nɛ làa: «Kɔ́ hɔ̀ bòo lɛ ɛ́ ɓɛ́pe zĩncãahɛ̃ sí ɛ́ bie ɛ̀ ɲíi?» Ɛ́ Yiezu zɔn nɛ «Ũun» à nɛ: «Mí bìe ɛ́ yí kɛ̀rán hɔ́pe bòo lɛ ɛ́ wɛ̃́ lé Dɔfĩn bienù vɛ̃hṹ hũn? Hɔ̀ wɛ̃́ yán ɛ́ nɛ làa: “Kɔ́ lɛ́ ɛ́ ɓɛ́ zĩncãahɛ̃ àá ɓɛ́ ńdìidíini ɛ́ kɔ̀ ɓàanínin.”»

17Ɛ́ Yiezu wo fùɛrɛ̀sí ɓà ǹ à zɔn lɔ́ lé lóo hũn ɛ́ lɔ́ van Betani, ɛ́ van cãa yán.

Lè ńluunù lɛ ɛ́ Yiezu ɛ́ dánkɛ́niɛ bòo

Mar 11.12-14; 11.20-24

18Ɛ́ pehɔ̀ sí lɛ ɛ́ tĩ ɲɛǹbín, ɛ́ Yiezu ɛ́ khũ̀a vaá-ɓen lè lóo hũn, ɛ́ hɔ́ hĩni ɛ́ ɔ̀ ɓé. 19Á mɔn ńluunù dɔ̀ kɛ́ lé wi le wṹn ɲunù á van lúwìniɛ lè ǹ, kɛ́ hɔ́ den wɔ́ ɲɛkɛ̃̀a mí dòonún á van tɛ̀rɛa yán. Á zɔn bie lɛ́ lè ǹ ɛ́ nɛ làa: «Nɛ kɔ bí bĩní hɛ biè ɛ̀ mi wɛ̀!» Ɛ́ mí laà hũn, ɛ́ lé ńluunù ɛ́ yòó ɛ́ hɔn dɛ̃̀. 20Ɛ́ piè kɛ̀ránzɛ̀ɓɛ̀ ɛ́ mɔn hɔ̀ ɛ́ hɔ́ hɛ̀ yòokɛa peɓɛ̀ lɔ̀n, ɛ́ ɓɛ́ zɔn ɛ́ Yiezu ɛ̀ dìenin nɛ: «Lèpe ńluunù sɔ ɛ́ wo wɔ́ wiɛ dàa yòó hɔn mí laà hũn kɛ̀amu?» 21Ɛ́ Yiezu ɛ́ zɔn kɔ̃́niɛ ɓɛ̀ ɛ́ nɛ làa: «Nin bie hɔ lɛ́ miɛ ǹ àá bɔ̀bín nɛ kɛ́ mí dàa ńdɛsĩ̀nlɔ́, lɛ kɛ́ mí yá titikɛ, ɛ́ hɔ́pe bòo lɛ ń wɔ́ àá lépe ńluunù lɛ ɛ́ mí wóo ɓén dàń wé, ɛ̀ mì lò dɛ̀ wóo ɓén bie ɛ́ lɛ́ lépe ɓúkìe lɛ ǹ nɛ: “Bùín kɔ́te ɛ̀ lé yán ɛ̀ khíi vɛ lísí hɔ́ ɲun-bɛhɔ́ hũn”, ɛ́ hɔ́ lò ɛ́ wé. 22Kɛ́ mí ɓen wóò hɛ̃un bòo Dɔfĩn viì àá ńdɛsĩ̀nlɔ́, ɛ́ hɔ́ bòo lɛ ɛ́ mí ɛ́ hɛ̃un míkùi ɛ́ mí wóo ɓén yí.»

Yiezu pànkɛ́ lénlén bòo

Mar 11.27-33; Lik 20.1-8

23Ɛ́ Yiezu ɛ́ van zɔn lè Dɔfĩn zũ-bɛhɔ́ ɛ́ zɔn ɓɛ̀ nìnbirìe ɛ̀ kɛ̀rán; ɛ́ ɓɛ́ kɛ̃́n-dàariè hándíe àá ɓɛ́ Zuifuɓɛ nìkĩ́ɛ ɛ́ ɓɛrɛ yú-o ɛ̀ ɓɛ̀ ɛ́ ɔ̀ dìenin ɛ́ nɛ làa: «Kɔ́ yú lé ɲunù àá yí ɛ́ dàa ɛ́ hɔ̀pe bòo sí ɛ̀ wé? À iè wie ɛ́ te le ɲunù sɔ ɛ́ lɛ́ kɔ ǹ nɛ kɔ wé hɔ́?» 24Ɛ́ Yiezu zɔn bie lɛ́ ɓà ǹ ɛ́ nɛ làa: «Ɛ́ ń ɓiɛ̀ nin dìe miɛ ǹ àá bɔ̀cóoní dɔ̀; kɛ́ mí ɛ́ kɔ̃́niɛ mi, ɛ́ ń ɓiɛ̀ ɛ́ zɛ̃́ní nìnbírɔ lɛ ɛ́ te le ɲunù lɛ́ mi ǹ ɛ́ ń dàa ɛ́ hɔ̀pe bòo sɔ lɛ ɛ̀ wé. 25À iè wie ɛ́ ti-e Zãn tɔrɛ nɛ a ɓen líiníkɛ ɓɛ́ nìnbirìe hɔ̀ ɲumu hũn? Hɔ̀ iè Dɔfĩn yée kɛ́ ɓɛ́ iè nìnbirìe?» Ɛ́ ɓɛ́ khie van bie ɓán hũn ɛ́ nɛ: «Kɛ́ ké zɔn nɛ hɔ iè Dɔfĩn ɛ́ ti-e Zãn tɔrɛ, á zɔ́ dìe kie ǹ nɛ ké wiɛ dàa ɛ́ yí dɛsĩ̀-ɛ ǹ? 26Ɛ̀ kè lò ɓen zɔn nɛ ɓɛ iè nìnbirìe ɛ́ ti-e tɔrɛ ɛ́ hɔ́ yá vɛ ke lɔ̀n àá ɓɛ́ nìzã̀amáa, iè hɔ̀ lɛ ɛ́ ɓɛ́pe ɓɛ́kùi ɛ́ dũmuasɛ̃̀ nɛ a Zãn ɛ́ iè Dɔfĩn bɔ̀háanírɔ.» 27Ɛ́ ɓɛ́ zɔn bie lɛ́ Yiezu ǹ nɛ ɓɛ́ yí dũ wɛ̀. Ɛ́ Yiezu ɓiɛ̀ zɔn bie lɛ́ ɓà ǹ nɛ làa: «Ɛ́ ń ɓiɛ̀ yí nin zɛ̃́ní-ɛ lɛ te le ɲunù ɛ́ lɛ́ mi ǹ ɛ́ ń dàa ɛ́ hɔ̀pe bòo lɛ ɛ̀ wé wɛ̀.»

Lè wĩ̀i lɛ ɛ́ Yiezu ɛ́ wɛ̃̀ nùún dɔ̀ nìɛ bìɛ ɲu dɔ̀ bòo hũn

28Ɛ́ Yiezu bĩniɛ zɔn ɛ́ bie ɛ́ nɛ làa: «Hɔ̀ iè ńɓùo ɛ́ mí ɛ́ nùún hɔ́pe lɛ bòo hũn? Nùún dɔ̀ ɛ́ hàarí ɛ́ dàa zɛ̀ɓɛ̀ bìɛ ɲu. Á vɔn ɔ̀ wìcóoní à bie lɛ́ à ǹ ɛ́ nɛ làa: “Niǹ yɛ̀nù, lé vɛ tɛ́ niǹ mún hũn zoòni.” 29Á zɔn kɔ̃́niɛ nɛ mí yí vaá-vɛ wɛ̀. Kɛ́ pehɔ̀ máahṹ, ɛ̀ piè tĩì khie zɛ̀niɛ á khie cɔ́ van lè mún hũn. 30Á yàá ɛ́ khie van yú mí yɛ̀nù sí kɛ́ à bie lèpe ben-cóoní sɔ ɛ́ lɛ́ à ǹ. Ɛ́ piè yɛ̀nù sɔ ɛ́ zɔn kɔ̃́niɛ nɛ ɓá yàá, ie vaá-vɛ. Kɛ́ á den khie ɛ́ yí vɛ wɛ̀. 31Ɛ́ ɓɛpe zɛ̀ɓɛ̀ bìɛ ɲu sɔ sí tĩ́ihṹ, á hɔ́sɔ ɛ́ temu wɔ́ ɓá yàá tĩi bòo?» Ɛ́ ɓɛ́ nìnbirìe ɛ́ zɔn nɛ a iè ɔ̀ hán yɛ̀nù lɛ ɛ́ ɓà yàá ɛ́ dàa bie. Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Ɛ́ nin bie hɔ lɛ́ miɛ ǹ àá bɔ̀bín nɛ ɓɛ lànpó-fériè àá ɓɛ́ hã́a lɛ wóò yìɛní ɓɛ́te ɛ́ ɓén dí mí híɛhɔ́ hɔ̀ Dɔfĩn bɛ́záanú hũn. 32Iè hɔ̀ lɛ á Zãn Batiisi ɛ́ ɓɛrɛ ɓen zɛ̃́niɛ miɛ àá lé wṹn lɛ ɛ́ cã̀aní, ɛ́ mí yí dɛsĩ̀-ɛ ǹ wɛ̀. Kɛ́ ɓɛ́ lànpó-fériè àá ɓɛ́ hã́a lɛ wóò yìɛní ɓɛ́te ɛ́ pe dũmuasɛ̃̀ à ǹ. Ɛ́ hɛ̀rí hɔ lɛ ɛ́ mí lò mɔn hɔ̀ àá mí yìe, kɛ́ mí pɛ́wi ɛ́ yí zɛ̀ní mí tĩɛ̀ ɛ̀ dɛsĩ̀-ɛ ǹ wɛ̀.»

Lè wĩ̀i lɛ ɛ́ Yiezu wɛ̃̀ ɓɛ̀ tɔntɛ́riè dɔ̀ lɛ mɛkɛnɲiì wi bòo hũn

Mar 12.1-12; Lik 20.9-19

33Ɛ́ Yiezu bĩniɛ zɔn bie ɛ́ nɛ làa: «Mì tɛ́ mí ɲɛkɛ̃̀a ɛ̀ mì ɲí lé wĩ̀i dɛ̀ɓuɛ̀ dɔ̀ lɛ: Nùún dɔ̀ hàarí fɛ́ divɛ̃n vɛ̃̀hɛ̃ mí mún hũn, à wɔ́ hɔ́ kɔnlɔ́ ɛ́ kírie hɔ̀n ɛ́ khie fɔ̀, à cɛ̃́ lé kṹun lɛ ɛ́ ɓɛ́ wóò fɔ̀ń hɔ́ divɛ̃n ńɲiɛ̀ hũn, à tɔn ɔ̀ bɔ̀hìerɔ lɔ́nkɔ́#21.33 Ɓɛ̀dɔ̀ ɛ́ wóò bie nɛ núnkɔ́ zũnù. zũnù yán. Ɛ́ pehɔ̀ máahṹ à khie dɔ́ lé mún sɔ ɓɛ̀ tɔntɛ́riè dɔ̀ núnú hũn nɛ ɓɛ teń pelè bòo húi, à cɔ́ van wṹn lɔ̀n. 34Ɛ́ pɛ̃̀hṹ lɛ ɛ́ hɔ́ bòo mìirɔ́ yìi ɛ́ van dɛ̃un, ápe mún ɓàasɔ ɛ́ tɔrɛ mí tɔntɛ́riè dɔ̀ nɛ ɓɛ vɛ ɓɛ mún tɔntɛ́riè viì ɛ̀ vɛ fé mí hɔ́n vɛ̀nù bòo. 35Ɛ́ ɓɛ́pe mún tɔntɛ́riè ɛ́ van ɓaakɛa ɔ̀pe mún ɓàasɔ tɔntɛ́riè lɛ á tɔrɛ; ɓɛ̀ han ɔ̀dɔ̀, àdɔ̀ ɛ́ ɓɛ́ ɓɔ́, àlɛ ɛ́ kɛ́ ɛ́ taa ɓɔ́ àá hɔ́ sɛ̃̀nlɛ̀a. 36Á mún ɓàasɔ ɛ́ bĩniɛ tɔrɛ mí tɔntɛ́riè bìɓuà dɔ̀ kɛ́ ɓɛ́ buò ɛ́ pɔ ɓɛ hán bìe. Kɛ́ ɓɛ́pe mún tɔntɛ́riè ɛ́ bĩniɛ van wɔ́ ɓɛ́ àá bòo lɛ ɛ́ ɓɛ́ zɔǹ wɔ́ àá ɓɛ́pe hán bìe. 37Ɛ́ pehɔ̀ vɛ víenílén, àpe mún ɓàasɔ ɛ́ tɔrɛ mí kùrú zuú, à ɛ́ lieníkɛ à nɛ ɓɛ ɓén vɛ ɛ́ kànɓi mí zuú. 38Kɛ́ bòo lɛ ɛ́ ɓɛ́pe mún tɔntɛ́riè ɛ́ van mɔn piè zuú sɔ, ɛ́ ɓɛ́ zɔn ɛ́ bie ɓán hũn ɛ́ nɛ: “Àlɛ ɛ́ iè ɔ̀pe lɛ ɛ́ ɓén wí-e pe mún ɓàasɔ. Mì ɓen kè ɓí-e, ɛ́ lépe mún ɛ́ wo bòo ɛ́ sĩ̀ kie ǹ.” 39Ɛ̀ ɓɛ̀ hĩ́nà ɓaa ɔ̀ ɛ́ tɛ́ van líeniɛ lè mún máahṹ ɛ́ van lɔ́ ɓɔ́. 40Ɛ́ kɛ̀a sáalɛ kɛ́ á mún ɓàasɔ ɛ́ ɓen ɓɛrɛ, ɛ́ hɔ́ iè ńɓùo á ɓen wé àá ɓɛ́ tɔntɛ́riè sɔ?» 41Ɛ́ ɓɛ́ nìnbirìe zɔn kɔ̃́niɛ ɔ̀ ɛ́ nɛ làa: «À ɓén ɓé ɓɛ́pe tɔntɛ́riè nìkoohɛ̃ sɔ ɓɛ́kùi kɛ́ peɓɛ̀ miinɛ̀ ɛ́ yá ɓaa ɔ̀ wɛ̀; à den ɛ́ khíi lɛ́ lé mún sɔ tɔntɛ́riè bìɓuà ǹ lɛ pe wóo ɓén lɛ́ piè hɔ́n vɛ̀nù bòo ɔ̀ ǹ hɔ bòo mìirɔ́ yìi hũn.» 42Ɛ́ Yiezu ɛ́ zɔn bie lɛ́ ɓà ǹ ɛ́ nɛ làa: «Mí iè bìe ɛ́ yí kɛ̀rán hɔ́ bòo lɛ ɛ́ wɛ̃́ lé Dɔfĩn bienù vɛ̃hṹ hũn? Hɔ̀ ɛ́ wɛ̃́ yán ɛ́ nɛ làa:

“Lè sɛ̃̀nlè lɛ ɛ́ ɓɛ́ zũteriè ɛ́ lerɛ tɛ́viɛniɛ,

Ɛ́ temu khũ̀a wɔ́ lé sɛ̃̀nlè lɛ̀ bòo hie, lɛ te lepe zũnù ɛ́ zɛ̃nkɛanin.

Ɲunsɔ ɛ́ temu wɛ nɛ hɔ wé kɛ̀amu,

Ɛ́ hɔ́ iè bɔ̀bɛhɔ́ kè yìe hũn!”»

43Ɛ́ Yiezu ɛ́ bĩniɛ zɔn bie sĩiniɛ ɛ́ nɛ làa: «Ɛ́ sí iè hɔ̀pe ɛ́ ń dàa ɛ́ nin bie hɔ lɛ́ miɛ ǹ nɛ Dɔfĩn ɛ́ ɓén fé mí bɛ́záanú mì viì ɛ̀ khíi lɛ́ nìnbí-ɓuà ǹ ɛ́ ɓɛ́pe ɛ́ teń pelè bie ɛ́ hɛ. 44Ɛ́ nìnbírɔ yée nìnbírɔ kɛ́ á kùerɛ siɛ lèpe sɛ̃̀nlè sɔ lɔ̀n, á síɛ ɛ́ háakɛ, àlɛ ɛ́ lepe sɛ̃̀nlè sɔ ɛ́ kùerɛ ɛ́ síɛ lɔ̀n, ɛ́ lé síɛ fɛ̀cɛ́kɛ ɓàasɔ.»

45Ɛ́ hɔ́ lɛ ɛ́ ɓɛ́ khɛ̃́ndàariè hándíe àá ɓɛ́ Farizĩɛɓɛ ɛ́ ɲɛ́ lé wĩ̀i sɔ, ɛ́ ɓɛ́ dũnɛ kɛ́ Yiezu iè ɓɛ́pe á nɛ̀ àá lé. 46Ɛ́ ɓɛ́ wo hṹn bòo lɛ ɛ́ ɓɛ wé ɛ̀ dàá ɓaa ɔ̀ ɛ̀ cɛ̀, kɛ́ ɓɛ́ den ɛ́ ɓɛ̀ nìzã̀amáa ɛ̀ zán, iè hɔ̀ lɛ ɛ́ ɓɛ́pe ɛ́ den ɛ́ Yiezu líi àá Dɔfĩn bɔ̀háanírɔ.

Currently Selected:

Matiye 21: bwj

Highlight

Copy