Matiye 23
23
Bòo lɛ ɛ́ Yiezu dàa ɛ́ fĩ àá ɓɛ́ làndɛ́ kɛ̀ránliè àá ɓɛ́ Farizĩɛɓɛ
Mar 12.38-39; Lik 11.43-46; 20.45-46
1Ɛ́ Yiezu ɛ́ khie ɛ́ bie àá ɓɛ́ nìzã̀amáa àá mí kɛ̀ránzɛ̀ɓɛ̀ ɛ́ nɛ:
2«Ɓɛ̀ làndɛ́ kɛ̀ránliè àá ɓɛ́ Farizĩɛɓɛ ɛ́ ti-e Moyiize làndɛ́ bòo ɛ́ wóò kɛ̀rán àá ɓɛ́ nìnbirìe. 3Ɛ́ mí fɔ́ɓán ɛ̀ mì wóo ɲí hɔ́ bòo lɛ ɛ́ ɓɛ́ wóò bie, ɛ̀ mì wé hɔ́ bòo lɛ ɛ́ ɓɛ́ nɛ mi wé míkùi; kɛ́ mí bí wóo wé hɔ́ bòo lɛ ɛ́ ɓɛ́ wóò wé wɛ̀. Iè hɔ̀ lɛ ɛ́ ɓɛ́ yáà wé hɔ́ bòo lɛ ɛ́ ɓɛ́ wóò bie wɛ̀. 4Ɓɛ̀ wóò cɛ hɔ tìerɔ́ lɛ lùkúkú ɛ̀ yòó bè ɓɛ̀ nìnbirìe bɛ̀khɛ̀á lɔ̀n, kɛ́ ɓɛ́ den yáà tɛ̀ nɛ ɓɛ nínkɛ́zuú ɛ̀ yòó hɛ hɔ̀ ǹ wɛ̀. 5Peɓɛ̀ bòo lɛ ɛ́ ɓɛ́ wóò wé míkùi ɛ́ ɓɛ́ wóò wé bòo lɛ ɛ́ wé ɛ̀ ɓɛ̀ nìnbirìe ɛ̀ mi ɓɛ. Ɛ́ sí iè pe temu lɛ́ ɛ́ lé Dɔfĩn bienù ńwĩ́ncɛ̃́a lɛ ɛ́ ɓɛ́ wóò cɛ ɓɛ́ ɓiè ǹ tàá ɓɛ́ bɛ̃̀hɛ̃ ǹ ɛ́ ɓɛ́ wóò wé ɓàakɛní ɛ̀ pɔní ɓɛ́lɛ kɛ́ bòo#23.5 Ɓɛ̀ Zuifubɛ ɛ́ hàarí wóo wĩ́ Dɔfĩn biehĩ́ dɔ̀ ɛ̀ bi dé dìɛ dɔ̀ hũn ɛ̀ yòó cɛ ɓɛ́ ɓiè ǹ tàá ɓɛ́ bɛ̃hɛ̃ ǹ, bòo lɛ wé ɛ̀ ɓɛ̀ wóo liení pehɔ̀ bòo fúu.; ɛ̀ peɓɛ̀ mùakúo ɲihĩ́ɛ ɛ́ ɓɛ́ lò wóò wé ɓàakɛní cɛ̃̀un. 6Ɓɛ̀ ɓen van sɛ́hĩ́ díe dínlén, ɛ̀ hɔ̀ kaǹsílénɓɛ̀ lɛ wi hɔ híɛhɔ́ iè pe ɛ́ ɓɛ́ wɛ; ɛ̀ ɓɛ̀ ɓen wi ɓɛ́ ńkóoɓánlɔ̀n zĩhĩ́ɛ hũn, ɛ̀ hɔ̀ hán kaǹsílénɓɛ̀ iè pe ɛ́ ɓɛ́ lò wɛ. 7Ɓɛ̀ wɛ nɛ ɓɛ nìnbirìe ɛ̀ wóo fòoníkɛ ɓɛ́ sãa sãa hɔ̀ fɔ́hĩ́ hũn, ɛ̀ wóo ve hɔ́rɔ nɛ “Kɛ̀ránlɔ”. 8Kɛ́ mípe, mì bí wóo bie nɛ ɓɛ ninbirìe ɛ̀ ve miɛ nɛ “Kɛ̀ránliè” wɛ̀; iè hɔ̀ lɛ ɛ́ mí iè zɛ̀ɓɛ̀, ɛ̀ mìpe mìkùi “Kɛ̀ránlɔ” ɛ́ iè nìnbí-cóoní. 9Ɛ̀ mì bí wóo ve nìnbírɔ dɔ̀ nɛ “Yàá” lè sṹsùnù lɔ̀n wɛ̀; iè hɔ̀ lɛ ɛ́ nìnbí-cóoní ɛ́ temu iè mì Yàá, àpe lɛ ɛ́ yòó van wi hɔ hóohũn. 10Ɛ̀ mì lò bí wóo lɛ́ nɛ ɓɛ ve miɛ nɛ “hándíe” wɛ̀; iè hɔ̀ lɛ á Kirisa mí dòonún ɛ́ temu iè mì “hándí”. 11Álɛ ɛ́ pɔ miɛ mìkùi ɛ́ fɔ́ɓán à wé mí tɔ̀ntɛ́. 12Álɛ ɛ́ wóò hóoní míte ǹ ɛ́ Dɔfĩn ɓén síɛnínin, àlɛ ɛ́ wóò síɛní míte ǹ ɛ́ Dɔfĩn ɓén hóoní ɛ́ yòoní.»
Yiezu ɛ́ ɓɛ̀ làndɛ́ kɛ̀ránliè àá ɓɛ́ Farizĩɛɓɛ nìhĩ́-dénlɔ́ bòo ɛ̀ bie
Mar 12.40; Lik 11.39-52; 20.45-47
13Ɛ́ Yiezu ɛ́ bĩniɛ zɔn bie ɛ́ làa: «Mí yìi ɓén mi hɔ, mìpe làndɛ́ kɛ̀ránliè àá mípe Farizĩɛɓɛ, mí iè nìhĩ́dériè! Mí wóò si ɓɛ nìnbirìe nɛ ɓɛ bí zɔ le hóohũn bɛ́záanú hũn wɛ̀. Mìpe kùusɔ ɛ́ lò yí mi zɔ, ɛ̀ mì lò yí mi fùansí ɓɛ́lɛ wɛ ɓɛ́ zɔ ǹ nɛ ɓɛ zɔ wɛ̀.
[14Mì yìi ɓén mi hɔ, mìpe làndɛ́ kɛ̀ránliè àá mípe Farizĩɛɓɛ, mí hɛ̀ iè nìhĩ́dériè! Mí wóò dí ɓɛ́ mɛ-hã́a zĩhĩ́ɛ tĩ̀ɛ, ɛ̀ mì lò den pɛ́wi ɓen mí hɛ̃un Dɔfĩn, ɛ̀ mì dìń hɛ̃un míi, bòo lɛ ɛ́ wé ɛ̀ ɓɛ̀ nìnbirìe ɛ̀ mi miɛ. Ɛ́ sí iè hɔ̀pe ɛ́ Dɔfĩn dàa ɓén vɛ́ mí ɲɛkɛ̃̀a cɛ̃̀un.]
15Mì yìi ɓén mi hɔ, mìpe làndɛ́ kɛ̀ránliè àá mípe Farizĩɛɓɛ, mí hɛ̀ iè nìhĩ́dériè! Mí wóò bè lè sṹsùnù ǹ àá hɔ́ ɲun-bɛhɔ́ ǹ ɛ̀ dàá vɛ cɛ̀ ɓɛ̀ nìnbirìe lɛ ɓɛ ɛ̀ tɛ̀ mì Dɔfĩn wṹn bòo. Kɛ́ mí ɓen yú nìcóoní dɔ̀, ɛ̀ mì bĩní khũ̀á wí-e àá Cã̀ámìnɛ́ nùún ɛ̀ pɔní miɛ fúu yìehɛ̃̀ ɲu.
16Mì yìi ɓén mi hɔ, mìpe lɛ dú ɓɛ́ nìnbirìe híɛhɔ́ kɛ́ mí lò iè muaɓɛ̀! Mí wóò bie nɛ kɛ́ nìnbírɔ ɛ́ tɛ̀ mí ɲunù kiè Dɔfĩn zũ-bɛhɔ́ lɔ̀n, ɛ̀ lè yí ɲunù kiè ɛ́ ɓàasɔ ɛ́ tɛ̀ wɛ̀; ie kɛ́ álɛ ɛ́ den ɓen tɛ̀ mí ɲunù kiè Dɔfĩn zũ-bɛhɔ́ sɛ̃́ní lɔ̀n, à den fɔ́ɓán à tíiní pehɔ̀ ɲunù. 17Mì hɛ̀ iè pe bɛ̃́nbṹa ɛ̀ mì lò iè muaɓɛ̀ àá bɔ̀bín! Hɔ̀ hɔ́sɔ ɛ́ temu bòo ɛ́ hie pɔ? Lɛ yí lépe Dɔfĩn zũ-bɛhɔ́ lɛ temu wóò lɛ́ ɛ̀ hɔ̀ sɛ̃́ní ɛ̀ dàa wé bɔ̀dɔnù? 18Mí wóò bĩní bie nɛ kɛ́ nìnbírɔ ɛ́ tɛ̀ mí ɲunù kiè hɔ̀ miyiɛ́ leǹlén dúekéré lɔ̀n, ɛ̀ lè yí ɲunù kiè ɛ́ ɓàasɔ tɛ̀ wɛ̀; ie kɛ́ álɛ ɛ́ den ɓen tɛ̀ mí ɲunù kiè hɔ̀ hɛ̃mù bòo lɛ yòó wi lepe miyiɛ́ leǹlén dúekéré sɔ lɔ̀n, ɛ̀ ɓàasɔ ɛ́ den fɔ́ɓán à tíiní pehɔ̀ ɲunù. 19Mí hɛ̀ iè pe muaɓɛ̀! Hɔ̀ hɔ́sɔ ɛ́ temu bòo ɛ́ hie pɔ? Lè yí hɔ́pe miyiɛ́ leǹlén dúekére lɛ temu wóò lɛ́ ɛ̀ hɔ̀pe hɛ̃mù bòo ɛ̀ dàa wé bɔ̀dɔnù? 20Ɛ́ nìnbírɔ kɛ́ á tɛ̀ mí ɲunù kiè hɔ̀ miyiɛ́ leǹlén dúekéré lɔ̀n, hɔ́rɔsí à tɛ̀ mí ɲunù kiè pelè lɔ̀n, à lò bĩníɛ tɛ̀ mí ɲunù kiè, hɔ̀pe bòo lɛ yòó wi le lɔ̀n míkùi. 21Ɛ̀ nìnbírɔ kɛ́ á tɛ̀ mí ɲunù kiè Dɔfĩn zũ-bɛhɔ́ lɔ̀n, hɔ́rɔsí à tɛ̀ mí ɲunù kiè Dɔfĩn zũ-bɛhɔ́ lɔ̀n, à lò bĩníɛ tɛ̀ mí ɲunù kiè hɔ̀pe Dɔfĩn lɛ wi le hũn lɔ̀n. 22Àlɛ kɛ́ á tɛ̀ mí ɲunù kiè àá hóohũn, hɔ́rɔsí à tɛ̀ mí ɲunù kiè Dɔfĩn bɛ́záanú wànlè lɔ̀n, à lò bĩníɛ tɛ̀ mí ɲunù kiè àá hɔ́pe Dɔfĩn lɛ kɛsí lé lɔ̀n.
23Mì yìi ɓén mi hɔ mìpe làndɛ́ kɛ̀ránliè àá mípe Farizĩɛɓɛ, mí hɛ̀ iè nìhĩ́dériè! Iè hɔ̀ lɛ ɛ́ hɔ́ zĩ́n-ɲɛkɛ̃̀a kɛ̀a ie hɔ fùahĩ́ àá hɔ́ kɔ́nlɔ́ àá hɔ́ víɛnú bòo pírú ɲún-cóoní ɛ́ mí wóò leń ɛ̀ lɛ́ Dɔfĩn, kɛ́ mí den wóò fùansí hɔ́ bòo lɛ bòo hie hɔ̀ làndɛ́ hũn, lɛ iè hɔ̀ cã̀anírɔ́ àá hɔ́ miinɛ̀ dũńlɔ́ àá lé ɲún cã̀anírɔ́. Kɛ́ sí lò den iè hɔ̀pe lɛ ɛ́ mí hṹn fɔ́ɓán ɛ̀ mì wé, lɛ kɛ́ mí lò yí fùansí hɔ́ sí kɛ́ ǹ wɛ̀. 24Mí iè muaɓɛ̀ ɛ́ temu dú ɓɛ́ nìnbirìe híɛhɔ́! Mí wóò cíiní mí bɔ̀ɲuriè ɛ̀ dàá leń ɔ́ ńcɛ̃nú ɛ̀ lé yán, kɛ́ á ńɲúkṹmì ɛ́ mí den wóò vĩ̀.
25Mì yìi ɓén mi hɔ, mìpe làndɛ́ kɛ̀ránliè àá mípe Farizĩɛɓɛ, mí hɛ̀ iè nìhĩ́dériè! Mí wóò tiɛ le ɲuǹlán dìɛ àá lé díe dìɛ máahṹ sãa sãa, kɛ́ pehɔ̀ hũn ɛ́ den zɔn tú àá hɔ́pe mì kɛ̃̀míhĩ́ pɔnù àá hɔ́pe mì nùn-koohɛ̃. 26Mìpe Farizĩɛɓɛ muaɓɛ̀! Hɔ̀ ɲuǹlán tĩ̀ɛ àá hɔ́ díe tĩ̀ɛ hũn iè pe ɛ́ mí wóo ɓɛ́ɓɛ́nin tiɛ vé, ɛ́ pehɔ̀ máahɛ̃ ɛ́ den ɛ́ lé ce lò.
27Mì yìi ɓén mi hɔ mìpe làndɛ́ kɛ̀ránliè àá mípe Farizĩɛɓɛ, mí hɛ̀ iè nìhĩ́dériè! Mí lɔ́ɓán àá hɔ́ búo lɛ ɛ́ ɓɛ́ wookɛa ɛ́ hɔ́ wɔ́ bɔ̀può, lɛ ɛ́ kɔ́ ɓen húi, ɛ̀ hɔ̀ ɛ́ ce sãa sãa; kɛ́ pehɔ̀ hũn ɛ́ den zɔn tú àá ɓɛ́ nìhiè hũà àá hɔ́ bòo lɛ ɛ́ tie àá mí ɲúuhɛ̃ ɲúuhɛ̃. 28Ɛ́ sí iè pe ɛ́ mí dɛ̃̀ kɛ̀amu. Ɓɛ̀ ɓen ɛ́ mì húi, ɛ̀ mì iè nìɛ lɛ ɛ́ cã̀aní ɓɛ́ nìnbirìe híɛhɔ́, kɛ́ mí hũn ɛ́ den zɔn tú àá hɔ́ nìhĩ́-dénlɔ́ àá hɔ́ bɔ̀koohɛ̃ wénlɔ́.
29Mì yìi ɓén mi hɔ, mìpe làndɛ́ kɛ̀ránliè àá mípe Farizĩɛɓɛ, mí hɛ̀ iè nìhĩ́dériè! Mí wóò te ɓɛ Dɔfĩn bɔ̀háaníriè búo, ɛ̀ mì lò wóokɛ ɓɛ́ nìtentiè búo sãa sãa, 30ɛ̀ mì wóò bie nɛ làa: “Kɛ́ ké hàarí hṹn kɛrɛ kìe zĩkĩ́nɓɛ̀ pɛ̃̀hṹ hũn, ɛ́ ké hàarí yá páa ɓɛ́ lɔ̀n ɛ́ dàá ɓé ɓɛ́ Dɔfĩn bɔ̀háaníriè wɛ̀.” 31Ɛ́ kɛ̀amu, ɛ́ mí iè bìe ɛ́ den ɛ́ zɛ̃́ní kɛ́ mí tɛ̀ ɛ́ dũ nɛ ɓɛpe lɛ ɛ́ ɓɔ́ ɓɛ́ Dɔfĩn bɔ̀háaníriè ɛ́ te ɓɛ́ nìɛ ɛ́ iè mìpe. 32Ɛ́ mí pɛ mi híɛhɔ́ ɛ̀ mì víení hɔ́ bòo lɛ ɛ́ mì zĩkĩ́nɓɛ̀ ɛ́ ɲɛ̀ fìi! 33Mìpe hóohĩ́ àá mípe ńkĩnlɛ̀a nìɛ lɛ! Mí ɛ́ lieníkɛ ɛ̀ mì nɛ mí dɛ̀ ɓén zè ɛ̀ mì ɛ́ kɛ́ hɔ́ cã̀ámìnɛ́ sɛ̃́ɲíi? 34Ɛ́ mí húi, nín tɔn ɓɛ̀ Dɔfĩn bɔ̀háaníriè dɔ̀ àá ɓɛ́ bɔ̀dũnbáa dɔ̀ àá ɓɛ́ làndɛ́ kɛ̀ránliè dɔ̀ ɛ̀ ɓɛ̀ ɓen mì viì. Ɛ́ mí wóo ɓén ɓé ɓɛ́dɔ̀, ɛ̀ ɓɛ̀dɔ̀ ɛ́ mí wóo ɓén ɓáa hɔ́ ɓáalén dãahĩ́ lɔ̀n, ɛ̀ ɓɛ̀dɔ̀ ɛ́ mí wóo ɓén hɛ àá hɔ́ hùehĩ́ mì ńkóoɓánlɔ̀n zĩhĩ́ɛ hũn, ɛ̀ ɓɛ̀dɔ̀ ɛ́ mí wóo ɓén bè máahṹ ɛ́ vɛ́ ɲɛkɛ̃̀a hɔ̀ lóoniɛ hũn. 35Ɛ́ kɛ̀amu, ɛ́ ɓɛ́pe nìnbiriè lɛ ɛ́ ɓɛ́ bɛ̀kɛanin ɓɔ́ ɓɛ́kùi lè sṹsùnù, ɛ́ cãani ɛ́ ɓén khũ̀á ɛ́ síɛ mí lɔ̀n. Ɓɛ̀pe lɛ ɛ́ ɓɛ́ ɓɔ́ ɓɛ́kùi ɛ̀ dàá vɛ mìí ɔ́ nìcã̀anírɔ Abɛɛle húmú ǹ fúu ɛ̀ ɓen dɛ̃ a Barakii yɛ̀nù Zakari húmú, àpe lɛ ɛ́ mí hàarí ɓɔ́ lé Dɔfĩn zũ-bɛhɔ́ àá lé miyiɛ́ leǹlén dúekéré tĩ́ihṹ. 36Ɛ́ nin bie hɔ lɛ́ miɛ ǹ àá bɔ̀bín nɛ ɓɛpe sí ɓɛ́kùi ɓénlɔ́ lɔ̀nbiè ɛ́ ɓén síɛ hɔ́pe zoòni sɔ lɛ nìɛ lɔ̀n.»
Yiezu ɛ́ cãamɛkɛ Zerizalɛɛmu nìɛ bòo hũn
Lik 13.34-35
37Ɛ́ Yiezu ɛ́ bĩníɛ zɔn bie ɛ́ nɛ làa: «Zerizalɛɛmu siè, Zerizalɛɛmu siè, mìpe lɛ ɛ́ wóò ɓé ɓɛ́ Dɔfĩn bɔ̀háaníriè, ɛ̀ mì taa ɓɛlɛ ɛ́ Dɔfĩn tɔrɛ nɛ ɓɛ ɓen mì viì ɛ̀ ɓé àá hɔ́ sɛ̃̀nlɛ̀a. Yìe cɛ̀rìɛɛ kɛ́ ń hṹn wóo nɛ nin fé miɛ ɛ̀ ɓen kóo ɓánlɔ̀n niǹ kòohɔ́ hũn, kɛ̀a bòo lɛ á kùé dàa wóo hè mí nìɛ ɛ̀ síɛ híɛnin àá mí ńmáa bòo sí, kɛ́ mí den yí tɛ̀ hɔ̀ ǹ wɛ̀. 38Ɛ́ mí húi, lɛ iè pe mì zũnù ɛ́ Dɔfĩn ɛ́ mii fùansínin ɛ̀ lɛ́ miɛ ǹ. 39Ɛ́ kɛ̀a sáalɛ, ɛ́ nin bie lɛ́ miɛ ǹ nɛ mí yí mí bĩní mi mi, fúu ɛ̀ vɛ dɛ̃ le pɛ̃̀hṹ lɛ ɛ́ mí den wóo ɓén bie nɛ “Nɛ Ɲunsɔ Dɔfĩn ɛ̀ dúɓɛ́ álɛ ɛ́ ɓen pehɔ̀ yèrè lɔ̀n.”»
Currently Selected:
Matiye 23: bwj
Highlight
Share
Copy

Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation