Matiye 25

Lè wĩ̀i lɛ ɛ́ Yiezu wɛ̃̀ ɓɛ̀ hĩ́ini pírú dɔ̀ bòo hũn

1Ɛ́ Yiezu ɛ́ bĩniɛ zɔn bie ɛ́ nɛ làa: «Ɛ́ hóohũn bɛ́záanú ɛ́ wo lɔ́ɓán àá hĩ́ini pírú dɔ̀ lɛ khuie ɓɛ́ pɛ̃̀ntĩ́hĩ́ ɛ̀ ɓɛ̀ nɛ ɓɛ́ vɛ sĩ́ yaamu ɓàasɔ híɛhɔ́. 2Ɛ́ ɓɛ́ hĩ́ini hùanú ɛ́ pe hɛciri wi, ɛ̀ ɓɛ̀ hùanú sí kɛ́ ɛ́ iè bɛ̃́nbṹa. 3Ɛ́ ɓɛ́ hĩ́ini lɛ iè bɛ̃́nbṹa ɛ́ khuie ɓɛ́ pɛ̃̀ntĩ́hĩ́ kɛ́ ɓɛ́ yí bĩní dàá yurɔ́ dɔ̀ ɛ́ bè ɓɛ́ núnú lɔ̀n wɛ̀. 4Kɛ́ ɓɛ́lɛ hɛciri wi ɛ́ pe khuie ɓɛ́ pɛ̃̀ntĩ́hĩ́ ɛ̀ ɓɛ̀ bĩniɛ dàa hɔ yurɔ́ dɔ̀ hɔ̀ pɛ̃́n-cíini hũn ɛ́ bɔ̀ ɓɛ́ núnú lɔ̀n. 5Kɛ́ á yaamu ɓàasɔ ɛ́ den ɛ́ míì kɛ́ á yá ɓen wɛ̀. Ɛ́ ɓɛ́pe hĩ́ini sɔ ɓɛ́kùi ɛ́ hɔ́ dɛmu ɛ́ pɔ ɛ́ ɓɛ́ wo síɛ dũmua. 6Ɛ́ hɔ́ sínɛ̀hɛ̃ǹ, ɛ̀ hɔ tɛmu dɔ̀ ɛ́ tɛ̀ ɛ́ nɛ: “À yaamu ɓàasɔ lɛ ɛ́ ɓen! Mì hĩ́ní lé sĩ́ piè híɛhɔ́.” 7Ɛ́ ɓɛ́ hĩ́ini pírú sɔ ɛ́ yìe síɛ fɛ́, ɛ́ ɓɛ́ síɛ hĩ́nà ɛ́ ɓɛ́ pɛ̃̀ntĩ́hĩ́ ɛ̀ sɛ́sɛ́kɛ. 8Ɛ́ ɓɛ́ hĩ́ini bɛ̃́nbṹa ɛ́ khie ɛ́ bie àá ɓɛ́ lɛ hɛciri wi ɛ́ nɛ làa: “Mì hɛ̃ kie àá mí yurɔ́ bìcínbóo iè hɔ̀ lɛ ɛ́ ké pɛ̃̀ntĩ́hĩ́ ɛ́ mii hí.” 9Ɛ́ ɓɛ́ hĩ́ini lɛ hɛciri wi ɛ́ zɔn kɔ̃́niɛ ɓɛ̀ ɛ́ làa: “Ńɓùé, hɔ̀ yurɔ́ lɛ ɛ́ ké dàa ɛ́ yá yí képe àá mípe wɛ̀. Mì tɛ̀ vɛ hɔ́ yurɔ́ yìɛnílén, ɛ̀ vɛ yɛ̀ hɔ̀ dɔ̀.” 10Ɛ́ hɔ́ lɛ ɛ́ ɓɛ́ hĩ́ini bɛ̃́nbṹa sɔ ɛ́ khie cɔ́ van hɔ̀ yurɔ́ yànlén, á yaamu ɓàasɔ ɛ́ ɓɛrɛ dɛ̃un. Ɛ́ ɓɛ́ hĩ́ini hùanú lɛ pe te ɛ́ sɛ́sɛ́a vɔ́ ɛ́ yòó zɔn le yaamu zũnù àá ɔ́pe yaamu ɓàasɔ, ɛ̀ lè zĩínù ɲunù ɛ́ khie híɛ ɛ́ pɔn. 11Ɛ́ pehɔ̀ máahṹ, ɛ̀ ɓɛ̀ hùanú sí kɛ́ ɛ́ ɓiɛ̀ ɓɛrɛ dɛ̃un ɛ̀ ɓɛ̀ ɛ́ bénkɛ ɛ́ nɛ: “Ɲunsɔ, Ɲunsɔ, hán lé zĩínù ɲunù nɛ ke zɔ!” 12Á yaamu ɓàasɔ ɛ́ zɔn bie lɛ́ ɓà ǹ ɛ́ nɛ làa: “Nin bie lɛ́ miɛ ǹ àá bɔ̀bín nɛ ń yí dũ miɛ wɛ̀.”» 13Ɛ́ Yiezu zɔn bie sĩiniɛ ɛ́ nɛ làa: «Ɛ́ mí piɛní mí yìe iè hɔ̀ lɛ ɛ́ mí yí dũ le sítĩnlɔ́ àá lé yìi wɛ̀.»

Lè wĩ̀i lɛ ɛ́ Yiezu ɛ́ wɛ̃̀ ɓɛ̀ tɔntɛ́riè nìɛ ɓɛ̀ tĩ dɔ̀ bòo hũn

Lik 19.11-27

14Ɛ́ Yiezu ɛ́ bĩniɛ zɔn bie ɛ́ nɛ làa: «Hɔ̀ ɓén wé kɛ̀ à ie nùún dɔ̀ lɛ ɛ́ vaá-vɛ le wṹn lɔ̀n, á vɔn mí tɔntɛ́riè à dɔ́ mí yírɛ́ húirɔ́ bòo peɓɛ̀ núnú hũn. 15À lɛ́ sɛ̃́ní ɲúuhɛ̃ hùanú àdɔ̀ ǹ, àdɔ̀ á lɛ́ sɛ̃́ní ɲúuhɛ̃ bɔ̀nbɔ̀ ɲu nin, à ńtĩnin á lɛ́ sɛ̃́ní ɲún-kùi nin. À lɛ́kɛ hɔ̀ ɓà ǹ, hɔ́rɔ àá bòo lɛ á dɛ̀ ɛ́ wé, à wo cɔ́ van mí wṹn lɔ̀n. 16Á lɛ ɛ́ yú hɔ́ sɛ̃́ní ɲúuhɛ̃ hùanú ɛ́ khie cɔ́ mí laà hũn ɛ́ van ɛ́ dan àá hɔ́, á yú pehɔ̀ ɲúuhɛ̃ hùanú ɛ́ yòó sĩiniɛ. 17Àlɛ ɛ́ yú hɔ́ sɛ̃́ní ɲúuhɛ̃ bɔ̀nbɔ̀ ɲu ɛ́ ɓiɛ̀ ɛ́ van wɔ́ kɛ̀amu, á ɓiɛ̀ yú sɛ̃́ní ɲúuhɛ̃ bɔ̀nbɔ̀ ɲu ɛ́ yòó sĩiniɛ. 18Àlɛ ɛ́ iè lè sɛ̃́ní ɲún-kùi á yú, ɛ́ van cɛ̃́ lé kṹun lè sṹsùnù à síɛ tànkɔ̀niɛ ɓɛ́ ɲúnsɔ sɛ̃́ní yán.

19Ɛ́ hɔ́ khie miɛ, ɛ́ ɓɛ́ tɔntɛ́riè sɔ ɲúnsɔ ɛ́ van ɓɛrɛ ɛ́ ɓen ɛ́ vɔn ɓɛ̀ à nɛ hɔ́rɔ wóo ɓen munkɛ hɔ bòo lɛ á wɔ́ àá mí sɛ̃́ní. 20Á tɔntɛ́ lɛ ɛ́ zɔǹ yú hɔ́ sɛ̃́ní ɲúuhɛ̃ hùanú ɛ́ ɓɛrɛ lúwiniɛ kɛ́ á bĩniɛ dàa sɛ̃́ní ɲúuhɛ̃ hùanú dɔ̀, à zɔn bie nɛ làa: “Ɲunsɔ, kɔ́ zɔǹ lɛ́ sɛ̃́ní ɲúuhɛ̃ hùanú mi ǹ. Ɛ́ ń bĩniɛ yú sɛ̃́ní ɲúuhɛ̃ hùanú ɛ́ yòó sĩiniɛ; ɛ́ hɔ́ lɛ!” 21Ɛ́ peɓɛ̀ ɲúnsɔ ɛ́ zɔn bie lɛ́ à ǹ nɛ: “Hɔ̀ sãa, kɔ́ iè tɔntɛ́ sãanù lɛ ɲún ɛ́ cã̀aní. Kɔ́ cã̀aniɛ kɔ̀ ɲún bòo lɛ ɛ́ mìniɛ hũn, ɛ́ nin dé bòo bɔ̀kùi kɔ̀ bàanì hũn. Ɛ́ kɔ́ ɓen zɔ wɛní kɔ́te àá mí ɲúnsɔ.” 22Á tɔntɛ́ lɛ zɔǹ yú hɔ́ sɛ̃́ní ɲúuhɛ̃ bɔ̀nbɔ̀ ɲu ɛ́ ɓiɛ̀ van lúwiniɛ à zɔn bie nɛ làa: “Ɲunsɔ, kɔ́ zɔǹ lɛ́ sɛ̃́ní ɲúuhɛ̃ bɔ̀nbɔ̀ ɲu mi ǹ, ɛ́ kɔ́ húi ń bĩniɛ yú pehɔ̀ ɲúuhɛ̃ bɔ̀nbɔ̀ ɲu ɛ́ yòó sĩiniɛ kɛ̀a tũ̀nú. Ɛ́ hɔ́ lɛ!” 23Ɛ́ peɓɛ̀ ɲúnsɔ ɛ́ zɔn bie lɛ́ à ǹ nɛ: “Hɔ̀ sãa kɔ́ iè tɔntɛ́ sãanù lɛ ɲún ɛ́ cã̀aní. Kɔ́ ɛ́ cã̀aniɛ kɔ̀ ɲún bòo lɛ ɛ́ mìniɛ hũn, ɛ́ nin dé bòo bɔ̀kùi kɔ̀ bàanì hũn. Ɛ́ kɔ́ ɓen zɔ wɛní kɔ́te àá mí ɲúnsɔ.” 24Á tɔntɛ́ lɛ zɔǹ yú lé sɛ̃́ní ɲún-kùi ɛ́ ɓiɛ̀ van lúwiniɛ à zɔn bie nɛ làa: “Ɲunsɔ, ń dũ kɛ́ kɔ́ iè nìnbírɔ lɛ lɔ̀nbiè wi; kɔ́ wóò mìí hɔ́ bòo lè mún lɛ ɛ́ kɔ́ yí zì bòo dɔ̀ hũn, ɛ̀ kɔ̀ wóò mìí hɔ́ bòo lè mún lɛ ɛ́ kɔ́ yí dé bòo dɔ̀ hũn wɛ̀. 25Ɛ́ ń zɛ́rɛ ɛ́ van tànkɔ̀niɛ kɔ̀ sɛ̃́ní lè sṹsùnù; ɛ́ hɔ̀ lɛ, ɛ́ kɔ́ fé kɔ́ bòo.” 26Ɛ́ peɓɛ̀ ɲúnsɔ ɛ́ zɔn bie lɛ́ à ǹ nɛ: “Tɔntɛ́ koohɔ́, paarɔ lɛ! Kɔ́ dũ kɛ́ ń wóò mìí hɔ́ bòo lè mún lɛ ɛ́ ń yí zì bòo dɔ̀ hũn, ɛ̀ ǹ mìí hɔ́ bòo lè mún lɛ ɛ́ ń yí dé bòo dɔ̀ hũn, 27ɛ́ kɔ́ hṹn fɔ́ɓán ɛ̀ kɔ̀ vɛ bìsí niǹ sɛ̃̀ní hɔ̀ màa bìsílén zũnù hũn, kɛ́ ń ɓen khũ̀a ɓɛrɛ, ɛ̀ ǹ ɓen fé niǹ bòo àá pehɔ̀ tũ̀nú.” 28À khie bie lɛ́ ɓɛ́ tɔntɛ́riè sí kɛ́ ǹ nɛ làa: “Mì khíi fé lé sɛ̃́ní ɲún-kùi sɔ ɛ̀ khíi lɛ́ álɛ ɛ́ dàa hɔ sɛ̃́ní ɲúuhɛ̃ pírú ǹ. 29Iè hɔ̀ lɛ álɛ ɛ́ dàa hɔ bòo ɛ́ ɓɛ́ ɓén bĩní lɛ́ nin ɛ́ sĩiní á wo ɛ́ wé bɔ̀kuì ɓàasɔ, àlɛ ɛ́ yí dàa bòo dɔ̀, ɛ́ hɛ̀rí hɔ́pe bìcínbóo lɛ á dàa ɛ́ ɓɛ́ ɓén bĩní fé. 30Kɛ́ hɔ́ ɓen ɛ́ kɛ́ ápe tɔntɛ́ koohɔ́ lɛ, ɛ̀ mì mìí ɔ́ ɛ̀ tɛ́ vɛ líení hɔ́ síbínú hũn; sí iè lè viì lɛ á mii wírí hũn kɛ́ á ɛ́ bie nɛ kɛ́ mí hṹn dũ.”»

Bòo lɛ ɛ́ Dɔfĩn dàa ɓén lè ɓɛ̀ nìnbirìe lìe.

31«Pɛ̃hṹ lɛ kɛ́ á nìnbírɔ Zuú ɛ́ ɓen ɛ́ vaá-ɓén mí ɓàarɔ́ hũn àá mí mɛlɛkɛɓɛ ɓɛ́kùi, á ɓén síɛ kansí mí bɛ́záanú wànlè lɔ̀n lè yèn-bɛhɔ́ hũn. 32Ɛ́ ɓɛ́ sṹsùnù nìnbirìe ɓɛ́kùi ɛ́ ɓén kóo ɓánlɔ̀n piè híɛhɔ́. Á wo ɓén sankɛ ɓɛ ɛ́ lé ɓán hũn, kɛ̀a bòo lɛ á pisierɔ ɛ́ dàa wóò sankɛ ɓɛ pirìe ɛ̀ lé ɓán hũn àá ɓɛ́ bìe bòo sí. 33À ɓén khíi ɛ́ dĩ̀ní ɓɛ́ pirìe àá mí ńdóonín, ɛ̀ ɓɛ̀ bìe á khíi dĩ̀ní à mí ńmiinín. 34Á bɛ́zuú ɛ́ ɓén khíi bie ɛ́ lɛ́ ɓɛ́lɛ ɛ́ wi piè ńdóonín nɛ làa: “Mì ɓen, mìpe lɛ ɛ́ kìe Yàá ɛ́ dúɓɛa nin; mì ɓen ɛ̀ zɔ le bɛ́záanú hũn, lèpe lɛ ɛ́ Dɔfĩn ɛ́ sɛ́sɛ́a bɔ̀sí mí bòo hũn lè dímíɲɛ́ fìi ɓánlén. 35Iè hɔ̀ lɛ ɛ́ hɔ́ hĩni ɛ́ hàarí ɛ́ nìn ɓé ɛ́ mí lɛ́ hɔ́ díe mi ǹ ɛ́ dú, ɛ̀ hɔ̀ ɲɛ-hĩni ɛ́ hàarí ɛ́ nìn ɓé ɛ́ mí lɛ́ hɔ́ ɲumu mi ǹ ɛ́ ń ɲún; ɛ̀ ǹ hàarí iè nɛ̀hũnù ɛ́ mí perɛ mi ǹ. 36Ń hàarí ɛ́ yí dàa bɔ̀-zɔriè ɛ́ mí lɛ́ tĩ̀ɛ mi ǹ ɛ́ ń zɔn, ɛ̀ ǹ hàarí ɛ́ dɔ ɛ́ mí huie niǹ bòo, ɛ̀ ǹ hàarí ɛ́ wi le kɛ̀sí hũn ɛ́ mí ɓɛrɛ ɛ́ khú mi ǹ.” 37Ɛ́ ɓɛ́pe nìcã̀aníriè sɔ ɛ́ ɓén zɔ bie ɛ́ lɛ́ à ǹ nɛ làa: “Ɲunsɔ, hɔ̀ iè wuàwurù ɛ́ ké dàa mɔn kɔ kɛ́ hɔ́ hĩni ɛ́ kɔ̀ ɓé ɛ́ ké lɛ́ hɔ́ díe kɔ ǹ ɛ́ kɔ́ dú, ɛ̀ kè mɔn kɔ wuàwurù kɛ́ ɲɛ-hĩni ɛ́ kɔ̀ ɓé ɛ́ ké lɛ́ hɔ́ ɲumu kɔ ǹ ɛ́ kɔ́ ɲun? 38Hɔ̀ iè wuàwurù ɛ́ ké dàa mɔn kɔ kɛ́ kɔ́ iè nɛ̀hũnù ɛ́ ké perɛ kɔ ǹ, ɛ̀ kè mɔn kɔ wuàwurù kɛ́ kɔ́ yì dàa bɔ̀-zɔriè, ɛ́ ké lɛ́ hɔ́ tĩɛ̀ kɔ ǹ ɛ́ kɔ́ zɔn? 39Hɔ̀ iè wuàwurù ɛ́ ké dàa mɔn kɔ kɛ́ kɔ́ ɛ́ dɔ tàá kɛ́ kɔ́ wi le kɛ̀sí hũn ɛ́ ké ɓɛrɛ huie kɔ?” 40Á bɛ́zuú ɛ́ ɓén zɔ́ kɔ̃́ní ɓɛ́ nɛ làa: “Nin bie hɔ lɛ́ miɛ ǹ àá bɔ̀bín nɛ pɛ̃̀hṹ yée pɛ̃̀hṹ lɛ mí dàa wɔ́ hɔ́ pesí ɛ́ lɛ́ kìe zuú dɔ̀ lɛ ɛ́ mìniɛ ɛ́ pɔ ɓɛpe kìe zɛ̀ɓɛ̀ lɛ kɛ́ ɓɛ́kùi, ɛ̀ hɔ̀ iè ǹpe ɛ́ mí wɔ́ hɔ́ ɛ́ lɛ́ nin.”

41Ɛ́ pehɔ̀ máahṹ, àpe bɛ́zuú ɛ́ khíi bie ɛ́ lɛ́ ɓɛ́lɛ ɛ́ wi piè ńmiinín nɛ làa: “Mì khɛ̃̀ún vɛ sɔ́n sɔ́n ɛ̀ mì kɛ́ mí, mí iè nìɛ lɛ dánkɛ́niɛ! Mì lan vɛ zɔ hɔ dṹn lɛ yá hí hũn, hɔ̀pe lɛ ɛ́ Dɔfĩn ɛ́ sɛ́sɛ́a ɔ̀ Sitũanɛ àá mí mɛlɛkɛɓɛ bòo hũn. 42Iè hɔ̀ lɛ ɛ́ hɔ́ hĩni ɛ́ ɓɔ́ mi ɛ́ mí yí lɛ́ bɔ̀díe mi ǹ ɛ̀ ǹ dí, ɛ̀ hɔ̀ ɲɛ-hĩni ɛ́ ɓɔ́ mi ɛ́ mí yí lɛ́ ɲumu mi ǹ ɛ̀ ǹ ɲu wɛ̀. 43Ń hàarí iè nɛ̀hũnù ɛ́ mí yí pen mi ǹ, ɛ̀ ǹ hàarí yí dàa bɔ̀-zɔriè ɛ́ mí lɛ́ tĩ̀ɛ mi ǹ ɛ̀ ǹ zɔ wɛ̀. Ń hàarí dɔ, ɛ̀ ǹ lò hàarí wi le kɛ̀sí hũn ɛ́ mí yí ɓen húi mi wɛ̀.” 44Ɛ́ ɓɛ́ ɓiɛ̀ ɓén zɔ́ bie nɛ làa: “Ɲunsɔ, hɔ̀ ɛ́ iè wuàwurù ɛ́ ké dàa mɔn kɔ kɛ́ hɔ́ hĩni ɛ́ kɔ̀ ɓé tàá kɛ́ hɔ́ ɲɛ-hĩni ɛ́ kɔ̀ ɓé tàá kɛ́ kɔ́ iè nɛ̀hũnù tàá kɛ́ kɔ́ yí dàa bɔ̀-zɔriè tàá kɛ́ kɔ́ ɛ́ dɔ tàá kɛ́ kɔ́ ɛ́ wi le kɛ̀sí hũn ɛ́ ké yí húi kɔ́ bòo?” 45Á bɛ́zuú ɛ́ ɓén zɔ́ kɔ̃ní ɓɛ́ nɛ làa: “Nin bie hɔ lɛ́ miɛ ǹ àá bɔ̀bín nɛ pɛ̃̀hṹ yée pɛ̃̀hṹ lɛ ɛ́ mí yí wé hɔ́pe sí ɛ̀ lɛ́ ápe lɛ ɛ́ mìniɛ ɛ́ pɔ ɓɛ́pe lɛ ɓɛ́kùi ǹ dɔ̀, ɛ̀ hɔ̀ iè ǹpe ɛ́ mí yí wé hɔ́ ɛ́ yí lɛ́ nin wɛ̀.” 46Ɛ́ ɓɛ́pe ɛ́ wo ɓén khíi vɛ kań lé sɛ̃́ɲíi lɛ yá vé hũn, ɛ̀ ɓɛ̀pe nìcã̀aníriè ɛ́ pe ɛ́ kań lé mɛkɛ̃nì lɛ yá vé hũn.»

Currently Selected:

Matiye 25: bwj

Highlight

Copy