Matiye 8

Ɓèré dɔ̀ wiɛnírɔ́ bòo

Mar 1.40-45; Lik 5.12-16

1Ɛ́ Yiezu ɛ́ yòó lɔ́ lé ɓúkìe lɔ̀n ɛ́ ɓen síɛ, ɛ́ ɓɛ́ nìnbí-dũmu ɛ́ khie bɔ̀ piè máahṹ. 2Ɛ́ ɓèré dɔ̀ ɛ́ van ɓɛrɛ yú-o, à síɛ lúsí mí nunkɛ́yìe lɔ̀n piè híehɔ́ à bie lɛ́ à ǹ ɛ́ nɛ làa: «Ɲunsɔ, kɛ́ kɔ́ tɛ̀, ɛ́ kɔ́ dɛ̀ ɛ́ lɛ́ ɛ́ nín wɛ, ɛ́ wé nìnbírɔ lɛ ɛ́ ce.» 3Ɛ́ Yiezu ɛ́ líeniɛ mí núnú ɛ́ lɔ́ han ɔ̀ ǹ, à zɔ nɛ làa: «Ń tɛ̀, ɛ́ kɔ́ wo wɛ!» Ɛ́ pehɔ̀ lɔ̀n, á nùún sɔ ɓèrému ɛ́ yòó lɔ́ piè lɔ̀n. 4Ɛ́ Yiezu ɛ́ khie bie lɛ́ à ǹ nɛ làa: «Tɛ́ kɔ́ ɲɛkɛ̃̀a sãàní: bí lɛ́ nɛ nìnbírɔ dɔ̀ ɛ̀ ɲí hɔ́, kɛ́ kɔ́ vɛ zɛ̃́ní kɔ́te hɔ̀ Dɔfĩn khɛ̃́ndàarɔ ǹ, ɛ̀ kɔ̀ lɛ́ hɔ́ bòo lɛ á Moyiize bie bòo hɔ̀ làndɛ́ vɛ̃́hṹ nɛ a nìnbírɔ́ fɔ́ɓán à wóo leń ɛ̀ dàá zɛ̃́ní lɛ́ ɓɛ́ nìnbirìe ǹ kɛ́ á wan.»

Rɔmu sɛ̃̀nɛ̀dɔ́síɓɛ́ ɲúnsɔ dɔ̀ tɔntɛ́ wiɛnírɔ́

Lik 7.1-10; Zãn 4.43-54

5Ɛ́ hɔ́ lɛ ɛ́ Yiezu ɛ́ van ɛ́ Kapɛrɛnayiimu lóo ɛ̀ zɔ, ɛ́ Rɔmu sɛ̃̀nɛ̀dɔ́síɓɛ́ ɲúnsɔ dɔ̀ ɛ́ ɓɛrɛ yú ó, 6à ɛ́ ɔ̀ ɓɔ́nɓɔ́ninin ɛ́ nɛ làa: «Ɲunsɔ, niǹ tɔntɛ́ ɛ́ van dũmua wi niǹ yíe, piè tɛkɛ̀a lɛ̀, ɛ́ piè lɔ̀n ɛ́ hɛ̀ be àá bɔ̀bín.» 7Ɛ́ Yiezu zɔn bie lɛ́ à ǹ nɛ làa: «Nín vɛ wiɛní-ɛ.» 8Á sɛ̃̀nɛ̀dɔ́síɓɛ́ ɲúnsɔ ɛ́ zɔn kɔ̃́niɛ ɔ̀ ɛ́ nɛ làa: «Ɲunsɔ, ń mìniɛ cɛ̃̀un ɛ̀ kɔ̀ ɓen niǹ yíe. Kɛ́ kɔ́ zɔn bie ben-cóoní dɔ̀ mí dòonún ɛ́ niǹ tɔntɛ́ sɔ ɛ́ wɛ. 9Iè hɔ̀ lɛ ɛ́ ńpe ɛ́ dàa ɲúuhɛ̃siè lɛ ɛ́ nín bòo ɛ̀ ɲí, ɛ̀ ǹ lò ɓiɛ̀ dàa sɛ̃̀nɛ̀dɔ́síɓɛ́ lɛ ɛ́ niǹ bòo ɛ̀ ɲí. Kɛ́ ń ɓen khie bie lɛ́ ádɔ̀ ǹ nɛ a lan, à lan; ɛ̀ ǹ ɓen khie bie lɛ́ á dɔ̀ ǹ nɛ a ɓen, à ɓen; ɛ̀ ǹ ɓen khie bie lɛ́ niǹ tɔntɛ́ ǹ nɛ a wé hɔ́lɛ, à wé hɔ́.» 10Ɛ́ bòo lɛ ɛ́ Yiezu ɛ́ ɲɛ́ hɔ́pe biehĩ́ sɔ sí, á yòó wɛniɛ míte cɛ̃̀un à khie bie lɛ́ ɓɛ́ nìnbirìe lɛ bɔ̀ mí máahũ ǹ nɛ làa: «Nin bie hɔ lɛ́ miɛ ǹ àá bɔ̀bín nɛ ń ɲɛùn yí mi nìnbírɔ dɔ̀ lɛ dàa ńdɛsĩ̀nlɔ́ kɛ̀a ɔ pe nùún lɛ, hɛ̀rí hɔ̀ Yizarayɛɛle cɛ̃̀mɛ̀nɛ́ hũn. 11Nin bie hɔ lɛ́ miɛ ǹ nɛ nìnbirìe bìkuì ɛ́ wóo ɓén vɛ́ lé àá wurù hànlén àá pelè línlén ɛ́ ɓen, ɛ́ páaní kansí ɛ́ dí àá Abarahaamu àá Yizaake àá Zakɔɔbu Dɔfĩn bɛ́záanú hũn. 12Hɔ́rɔsí kɛ́ ɓɛ́pe Yizarayɛɛle nìɛ dɔ̀ lɛ ɛ́ den hṹn sãawi ɛ̀ ɓɛ̀ teń lépe Dɔfĩn bɛ́záanú sɔ ɛ̀ zɔ ɛ́ ɓɛ́ den ɛ́ ɲɛ ɛ́ liení lé zĩínù, hɔ̀ síbínú hũn, ɛ́ ɓɛ́ lé wirikɛ kɛ́ ɓɛ̀ ɛ́ ɓɛ́ ɲiɛ̀ ɛ̀ khĩ yán.» 13Ɛ́ Yiezu ɛ́ khie bie lɛ́ á sɛ̃̀nɛ̀dɔ́síɓɛ́ ɲúnsɔ ǹ nɛ làa: «Lan ɓɔ, nɛ hɔ wé kɛ̀a bòo lɛ ɛ́ kɔ́ dàa ɛ́ dũmuasɛ̃̀!» Ɛ́ pehɔ̀ laà hũn, á sɛ̃̀nɛ̀dɔ́síɓɛ́ ɲúnsɔ́ tɔntɛ́ sɔ ɛ́ yòó wan.

Piɛre ɓà he-hṹnu àá ɓɛ́ dɔriè dɔ̀ wiɛnírɔ́

Mar 1.29-34; Lik 4.38-41

14Ɛ́ Yiezu ɛ́ khie ɛ́ van Piɛre yíe. Á van yú ɓà he-hũnu kɛ́ á dũmua ɛ́ tɛkɛ̀a bɔn. 15Á síɛ han piè núnú ǹ ɛ́ piè tɛkɛ-benlè ɛ́ yòó lɔ́ piè lɔ̀n á hṹna ɛ́ khie perɛ à ǹ.

16Ɛ́ hɔ́ zĩ́ihṹ ɛ́ van dɛ̃un, ɛ́ ɓɛ́ nìnbirìe ɛ́ van dàa ɓɛ nìnbí-kuì lɛ ɛ́ ɓɛ́ ńɲíkĩ́nìɛ ɛ́ lɔ̀n ɛ̀ biení ɛ́ dàa ɓɛrɛ Yiezu viì. Ɛ́ Yiezu ɲɛun ɓɛ̀ ńɲíkĩ́nìɛ sɔ ɛ́ líeniɛ ɓà ǹ àá mí bienù pànkɛ́, à wiɛniɛ ɓɛ̀ dɔriè ɓɛ́kùi. 17Hɔ̀ wɔ́ kɛ̀amu, ɛ́ Dɔfĩn bɔ̀háanírɔ Ezayi bòo lɛ á hàarí bie ɛ́ dàa ɲunù ɛ́ tú. Àpe Ezayi ɛ́ den hàarí bie nɛ làa:

«À fɔ́ hɔ́ bòo lɛ ɛ́ kè lɔ̀n ɛ̀ biení ɛ́ bɔ̀ mí lɔ̀n, à lò fɔ́ ké duò ɛ́ tìe.»

Yiezu máahṹ bènlɔ́ bòo

Lik 9.57-62

18Ɛ́ Yiezu ɛ́ mɔn ɓɛ̀ nìzã̀amáa lɛ kirie ɔ̀ ǹ, á bie lɛ́ mí kɛ̀ránzɛ̀ɓɛ̀ ǹ nɛ ɓɛ lɛ́ nɛ ɓɛ́ cánkɛ hɔ́ ɲumu ɛ̀ lé vɛ àá lé vṹn máahṹ. 19Ɛ́ Moyiize làndɛ́ kɛ̀ránlɔ́ dɔ̀ ɛ́ van lúwiniɛ ɔ̀ ǹ à bie lɛ́ à ǹ nɛ làa: «Kɛ̀ránlɔ, nin bè kɔ̀ máahṹ ɛ̀ dàá vɛ hɔ vuò lɛ ɛ́ kɔ́ vaá-vɛ hũn míkùi.» 20Ɛ́ Yiezu ɛ́ zɔn kɔ̃́niɛ ɔ̀ ɛ́ nɛ làa: «Ɓɛ̀ ńbɛ́hooni ɛ́ dàa ɓɛ́ kṹuhɛ̃, ɛ̀ ɓɛ̀ ńɲíizàani ɛ́ dàa ɓɛ́ ńwíɛhɛ̃, kɛ́ ńpe nìnbírɔ Zuú ɛ́ den yí dàa viì lɛ ɛ́ nín síɛ bè niǹ ɲún nin wɛ̀.» 21Ádɔ̀ ɓɛ̀ kɛ̀ránzɛ̀ɓɛ̀ tĩ́ihṹ ɛ́ zɔn bie lɛ́ à ǹ nɛ: «Kɛ̀ránlɔ, fùansí nɛ n vɛ wũ̀ń kiè yàá vé.» 22Ɛ́ Yiezu zɔn kɔ̃́niɛ ɔ̀ nɛ làa: «Fùansí ɓɛ́ nìhiè ǹ nɛ ɓɛ wũ̀ń ɓɛ́ nìhiè, ɛ̀ kɔ̀pe ɓen bè niǹ máahṹ.»

Bòo lɛ ɛ́ Yiezu dàa waaniɛ pinpi-bɛhɔ́ dɔ̀ hɔ̀ ɲun-bɛhɔ́ lɔ̀n

Mar 4.35-41; Lik 8.22-25

23Ɛ́ Yiezu yòó zɔn lè ɲumu wiè, ɛ́ piè kɛ̀ránzɛ̀ɓɛ̀ ɛ́ bɔ̀ɓán àá ɔ̀. 24Ɛ́ lé pinpi-bɛhɔ́ dɔ̀ ɛ́ pan pan ɛ̀ lè síɛ hĩ́nà hɔ̀ ɲumu lɔ̀n. Ɛ́ hɔ́ ɲumu lɛ ɛ́ sànbɔ̀níkɛ ɛ́ wo yòó ɛ́ lè wiè ɛ̀ tí, hɔ́rɔsí kɛ́ Yiezu ɛ́ pe síɛ dũmua. 25Ɛ́ piè kɛ̀ránzɛ̀ɓɛ̀ ɛ́ khie van lúwiniɛ ɔ̀ ǹ, ɛ̀ ɓɛ̀ tĩ̀niɛ ɔ̀ kɛ́ ɓɛ̀ ɛ́ benkɛ ɛ́ nɛ: «Ɲunsɔ, fuení kie ǹ, ké lɛ ɛ́ hí cɔ́!» 26Ɛ́ Yiezu zɔn khɛ́ lɛ́ ɓà ǹ nɛ làa: «Mí wiɛ dàa ɛ́ zɛ́rɛ? Mí wiɛ dàa ńdɛsĩ̀nlɔ́ ɛ́ mìníɛ kɛ̀amu?» À síɛ hĩ́nà tĩ́nɛ lè pinpinù àá hɔ́ ɲumu ɲún hũn, ɛ́ lé viì míkùi ɛ́ yòó wan hĩ́ɔɔn. 27Ɛ́ ɓɛ́pe ɓɛ́kùi ɛ́ hɔ́ hɛ̀ yòokɛa lɔ̀n, ɛ́ ɓɛ́ ɛ́ bie nɛ làa: «Àpe nùún sɔ lɛ ɛ́ hɛ̀ iè wie, ɛ́ lé pinpinù àá hɔ́ ɲumu ɛ́ dàa wóò ɲí piè bòo?»

Bòo lɛ ɛ́ Yiezu dàa wiɛniɛ nìɛ ɓɛ̀ ɲu dɔ̀ lɛ ɛ́ ńɲíkĩ́nìɛ wi nin

Mar 5.1-20; Lik 8.26-39

28Ɛ́ bòo lɛ ɛ́ Yiezu ɛ́ cankɛa hɔ̀ ɲumu ɛ́ van lɔ́ dɛ̃un ɓɛ̀ Kadareniɛɓɛ cɛ̃̀mɛ̀nɛ́, ɛ́ nìɛ ɓɛ̀ ɲu dɔ̀ lɛ ɛ́ ńɲíkĩ́nìɛ ɛ́ wi nin ɛ́ zɔn lɔ́ hɔ́ búo tĩ́ihṹ ɛ́ ɓen lɔ́ sɛ̃́ piè híɛhɔ́. Peɓɛ̀ hiɛ̀ ɛ́ hṹn wi cɛ̃̀un, ɛ́ nìnbírɔ dɔ̀ ɛ́ yáà hĩ̀ mì tĩì ɛ̀ vɛ khíi àá yán wɛ̀. 29Ɛ́ ɓɛ́ zɔn ɛ́ bénkɛ nɛ: «Hɔ ńɓùo ɛ́ kɔ́ ɛ́ cɛ̀ àá kie, Dɔfĩn Zuú? Kɔ́ wìe ɛ́ ɓɛrɛ hũ̀nún ɛ́ kɔ ɓen vɛ́ ké ɲɛkɛ̃̀a kɛ́ lé pɛ̃̀hṹ lɛ ɛ́ Dɔfĩn lerɛ ɛ́ ɲɛùn yí dɛ̃?» 30Hɔ́rɔsí ɛ̀ ɓɛ̀ nɛ̀nbùɛhĩ́ bìkuì dɔ̀ ɛ́ van dɛ̃̀ viì ni ɛ́ dí. 31Ɛ́ ɓɛ́ ńɲíkĩ́nìɛ ɛ́ Yiezu ɛ̀ ɓɔ́nɓɔ́níkɛnin nɛ: «Kɔ́ ɓen kɔ́ ɲɛ kie ɛ̀ kɔ̀ lɛ́ nɛ ke vɛ zɔ ɓɛ nɛ̀nbùɛhĩ́ yéní hũn.» 32Ɛ́ Yiezu nɛ ɓɛ lan vɛ zɔ. Ɛ́ ɓɛ́ ńɲíkĩ́nìɛ ɛ́ zɔ lɔ́ ɓɛ́ nìɛ ɓɛ̀ ɲu sɔ hũn, ɛ́ cɔ́ van zɔn ɓɛ̀ nɛ̀nbùɛhĩ́ hũn. Ɛ́ ɓɛ́pe ɓɛ́kùi ɛ́ van yòó lɔ́ lé ɓúekìe lɔ̀n ɛ́ ɓen síɛ zɔn hɔ̀ ɲumu, ɛ́ zɔn húrunkɛ. 33Ɛ́ ɓɛ́ nìnbirìe lɛ te ɓɛ nɛ̀nbùɛhĩ́ sɔ ɛ́ hṹn sie ɛ́ zɔ̀ van zɔn lè lóo hũn, ɛ́ zɔn khɛ́ hɔ́ bòo lɛ wɔ́ míkùi, ɛ̀ ɓɛ̀ lò bie hɔ̀ bòo lɛ wɔ́ ɓɛ́ nìɛ ɓɛ̀ ɲu lɛ ɛ́ ɓɛ́ ńɲikĩ́nìɛ ɛ́ hṹn wi nin. 34Ɛ́ ɓɛ́ lóo nìɛ ɓɛ́kùi ɛ́ lɔ́ kã́a Yiezu; ɛ́ bòo lɛ ɛ́ ɓɛ́ van mɔn ɔ̀, ɛ́ ɓɛ́ ɓɔ́nɓɔ́niɛ ɔ̀ ǹ nɛ a lé ɓɛ́ sṹsùnù lɔ̀n.

Currently Selected:

Matiye 8: bwj

Highlight

Copy