Marike 15

Ɓɛ̀ dàa Yiezu ɛ́ dàa van ɔ̀ Kuvɛrɛnɛɛre Pilaate viì

Mat 27.1-2; 27.11-14; Lik 23.1-5; Zãn 18.28-38

1Ɛ́ ɲɛǹbín dùdù ɛ́ ɓɛ́ khɛ̃́ndàariè hándíe àá ɓɛ́ Zuifuɓɛ nìkĩ́ɛ àá ɓɛ́ làndɛ́ kɛ̀ránliè àá ɓɛ́pe Zuifuɓɛ lìe lèriè lɛ kɛ́ ɓɛ́kùi, ɛ́ lɔ́ koo ɓánlɔ̀n hɔ̀ lìe lènlén, ɛ̀ ɓɛ̀ khie can Yiezu ɛ́ dàa van lɛ́ á Kuvɛrɛnɛɛre Pilaate ǹ. 2Ɛ́ Pilaate ɛ́ van ɔ̀ dìenin nɛ làa: «Kɔ́ iè ɓɛ̀ Zuifuɓɛ bɛ́zuú?» Ɛ́ Yiezu zɔn kɔ̃́niɛ ɔ̀ nɛ: «Kɔ́ khɛ́ mú.» 3Ɛ́ ɓɛ́ khɛ̃́ndàariè hándíe ɛ́ khie ɛ́ hɔ̀ ɓúo bɔ̀kùi ɛ̀ ɓúukɛ nɛ Yiezu ɛ́ wɔ́. 4Ɛ́ Pilaate ɛ́ sĩ̀n khie ɔ̀ dìenin nɛ làa: «Kɔ́ hĩɛ ɛ́ yá bòo khɛ́? Húi hɔ́pe sí ɛ́ ɓɛ́ bie nɛ kɔ́ te wɔ́ lò.» 5Kɛ́ Yiezu dú mí ɲunù ɛ́ yí bĩní zɔ bie bòo dɔ̀ wɛ̀. Ɛ́ hɔ́ hɛ̀ yòokɛa Pilaate lɔ̀n àá bɔ̀bín.

Zuifuɓɛ nìkĩ́ɛ ɛ́ nɛ Yiezu fɔ́ɓán àá húmú

Mat 27.15-26; Lik 23.13-25; Zãn 18.39; 19.16

6Nyiewɛlɔn Sɛ́rí ɛ́ hṹn wóò ɓen dɛ̃un, à Pilaate ɛ́ wóò leń ɓɛ́ kɛ̀sí nìɛ nìcóoní dɔ̀ ɛ́ fùansínin; kɛ́ á den wóò wí-e lɛ ɛ́ ɓɛ́ nìzã̀amáa nɛ a leń fuànsínin. 7Ɛ́ nùún dɔ̀ lɛ yèrè ɛ́ ɓɛ́ nɛ Barabaasi ɛ́ hàarí wi le kɛ̀sí hũn àá ɓá ńkɔhĩ́ dɔ̀. Ɓɛ̀ hàarí hĩ́nà pɛ̃́ ɓɛ́ Rɔmu siè bòo, ɛ́ yɛ̀rɛ́ hàarí yú nìnbírɔ dɔ̀ ɛ́ ɓɔ́ pehɔ̀ yìi hũn. 8Ɛ́ ɓɛ́ nìzã̀amáa ɛ́ khie van ɔ̀ Pilaate yíe ɛ́ van dɛ̃̀ ɛ́ bie nɛ a wé hɔ́ bòo lɛ á wóò wé ɛ̀ lɛ́ ɓá ǹ fúu lé Nyiewɛlɔn sɛ́rí hũn. 9Ɛ́ Pilaate ɛ́ zɔn ɓɛ̀ dìenin nɛ làa: «Mí biè ɛ́ wɛ nɛ n leń ɔ́ Zuifuɓɛ bɛ́zuú ɛ̀ fùansínin lɛ́ miɛ ǹ?» 10À Pilaate den dũ kɛ́ ɓɛ́ khɛ̃́ndàariè hándíe iè biè ɛ́ yanlienú ɛ̀ dí àá Yiezu ɛ́ ɓɛ́ dàa ɓɛrɛ dú-o mí núnú hũn. 11Kɛ́ ɓɛ́ khɛ̃́ndàariè hándíe ɛ́ den khié sùkúrɛ ɓɛ́ nìzã̀amáa bòo lɛ ɛ́ wé ɛ̀ ɓɛ̀ bie nɛ Barabaasi iè pe ɛ́ ɓɛ́ wɛ nɛ a Pilaate ɛ̀ leń fùansínin ɛ̀ lɛ́ ɓá ǹ. 12Ɛ́ Pilaate ɛ́ sĩ̀n zɔn ɓɛ̀ dìenin nɛ làa: «Ɛ́ hɔ́ iè ńɓùo ɛ́ mí nɛ n wé àá ɔ́pe lɛ ɛ́ mí wóò vé nɛ Zuifuɓɛ bɛ́zuú?» 13Ɛ́ ɓɛ́ zɔn bénkɛ ɛ́ nɛ làa: «Ɓáa ɔ́ lè ɓáalén dãanù lɔ̀n.» 14Ɛ́ Pilaate ɛ́ ɓɛ̀ dìenin nɛ làa: «Kɛ́ hɔ́ den iè hɔ̀ bɔ̀koohɔ́ hɔ́sɔ á wɔ́?» Kɛ́ ɓɛ́ den wóokɛa zɔn benkɛ́ cɛ̃̀un ɛ́ nɛ: «Ɓáa ɔ́ lè ɓáalén dãanù lɔ̀n.» 15Ɛ́ Pilaate ɛ́ den wɛ mii wé ɓɛ́ nìzã̀amáa bòo lɛ ɛ́ ɓɛ́ ɛ́ cɛ̀; á lerɛ a Barabaasi ɛ́ fùɛrɛ̀sínin lɛ́ ɓà ǹ, à khie nɛ ɓɛ hɛ Yiezu àá hɔ́ ńhùiehĩ́, ɛ́ pehɔ̀ máahṹ, à lɛ́ á ɓà ǹ nɛ ɓɛ vɛ ɓáa lé ɓáalén dãanù lɔ̀n.

Ɓɛ̀ sɛ̃̀nɛ̀dɔ́síɓɛ́ ɛ́ Yiezu ɛ̀ yáakɛ

Mat 27.27-31; Zãn 19.2-3

16Ɛ́ ɓɛ́ sɛ̃̀nɛ̀dɔ́síɓɛ́ ɛ́ khie dàa Yiezu ɛ́ dàa van zɔn ɔ̀pe Rɔmu Kuvɛrɛnɛɛre dànkɔ̀ hũn, ɛ́ zɔn vɔn ɓá ńkɔhĩ́ sɛ̃̀nɛ̀dɔ́síɓɛ́ lɛ wi yán ɓɛ́kùi. 17Ɛ̀ ɓɛ́ den khie zooniɛ Yiezu àá pɔnkɔ̀-miì dɔ̀, ɛ̀ ɓɛ̀ khie tɛ̃́ lé bɛ́záanú múnséré dɔ̀ àá ńɲinlɛ̀a ɛ́ yòó yìiniɛ piè ɲún ǹ. 18Ɛ̀ ɓɛ̀ den khie ɛ́ ɔ̀ fòoníkɛ kɛ́ ɓɛ̀ ɛ́ bie nɛ làa: «Zuifuɓɛ bɛ́zuú, ké kɔ̀ fòoní loo.» 19Ɛ̀ ɓɛ̀ wóò yóò nii piè ɲún ǹ àá kã́anú, ɛ̀ ɓɛ̀ khàaníkɛ ɛ̀ kóo piè lɔ̀n, ɛ̀ ɓɛ̀ síɛ hùensí ɓɛ́ nunkɛ́yìe lɔ̀n piè híɛhɔ́. 20Ɛ́ bòo lɛ ɛ́ ɓɛ́ yáakɛa ɔ̀ vɔ́, ɛ́ ɓɛ́ duirɛ lè pɔnkɔ̀-miì lɛ ɓɛ́ hṹn zooniɛ àá ɔ́, ɛ̀ ɓɛ̀ khuie piè tĩ̀ɛ ɛ́ khie zooniɛ àá ɔ́, ɛ̀ ɓɛ̀ dàa ɔ̀ ɛ́ dàa lɔ́ cɔ́ ɛ́ ɓɛ́ vɛ ɓáa lé ɓáalén dãanù lɔ̀n.

Yiezu ɓáarɔ́ lè ɓáalén dãanù lɔ̀n bòo

Mat 27.32-44; Lik 23.26-43; Zãn 19.17-27

21Ɛ́ ɓɛ́ khie sɛ̃́ nùún dɔ̀ lɛ yèrè ɛ́ ɓɛ́ nɛ Simɔn lɛ ɛ́ lé Sirɛnɛ lóo kɛ́ á van lɔ́ àá hɔ́ maa ɛ́ ɓen. Ɛ́ ɓɛ́ khie mɛmɛkɛa ɔ̀ nɛ a tìé Yiezu ɓáalén dãanù. Àpe Simɔn sɔ ɛ́ hàarí iè Alɛkisandere àá Rufiise ɓà yàá. 22Ɛ́ ɓɛ́ sɛ̃̀nɛ̀dɔ́síɓɛ́ ɛ́ dàa Yiezu ɛ́ dàa van lè viì dɔ̀ lɛ yèrè ɛ́ ɓɛ́ nɛ Kɔlikota, iè bòo ɛ́ ɓɛ́ nɛ ɲún ɓɔ̀ɓɔ́khiɛ̀ viì. 23Ɛ́ ɓɛ́ khie lɛ́ hɔ́ divɛ̃n lɛ ɛ́ ɓɛ́ kánkɛa àá hɔ́ bòo dɔ̀ lɛ ɛ́ ɓɛ́ wóò ve nɛ míire ɔ̀ ǹ, kɛ́ Yiezu ɛ́ pɛ̃́ ɛ́ yí ɲu hɔ wɛ̀. 24Ɛ́ ɓɛ́ khie ɓáa ɔ̀ lè ɓáalén dãanù lɔ̀n. Ɛ̀ hɔ̀ lɛ ɛ́ ɓɛ́ wɛ ɛ́ ɓɛ sankɛ piè tĩ̀ɛ lɛ á hṹn zɔn, ɛ́ ɓɛ́ khie lenkɛa hɔ̀ bòo ɛ́ dàa dũnɛ hɔ́rɔ́ dìɛ lɛ á sãawi à yí. 25Ɓɛ́ ɓaa Yiezu lè ɓáalén dãanù lɔ̀n kɛ́ lé wurù ɛ́ wo yòó mii be. 26Ɛ́ lé dìɛ dɔ̀ lɛ yòó wi piè ɲún hũn lè ɓáalén dãanù lɔ̀n, ɛ́ ɓɛ́ wɛ̃́ hɔ́ bòo lɛ ɛ́ ɓɛ́ nɛ a wɔ́ ɛ́ ɓɛ́ dàa nɛ a ɛ́ ɓé lɔ̀n ɛ́ nɛ: «Zuifuɓɛ bɛ́zuú». 27Ɛ́ ɓɛ́ sɛ̃̀nɛ̀dɔ́síɓɛ́ ɛ́ bĩniɛ khie ɓáa kɛ̃̀míbáa ɓìɛ-ɲu dɔ̀ hɔ̀ ɓáalén dãahĩ̀ lɔ̀n, à wìcóoní ɛ́ wi àá Yiezu ńdóonín àdɔ̀ ɛ́ wi àá piè ńmiinín. [ 28Hɔ̀ wɔ́ kɛ̀amu ɛ́ dàa tíiniɛ hɔ̀ bòo lɛ ɛ́ wɛ̃́ lé Dɔfĩn bienù vɛ̃hṹ hũn ɲunù. Hɔ̀ den wɛ̃́ yán ɛ́ nɛ: «Ɓɛ̀ dú-o ɓɛ̀ bɔ̀konwériè tĩ́ihṹ.»] 29Ɛ́ ɓɛ́ nìnbirìe lɛ ɛ́ khíi ɛ́ ɓɛ́ ɲúuhɛ̃ ɛ̀ hóoníkɛ piè lɔ̀n kɛ́ ɓɛ̀ ɛ́ ɔ̀ tòokɛ ɛ́ nɛ: «Hé! kɔ̀pe lɛ ɛ́ dɛ̀ lè Dɔfĩn zũnù ɛ́ wúa ɛ̀ kɔ̀ ɛ́ khíi te le wihĩ́ bɔ̀nbɔ̀ tĩ tĩ́ihṹ hũn; 30ɛ́ kɔ́ fuení kɔ́te kɔ̀te ǹ ɛ̀ kɔ̀ khíi síɛ lé lé ɓáalén dãanù lɔ̀n nɛ ke mi!» 31Ɛ́ ɓɛ́ khɛ̃́ndàariè hándíe àá ɔ́ Moyiize làndɛ́ kɛ̀ránliè ɛ́ lòo ɓiɛ̀ ɛ́ ɔ̀ yáakɛ ɛ́ nɛ làa: «À fueniɛ ɓɛ̀ dɔ̀ ǹ, à den yí dɛ̀ míte ɛ́ yá fuenínin wɛ̀. 32Nɛ ape Kirisa, ɓɛ̀ Yizarayɛɛle nìɛ bɛ́zuú ɛ̀ lé lé ɓáalén dãanù lɔ̀n ɛ̀ khíi síɛ hɔ́pe lɛ lɔ̀n nɛ ke mi, ɛ̀ kè den dɛsĩ̀!» Ɛ́ ɓɛ́pe kɛ̃̀míbáa bìɛ ɲu lɛ ɛ́ ɓɛ́ ɓáa hɔ̀ ɓáalén dãahĩ́ lɔ̀n Yiezu sɛhĩ́ɛ ɛ́ lò ɓiɛ̀ ɛ́ ɔ̀ tòokɛ.

Yiezu húmú bòo

Mat 27.45-56; Lik 23.44-49; Zãn 19.28-30

33Ɛ́ bòo lɛ lé wurù yòó dɛ̃un lè sí tĩ́ihṹ, lè wúsɔn-dáabíi hṹn, ɛ́ hɔ́ síbínú ɛ́ yòó wɔ́ lé sṹsùnù míkùi lɔ̀n fúu ɛ́ lé wurù van háa. 34Ɛ́ lépe wu-háalé sɔ hũn, ɛ́ Yiezu ɛ́ zɔn ɛ́ bérɛ cɛ̃̀un ɛ́ nɛ làa: «Eloyi, Eloyi, Lema sabakatani?» Iè bòo á nɛ: «Niǹ Dɔfĩn, niǹ Dɔfĩn kɔ́ wiɛ dàá fuɛ̀rɛ̀sí mi ǹ?» 35Ɛ́ ɓɛ́pe nìnbirìe lɛ hṹn wi yán dɔ̀ ɛ́ ɲɛ́ hɔ́ ɛ́ ɓɛ́ ɛ́ bie nɛ làa: «Mì húi à ɛ́ Elii ɛ̀ ve!» 36Ádɔ̀ ɛ́ khie zɔ̀ van mɔ̀ lè pɔ̀nkɔ̀-núnú dɔ̀ ɛ́ khie van zìiniɛ hɔ̀ divɛ̃n lɛ ɲiì hũn ɛ́ yòó bun lè kã́anù ɲún ǹ ɛ́ yòoniɛ nɛ Yiezu ɲu, à ɛ́ bie ɛ́ nɛ làa: «Mì dìń nɛ ke húi nɛ ape Elii iè wìe ɓén ɓen leń ɔ́ ɛ́ síɛní ɛ́ lé lé ɓáalén dãanù lɔ̀n!» 37Kɛ́ Yiezu ɛ́ den zɔn bérɛ à wo húrun.

38Ɛ́ lé fúrɛ́ dɛ̀bɛhɔ́ lɛ zɔn cérɛ lè Dɔfĩn zũ-bɛhɔ́ tĩ́ihṹ ɛ́ zɔn khã̀a ɛ́ yòó lɔ́ hɔ́ hóohũn fúu ɛ́ ɓen síɛ tɛ́rɛ. 39Á Rɔmu sɛ̃̀nɛ̀dɔ́síɓɛ́ ɲúnsɔ lɛ hṹn dɛ̃̀ Yiezu híɛhɔ́, ɛ́ lɛ mɔn bòo lɛ á dàa húrun, á ɛ́ bie nɛ làa: «Àpe nùún lɛ ɛ́ pe hɛ̀ wo hṹn iè Dɔfĩn Zuú àá bɔ̀bín!» 40Ɛ̀ ɓɛ̀ hã́a dɔ̀ ɛ́ lò ɓiɛ̀ hṹn wi yán kɛ́ ɓɛ́ khɛ̃̀nɛ van dɛ̃̀ ɛ́ viì ni ɛ́ húi. Maari lɛ ɛ́ lé hɔ́ Makedala lóo àá Zaake wìcínwíe àá Zooze ɓà nín Maari, àá Salome ɛ́ hàarí wi ɓɛ hãá sɔ tĩ́ihṹ. 41Ɓɛ̀pe hã́a sɔ ɛ́ hṹn wóò bè Yiezu máahṹ, ɛ̀ húi piè bòo pɛ̃̀hṹ lɛ kɛ́ á wi hɔ Kalile pɛ̃̀hɛ̃ hũn. Ɛ̀ ɓɛ̀ hã́a bìɓuà dɔ̀ cɛ̀rìɛɛ lɛ hṹn bɔ̀ɓán àá Yiezu ɛ́ dàa yòó van hɔ̀ Zerizalɛɛmu ɛ́ lò ɓiɛ̀ hṹn wi yán.

Yiezu wũ̀nlɔ́

Mat 27.57-61; Lik 23.50-56; Zãn 19.38-42

42Ɛ́ hɔ́ zĩ́ihṹ ɛ́ wo van dɛ̃un. Ɛ̀ pehɔ̀ zɔǹ ɛ́ wɔ́ ɓɛ́ Zuifuɓɛ ńvũùnín sí sɛ́sɛ́lɔ́, iè hɔ̀ lɛ ɛ́ hɔ́ sí lɛ ɛ́ tĩ ɛ́ iè lèpe ńvũùnín sí. 43Ɛ́ nùún dɔ̀ lɛ yèrè ɛ́ ɓɛ́ nɛ Zozɛɛfu lɛ ɛ́ lé hɔ́ Arimatee lóo ɛ́ van ɓɛrɛ. À hàarí iè ɓɛ̀pe Zuifuɓɛ lìe lèriè nì-bɛhɔ́ dɔ̀, à hàarí dũmuasɛ̃̀ Dɔfĩn ɛ́ pehɔ̀ bɛ́záanú ɓenlɔ́ ɛ̀ hìe. Á hɛ̀ hɛ̃̀ mí tĩì à van ɔ̀ Pilaate viì ɛ́ van hɛ̃nnɛ Yiezu nìhemu. 44Ɛ́ hɔ́ lɛ ɛ́ Pilaate ɛ́ ɲɛ́ ɛ̀ ɓɛ̀ nɛ Yiezu zĩ̀níkɛa húrun, ɛ́ hɔ́ hɛ̀ yòokɛa piè lɔ̀n. Á vɔn ɔ̀ sɛ̃̀nɛ̀dɔ́síɓɛ́ ɲúnsɔ ɛ́ ɓen ɛ́ dìenin nɛ Yiezu ɛ́ wìe húrun míɛ. 45Ɛ́ hɔ́ lɛ ápe sɛ̃̀nɛ̀dɔ́síɓɛ́ ɲunsɔ ɛ́ hièniɛ ɔ̀ Pilaate tĩì nɛ Yiezu ɛ́ húrun, ɛ́ Pilaate ɛ́ tɛ̀ nɛ a Zozɛɛfu ɛ̀ vɛ mìí Yiezu nìhemu. 46Ɛ́ Zozɛɛfu ɛ́ van yɛ̀ pɔnkɔ̀-núnú, à ɓɛrɛ lerɛ Yiezu nìheemu ɛ́ lɔ́ lé ɓáalén dãanù lɔ̀n, à síɛ bɛ́ hɔ̀ ǹ àá lé pɔnkɔ̀-núnú sɔ, ɛ́ mɔ̀ ɛ́ van dɔ́ lé búi lɛ ɛ́ ɓɛ́ cɛ̃́ lé lɛnù hũn; à khie bìríkɛa lè sɛ̃̀n-bɛhɔ́ dɔ̀ ɛ́ khie híɛ pelè ɲunù. 47Á Maari lɛ ɛ́ lé hɔ́ Makedala lóo àá Zooze ɓà nín Maari ɛ́ dɛ̃̀ ɛ́ lè viì lɛ ɛ́ ɓɛ́ ɛ́ Yiezu nìheemu ɛ̀ dé hũn ɛ̀ húi.

Currently Selected:

Marike 15: bwj

Highlight

Compare

Copy