Marike 2
2
Nùún dɔ̀ lɛ tɛ̀kɛ̀a lɛ̀ wiɛnírɔ́
Mat 9.1-8; Lik 5.17-26
1Ɛ́ sítĩnlɔ́ bɔ̀nbɔ̀ yiɛní khíirɔ́ máahṹ, ɛ́ Yiezu khũ̀a van Kapɛrɛnayiimu lóo. Ɛ́ ɓɛ́ nìnbirìe ɛ́ ɲɛ́ kɛ́ ɓɛ́ nɛ a zɔn wi le zũnù hũn. 2Ɛ́ ɓɛ́ nìnbí-dũmu ɛ́ ɓɛrɛ kóo ɓánlɔ̀n, ɛ́ hɛ̀rí ɛ́ lé zĩínù ɲunù ɛ́ dìnlén ɛ́ mínɛ nin wɛ̀. Ɛ́ Yiezu ɛ́ ɓɛ̀ kɛ̀rán àá Dɔfĩn bienù. 3Ɛ́ ɓɛ́dɔ̀ ɛ́ van dàa nìnbírɔ dɔ̀ lɛ tɛkɛ̀a lɛ̀, lɛ ɛ́ nìnbirìe bìɛ nɛ́ te dàa nin ɛ́ dàa vaá-ɓen Yiezu viì. 4Kɛ́ hɔ́ lɛ ɛ́ ɓɛ́ nìnbirìe den buò, ɛ́ ɓɛ yí dɛ̀ Yiezu viì ɛ́ yá vɛ zɔ dɛ̃ wɛ̀. Ɛ́ ɓɛ́ khie yòó lé lòo ɛ́ yòó kɛrɛ lè viì dɔ̀ ɛ́ dàa síɛniɛ ɔ̀ nùún sɔ àá lé dìɛ á dũmua lɔ̀n. 5Ɛ́ hɔ́ lɛ ɛ́ Yiezu ɛ́ mɔn peɓɛ̀ ńdɛsĩ̀nlɔ́, á zɔn bie lɛ́ ápe nùún sɔ lɛ ɛ́ tɛkɛ̀a lɛ̀ ɛ́ nɛ làa: «Niǹ yɛ̀nù, kɔ̀ bɔ̀koohɛ̃ sɛ́wɛ́rí ɛ́ dɔ́ lɛ́ kɔ̀ ǹ.» 6Ɛ́ Moyiize làndɛ́ kɛ̀ránliè dɔ̀ ɛ́ kɛ́sí ɛ́ ɓɛ́ hũn ɛ̀ vɛ̀ nɛ: 7«Àpe nùún sɔ lɛ ɛ́ wiɛ dàa hɛ̀ hɛ̃̀ mí tĩì ɛ́ khɛ́ kɛ̀amu? Hɔ̀ iè Dɔfĩn á tòokɛ lò! Á wíeni temu dɛ̀ hɔ̀ bɔ̀koohɛ̃ sɛ́wɛ́rí ɛ́ dé kɛ́ Dɔfĩn mí dòonún ɛ́ ɓen bòomí?» 8Ɛ́ Yiezu ɛ́ dũnɛ peɓɛ̀ bòo lɛ ɛ́ ɓɛ́ ɛ́ lieníkɛ ɓɛ́ tĩɛ̀ hũn, á zɔn ɓɛ̀ dìenin nɛ làa: «Mí wiɛ dàá ɛ́ lieníkɛ kɛ̀amu mì tĩɛ̀ hũn? 9Hɔ̀ hɔ́sɔ ɛ́ temu hie pɔ? Hɔ̀ ńbie lɛ́ álɛ tɛkɛ̀a lɛ̀ ǹ nɛ: “Kɔ̀ bɔ̀koohɛ̃ sɛ́wɛ́rí ɛ́ dɔ́ lɛ́ kɔ ǹ” yée kɛ́ hɔ́ ńbie lɛ́ à ǹ nɛ: “Hĩ́ní mìí kɔ́ dɛmu dìɛ ɛ́ kɔ̀ vɛ lan?” 10Kɛ́ ń den wɛ nɛ mi dũń kɛ́ á nìnbírɔ Zuú#2.10 Yiezu ɛ́ wóò ɓen nɛ «Nìnbírɔ Zuú» ɛ̀ hɔ̀ iè ɔ̀pe kùusɔ á nɛ̀. ɛ́ dɛ̀ hɔ̀ bɔ̀koohɛ̃ sɛ́wɛ́rí ɛ́ dé lé sṹsùnù. À khie bie lɛ́ ápe lɛ tɛkɛà lɛ̀ ǹ ɛ́ nɛ: 11“Nin bie lɛ kɔ ǹ nɛ kɔ síɛ hĩ́ní mìí kɔ́ dɛmu dìɛ ɛ̀ kɔ̀ lan ɓɔ́!”» 12Ɛ́ pehɔ̀ lɔ̀n, á nùún ɛ́ síɛ hĩ́nà mɔ̀ mí dɛmu dìɛ à zɔn lɔ́ ɓɛ́pe ɓɛ́kùi híɛhɔ́. Ɛ́ hɔ́ hɛ̀ yòokɛa ɓɛ̀pe ɓɛ́kùi lɔ̀n. Ɛ́ ɓɛ́ khie ɛ́ Dɔfĩn ɛ̀ ɓàanínin kɛ́ ɓɛ̀ ɛ́ bie nɛ: «Hɔ̀pe lɛ ɓà ńmáà ɛ́ ké hɛ̀ ɲɛùn yí mi wɛ̀.»
Yiezu àá Levii bòo
Mat 9.9-13; Lik 5.27-32
13Ɛ́ Yiezu ɛ́ sĩ̀n lɔ́ van hɔ̀ Kalile ɲun-bɛhɔ́ ɲunù. Ɛ́ ɓɛ́ nìzã̀amáa ɛ́ ɓen àá pie viì, á ɓɛ̀ kɛ̀rán àá Dɔfĩn bienù. 14Á van mii khíi á mɔn ɔ̀ Alife yɛ̀nu Levi#2.14 Levii ɛ́ iè pe Yiezu kɛ̀ránzuú lɛ ɛ́ ɓɛ́ wóò bĩní ve nɛ Matiye (Mat 9.9; Lik 5.28). kɛ́ á kɛsí mí tɔnlɔ́ tánlén lɛ iè hɔ̀ lànpóo fénlén. Á zɔn bie lɛ́ à ǹ ɛ́ nɛ làa: «Hĩní ɓen bè niǹ máahṹ!» Ápe Levii ɛ́ síɛ hĩ́nà bɔ̀ piè máahṹ. 15Ɛ́ Levii khie van perɛ Yiezu ǹ mí yíe. Ɛ́ ɓɛ́ lànpó-fériè àá ɓɛ́ bɔ̀konwériè bìkuì dɔ̀ ɛ́ ɓiɛ̀ ɓɛrɛ kɛsí àá Yiezu àá mí kɛ̀ránzɛ̀ɓɛ̀ ɛ́ pániɛ ɛ́ dí àá ɓɛ́, iè hɔ̀ lɛ ɛ́ ɓɛ́ hṹn bɔ̀ piè máahṹ buòniɛ. 16Ɛ́ Moyiize làndɛ́ kɛ̀ránliè lɛ ie ɓɛ̀ Farizĩɛɓɛ ɛ́ mɔn kɛ́ Yiezu ɛ́ dí àá ɓɛ́ lànpó-fériè àá ɓɛ́ bɔ̀konwériè, ɛ́ ɓɛ́ khie ɛ́ bie àá piè kɛ̀ránzɛ̀ɓɛ̀ nɛ làa: «Mì Ɲunsɔ ɛ́ wiɛ dàa ɛ́ dí àá ɓɛ́ lànpó-fériè àá ɓɛ́ bɔ̀konwériè?» 17Ɛ́ Yiezu ɲɛ́ hɔ́ á zɔn khɛ́ lɛ́ ɓà ǹ nɛ làa: «Ɓɛ̀ yí ɓɛ́ nìnbirìe lɛ lɔ̀n hie ɛ́ temu mɛ̀kóo wi dɔ̀kɔ̀tɔ̀rɔ ǹ, kɛ́ ɓɛ́ iè ɓɛ̀lɛ ɛ́ dɔ̀. Ɛ́ ń yí ɓen ɛ́ nin ɓen ve ɓɛ nìnbirìe lɛ tĩì ɛ́ ɓɛ̀ nɛ ɓɛ́ ɛ́ cã̀aní, kɛ́ ɓɛ́ iè ɓɛ̀lɛ dũ kɛ́ ɓɛ́ iè bɔ̀konwériè.»
Yiezu àá ɲunù lìnlɔ́ bòo
Mat 9.14-17; Lik 5.33-39
18Zãn Batiisi kɛ̀ránzɛ̀ɓɛ̀ àá ɓɛ́ Fariziɛɓɛ hàarí ɛ́ ɓɛ́ ɲihĩ́ɛ ɛ̀ lì. Ɛ́ nìnbírie dɔ̀ ɓɛrɛ ɛ́ Yiezu ɛ̀ dìenin nɛ làa: «Hɔ̀ wiɛ á Zãn kɛ̀ránzɛ̀ɓɛ̀ àá ɓɛ́ Farizĩɛɓɛ kɛ̀ránzɛ̀ɓɛ̀ ɛ́ dàa wóò lì ɓɛ́ ɲihĩ́ɛ kɛ́ kɔ́pe kɔ̀ bán ɛ́ pe yáà lì ɓɛ́ ɲihĩ́ɛ?» 19Ɛ́ Yiezu zɔn bie lɛ́ ɓà ǹ nɛ làa: «À yaamu ɓàasɔ ɓà biɛ̀ɓɛ̀ ɛ́ yí dɛ̀ ɓɛ́ ɲihĩ́ɛ ɛ́ yá lì kɛ́ á yaamu ɓàasɔ ɛ́ lò wi yán àá ɓɛ́ lò! Pɛ̃̀hṹ míkùi hũn lɛ kɛ́ á pe yaamu ɓàasɔ ɛ́ wi yán àá ɓɛ́, ɛ́ ɓɛ́ yí dɛ̀ ɓɛ́ ɲihĩ́ɛ ɛ́ yá lì wɛ̀.» 20Kɛ́ lé pɛ̃̀hṹ dɔ̀ ɛ́ vaá-ɓen, à yàamu ɓàasɔ ɛ́ ɓɛ́ ɓén leń. Ɛ́ pehɔ̀ yìi hũn ɛ́ ɓɛ́ den ɛ́ lì ɓɛ́ ɲihĩ́ɛ. 21Nìnbírɔ ɛ́ yáà mìí pɔnkɔ̀-núnú dɛ̀fĩì ɛ̀ dàá khíi lɛ pɔnkɔ̀-kĩ́i wɛ̀. Kɛ́ bòo mí, ɛ́ lé pɔnkɔ̀-núnú dɛ̀fĩì ɛ́ khã̀á lé pɔnkɔ̀-kĩ́i ɛ́ dàá lan, ɛ́ pelè yìi ɛ́ wookɛ ɛ́ ɓàaní. 22Ɛ̀ nìnbírɔ ɛ́ yáà kóo divɛ̃-fĩɛ lɛ ɛ́ be puo-kĩ́ɛ hũn wɛ̀. Kɛ́ bòo mí ɛ́ hɔ́ divɛ̃n ɛ́ wua hɔ può, ɛ́ hɔ́ divɛ̃n àá hɔ́pe può ɛ́ wo vɛ̀ ɲumu. Kɛ́ hɔ́ divɛ̃-fĩɛ ɛ́ wóò kóo puo-fĩɛ hũn.
Zuifuɓɛ ńvũùnín sí bòo
Mat 12.1-8; Lik 6.1-5
23Zuifuɓɛ ńvũùnín sí dɔ̀ zɔǹ, ɛ́ Yiezu àá mí kɛ̀ránzɛ̀ɓɛ̀ ɛ́ zɔn ɛ́ mún dɔ̀ ɛ̀ cánkɛ́. Ɛ́ piè kɛ̀ránzɛ̀ɓɛ̀ ɛ́ khie ɛ́ hɔ̀ dínlɔ́ lɛ bɔn dɛ̃̀ ɲúuhɛ̃ ɛ̀ khè kɛ́ ɓɛ́ ɛ́ vɛ. 24Ɛ́ ɓɛ́ Farizĩɛɓɛ ɛ́ khie bie àá Yiezu ɛ́ nɛ làa: «Húi, hɔ ńɓùo ɛ́ kɔ́ kɛ̀ránzɛ̀ɓɛ̀ ɛ́ dàa hɔ̀ bòo lɛ yáà wé hɔ́ ńvũùnín sí zɔn ɛ̀ wé?» 25Ɛ́ Yiezu zɔn bie lɛ́ ɓà ǹ ɛ́ nɛ làa: «Mì bìe ɛ́ yí kɛ̀rán lé Dɔfĩn bienù vɛ̃hṹ, ɛ̀ mi hɔ bòo lɛ á Daviide ɛ́ hàarí wɔ́ pɛ̃̀hṹ lɛ ɛ́ hɔ́ hĩni ɛ́ dàa hàarí ɛ́ ɔ̀pe àá ɓɛ́lɛ ɛ́ hàarí bɔ̀ɓán àá ɔ̀ ɛ̀ ɓé, lɛ kɛ́ ɓɛ́ lò yí dàa bòo lɛ ɛ́ dí? 26À yòó zɔn lè Dɔfĩn zũnù, lè yìi lɛ á Abiyataare ɛ́ dàa temu hàarí iè ɔ̀ Dɔfĩn khɛ̃́ndàarɔ wì-bɛhɔ́, ɛ́ zɔn lɛ̀ hɔ̀ búrú lɛ ɛ́ ɓɛ́ wóò bìsí ɛ̀ lɛ́ Dɔfĩn, à lerɛ hɔ̀dɔ̀ ɛ́ van lɔ́ lɛ́ ɓɛ́ lɛ ɛ́ bɔ̀ɓán àá ɔ̀ ǹ ɛ́ ɓɛ́ ɓiɛ̀ lɛ̀. Hɔ́rɔsí ɛ̀ hɔ̀ làndɛ́ ɛ́ lò den nɛ ɓɛpe khɛ̃́ndàariè ɓɛ́ dòonún ɛ́ temu dɛ̀ hɔ́ búrú sɔ ɛ́ wóo lɛ̀.» 27Ɛ́ Yiezu ɛ́ bĩniɛ zɔn khɛ́ sĩiniɛ nɛ làa: «Lè ńvũùnín sí ɛ́ wɔ́ á nìnbírɔ́ yènsénín, kɛ́ á den yí-e nìnbírɔ ɛ́ temu wɔ́ lé ńvũùnín sí yènsénín wɛ̀. 28Ɛ́ sí iè pe temu lɛ́ á nìnbírɔ Zuú ɛ́ dàa iè lè ńvũùnín sí ɲúnsɔ.»
Currently Selected:
Marike 2: bwj
Highlight
Share
Compare
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
