མཛད༌པ། 26

1ཉི་གེ་ ཨ་གིརི་པཱས་གི་ པ་ཝལ་ག་གསུངས་མ་ལ་ ནཱན་ནཱན་ཏེན་ག་ སྐྱབས་ཨ་ལེ་དེན་གེ་ ཡེག་ཅོ་ཨ༌ཉི།

ཉི་པ་ཝལ་གི་ རོ་ཀ་ཕྱག་ ག་དུང་ཐཱན་ ཞུ་ལེ་གོ་ཙུག་པ༌ལ། 2མངའ་བདག་རྒྱལ་པོ་ལགས་ ཇང་ན་ག་ སྐུན་མདུན་ག་ཐིང་ཉི་ ཡ་ཧུ་དི་པ་བ་ཀི་ ཇ་ག་དགྲ་ཨ་ཉི་ཡེག་ཁཱན་ ཆཱས་བ་ཀ་ཀོར་གེ་ ལན་མཇལ་བེ་ག་ ཉོང་པ་ཨ་དེན་གེ་ ཇང་གནམ་མེད་ས་མེད་ ཤོ་ནང་ཕེ་ཝ༌ཅ། 3ཡ་ཧུ་དི་པ་བ་ཀ་ ལུགས་སྲོལ་དང་ ཡ་ཧུ་དི་པ་བ་ཀི་ ཧང་ཨ་ཉི་ རྩོད་པ་ཕིན་ཅ་གི་ལ་སྨོ་ མངའ་བདག་རྒྱལ་པོ་གི་ ཐམས་ཅན་རང་མཁྱེན༌ཅ། ཨོ་ཉི་ཨ་དེན་གེ་ ཐུགས་ཚེར་ཐཱན་རང་གི་ནེ་བུ་ ཇི་གི་ཞུ་ཁཱན་ཁེ་པ་ སྙན་གསེང་ཉི་གནང༌ཤོ།

4ཇ་ག་དུ་ཁ་ ཇང་ཟེ་མུ་ཨ་ཉི་ ཆོ་ལེ་གང་ཀ་དང་ ཉི་ཚི་ངེ་ ཡ་རུ་ཤ་ལེམ་ག་ ཆོ་ལེ་གང་ཀ་ ཇི་གི་ཧང་ཏེན་ཆོ་ཝ་གི་ལ་སྨོ་ ཨོ་ཉ་ཀོར་གེ་ ཡ་ཧུ་དི་པ་ ཐམས་ཅན་གི་ སེ་ཝ་གེ་ལག་ཏང་མཱན༌ཅ། 5རོག་ཏེ་བ་ཀི་ ཁ་དོག་ནེ་ལ་ ཇང་ཤོ་ ཕ་རི་སི་པ་ཨ་ཉི་ ཆོ་ཝ་གི་ལ་ཨ་ཉི་ རོག་ཏེ་བ་ཀི་ གོ་མ་གེ་རང་སེན༌ཅ། ཉི་ཕ་རི་སི་པ་བ་ཀི་ བཀའ་ཁྲིམས་ག་ཤེག་པ་ ཐམས་ཅན་གེ་ མང་པུ་ཆ་གནས་ཐཱན་ཅ་གི༌ལ། 6ཉི་ཇང་ ཨོ་མ་ཁྲིམས་ཁང་ག་ ཙུག་པེ་ཁེ་ཁཱན་ཤོ་ དཀོན་མཆོག་གི་ ཨ་ཧ་ཕ་མ་བ་ཀ་ དབུ་མནའ་བཞེས་ཁཱན་ག་ རེ་ཆ་ཨ་ཉི་ དད་པ་ཨ་ཝ་ཨ་དེན་གེ་གི༌ལ། 7ཨིས་རེལ་ག་ མི་རིགས་སོང་ཉིག་ཙིང་གི་ ངམ་བི་ནང་མ་ཝ་ དཀོན་མཆོག་ག་ མགུར་མ་ཞུ་ལེ་ག་ཇུང་ཚེན་བུ་ དཀོན་མཆོག་གི་ དབུ་མནའ་བཞེས་ཁཱན་ག་ རེ་ཆ་ཨ་ཉི་ དད་པ་ཨ་ཝ་ཨ་དེན་གེ་གི༌ལ། མངའ་བདག་རྒྱལ་པོ་ལགས་ ཨོ་ཐ་རེ་ཆ་ག་ཡོར་ཀེ་ ཡ་ཧུ་དི་པ་བ་ཀི་ ཇ་ག་དགྲ་ཨ་ཝ་གི་ལ༌ལ། 8དཀོན་མཆོག་གི་ སོ་ངོ་ཤི་ཝ་གེ་ ལོག་ཉི་ཝུ་ལེ་མར་བ་དག་ ན་ཤི་ཧང་ཨ་ཉི་ མིན་ཅ་ཡ།

9གོ་མ་ ཇི་གི་བུ་མིན་ཆོ་ཝ་ ནཱས་རཱད་ག་ ཡི་ཤུ་ག་མཚན་ག་དགྲ་ཨ་ཉི་ ལའི་མང་པུ་ཐུར་ ཨ་ལེ་ཁེ་ལེ་ཨ༌ཉི། 10ཨུ་ཉུ་དང་ཏུན་མ་ག་ལའི་ ཇི་གི་ཡ་རུ་ཤ་ལེམ་ག་ཨ༌ཝ། དད་པ་ཨ་ཁཱན་བ་ཙུང་ཐཱན་ བཙོན་ག་ཙུག་པེ་ག་དབང་ཚད་ བླ་མ་ཆི་ལུ་བ་ཀི་ ཇ་ག་གནང་མ་ཆོ༌ཝ། ཉི་དད་པ་ཨ་ཁཱན་བ་ ཤེ་ལེ་ཙུག་པ་ཀབ་ཉི་བུ་ ཇི་གི་བུ་ ཤེ་ལེ་ཆོག་པེ་དག་ཉི་ཡེག༌པ། 11ཡ་ཧུ་དི་པ་ཆོས་འཛོམས་ཁོན་ ཤེབ་མང་པུ་ཐུར་ དད་པ་ཨ་ཁཱན་བ་ཀི་ ཡི་ཤུ་ག་སྐུར་པ་ཞུ་ལེ་བི་ལེ་ མིག་པ་ཕི་ཉི་ ཇི་གི་རོག་ཏེ་བ་ ཏེ་ཐ་ཀི་ཕི༌ཝ། ཇང་དད་པ་ཨ་ཁཱན་བ་ཀབ་ཉི་ གནམ་མེད་ས་མེད་ རོ་ཙིག་པ་ཨ་དེན་གེ་ ཇི་གི་རོག་ཏེ་བ་ ལམ་ཐཱན་ ཁྲིམས་ཀེ་བེ་དེན་གེ་ བཱརའ་ཁྲོམ་ཆེན་ཁོན་བུ་དི༌ཝ།

12ནོང་ཐུར་ བླ་མ་ཆི་ལུ་བ་ཀི་ ཇ་ག་དབང་ཚད་གནང་ཐཱན་ ད་མཱས་ཀཱས་ག་ཏཱན་ ཀུན་ཏི་ཝ་ཆོ༌ཝ། 13མངའ་བདག་རྒྱལ་པོ་ལགས་ ཇང་ད་མཱས་ཀཱས་ག་ དིན་ཅ་ཨ་ཉི་ ངམ་བར་ཀ་གི༌ལ། ཞིང་ཁམས་གེ་དོང་ ངམ་གེ་བུ་ དབང་པུ་ཆོ་ཁཱན་ འོད་ཟེར་ཤར་ཉི་ ཇང་དང་ ཇང་ཀབ་ཉི་དི་ཁཱན་བ་ཀ་ཐུང་ཀ་ཁེ༌ཝ། 14ཉི་ཨ་ཧ་བ་ ཐམས་ཅན་རང་ ས་ག་ཐང་ཇོང༌མ། ཉི་གེ་ ཧི་བུརུ་ག་ལོ་གེ་ཨ་ཉི་ ཤ་ཝུལ་ ཤ་ཝུལ་ ནཱན་གི་ ཇང་ཧང་ཨ་ཉི་ མ་ལེག་པ་ཨན་ཅ་ཡ། ནཱན་གི་ ཇ་ག་དགྲ་ཨ་ཉི་ ནཱན་ནཱན་ཏེན་ག་ ནོད་པ་ཤ་ཀེ་ལ་ཨ་ཉི་ གསུངས་མ་ག་ ན་ཐ༌ཝ།

15ནཱན་ཨི་བི་ཡ་ གཙོ་བོ་ཨ་ཉི་ ཇི་གི་ཞུ་ལ་ཀབ་ཉི་ རོ་ཀི་ཇ་ག་ལན་གནང་ཉི་ གསུངས་ཆོ་ཝ་ ཇང་ནཱན་གི་ མ་ལེག་པ་ཨ་ཁཱན་ ཡི་ཤུ་གི༌ལ། 16ཨོམ་ནཱན་ ག་ཐིང༌ཤོ། ཇི་གི་ནཱན་ ཇ་ག་གཡོག་པ་དང་ འཛོམས་དཔང་ཨ་ཉི་ སི་ཝ་གི༌ལ། ནཱན་གི་ ཐོང་ཁཱན་ག་ཀོར་གེ་དང་ ཇི་གི་ན་ག་ ཧང་གེན་མ་ཐུར་ ཨོ་ཉ་ཀོར་གེ་ ནཱན་གི་སོ་ངོ་བ་ཀ་ ཡེག་པེ་ཁེ༌ལེ། ཨོ་ཉི་ཨ་དེན་གེ་ ཇང་ཐི་ནོང་ ན་ག་བཱརང་ཀ་ ཨོ་ཕ་གི༌ལ། 17ཉི་ཇི་གི་ནཱན་ ན་ག་སོ་ངོ་བ་ཀེ་དང་ ཡ་ཧུ་དི་པ་མང་གི་ཁཱན་ སོ་ངོ་བ་ཀེ་ སྐྱབས་ཨ༌ལེ། ཇི་གི་ནཱན་ ཡ་ཧུ་དི་པ་མང་གི་ཁཱན་ སོ་ངོ་བ་ཀ་པོང་ཀ་ ཀུན་ཏི༌ལེ། 18ཉི་རོག་ཏེ་བ་ཀི་ མེར་བུ་གེ་ འོད་ཟེར་ག་ཏཱན་ ལོག་པེ་དེན་གེ་དང་ སེ་ཏཱན་གེ་ དཀོན་མཆོག་ག་ཏཱན་ ལོག་པེ་དེན་གེ་ ནཱན་གི་ རོག་ཏེ་བ་ཀ་ མིང་ཕེག༌པེ། ཉི་གེ་ རོག་ཏེ་བ་ཀི་ རོག་ཏེ་བ་ཀ་ སྡིག་པ་ག་བཤགས་པ་ཉོང༌པེ། ཨུ་ཉུ་མ་ཚཱད་པ་ ཇ་ག་ཏཱན་ཀེ་ཁཱན་ དད་པ་ག་ཐུང་ཀེ་ཨ་ཉི་ སོ་སུ་ཤོ་ཉི་ཐ་ཁཱན་ དཀོན་མཆོག་ག་ སོ་ངོ་བ་ཀ་དྲེ་ཀ་ཚུད་པེ་ཨ༌ཉི།

19མངའ་བདག་རྒྱལ་པོ་ལགས་ ཞིང་ཁམས་གེ་ དོང་གནང་ཁཱན་ ཨོ་ཐ་མཇལ་ཁ་ག་ ཇི་གི་ཆ་གནས་ ཐ་ཝ་གི་ལ༌ལ། 20ཇི་གི་ད་མཱས་ཀཱས་གེ་ གོ་ཙུག་ཉི་ ཡ་རུ་ཤ་ལེམ་དང་ ཡ་ཧུ་དི་ཡ་ ཐམས་ཅན་ག་ ཉི་ཡ་ཧུ་དི་པ་མང་གི་ཁཱན་ སོ་ངོ་བ་ཀ་ཡེག་པ་ ཐམས་ཅན་གི་ སྡིག་པ་གེ་ལོག་ཐཱན་ དཀོན་མཆོག་ག་ དད་པ་ཨ་ལེ་ཁེ༌ལེ། ཉི་རོག་ཏེ་བ་ སོར་པ་གི་ལ་ཨ་ཉི་ ཁུངས་ཀེ་བེ་དེན་གེ་ རོག་ཏེ་བ་ཀི་ ལའི་ལེག་པུ་ ཨ་ལེ་ཁེ་ལེ་ཨ༌ཉི། 21ཨོ་ཉི་ཨ་དེན་གེ་ ཡ་ཧུ་དི་པ་ ཚེ་བང་གི་ ཇང་མཆོད་ཁང་ནང་ཀ་ཙུང་ཐཱན་ རོག་ཏེ་བ་ཀི་ ཇང་ཤེ་ལེ་མིག་པ་ཕི༌ཝ། 22དག་པ་ཀབ་ཉི་ སོ་ངོ་ཟེ་མུ་ཆི་ལུ་ ཐམས་ཅན་ག་རང་ ཨོ་ཐ་དེན་པ་ཆཱས་ ཡེག་ཅེན་དག་པ་གི་ དཀོན་མཆོག་གི་ ཐི་ནོང་སག་པུ་ ཇ་ག་སྐྱབས་ཨ་ཉི་ ཐཱན་གནང་མ༌ཅ། ཇི་གི་ཡེ་ཁཱན་ དེན་པ་ཆཱས་ཤོ་ ལུང་བསྟན་པ་བ་དང་ མོ་ས་གི་ ཇུང་མེ་དག་ཉི་ གསུངས་ཁཱན་ཁེ་པ་གི༌ལ། 23ཁིརིས་གཤགས་པེ་ཁེ༌ལེ། ཉི་ཤི་ཁཱན་བ་ཀ་པོང་ཀེ་ གོ་རང་ རོག་གསོན་པོ་ཨ་ཉི་སྐུ་བཞེངས༌པེ། ཉི་རོ་ཀི་ རོ་ཀ་སོ་ངོ་བ་དང་ ཡ་ཧུ་དི་པ་མང་གི་ཁཱན་བ་ཀ་པོང་ཀ་ འོད་ཟེར་ཕ་ལེ་ཨ་ཉི་ ཤོན་ཅ་དག་ཉི་ ཞུ་ཝ༌ལ།

24ཡིད་ཀ་རྣམ་ཏོག་མ་ཝ་ ཕེས་ཏཱས་གི་ ཤ་དར་ཕི་ཉི་ གསུངས་མ་ལ་ པ་ཝལ་ ནཱན་གི་ ནཱན་ཏེན་ག་སེམས་ ཙུང་མེ་མར་བ༌ལ། དཔེ་ཆ་མང་པུ་ ལམ་པ་ཨ་དེན་གེ་ ནཱན་ཉོས་པ་ལ་ཨ༌ཉི།

25པ་ཝལ་གི་ལན་ཞུ་ཉི་ གུས་ཞབས་ཉོང་ཁཱན་ དཔོན་སློབ་ཕེས་ཏཱས་ ཇང་ཉོས་པ་མང་གི། ཇི་གི་ཧང་ཞུན་ཅ་གི་ལ་སྨོ་ ཇི་གི་སེན༌ཅ། ཉི་ཇི་གི་ཞུ་ཁཱན་ཁེ་པ་ དེན་པ་གི༌ལ། 26ཉི་དཔོན་ཨ་གིརི་པཱས་གི་བུ་ ཨོ་ཐ་ཆཱས་ཁེ་པ་ དེན་པ་གི་ལ་ཨ་ཉི་མཁྱེན་མ་ཨ་དེན་གེ་ ཇི་གི་རོ་ཀ་ཐྲང་ཉི་ཞུན༌ཅ། ཉི་ཨོ་ཐ་ཀོར་གེ་ ཐམས་ཅན་རང་ རོ་ཀི་སྙན་གསེང་པ་ཅ་ཨ་ཉི་ ཇི་གི་སེན༌ཅ། ཧང་ཡ་དག་ནེ་ལ་ ཨོ་ཐ་ཇུང་ཁཱན་བ་ ཟུར་ཀ་ ཇུང་མ་མང་གི། 27མངའ་བདག་རྒྱལ་པོ་ལགས་ ནཱན་གི་ལུང་བསྟན་པ་བ་ཀི་ འབྲི་ཁཱན་ག་ དད་པ་ཨན་ཅ་སྨོ། ཇི་གི་སེན་ཅ་ ནཱན་གི་དད་པ་ཨན་ཅ་ཨ་ཉི་ ཞུ་ལ་ཀབ་ཉི་ 28ཨ་གིརི་པཱས་གི་ པ་ཝལ་ག་ གསུངས་མ་ལ་ རེབ་ཀིན་ཐུར་ག་རང་ ནཱན་གི་ཇང་ ཡི་ཤུ་པ་ ཅོད་པེ་གོད་ལ་ཨ༌ཉི།

29པ་ཝལ་གི་ཞུ་ཝ་ལ་ རེབ་ཀིན་ཐུར་ག་གི་ནེ་བུ་ གོར་ཉི་ཨ་ནེ་བུ་ ནཱན་དང་ ཨོ་ཐ་ཆོ་ཁཱན་སོ་ངོ་ ཐམས་ཅན་གི་བུ་ ཇང་ད་བུ་རིན་ཆེན་ཨ་ཉི་ ཇི་གི་དཀོན་མཆོག་ག་ སྨོན་ལམ་ཞུན༌ཅ། དག་པ་ཀབ་ཉི་ ཨོ་ཐ་ལྕགས་ཐག་གི་ནེ་ལ་ ཨི་བི་གི་རང་ མ་ཉོང་ཅེན་ཨ༌ཉི།

30ཉི་གེ་ དཔོན་ཨ་གིརི་པཱས་དང་ དཔོན་སློབ་ཕེས་ཏཱས་ ཉི་བར་ནི་ཀི་དང་ རོག་ཏེ་བ་ཀབ་ཉི་ལང་ཁཱན་ སོ་ངོ་ཐམས་ཅན་རང་ ག་ཐིང་ཐཱན་བྱོན་མ༌ལ། 31རོག་ཏེ་བ་ཀི་ ཐུར་གི་ཐུར་ག་ཡེག་པ་ལ་ ཨོ་ཐ་སོ་ངོ་གི་ ཤེ་ལེ་ཁེ་ཝ་ག་ལའི་ ཧང་རང་ཨ་ཝ་མ༌ལ། ཉི་བཙོན་ག་ནུ་ཕེ་ཁེ་ཝ་ག་ལའི་བུ་ ཨ་ཝ་མ་ལ་ཨ༌ཉི།

32ཨ་གིརི་པཱས་གི་ ཕེས་ཏཱས་ག་གསུངས་མ་ལ་ རོ་ཀི་ རོག་ཀའི་སར་ག་ སྐུན་མདུན་ག་ ཀུན་ཏི་ཨ་ཉི་ མ་ཞུ་ཝ་ཏེ་ཆོ་ནེ་ལ་ ཨ་ཤི་རོག་ ཐར་ཀུན་ཏི་ལེ་ རེ་བེ་ཆོན་ཨ༌ཉི༎

Currently Selected:

མཛད༌པ། 26: TNTB

Highlight

Copy

Want to have your highlights saved across all your devices? Sign up or sign in

Tshangla New Testament