ཡུ་ཧན་ན། 10

ཤི་ཤ་དི་པ་དང་ རོ་ཀ་ཤི་ཤ༌བ།

1ཇི་གི་ ན་ཧ་དེན་པ་ཡེག་ཅ་ ཨི་བི་གི་ ཤི་ཤ་ཕའི་ནང་ཀ་ མ་ཀོ་གེ་ཨ་ཉི་མ་ནུ་ཕཱན་ བཱརའ་ཧང་ཐུར་གེ་ གོང་ཉི་ནུབ་ནེ་ལ་ ཨོ་ཉ་སོ་ངོ་ཤོ་ དྲོ་ཝཱན་པ་དང་ཅོམ་ཁཱན་གི༌ལ། 2དག་པ་ཀབ་ཉི་ མ་ཀོ་གེ་ཨ་ཉི་ནུབ་ཁཱན་ སོ་ངོ་ཤོ་ ཤི་ཤ་ག་དི་པ་གི༌ལ། 3མ་ཀོ་ག་ཁུང་ཁཱན་གི་ མ་ཀོ་ཕེག༌ཅ། ཉི་རོ་ཀ་ཀཱན་ ན་ཐ་ལ་ཀབ་ཉི་ ཤི་ཤ་བ་ཀི་ རོག་ཆོ་ས་ག་ཏཱན་ཨུན༌ཅ། རོ་ཀི་ རོག་ཏེན་ག་ཤི་ཤ་བ་ མིང་ཨན་ར་ཉི་ ཕིས་ཀ་ཏཱན་རིག་ཉི་བུན༌ཅ། 4རོ་ཀི་ རོ་ཀ་ཤི་ཤ་བ་ ཐམས་ཅན་རང་ ཏབ་ཐུར་དུས་ཏེན་གེ་ རོག་ རོག་ཏེ་བ་ཀེ་ གུམ་གུམ་དིན༌ཅ། ཉི་རོ་ཀ་ཤི་ཤ་བ་ཀི་ རོ་ཀ་ཀཱན་གུམ་ཡེ་ཝ་ཨ་དེན་གེ་ རོ་ཀ་ཚིང་ཚིང་དིན༌ཅ། 5དག་པ་ཀབ་ཉི་ རོག་ཏེ་བ་ཀི་ སོ་ངོ་གུམ་མ་ཡེ་ཁཱན་ག་ ཚིང་ཚིང་མ་དི༌ལ། ལག་ཏང་ ཨོ་ཉ་སོ་ངོ་ག་ཀཱན་ གུམ་མ་ཡེ་ཝ་ཨ་དེན་གེ་ ཤི་ཤ་བ་ཀི་ རོ་ཀེ་གཱན་ཇོང༌མེ། 6ཡི་ཤུ་གི་ རོག་ཏེ་བ་ཀ་ ཨོ་ཐ་དཔེ་གཏམ་ག་ཐུང་ཀེ་ཨ་ཉི་ གསུངས་མ༌ལ། དག་པ་ཀབ་ཉི་ རོ་ཀི་གསུངས་ཁཱན་ཁེ་པ་ རོག་ཏེ་བ་ཀི་ ཧ་མ་གོ་ཝ༌ལ།

7ཨོ་ཉི་ཨ་དེན་གེ་ ཡི་ཤུ་གི་ ལོག་ཉི་རང་གསུངས་མ་ལ་ ཇི་གི་ ན་ཧ་དེན་པ་ཡེག་ཅ་ ཇང་ཤོ་ ཤི་ཤ་བ་ཀ་ མ་ཀོ་གི༌ལ། 8ཉི་ཇང་གེ་ གོ་མ་ཨུ་ཁཱན་བ་ཤོ་ དྲོ་ཝཱན་པ་བ་དང་ ཅོམ་ཁཱན་བ་གི༌ལ། དག་པ་ཀབ་ཉི་ ཤི་ཤ་བ་ཀི་ རོག་ཏེ་བ་ཀི་ ཡེག་ཁཱན་ཁེ་པ་མ་ཉཱན་ཅི། 9ཇང་ཤོ་ མ་ཀོ་གི༌ལ། ཉི་ཇང་གེ་ཨ་ཉི་ ཨི་བི་ནུ་ཕ་ཐུར་ ཨོ་ཉ་སོ་ངོ་གི་ ཐར་པ་ཉོང༌པེ། རོག་ཏེ་བ་ ནང་ཀ་ཨུ་ཉི་ ཕིས་ཀ་དི་ཉི་ཨ་ལ་ཀབ་ཉི་ ཙི་མང་པུ་ཉོང༌པེ། 10དྲོ་ཝཱན་པ་ཤོ་ དྲོ་ཝཱན་ཨ་ལེ་དེན་གེ་དང་ ཤེ་ལེ་དེན་གེ་ ཉི་མེ་པ་ཕི་ལེ་དེན་གེ་ ཨུན་ཅ་གི༌ལ། དག་པ་ཀབ་ཉི་ ཇང་ཨུ་ཁཱན་ཤོ་ རོག་ཏེ་བ་ཀི་ཚེ་ཉོང་ཅེན་ ཉི་ཇོབ་ཇོབ་ཨ་ཉི་ཆོ་ཝ་ག་ ཚེ་ཉོང་ཅེན་དག་པ་གི་ ཨོ་ཕ་གི༌ལ།

11ཇང་ཤོ་ ཤི་ཤ་དི་པ་ལེག་པུ་གི༌ལ། ཉི་ལེག་པུ་ཆོ་ཁཱན་ ཤི་ཤ་དི་པ་གི་ ཤི་ཤ་ག་དེན་གེ་ རོ་ཀ་ཚེ་བུ་བིན༌ཅ། 12ཉི་པ་ལམ་ཉི་ཐ་ཁཱན་གི་ བོ་རང་ཁུ་ཨོ་ཕ་ཀབ་ཉི་ ཤི་ཤ་བ་ཐུབ་ཐཱན་ཐཱན་ གཱན་ཇོང༌ཅ། ཧང་ཡ་དག་ནེ་ལ་ ཨོ་ཉ་ཤི་ཤ་བ་ རོ་ཀ་མང་གི། ཉི་རོག་ཤོ་ རོག་ཏེ་བ་ཀ་ ཡོན་ད་མང་གི། ཉི་བོ་རང་ཁུ་གི་ ཤི་ཤ་བ་ཀ་ ནོད་པ་ཀེ་ཉི་ རོག་ཏེ་བ་ཏོར་ཉི་གེམ༌ཅ། 13ཨོ་ཉ་སོ་ངོ་ཤོ་ ཉི་པ་ཤ་གི་ཝ་ཨ་དེན་གེ་ རོ་ཀི་ཤི་ཤ་བ་ བདག་འཛིན་ཨ་ལེ་མང་གི་ཝ་ ཐུབ་ཐཱན་ཐཱན་ གཱན་ཇོང༌ཅ།

14ཇང་ཤོ་ ཤི་ཤ་དི་པ་ལེག་པུ་གི༌ལ། ཇི་གི་ ཇ་ག་ཤི་ཤ་གུམ་ཡེན༌ཅ། ཉི་ཇ་ག་ཤི་ཤ་གི་ ཇང་གུམ་ཡེན༌ཅ། 15ཨ་པ་གི་ ཇང་གུམ་ཡེ་ཉི་ ཇི་གི་ཨ་པ་གུམ་ཡེ་ཝ་པུརུས་ཀིན་ཨ་ཉི་ ཇི་གི་ ཇ་ག་ཤི་ཤ་བ་ གུམ་ཡེན༌ཅ། ཉི་ཇི་གི་ ཇ་ག་ཤི་ཤ་བ་ཀ་དེན་གེ་ ཇ་ག་ཚེ་བིན༌ཅ། 16ཨོ་ཐ་ཤི་ཤ་ཆུ་ག་མ་ཁཱན་ ཇ་ག་བཱརའ་ཤི་ཤ་བ་བུ༌ཅ། ཉི་ཇི་གི་ རོག་ཏེ་བ་བུ་ཕ་ལེ་ཁེ༌ལེ། རོག་ཏེ་བ་ཀི་བུ་ ཇ་ག་ཀཱན་ ན་ཐ་ལ་ཀབ་ཉི་ཉཱན༌པེ། ཉི་ཤི་ཤ་དི་པ་ཐུར་དང་ ཤི་ཤ་ག་ཆུ་བུ་ཐུར་ཤ་རི༌ལེ། 17ཇི་གི་ལོག་ཉི་ཉོང་ཅེན་དག་པ་གི་ ཇི་གི་ ཇ་ག་ཚེ་བི་ཝ་ཨ་དེན་གེ་ ཨ་པ་གི་ ཇང་གནམ་མེད་ས་མེད་ཕང༌ཅ། 18ཇ་ག་ཚེ་ཁེ་པ་ ཇང་གེ་ ཨི་བི་གི་རང་བུ་ལེ་མར༌བ། དག་པ་ཀབ་ཉི་ ཇང་ཇང་ཏེན་གི་རང་ ཇ་ག་ཚེ་བིན་ཅ་གི༌ལ། ཚེ་བི་ལེ་ག་དང་ ལོག་ཉི་ལ་ལེ་ག་ དབང་ཚད་ཇ་ག༌ཅ། ཨོ་ཐ་བཀའ་ཁེ་པ་ ཇི་གི་ ཇ་ག་ཨ་པ་གེ་ཉོང་པ་གི་ལ་དག་ཉི་ གསུངས་མ༌ལ།

19ཨོ་ཐ་གསུང་གི་ ཨོམ་ཆང་རང་ ཡ་ཧུ་དི་པ་བ་ མ་ཆ་མ་ཅོད་པ༌ལ། 20སོ་ངོ་མང་པུ་ཐུར་གི་ཡེག་པ་ལ་ རོ་ཀ་ནང་ཀ་ བདུད་ནུ་ཕ་ཨ་དེན་གེ་ རོག་ཉོས་པ༌ལ། ན་ཧ་བ་ ཧང་ཨ་ཉི་ རོ་ཀི་ཡེག་ཁཱན་ཉཱན་ཅ་ཡ་དག༌ཉི།

21དག་པ་ཀབ་ཉི་ བཱརའ་སོ་ངོ་བ་ཀི་ ཡེག་པ་ལ་ བདུད་ཀི་ནོད་ཁཱན་སོ་ངོ་གི་ ཨུ་ཐུ་ད་བུ་གསུངས་མེ་མར༌བ། ཉི་བདུད་ཀི་ ཧང་ཏེན་ཨ་ཉི་ མིང་ཀ་ན་ག་ མིང་ཆོག་པེ་རེ་བེ་ཡ་དག་ཉི༎

ཡི་ཤུ་གི་ རོག་དཀོན་མཆོག་ག་སྲས་གི་ལ་དག་ཉི་ གསུངས་མ༌ལ།

22ཨུ་ཉུ་གང་ཀ་ ཏོན་གི་ཝ་ཆོ་ཝ༌ལ། ཉི་ཡ་རུ་ཤ་ལེམ་ག་ ཕུལ་བེ་ག་དུས་ཆེན་ ཙི་ལེ་གོ་ཙུག་ཅ་གི་ཝ༌ལ། 23ཉི་ཡི་ཤུ་མཆོད་ཁང་ནང་ཀ་ སོ་ལོ་མོན་ག་གཡབ་རིང་ནང་ཀེ་ལེང་ བྱོན་ཅ་གི་ཝ༌ལ། 24ཡ་ཧུ་དི་པ་འགོ་དཔོན་བ་ཀི་ རོག་ཉ་གེ་ཐ་གེ་ཀོར་ཐཱན་ རོ་ཀ་ཞུ་ཝ་ལ་ ནཱན་གི་ ཨ་ཧ་ཏཱན་མ་ཡེག་པཱན་ ཧབ་ཏུར་ཤ་ཐ་ལེ་ཡ། ནཱན་ཁིརིས་གི་ནེ་ལ་ ཨ་ཧ་ཏཱན་ དང་སང་ཀིན་ཨ་ཉི་ ཡེག་ཅོ་དག༌ཉི།

25ཡི་ཤུ་གི་གསུངས་མ་ལ་ ཇི་གི་ ན་ཧ་ཡེག་པ་ཆོ་ཝ་ དག་པ་ཀབ་ཉི་ ན་ཤི་ ཇ་ག་དད་པ་ཨ་ལུ་མ༌ལ། ཇི་གི་ ཇ་ག་ཨ་པ་ག་མཚན་ག་ ཨ་ཁཱན་ལའི་བ་ཀི་ ཁུངས་ཀེ༌ཅ། 26དག་པ་ཀབ་ཉི་ ན་ཧ་བ་ཤོ་ ཇ་ག་ཤི་ཤ་མང་གི་ཝ་ཨ་དེན་གེ་ ན་ཤི་ ཇ་ག་དད་པ་ཨ་ལུ་མ༌ལ། 27ཇ་ག་ཤི་ཤ་བ་ཀི་ ཇ་ག་ཀཱན་གུམ་ཡེན༌ཅ། ཇི་གི་ རོག་ཏེ་བ་གུམ་ཡེན༌ཅ། ཉི་རོག་ཏེ་བ་ཀི་ ཇ་ག་ཚིང་ཚིང་ཨུན༌ཅ། 28ཇི་གི་ རོག་ཏེ་བ་ཀ་ ཚེ་མ་འགྱུར་བརྟན་པ་བིན༌ཅ། ཉི་རོག་ཏེ་བ་ ཧ་ལ་རང་མ་ཤི༌ལ། ཉི་ཨི་བི་གི་རང་ རོག་ཏེ་བ་ ཇ་ག་ག་དང་གེ་ རུ་ཉི་བུ་ལེ་མར༌བ། 29ཧང་ཡ་དག་ནེ་ལ་ ཇ་ག་ཨ་པ་གི་ རོག་ཏེ་བ་ ཇ་ག་ཏཱན་གནང་མ་གི༌ལ། ཉི་རོག་ཤོ་ ཐམས་ཅན་གེ་ཤུག་ཅཱན༌ཅ། ཨོ་ཉི་ཨ་དེན་གེ་ རོག་ཏེ་བ་ ཇ་ག་ཨ་པ་ག་ག་དང་གེ་ ཨི་བི་གི་རང་ རུ་ཉི་བུ་ལེ་མར༌བ། 30ཇང་དང་ ཇ་ག་ཨ་པ་ཤོ་ ཐུར་གི་ལ་དག་ཉི་ གསུངས་མ༌ལ།

31ཉི་ཨོམ་ཆང་རང་ ཡ་ཧུ་དི་པ་བ་ཀི་ རོ་ཀ་ལུ་ཤི་དྲོ་མེ་དེན་གེ་ ལུང་དུང་མ༌ལ། 32དག་པ་ཀབ་ཉི་ ཡི་ཤུ་གི་ རོག་ཏེ་བ་ཀ་གསུངས་མ་ལ་ ཇ་ག་ཨ་པ་གི་གསུངས་མ་དང་ཏུ་ཉི་ ཇི་གི་ལའི་ལེག་པུ་ མང་པུ་ཐུར་གེན༌མ། ཉི་ཨོ་ཉ་ལའི་ལེག་པུ་བ་ཀ་པོང་ཀེ་ ཧང་ད་བུ་ལའི་ལེག་པུ་ག་ཡོར་ཀེ་ ན་ཤི་ ཇ་ག་ལུ་ཤི་དྲོ་མེ་ཡ་དག༌ཉི།

33ཨོ་ཉ་ལའི་ལེག་པུ་བ་ཀ་པོང་ཀེ་ ཐུར་ག་ཡོར་ཀེ་བུ་ ཨ་ཤི་ ན་ག་ལུ་ཤི་དྲོམ་ཅ་མང་གི་ དག་པ་ཀབ་ཉི་ ནཱན་གི་ སྐུར་པ་ཞུ་ཝ་ཨ་དེན་གེ་ ཨ་ཤི་ ན་ག་ལུ་ཤི་དྲོ༌མེ། ཧང་ཡ་དག་ནེ་ལ་ ནཱན་ཤོ་ སོ་ངོ་ཐུར་ཤ་གི༌ལ། དག་པ་ཀབ་ཉི་ ནཱན་ནཱན་ཏེན་གི་ དཀོན་མཆོག་ཅོད་ལ་དག་ཉི་ རོག་ཏེ་བ་ཀི་ ཡེག་པ༌ལ།

34ཡི་ཤུ་གི་ རོག་ཏེ་བ་ཀ་གསུངས་མ་ལ་ ན་ཧ་བཀའ་ཁྲིམས་ནང་ཀ་འབྲི་བ༌ཅ། དཀོན་མཆོག་གི་ སོ་ངོ་ཚེ་བང་ག་གསུངས་མ་ཅ་ ཇི་གི་ཡེག་ཅ་ ན་ཧ་བ་ཤོ་ ལྷ་བ་གི་ལ་#10:34 མགུར་མ་ག་དཔེ་ཆ་ 82:6 དག༌ཉི། 35དཀོན་མཆོག་ག་ གསུང་ཞུ་ཁཱན་སོ་ངོ་བ་ཤོ་ དཀོན་མཆོག་བ་གི་ལ་དག་ཉི་ དཀོན་མཆོག་གི་གསུངས་མ༌ལ། ཉི་གསུང་རབ་ཁེ་པ་ མ་ཝ་ཅོད་པེ་ག་ ཏི་ངེ་རང་མར༌བ། 36དག་པ་ཀབ་ཉི་ ཇང་ཤོ་ ཨ་པ་གི་སིན་ཐཱན་ འཛམ་གླིང་ག་ཀུན་ཏི་ཝ་གི༌ལ། ཉི་ཇི་གི་ ཇང་ཤོ་ དཀོན་མཆོག་ག་ཟ་གི་ལ་དག་ཉི་ ཡེག་པ་ཨ་དེན་གེ་ ཇི་གི་སྐུར་པ་ཞུ་ཝ་གི་ལ་དག་ཉི་ ན་ཤི་ཧང་ཏེན་ ཡེག་པེ་རེ་བེ་ཡ། 37ཇ་ག་ཨ་པ་གི་མཛད་ཁཱན་ཁེ་པ་ ཇི་གི་མ་ཨ་ནེ་ལ་ ན་ཤི་ ཇ་ག་དད་པ་ཨ་ལེ་མ་ཁེ༌ལ། 38དག་པ་ཀབ་ཉི་ ཨ་པ་གི་མཛད་ཁཱན་བ་ ཇི་གི་ཨ་ནེ་ལ་ ན་ཤི་ ཇ་ག་དད་པ་མ་ཨ་ནེ་བུ་ ཇི་གི་ཨ་ཁཱན་ལའི་བ་ཀ་ དད་པ་ཨ་ལེ་ཁེ༌ལེ། ཉི་ཤ་ ཨ་པ་ཤོ་ ཇ་ག་ནང་ཀ་དང་ ཇང་ཤོ་ ཨ་པ་ག་ནང་ཀ་ལ་དག་ཉི་ ན་ཤི་ཏེན་ཏེན་རང་ སེ་ལེ་རེ་བེ་དག་ཉི་ གསུངས་མ༌ལ། 39ཉི་ཨོམ་ཆང་རང་ རོག་ཏེ་བ་ཀི་ རོག་ཙུང་མེ་མིག་པ་ ཕི་ཝ༌ལ། དག་པ་ཀབ་ཉི་ རོག་ རོག་ཏེ་བ་ཀ་ ག་དང་གེ་གཱན་ཐར་བ༌ལ།

40ཉི་རོག་ལོག་ཉི་རང་ ཡར་དཱན་རི་དྲང་ཉ་ལོ་ཀ་ གོ་མ་ཡུ་ཧན་ན་གི་ ཁྲུས་གསོར་ཕི་ས་ག་བྱོན་ཉི་ བཞུགས་པ༌ལ། 41ཉི་སོ་ངོ་མང་པུ་ཐུར་ རོག་བཞུགས་ས་ག་ཤེག་པ༌ལ། རོག་ཏེ་བ་ཀི་ཡེག་པ་ལ་ ཡུ་ཧན་ན་གི་ རྫུ་འཕྲུལ་ག་རྟགས་མཚན་ ཐུར་རང་མ་གེན་ཤི་ དག་པ་ཀབ་ཉི་ ཡུ་ཧན་ན་གི་ རོ་ཀ་ཀོར་གེ་ གསུངས་ཁཱན་ཐམས་ཅན་རང་ དེན་པ་གི་ཝ་ལ་དག༌ཉི། 42ཉི་ཉ་ག་ཆོ་ཁཱན་ སོ་ངོ་མང་པུ་ཐུར་གི་ ཡི་ཤུ་ག་ དད་པ་ཨ་ཝ༌ལ༎

Currently Selected:

ཡུ་ཧན་ན། 10: TNTB

Highlight

Copy

Want to have your highlights saved across all your devices? Sign up or sign in

Tshangla New Testament

Learn More About Tshangla New Testament (BSI)