ལུ་ཀ། 2

ཡི་ཤུ་སྐུ་འཁྲུངས་མ༌ལ།

1ཨུ་ཉུ་གང་ཀ་ རོ་མི་ག་དཔོན་ཆི་ལུ་ ཀའི་སར་ཨ་གཱས་ཏྲས་དག་ཁཱན་གི་ རོམ་གི་དབང་ཁཱན་ རྒྱལ་ཁབ་ ཐམས་ཅན་ག་རང་ མི་རྩིས་ཕི་ལེ་ཁེ་ལེ་དག་ཉི་ བཀའ་ཤོག་ཏྲ་མ༌ལ། 2ཉི་ཨོ་ཐ་མི་རྩིས་ཤོ་ ཀུ་རེ་ནི་ཡཱས་དག་ཁཱན་ཁེ་པ་ སི་རི་ཡ་ག་ དཔོན་སློབ་ཨ་ཉི་ ཆོ་ལེ་གང་ཀ་ གོ་དང་པ་ མི་རྩིས་ཕིན་ཅ་གི་ཝ༌ལ། 3ཉི་ཨི་བི་རང་གི་ནེ་བུ་ རང་ག་ཕ་མ་ག་ དུང་ག་དི་ཉི་ མི་རྩིས་ཕི་ལེ་ཁེན་ཅ་གི་ཝ༌ལ། 4ཉི་ཡོ་སེཕ་ཤོ་ ད་ཝུད་ག་ རྒྱུད་པ་གི་ཝ་ཨ་དེན་གེ་ ས་ཆ་ ཡ་ཧུ་དི་ཡ་ག་ཆོ་ཁཱན་ ག་ལིལ་ག་ཁྲོམ་ ནཱས་རཱད་དག་ས་ག་ ད་ཝུད་ག་ཁྲོམ་ བེད་ལེ་ཧེམ་ག་ཏཱན་ དི་ལེ་ཁེ་ཝ༌ལ། 5ཉི་རོ་ཀི་ཕུན་ཁཱན་ མ་རི་ཡམ་བུ་ རོག་ཀབ་ཉི་ མི་རྩིས་ཕི་ལེ་དེན་གེ་ རིག་ཉི་བུ་ཝ༌ལ། ཉི་ཨུ་ཉུ་གང་ཀ་ མ་རི་ཡམ་ག་ ལ་ཉི་ཚང་ཅ་གི་ཝ༌ལ།

6ཉི་རོག་ཉིག་ཙིང་ ལེ་ལ་ཆོ་ལ་ཀབ་ཉི་ མ་རི་ཡམ་ ཝག་ཙ་སིང་མེ་ རེན་པ༌ལ། 7ཉི་རོ་ཀི་ ཝག་ཙ་ གོ་རང་ ཟ་ཐུར་སིང་ཉི་ ཐ་ང་གི་ཨ་ཉི་ཆོམ་ཐཱན་ ཐོང་ཀོར་ནང་ཀ་ ཐ་ཝ༌ལ། ཧང་ཡ་དག་ནེ་ལ་ རོག་ཉིག་ཙིང་ ཆོ་ལེ་ག་དེན་གེ་ མགྱོན་ཁྱིམ་ཐུར་བུ་ ཏོང་པུ་ཐུར་རང་ མ་ལུས་པ་ཆོ་ཝ༌ལ༎

ཞིང་ཁམས་ག་འཐེན་པ་དང་ ཤི་ཤ་དི་པ༌བ།

8ཉི་ཨོ་ཉ་ས་ཆ་ག་ ཤི་ཤ་དི་པ་བ་ བི་ནང་ག་ རང་རང་ས་ ཤི་ཤ་ཁུང་ཉི་ཆོ་ཁཱན་ ཕིས་ཀ་པང་ཐང་ག་ ཅ་གི་ཝ༌ལ། 9ཉི་གཙོ་བོ་ག་ ཞིང་ཁམས་ག་འཐེན་པ་ རོག་ཏེ་བ་ཀ་པོང་ཀ་བྱོན་ཉི་ གཙོ་བོ་ག་དབང་གི་ རོག་ཏེ་བ་ཀ་ ཀོ་ལོ་ལོ་ འོད་ཆར་བ་ཀབ་ཉི་ རོག་ཏེ་བ་ གནམ་མེད་ས་མེད་ ཡོང་ཁེ་ཝ༌ལ། 10ཉི་ཞིང་ཁམས་ག་འཐེན་པ་གི་ རོག་ཏེ་བ་ཀ་ གསུངས་མ་ལ་ ཡོང་མ་ཁེ། ཧང་ཡ་དག་ནེ་ལ་ སོ་ངོ་ཐམས་ཅན་རང་ ཤོ་ནང་ཕེ་ཝ་ཅོད་ཁཱན་ འཐེན་ལེག་པུ་ཕ་ཉི་ ཇང་ ན་ཧ་བཱརང་ཀ་ ཨོ་ཕ་གི༌ལ། 11ཐི་ནོང་ག་ནོང་ཀ་ ད་ཝུད་ག་ཁྲོམ་གེ་ ན་ཧ་སྐྱབས་མགོན་འཁྲུངས༌མ། རོག་ཤོ་ གཙོ་བོ་ ཁིརིས་གི༌ལ། 12ཨུ་ཐུ་ཤོ་ ན་ཧ་དེན་གེ་ ངོ་རྟགས་གི༌ལ། ཨོ་ཉ་ཝག་ཙ་ཁེ་པ་ ཐ་ང་གི་ཆོམ་ཉི་ ཐོང་ཀོར་ནང་ཀ་ཐང་ཉི་ ཐ་ཝ་ཨོ་ཕེ་དག༌ཉི།

13ཡིད་ཀ་རྣམ་ཏོག་མ་ཝ་ ཞིང་ཁམས་གེ་དོང་ བཱརའ་ཞིང་ཁམས་ག་འཐེན་པ་ མང་པུ་ཐུར་ ཨོ་ཉ་ཞིང་ཁམས་ག་འཐེན་པ་ ཀོ་ལོ་ལོ་ཤེག་ཉི་ དཀོན་མཆོག་ག་ བསྟོད་པ་ཕུལ་ཉི་

14ཞིང་ཁམས་ག་ དཀོན་མཆོག་ག་ བསྟོད་པ་ཕུལ༌ཤོ། ཉི་འཛམ་གླིང་ག་ དཀོན་མཆོག་ག་ ཐུགས་ཀ་ཚུད་ཁཱན་བ་ ཐམས་ཅན་རང་ སྐྱིད་པུ་ཨུན་ཆེན་དག་ཉི་ ཞུ་ཝ༌ལ།

15ཉི་ཞིང་ཁམས་ག་འཐེན་པ་བ་ ལོག་ཉི་ཞིང་ཁམས་ག་ བྱོན་མ༌ལ། ཉི་ཤི་ཤ་དི་པ་བ་ ཐུར་གི་ཐུར་ག་ ཡེག་པ་ལ་ གཙོ་བོ་གི་ ཨ་ཧ་གསུངས་ཁཱན་ ཨུ་ཐུ་བྱོན་ཁཱན་ཁེ་པ་ མཇལ་བེ་དེན་གེ་ ཨ་ཧ་བ་ བེད་ལེ་ཧེམ་ག་ དི་ཁེ་དག༌ཉི།

16ཉི་རོག་ཏེ་བ་ བཱས་པ་དི་ཉི་ མ་རི་ཡམ་དང་ ཡོ་སེཕ་ ཉི་ཝག་ཙ་ ཐོང་ཀོར་ནང་ཀ་ཐང་ཉི་ ཐ་ཝ་ཨ་ཝ་ མཇལ་བ༌ལ། 17ཉི་རོག་ཏེ་བ་ཀི་ མཇལ་བ་ཐུར་ག་རང་ ཞིང་ཁམས་ག་འཐེན་པ་བ་ཀི་ ཝག་ཙ་ཀོར་གེ་ གསུངས་ཁཱན་ཁེ་པ་ རོག་ཏེ་བ་ཀི་ སོ་ངོ་ཐམས་ཅན་ག་ ཡེག་པ༌ལ། 18ཉི་ཨོ་ཉ་ཀོར་གེ་ ཤི་ཤ་དི་པ་བ་ཀེ་ ན་ཐ་ཁཱན་ ཐམས་ཅན་རང་ ཡིད་ཆི་ཝ༌ལ། 19ཉི་མ་རི་ཡམ་གི་ ཨོ་ཐ་བ་ ཐམས་ཅན་རང་ རོ་ཀ་སེམས་ཀ་ཐ་ཉི་ མི་ཉི་རང་ཆོ་ཝ༌ལ། 20རོག་ཏེ་བ་ཀི་ ན་ཐ་ཁཱན་དང་ མཇལ་ཁཱན་ ཐམས་ཅན་རང་ ཞིང་ཁམས་ག་འཐེན་པ་གི་ རོག་ཏེ་བ་ཀ་ གསུངས་མ་པུརུས་ཀིན་ཨ་ཉི་རང་ གི་ཝ་ཨ་དེན་གེ་ དཀོན་མཆོག་ག་ མགུར་མ་ཞུ་ཉི་ བསྟོད་པ་ཕུལ་ཉི་རང་ ཤི་ཤ་དི་པ་བ་ ལོག་ཉི་དི་ཝ༌ལ༎

ཡི་ཤུ་མཆོད་ཁང་ག་ཕུལ་བ༌ལ།

21རོག་འཁྲུངས་ཉི་ བི་ནང་ཡེན་ དི་ལ་ཀབ་ཉི་ ཤ་ཅཱད་ཐཱན་ རོག་མ་རི་ཡམ་ག་ངེ་ཀ་ མ་བྱོན་མེ་གོ་མ་རང་ ཞིང་ཁམས་ག་འཐེན་པ་གི་གནང་ཁཱན་ མཚན་ཡི་ཤུ་དག་ཉི་ ཞུ་ཝ༌ལ།

22མོ་ས་ག་ བཀའ་ཁྲིམས་དང་ཏུ་ཉི་ ཡོ་སེཕ་དང་ མ་རི་ཡམ་ ཙང་མ་ཅོད་པེ་ག་ དུས་ཙུན་རེན་པ་ཀབ་ཉི་ ཝག་ཙ་ཡི་ཤུ་བུ་ གཙོ་བོ་ག་ཕུལ་བེ་དེན་གེ་ ཡ་རུ་ཤ་ལེམ་ག་ཏཱན་ བུ་ཝ༌ལ། 23ཧང་ཡ་དག་ནེ་ལ་ གོ་སིང་ཁཱན་ཟ་ཁེ་པ་ གཙོ་བོ་ག་ ཕུལ་བེ་ཁེ་ལེ་#2:23 ཤོན་དི་ཝ་ག་དཔེ་ཆ་ 13:2, 12 དག་ཉི་ གཙོ་བོ་ག་ བཀའ་ཁྲིམས་ག་ འབྲི་བ་ཅ་གི་ཝ༌ལ། 24ཉི་གཙོ་བོ་ག་ བཀའ་ཁྲིམས་དང་ཏུ་ཉི་ མཆོད་པ་ཕུལ་བེ་དེན་གེ་ ཏི་ཏ་ར་ཉིག་ཙིང་གི་ནེ་བུ་ པ་རོ་ཉིག་ཙིང་གི་ནེ་བུ་ ཕུལ་བེ་ཁེན་ཅ་གི་ཝ༌ལ།#2:24 ལེ་ཝི་ག་དཔེ་ཆ་ 12:8

25ཉི་ཡ་རུ་ཤ་ལེམ་ག་ ཤི་མི་ཡོན་དག་ཁཱན་ སོ་ངོ་ཐུར་ཅ་གི་ཝ༌ལ། ཉི་རོག་ཤོ་ སོ་ངོ་དྲང་པུ་ དཀོན་མཆོག་ག་ བཀའ་ཁྲིམས་འགྲུབ་ཁཱན་ གི་ཝ་མ་ཚཱད་པ་ ཨིས་རེལ་ག་སྐྱབས་ཨ་ཁཱན་ བྱོན་མ་ལ་སྨོ་ གོད་ཉི་རང་ཆོ་ཁཱན་ སོ་ངོ་ཐུར་གི་ཝ་ཆོ་ཝ༌ལ། ཉི་དམ་པའི་ཐུགས་ཉིད་ རོག་ཀབ་ཉི་ བཞུགས་པ་ཅ་གི་ཝ༌ལ། 26ཉི་ནཱན་གི་ གཙོ་བོ་ཁིརིས་ མ་མཇལ་བ་སག་པུ་ ནཱན་མ་ཤི་ལ་དག་ཉི་ དམ་པའི་ཐུགས་ཉིད་གི་ གེན་མ་ཆོ་ཝ༌ལ། 27ཡོ་སེཕ་དང་ མ་རི་ཡམ་གི་ ཝག་ཙ་ཡི་ཤུ་ མཆོད་ཁང་ག་ བཀའ་ཁྲིམས་གེ་ཤོ་ཝ་དང་ཏུ་ཉི་ རོ་ཀ་དེན་གེ་ ཨ་ལེ་ག་ཕཱན་ཅ་ཨ་ཉི་ དམ་པའི་ཐུགས་ཉིད་གི་ཨ་ཉི་ རིག་ཉི་ ཤི་མི་ཡོན་བུ་ མཆོད་ཁང་ག་ཕེབས་པ༌ལ། 28ཉི་རོ་ཀི་ ཡི་ཤུ་ ག་ཕུན་ཐཱན་ དཀོན་མཆོག་ག་ བཀའ་དྲིན་བསམ་ཉི་ ཞུ་ཝ་ལ་

29གཙོ་བོ་ ནཱན་གི་གསུངས་མ་དང་ཏུ་ཉི་ ཇང་ན་ག་གཡོག་པ་ སྐྱིད་པུ་ཨ་ཉི་ གོང་མ་ཞུ་ཁེ་དག༌ཉི། 30ཧང་ཡ་དག་ནེ་ལ་ ནཱན་གི་གནང་ཁཱན་ སྐྱབས་མགོན་ ཇི་གི་མཇལ༌བ། 31རོག་ཤོ་ སོ་ངོ་ཐམས་ཅན་ག་གུབ་ཀ་ ནཱན་གི་ཅམ་པ་ཆོ༌ཝ། 32རོ་ཀི་ དད་པ་མ་ཨ་ཁཱན་བ་ཀ་ཐུང་ཀ་ ན་ག་ཐུགས་བཞེད་གེན་ཁཱན་ འོད་ཟེར་ཨ་ཉི་ཤར༌བེ། ཉི་ན་ག་སོ་ངོ་ ཨིས་རེལ་ག་ མིང་གཏམ་ཤོ་ཝ་ ཅོད་ཉི་གནང༌མེ།

33ཉི་རོ་ཀ་ཡུམ་དང་ཡབ་ རོ་ཀི་ ཡི་ཤུ་ཀོར་གེ་ ཨོ་ཐེན་ཞུ་ཝ་ག་ ན་ཐ་ཉི་ ཡིད་ཆི་ཝ༌ལ། 34ཉི་ཤི་མི་ཡོན་གི་ རོག་ཉིག་ཙིང་ག་ བྱིན་རླབས་གནང་ཐཱན་ ཡི་ཤུ་ག་ཡུམ་ མ་རི་ཡམ་ག་ གསུངས་མ་ལ་ ཨོ་ཐ་ཝག་ཙ་ཤོ་ ཨིས་རེལ་ག་ སོ་ངོ་མང་པུ་ཐུར་ ཐང་མེ་དེན་གེ་དང་ མང་པུ་ཐུར་ ག་དུང་མེ་དེན་གེ་ དཀོན་མཆོག་གི་ སི་ཝ་གི༌ལ། རོག་ཤོ་ དཀོན་མཆོག་གེ་ རྟགས་གི༌ལ། ཉི་སོ་ངོ་བ་ཀི་ ཁ་ཏང༌མེ། 35ཨོ་ཉི་ཨ་དེན་གེ་ ཙང་ཀེན་མི་ཁཱན་ ཐམས་ཅན་རང་ མཁྱེན༌མེ། ཉི་སྒྲོ་གཟུགསམ་གི་ཆུང་ཉི་ དྲོཤ་ཧོད་པ་ད་བུ་རང་ ན་ག་ཐིང་ལོམ་ ང་མེ་ན་དག༌ཉི།

36མི་རིགས་ ཨ་ཤེར་དག་ཁཱན་གེ་ ཕ་ནུ་ཨེལ་ག་ཟ་མིན་ ཧཱན་ན་དག་ཁཱན་བུ་ ལུང་བསྟན་མོ་ གི་ཝ་ཆོ་ཝ༌ལ། ཉི་རོག་ཤོ་ གནམ་མེད་ས་མེད་ གཱན་པ་ཅ་གི་ཝ༌ལ། རོག་གཉེན་ཕིན་ཐཱན་ ཕེ་ཝག་ཙ་ཀབ་ཉི་ ཉིང་ཟུམ་ཤ་ ཆོ་ཝ་གི་ཝ༌ལ། 37ཉི་རོག་ལོ་སྐོར་ཟུམ་ མ་དི་ཝ་སག་པུ་ མོ་རེན་མ་ཨ་ཉི་ཆོ་ཝ༌ལ། སྨོན་ལམ་ཏབ་ཉི་ ཉི་བར་ཀེ་བར་ཀེ་རང་ སྨྱུང་གནས་ཆོ་ཉི་ ངམ་བི་ནང་མ་ཝ་ དཀོན་མཆོག་ག་ མགུར་མ་ཞུ་ཉི་ མཆོད་ཁང་ག་རང་ བཞུགས་ཅ་གི་ཝ༌ལ། 38ཉི་ཨུ་ཉུ་གང་ཀ་རང་ རོག་བུ་བྱོན་ཉི་ དཀོན་མཆོག་ག་ བཀའ་དྲིན་བསམ་ཐཱན་ ཡ་རུ་ཤ་ལེམ་ ཚེ་ཐར་གནང་ཁཱན་ ཧ་ལ་བྱོན་ལ་སྨོ་ གོད་ཉི་ཆོ་ཁཱན་བ་ཀ་ ཨོ་ཉ་ཝག་ཙ་ཀོར་གེ་ ཡེག་པེ་གོ་ཙུག་པ༌ལ།

39ཉི་རོག་ཏེ་བ་ཀི་ དཀོན་མཆོག་ག་ བཀའ་ཁྲིམས་དང་ཏུ་ཉི་ ཧང་རང་ཨན་ཐཱན་ ལོག་ཉི་རང་ ག་ལིལ་ག་ཆོ་ཁཱན་ རོག་ཏེ་བ་ཀ་ཁྲོམ་ ནཱས་རཱད་ག་ཏཱན་ དི་ཝ༌ལ། 40ཝག་ཙ་སྐུ་བྲོང་ཉི་ ཤུག་ཏག་པ༌ལ། ཉི་རིག་པ་ གནམ་མེད་ས་མེད་ མཁས་ཏྲ་རི་ཉི་ དཀོན་མཆོག་ག་བྱིན་རླབས་ རོ་ཀ་ཐུང་ཀ་ཆོ་ཝ༌ལ༎

ཝག་ཙ་ཡི་ཤུ་ མཆོད་ཁང་ག་ལུས་པ༌ལ།

41ཉི་ཡི་ཤུ་ག་ ཕ་མ་ཉིག་ཙིང་ གོག་ཉི་དི་ཝ་ག་དུས་ཆེན་ བརྩི་སྲུང་ཨ་ལེ་དེན་གེ་ ཉིང་དྲང་རང་ ཡ་རུ་ཤ་ལེམ་ག་ དིན་ཅ་གི་ཝ༌ལ། 42ཉི་རོག་ ལོ་སྐོར་ཐུར་ག་བཞེས་དེན་གེ་ རོག་ཏེ་བ་ཀ་ ལུགས་སྲོལ་དང་ཏུ་ཉི་ ཡ་རུ་ཤ་ལེམ་ག་ དི་ཝ༌ལ། 43ཉི་དུས་ཆེན་ བརྩི་སྲུང་ཨ་ཉི་ཆུམ་ཉི་ ལོག་པེ་གང་ཀ་ ཝག་ཙ་ཡི་ཤུ་ ཡ་རུ་ཤ་ལེམ་ག་རང་ ལུས་པ༌ལ། ཉི་རོ་ཀ་ཕ་མ་ཉིག་ཙིང་གི་ མ་སེ་ཝ༌ལ། 44ཉི་རོག་ཉིག་ཙིང་གི་ཨ་ནེ་ལ་ རོག་ཏེ་བ་ཀབ་ཉི་དི་ཁཱན་ བཱརའ་སོ་ངོ་བ་ཀབ་ཉི་ ཅ་ཨོ་ཕེ་དག་ཉི་མི་ཉི་ དང་ཉི་རང་ ངམ་ཐུར་ག་ས་ག་སག་པུ་ ཤེག་པ༌ལ། ཉི་རོག་ཉིག་ཙིང་གི་ རོག་ཏེ་བ་ཀ་ ནོག་མིན་དང་ ཇ་རོ་བ་ཀ་པོང་ཀ་ ལ་མ༌ལ།

45རོག་ཉིག་ཙིང་གི་ རོག་ལམ་ཉི་ མ་ཐོང་མ་ཨ་དེན་གེ་ རོག་ལམ་ཉི་རང་ ལོག་ཉི་ཡ་རུ་ཤ་ལེམ་ག་ཏཱན་ དི་ཝ༌ལ། 46ནོང་སམ་ག་ཚི་ངེ་ ཧང་རང་རུད་པཱན་ རོག་ཉིག་ཙིང་གི་ ཡི་ཤུ་ལམ་ཉི་ ཐོང་མ༌ལ། ཉི་ཨུ་ཉུ་གང་ཀ་ རོག་མཆོད་ཁང་ནང་ཀ་ བཀའ་ཁྲིམས་ག་ སློབ་དཔོན་བ་ཀ་པོང་ཀ་བཞུགས་ཉི་ དྲི་ཝ་དྲི་ལན་ཨ་ཉི་ བཞུགས་པ་ཅ་གི་ཝ༌ལ། 47ཉི་རོ་ཀ་གསུང་ ན་ཐ་ཁཱན་ ཐམས་ཅན་རང་ རོ་ཀི་མཁྱེན་ཉི་ ལན་གནང་ཁཱན་ག་གོད་ཉི་ ཡིད་ཆི་ཝ༌ལ།

48ཉི་རོག་མཇལ་བ་ཀབ་ཉི་ རོག་ཉིག་ཙིང་ཡིད་ཆི་ཉི་ རོ་ཀ་ཡུམ་གི་ རོ་ཀ་ཞུ་ཝ་ལ་ ཟ་ ནཱན་གི་ཨ་ཧ་ཏཱན་ ཧང་ཨ་ཉི་ ཨུ་ཉུ་ད་བུ་ཨ་ཝ་ཡ། ན་ག་ཨ་པ་ཨ་ཆིང་ གནམ་མེད་ས་མེད་ སྡུག་བསྔལ་ཨ་ཉི་ ནཱན་ ཐ་ས་ལ་མ་མང་གི་དག༌ཉི།

49རོ་ཀི་ རོག་ཉིག་ཙིང་ག་ ལན་གནང་མ་ལ་ ན་ཆིང་གི་ ཇང་ཧང་ཨ་ཉི་ ལ་མ་ཡ། ཇང་ ཇ་ག་ཨ་པ་ག་ཕོ་བྲང་ག་ ཨོ་ཕེ་དག་ཉི་ ན་ཆིང་གི་ མ་སེན་ཤི་སྨོ་དག༌ཉི། 50རོ་ཀི་ ཨོ་ཐེན་གསུངས་ཁཱན་ཀོར་གེ་ རོག་ཉིག་ཙིང་གི་ ཧ་གོ་ལེ་མར་བ༌ལ།

51ཉི་ཡི་ཤུ་ རོག་ཉིག་ཙིང་ཀབ་ཉི་བྱོན་ཉི་ ནཱས་རཱད་ག་ཕེབས་པ༌ལ། ཉི་ཕ་མ་གི་ ཧང་ཡེག་པ་ཐུར་ སྙན་གསེང་ཅ་གི་ཝ༌ལ། ཉི་རོ་ཀ་ཡུམ་གི་ ཨོ་ཐ་ཇུང་ཁཱན་བ་ ཐམས་ཅན་རང་ རོ་ཀ་སེམས་ཀ་ཐ་ཝ༌ལ།

52ཉི་ཡི་ཤུ་ རིག་པ་མང་པུ་ཉོང་ཉི་ སྐུ་གཟུགས་བུ་བྲོང་ཉི་ སོ་ངོ་དང་ དཀོན་མཆོག་ག་ ཐུགས་ག་ཚུད་པ་ རི་ཝ༌ལ༎

Currently Selected:

ལུ་ཀ། 2: TNTB

Highlight

Copy