རོ་མི། 11

ཨིས་རེལ་ག་སོ་ངོ་བ་ཀ་ཐུང་ཀ་ དཀོན་མཆོག་ག་སྙིང་རྗེ།

1ཉི་ལ་ ཇི་གི་ཇིམ་ཅ་ ཧང་དཀོན་མཆོག་གི་ རོ་ཀ་སོ་ངོ་བ་ ཐུབ་ཐ་ཝ་སྨོ། ཏི་ངེ་རང་ ཐུབ་ཐ་ཝ་མཱན༌ཅ། ཇང་བུ་ ཨིས་རེལ་ག་སོ་ངོ་གི༌ལ། ཨ་བཱརའ་ཧམ་ག་ མི་རྒྱུད་གི༌ལ། ཉི་བེ་ནེ་ཡ་མིན་ག་ མི་རིགས་གི༌ལ།

2དཀོན་མཆོག་གི་ གོ་ཙུག་པེ་གང་ཀེ་རང་སི་ཁཱན་ རོ་ཀ་སོ་ངོ་བ་ ཐུབ་མ་ཐ་ཝ༌ཅ། ཨེ་ལི་ཡ་གི་ ཨིས་རེལ་ག་ སོ་ངོ་བ་ཀ་ཀོར་གེ་ཞུ་ཁཱན་ རིམ་པང་ནང་ཀ་ གསུང་རབ་གེ་ ཧང་ཤོན་ཅ་གི་ལ་སྨོ་ ན་ཤི་སེ་ལུ་མ་ལ་སྨོ། 3གཙོ་བོ་ རོག་ཏེ་བ་ཀི་ ན་ཧ་ལུང་བསྟན་པ་བ་ ཤེན་ཆུ༌མ། ན་ག་མཆོད་གཤམ་བ་བུ་ དེད་ཉི་གེ༌མ། ཉི་ཨོམ་ ཇང་ཐུར་ཤ་ལུས་པ༌ཅ། ཉི་རོག་ཏེ་བ་ཀི་ ཇང་བུ་ཤེ་ལེ་ག་ མིག་པ་ཕི་ན་#11:3 1 དཔོན་བ་ཀ་དཔེ་ཆ་ 19:10, 14དག་ཉི་ ཞུ་ཝ༌ཅ།

4དཀོན་མཆོག་གི་ རོ་ཀ་ལན་ ཧང་གནང་མ་ཡ། བཱལ་ག་སྐུ་ག་གུབ་ཀ་ ཕྱག་མ་འཚལ་ཁཱན་ སོ་ངོ་ 7000 ཐེན་ ཇི་གི་ཇང་ཏེན་ག་དེན་གེ་ ཐ་ཝ་ཅ་#11:4 1 དཔོན་བ་ཀ་དཔེ་ཆ་ 19:18། བཱལ་དག་ཁཱན་ཤོ་ ཀ་ནཱན་ག་ སོ་ངོ་བ་ཀི་ གསོལ་ཝ་ཏབ་ཁཱན་ ལྷ་ཐུར་ག་མིང་གི་ཝ༌ལ།དག་ཉི་ དཀོན་མཆོག་གི་ གསུངས་མ༌ལ།

5ཨུ་ཉུ་པུརུས་ཀིན་ཨ་ཉི་ ཨོ་མ་ག་དུས་ག་བུ་ ཨིས་རེལ་ག་ སོ་ངོ་ཚེ་བང་ དཀོན་མཆོག་གི་ ཐུགས་རྗེ་གཟིགས་ཉི་ སིན་གནང་མ༌ཅ། 6ཉི་རོག་ཏེ་བ་ དཀོན་མཆོག་ག་ ཐུགས་རྗེ་གི་ཨ་ཉི་ ཐར་པ་ཉོང་པ་ཆོ་ནེ་ལ་ རོག་ཏེ་བ་ཀི་ ལའི་ཨ་ཉི་ཉོང་ཅ་ ཏི་ངེ་རང་མང་གི། ལའི་ཨ་ཉི་ཉོང་ཐཱན་རང་གི་ནེ་ཏ་ ཐུགས་རྗེ་ཤོ་ ཐུགས་རྗེ་རང་མ་ཝ་རི༌ལེ།

7ཉི་ལ་ ཧང་ཨ་ཝ་ཡ། ཨིས་རེལ་ག་སོ་ངོ་བ་ཀི་ གནམ་མེད་ས་མེད་ ཚ་གྱང་བང་ཉི་ ལམ་ཁཱན་ཁེ་པ་མ་ཉོང་ཅི། དག་པ་ཀབ་ཉི་ དཀོན་མཆོག་གི་ སི་ཁཱན་བ་ཀི་ཤ་ཉོང༌པ། བཱརའ་སོ་ངོ་བ་ཀ་སེམས་ཤོ་ ཀག་ཏར་རི་ཝ༌ལ།

8དཀོན་མཆོག་གི་ རོག་ཏེ་བ་ཀ་ ཡོང་བ་རྣམ་ཤེས་གནང་མ༌ལ། ཐི་ནོང་ག་ནོང་སག་པུ་བུ་ མ་ཐོང་ཁཱན་མིང་དང་ མ་ཐ་ཁཱན་ན་ གནང་མ་ལ་#11:8 ཁྲིམས་ལུགས་ག་དཔེ་ཆ་ 29:4; ཡ་ཤའི་ཡ་ག་དཔེ་ཆ་ 29:10 དག་ཉི་

གསུང་རབ་གེ་ཤོན༌ཅ།

9ཉི་ད་ཝུད་གི་ གསུངས་མ་ཅ་

རོག་ཏེ་བ་ཀ་དོང་ཏཱན་ཤོ་ རོག་ཏེ་བ་ཀ་ ཁ་ཤོང་དང་གེརེམ་རིན་ཆེན། ཉི་ཤ་ རོག་ཏེ་བ་ རོ་ཁེ་ཇོང་མེ་ ཉི་རོག་ཏེ་བ་ཀི་ ཁྲིམས་ཉོང༌པེ། 10རོག་ཏེ་བ་ཀ་ མིང་མེར་བུ་རི་ཉི་ མ་ཐོང་ཆེན། ཉི་རོག་ཏེ་བ་ཀ་ ཚིང་ཧ་ལ་རང་མ་ཐྲང་པ་ཨ་ཉི་ ཀུར་ཅེན་#11:10 མགུར་མ་ག་དཔེ་ཆ་ 69:22,23 དག༌ཉི།

11ཉི་ཨོམ་ཆང་རང་ ཇི་གི་ཇིམ་ཅ་ རོག་ཏེ་བ་ ལོག་ཉི་ཝུ་ལེ་མར་བ་ཨ་ཉི་རང་ རོ་ཁེ་དི་ཝ་སྨོ། ཏི་ངེ་རང་མང་གི། ལག་ཏང་ རོག་ཏེ་བ་ཀི་ སྡིག་པ་ཨ་ཝ་ཨ་དེན་གེ་ ཡ་ཧུ་དི་པ་མང་གི་ཁཱན་བ་ཀི་ ཐར་པ་ཉོང་པ༌ཅ། ཉི་ཡ་ཧུ་དི་པ་བ་ རོག་ཏེ་བ་ཀབ་ཉི་ སེར་སྣ་ཨ་ཝ་རི༌ལེ། 12ཡ་ཧུ་དི་པ་བ་ཀི་ སྡིག་པ་ཨ་ལ་ཀབ་ཉི་ འཛམ་གླིང་གི་ བྱིན་རླབས་ཉོང་ཉི་ ཉི་ཡ་ཧུ་དི་པ་བ་ ཕ་མ་ཀབ་ཉི་ ཡ་ཧུ་དི་པ་མང་གི་ཁཱན་བ་ཀི་ བྱིན་རླབས་ཉོང༌ལ། ཉི་ཨོམ་ ཡ་ཧུ་དི་པ་བ་ཀི་བུ་ ཐར་པ་ཉོང་ནེ་ཏ་ ཧབ་ཏུར་མང་པུ་ཨ་ཉི་ བྱིན་རླབས་ཉོང་པེ་ལ་ཡ།

13ཇི་གི་ཨོ་ཐ་བ་ ཐམས་ཅན་རང་ ནའི་ཡ་ཧུ་དི་པ་ མང་གི་ཁཱན་བ་ཀ་དེན་གེ་ ཡེག་ཅ་གི༌ལ། ཇང་ཤོ་ ཡ་ཧུ་དི་པ་ མང་གི་ཁཱན་བ་ཀ་དེན་གེ་ སྐུ་ཚབ་ཨ་ཉི་ ཀེ་བ་ཨ་དེན་གེ་ ཇི་གི་ན་ཧ་དེན་གེ་རང་ མང་པུ་ཙ་དྲེག༌ཅ། 14ཇི་གི་ཨོ་ཐེན་ཨ་ལ་ཀབ་ཉི་ ཇང་ཏེན་ག་སོ་ངོ་བ་བུ་ སེར་སྣ་ཨ་ཝ་རི་ཉི་ ཚེ་བང་གི་ ཐར་པ་ཉོང་ཏུ་མེ་དག་ཉི་ ཇ་ག་རེ་ཆ༌ཅ། 15ཧང་ཡ་དག་ནེ་ལ་ རོག་ཏེ་བ་ཀི་ དཀོན་མཆོག་ ཐུབ་ཐ་ཝ་ཨ་དེན་གེ་ འཛམ་གླིང་ག་ བཱརའ་སོ་ངོ་བ་ དཀོན་མཆོག་ཀབ་ཉི་ ལོག་ཉི་རང་ཆ་མ་རིན༌ཅ། རོག་ཏེ་བ་ཀི་བུ་ དཀོན་མཆོག་ག་ ཐུགས་རྗེ་ཞུ་ནེ་ཏ་ ཨོ་ཉ་གེ་བུ་ལག་ཉི་ ཤི་ཁཱན་བ་ཀ་དེན་གེ་ ཚེ་རིན་ཇོང༌མེ། 16གོ་མ་སེ་ཁཱན་སེ་ཨ་ཉི་ དཀོན་མཆོག་ག་ ཕུལ་ཁཱན་ཀེབ་ཏང་ཁེ་པ་ དམ་པ་ཆོ་ནེ་ལ་ ཀེབ་ཏང་ཐམས་ཅན་རང་ དམ་པ་ཨོ་ཕེ། ཤིང་ག་ཙ་རང་ དམ་པ་ཆོ་ནེ་ལ་ ད་ཀ་བ་ཏ་ རང་བཞིན་གེ་རང་ དམ་པ་ཨོ་ཕེ།

17དག་པ་ཀབ་ཉི་ ཤིང་ག་ད་ཀ་ཚེ་བང་ཞུད་ཉི་ དི་ཝ་པུརུས་ཀིན་ཨ་ཉི་ ཨ་བཱརའ་ཧམ་ག་ མི་རྒྱུད་ཚེ་བང་ ཞུད་ཉི་དི་ཝ༌ཅ། ཨོ་ཉི་ཨ་དེན་གེ་ ནའི་ཡ་ཧུ་དི་པ་མང་གི་ཁཱན་བ་ཤོ་ བོ་རང་ག་ཨོ་ལིབ་ཤིང་ག་ ཉོམ་ད་བུ་ཐུར་གི༌ལ། ཉི་དཀོན་མཆོག་གི་ ཡ་ཧུ་དི་པ་བ་ཀ་གནང་ཁཱན་ བྱིན་རླབས་ཅན་ག་ཚེ་ཁེ་པ་ ན་ཤི་བུ་ ཉོང་ཅེན་དག་པ་གི་ ན་ཧ་བ་ཕཱན་ཐཱན་ རོག་ཏེ་བ་ཀ་ ཚབ་ཀ་ཏུན༌ཅ། 18ཨོ་ཉི་ཨ་དེན་གེ་ ཞུད་ཉི་དི་ཁཱན་ ད་ཀ་བ་ཀ་ཐུང་ཀ་ ན་ཧ་བ་ ངལ་མ་རངས་པ་མ་ཨའི། ན་ཤི་ངལ་མ་རངས་པ་ ཨན་ཐཱན་ཨ་ནེ་ལ་ ཨོ་ཐ་ཆཱས་སེམས་ཀ་ཐའི། ན་ཤི་ཙ་ཙུང་ཅ་མང་གི་ཝ་ ཙ་གི་ན་ཧ་བ་ཙུང་ཅ་གི༌ལ།

19དག་པ་ཀབ་ཉི་ ན་ཤི་ཡེག་ཏུ་ ཨོ་ཉ་ད་ཀ་བ་ཤོ་ ཇ་ག་བཱརང་ཅོད་པེ་དེན་གེ་ ཞུད་ཉི་དི་ཝ་གི་ལ་དག༌ཉི། 20གི་ལ་དེན་མེ་ དག་པ་ཀབ་ཉི་ སེམས་ཀ་ཐའི། ཨོ་ཉ་ད་ཀ་བ་ཤོ་ དཀོན་མཆོག་ག་དད་པ་ མ་ཨ་ཝ་ཨ་དེན་གེ་ ཞུད་ཉི་དི་ཝ་གི༌ལ། ཉི་ན་ཤི་ དད་པ་ཨ་ཝ་ཨ་དེན་གེ་ ན་ཧ་བ་ཤོ་ རོག་ཏེ་བ་ཀ་ཚབ་ཀ་ སོག་པེ་རེ་བ་གི༌ལ། ན་ཤི་ཁམ་མ་ཙོང་ཤོ་ ལག་ཏང་ ཡོང་ཁེ་ཉི་ཆོ་ལེ་ཁེ༌ལེ། 21གོ་མ་གེ་ཆོ་ཁཱན་ ད་ཀ་བ་རང་ དཀོན་མཆོག་གི་ ཐུབ་མ་ཐ་ནེ་ལ་ ན་ཧ་བ་ཏ་ རོ་ཀི་ཧང་ཨ་ཉི་ ཐུབ་ཐ་ལེ་ཡ།

22ཨོ་ཉི་ཨ་དེན་གེ་ མིན་གོད་ཅོ༌ལེ། དཀོན་མཆོག་ཤོ་ གནམ་མེད་ས་མེད་ ཇམ་པུ༌ཅ། ཉི་གནམ་མེད་ས་མེད་ ཀ་ལུ་བུ༌ཅ། རོ་ཀ་བཀའ་ག་ ཆ་གནས་མ་ཐ་ཁཱན་བ་ཀ་དེན་གེ་ རོག་ཤོ་ཀ་ལུ༌ཅ། དག་པ་ཀབ་ཉི་ ན་ཤི་རོ་ཀ་བྱམས་པར་ག་ ལོ་ཏེན་ཉི་རང་ཆོ་ནེ་ལ་ རོ་ཀི་ན་ཧ་ བྱམས་པར་ཀེ་ཉི་གནང༌མེ། ཨུ་ཉུ་མ་ནེ་ལ་ ད་ཀ་པུརུས་ཀིན་ཨ་ཉི་ ན་ཧ་བ་བུ་ཅཱད་གེ༌མེ། 23ཡ་ཧུ་དི་པ་བ་ཀི་ དད་པ་མ་ཨ་ལཱན་རང་ མ་ཆོ་ནེ་ལ་ དཀོན་མཆོག་གི་ རོག་ཏེ་བ་ལོག་ཉི་རང་ རོག་ཏེ་བ་ཀ་བཱརང་ཀ་ ཕཱན་གནང༌མེ། ཨུ་ཉུ་ད་བུ་མཛད་པེ་ག་ སྟོབས་དབང་ དཀོན་མཆོག་ག༌ཅ། 24ན་ཧ་བ་ཏ་ བོ་རང་ག་ ཨོ་ལིབ་ཤིང་ག་ ད་ཀ་ད་བུ་ཐུར་གི༌ལ། ཨོ་ཉེ་རང་གི་ནེ་བུ་ རོ་ཀི་ན་ཧ་བ་ ཅཱད་ཉི་ཕཱན་ཐཱན་ ཆེ་ཁཱན་ཨོ་ལིབ་ཤིང་ཀབ་ཉི་ ཏུན་གནང་མ༌ཅ། ནའི་རང་བཞིན་གེ་རང་ ད་ཀ་གི་ཁཱན་བ་ཏ་ རང་ཏེན་ག་གི་ཁཱན་ཀབ་ཉི་ ཏུ་ལེ་ག་ཐུགས་བཞེད་ དཀོན་མཆོག་གི་བཞེས་ཝ་ཅ༎

ཐམས་ཅན་ག་དེན་གེ་ དཀོན་མཆོག་ག་སྙིང་རྗེ།

25ཇ་ག་ཡུང་ཟི་བ་ ན་ཧ་བ་ ཁམ་མ་ཏག་ཅེན་དག་པ་གི་ ཨོ་ཐ་གུམ་ནང་ཆཱས་ཁེ་པ་ ན་ཤི་ཧ་གོན་ཆེན་དག་ཉི་ ཇ་ག་སེམས༌ཅ། ཨིས་རེལ་ག་ སོ་ངོ་བ་ཀི་ ཀག་ཏར་རི་ཝ་ག་ཉམས་མྱོང་ ད་སུར་ཏ་ཉོང་པ༌ཅ། དག་པ་ཀབ་ཉི་ ཨུ་ཐུ་བུ་ ཡ་ཧུ་དི་པ་མང་གི་ཁཱན་བ་ ཐམས་ཅན་རང་ ཁིརིས་ག་ནང་ཀ་ མ་ཨོ་ཕ་སག་པུ་ཤ་གི༌ལ། 26ཨོ་ཐེན་ཨ་ཉི་ ཨིས་རེལ་ག་སོ་ངོ་བ་ ཐམས་ཅན་གི་ ཐར་པ་ཉོང༌པེ། གསུང་རབ་གེ་བུ་ ཨོ་ཐེན་ཤོན་ཅ་

ཐར་པ་གནང་ཁཱན་ཁེ་པ་ སི་ཡོན་གེ་བྱོན༌མེ། ཉི་རོ་ཀི་ ཡ་ཀུབ་ག་མི་རྒྱུད་གེ་ ངན་པ་ད་སུ་རང་ མ་ཝ་ཅོད༌པེ། 27ཨུ་ཐུ་ཤོ་ རོག་ཏེ་བ་ཀབ་ཉི་ ཇ་ག་འགན་རྒྱ་གི༌ལ། ཇི་གི་རོག་ཏེ་བ་ཀ་ སྡིག་པ་མ་ཝ་ཅོད་པེ་#11:27 ཡ་ཤའི་ཡ་ག་དཔེ་ཆ་ 59:20, 21; ཡ་ཤའི་ཡ་ག་དཔེ་ཆ་ 27:9; ཡར་མི་ཡ་ག་དཔེ་ཆ་ 31:33,34 དག༌ཉི།

28ཡ་ཧུ་དི་པ་མང་པུ་ཐུར་ འཐེན་ལེག་པུ་ག་ དགྲ་རི་ཝ་ཨ་དེན་གེ་ ན་ཧ་ཕཱན་མ༌ཅ། དག་པ་ཀབ་ཉི་ སི་ལེ་ག་ཤེག་པ་ཀབ་ཉི་ རོག་ཏེ་བ་ཀ་ ཕ་མ་བ་ཀ་ཡོར་ཀེ་ རོག་ཏེ་བ་ཤོ་ དཀོན་མཆོག་གི་ ཕང་ཁཱན་བ་གི༌ལ། 29དག་པ་ཀབ་ཉི་ དཀོན་མཆོག་གི་གནང་ཁཱན་ སེ་རབ་དང་ དཀོན་མཆོག་གི་ ར་ཁཱན་ཁེ་པ་ ཏི་ངེ་རང་ འགྱུར་བེ་དག་ཉི་མཱན༌ཅ། 30གོ་མ་ཤེབ་ཐུར་ ནའི་ཡ་ཧུ་དི་པ་མང་གི་ཁཱན་བ་ཀི་ དཀོན་མཆོག་ག་ བཀའ་འགྲུབ་ཕ་མཱན་ཆི། དག་པ་ཀབ་ཉི་ ཡ་ཧུ་དི་པ་བ་ཀི་ དཀོན་མཆོག་ག་ བཀའ་མ་འགྲུབ་ཕ་ཨ་དེན་གེ་ ཨོམ་ དཀོན་མཆོག་ག་སྙིང་རྗེ་ ན་ཤི་ཉོང་པ༌ཅ། 31ཉི་དཀོན་མཆོག་གི་ ན་ཧ་སྙིང་རྗེ་ཨན་གནང་མ་ཨ་དེན་གེ་ ཉི་ཨོམ་ རོ་ཀི་ རོག་ཏེ་བ་ཀ་བུ་ སྙིང་རྗེ་ཨན་གནང་ཆེན་དག་པ་གི་ ཡ་ཧུ་དི་པ་བ་ བཀའ་མ་འགྲུབ་ཁཱན་རི་ཝ༌ཅ། 32ཧང་ཡ་དག་ནེ་ལ་ དཀོན་མཆོག་གི་ ཐམས་ཅན་ག་ སྙིང་རྗེ་ཨན་གནང་མེ་དེན་གེ་ རོ་ཀི་ སོ་ངོ་ཐམས་ཅན་གི་ བཀའ་མ་འགྲུབ་ཁཱན་ག་ བཙོན་པ་ཅོད་ཉི་གནང་མ༌ཅ།

33དཀོན་མཆོག་ག་ རིག་པ་དང་ཡོན་ཏན་ ཧབ་ཏུར་བེ་དིང་ལ་ཡ། རོ་ཀ་ཐག་གཅཱད་ཐང་བ་ ཨི་བི་གི་རང་ ལ་མེ་མར་བེ༌ལ། ཉི་རོ་ཀ་ལམ་ག་བ་ ཐུར་གི་རང་ ཧ་གོ་ལེ་མར་བེ༌ལ།

34གཙོ་བོ་ག་ ཐུགས་བསམ་ཁེ་པ་ ཨི་བི་གི་སེ་ཝ་ཅ་ཡ། ཨི་བི་གི་ རོ་ཀ་ནོ༌ཝང་ ཨ་ལེ་རེ་བེ་ཡ།#11:34 ཡ་ཤའི་ཡ་ག་དཔེ་ཆ་ 40:13 35ཉི་ཨི་བི་གི་ དཀོན་མཆོག་ག་ བི་ཝ་ཨ་དེན་གེ་ ལོག་ཉི་ དཀོན་མཆོག་གེ་ ཉོང་པེ་ཅ་ཡ་#11:35 ཨ་ཡུབ་ག་དཔེ་ཆ་ 41:11 དག༌ཉི།

36ཐམས་ཅན་རང་ རོ་ཀེ་ཨ་ཉི་ཇུང་མ་གི༌ལ། ཐམས་ཅན་རང་ རོ་ཀི་བཀོད་པ་གི༌ལ། ཉི་ཐམས་ཅན་རང་ རོ་ཀ་དེན་གེ་གི༌ལ། དུས་ཏ་བུ་རང་ རོ་ཀ་ཏཱན་གཟི་བརྗིད་ཕུལ༌ཤོ། ཨ་མེན༎

Currently Selected:

རོ་མི། 11: TNTB

Highlight

Copy