Ап.паш 6
6
6 ГЛАВА
1-7 Шым диаконым шогалтымаш. 8-15 Стефаным руалтен кучымаш.
1Тиде кечылаште, тунемше-влак ешаралтме годым, грекла мутланыше иудей-влак «Кече еда полышым пуэдыме годым мемнан кокласе тулык вате-влакым шотыш огыт нал» манын, еврейла ойлышо иудей-влак ӱмбак ӧпкелаш тӱҥалыныт. 2Тунам латкок Апостол чыла тунемшым ӱжын да нунылан каласен: «Еҥ-влакым пукшышаш верч Юмын шомакым ӧрдыжеш кодена гын, чын огына ыште. 3Сандене, иза-шольо-влак, Святой Шӱлыш да кугу уш дене тич темше шым еҥым, поро лӱмнераным, шкендан кокла гыч ойырыза, нуным служитлыме пашашке шогалтена. 4А ме шкенам умбакыжат кумалмылан да Юмын шомаклан служитлымылан пуэна».
5Тиде ой уло погынымашлан келшен. Нуно Стефаным, ӱшанымаш да Святой Шӱлыш дене тич темше пӧръеҥым, тыгак Филиппым, Прохор ден Никанорым, Тимон ден Парменым, Антиохий гыч Николайым ойыреныт. Николай ончыч чын Юмым палыдыме лийын. 6Нуным Апостол-влак ончылан шогалтеныт, Апостол-влак кумалыныт да ӱмбакышт кидым пыштеныт.
7Тыгеракын, Юмын шомакше шарлен. Тунемше-влак Иерусалимыште моткоч ешаралтыныт, иерей-влак кокла гычат пешак шукын ӱшанымашын мутшым колыштшо лийыныт.
8А ӱшанымаш да вий дене тич темше Стефан калык коклаште ӧрыктарыше пашам да палдарыше кугу пале-влакым ыштен. 9Южо еҥ тудын дене ӱчашаш тӱҥалын. Иктышт либертинец#6:9 Либертинец – эрыкыш лукмо кул лийше иудей. манме еҥ-влакын синагогышт гыч лийыныт, весышт Кириней да Александрий гыч улыт улмаш, а южышт Киликий да Асий кундем гыч лийыныт. 10Но Шӱлыш Стефанлан моткоч кугу ушым пуэн, сандене нуно тудын ваштареш шоген кертын огытыл. 11Тунам нуно икмыняр еҥым тыге каласаш таратеныт: «Моисей ден Юмо ӱмбаке мыскылен ойлымыжым ме колынна». 12Тыге калыкымат, калык кугурак ден закон туныктышо-влакымат таратеныт да Стефаным руалтен кученыт, Синедрион ончыко наҥгаеныт. 13Шояк таныклыше-влакым луктын шогалтеныт, нунышт ойленыт: «Тиде святой вер да мемнан закон ӱмбаке осал мут-влакым ойлымым тиде еҥ ок чарне. 14”Назорей Иисус тиде верым шалата да Моисейын мыланна кодымо йӱлам вашталта” манын ойлымыжым ме колынна». 15Синедрионышто шинчыше-влак чылан Стефан ӱмбаке онченыт да тудын чурийже Суксын гай коймым ужыныт.
Currently Selected:
Ап.паш 6: УС
Highlight
Share
Copy
Want to have your highlights saved across all your devices? Sign up or sign in
Библийым кусарыше институт, Хельсинки 2007
