Лк 18

18 ГЛАВА

1-8 Тулык ӱдырамаш ден судья нерген туштен ойлымаш. 9-14 Фарисей ден йозак погышо нерген туштен ойлымаш. 15-17 Иисус да йоча-влак. 18-30 Поян вуйлатыше. 31-34 Иисус шке колымыж да ылыжмыж нерген кумшо гана каласкала. 35-43 Иерихон воктене сокыр кӱчызым паремдымаш.

1Нойыде эре кумалаш кӱлмӧ нерген Иисус тунемшыж-влаклан туштен каласкален: 2«Ик олаште судья лийын. Тудо Юмо деч лӱдын огыл, еҥ деч вожылын огыл. 3Тиде олаштак тулык ӱдырамаш илен, судья деке шуко гана миен да ойлен: ”Мый денем тавалыше деч арален нал”. 4Но тудыжо кужу жап нимом ынеж ыште улмаш, а вара шкаланже шке каласен: ”Мый Юмо дечат ом лӱд, еҥ дечат ом вожыл гынат, 5тиде ӱдырамашым арален налам, вет тудо мылам ласкалыкым ок пу. Уке гын, тышке коштмыж дене мыйым нойыктара”».

6Господь йодын: «Тиде чын огыл ыштыше судьян мом ойлымыжым те колыда? 7Кеч вучыкта гынат, йӱдшӧ-кечыже полышым йодын сӧрвалыше, ойырен налме еҥже-влакым Юмо арален ок нал мо? 8Тыланда ойлем: Тудо нуным вашке арален налеш. Но, толмекыже, Айдеме Эрге мланде ӱмбалне ӱшанымашым муэш мо?»

9Чын ыштыше улына манын ӱшаныше да молыштым шотлыдымо южо еҥлан Иисус тыге туштен ойлен:

10«Кок еҥ храмыш кумалаш пурен, иктыже фарисей лийын, весыже – йозак погышо. 11Фарисей шогалын да шке шотшо дене тыге кумалын: ”О, Юмо! Мый моло еҥ гай агыше, осалланыше, яжарланыше але тиде йозак погышо гай омыл, тидлан Тылат таум ыштем. 12Мый арнялан кок гана пӱтым кучем, ыштен налмем гыч луымшо ужашыжым Тылат пуэм”. 13А йозак погышо ӧрдыжтырак шоген, шинчажымат пылпомышко ынеж нӧлтал улмаш, шкенжым оҥ гыч кырен ойлен: ”Юмо! Мыйым, языканым, чамане!” 14Тыланда ойлем, фарисей огыл, а йозак погышо мӧҥгыжӧ чыныш лукмо пӧртылын. Вет шкенжым кӱшкӧ шындыше кеч-кӧат волтымо лиеш, а шкенжым ӱлыкӧ волтышо нӧлтымӧ лиеш».

15Нунын деке тӱкныжӧ манын, Иисус деке изи йоча-влакымат нумал конденыт. Тидым ужын, тунемшыж-влак нуным чареныт, 16но Иисус йоча-влакым Шкеж деке ӱжын каласен: «Йоча-влакым Мый декем пуртыза, нуным ида чаре, вет Юмын Кугыжаныш – нунын гай еҥ-влакын. 17Тыланда чынак ойлем: кӧ Юмын Кугыжанышым йоча семын порын ок вашлий, тудо тушко пурен ок керт».

18Вуйлатыше ик еҥ Иисус деч йодын: «Поро Туныктышо, курымашлык илышым налаш манын, мый мом ыштышаш улам?» 19Иисус йодын: «Молан тый Мыйым поро манат? Юмо деч моло нигӧ поро огыл. 20Тудын кӱштымыжым тый палет: ит яжарлане, ит пушт, ит шолышт, шойыштын, еҥ ӱмбаке таныклен ит ойло, ача-аватым пагале».#18:20 Исх 20:12-16. 21Тудыжо Иисуслан вашештен: «Мый чыла тидым самырык годсекак шуктем». 22Тидым колмеке, Иисус каласен: «Тылат эше икте ок сите: мо тыйын уло, чыла ужале да оксажым йорло-влаклан шеледен пу. Тунам пылпомышто тыйын поянлыкет лиеш. Вара тол да почешем кае». 23Тудыжо, тидым колмеке, чот ойганен. Тудо пешак поян лийын.

24Иисус, тудын ойганымыжым ужын, тыге каласен: «Поян еҥлан Юмын Кугыжанышыш пураш кунар йӧсӧ! 25Верблюдлан имышу вошт лекташ куштылго огыл, а поянлан Юмын Кугыжанышыш пураш эшеат нелырак». 26Колыштшо-влак Иисус деч йодыныт: «Тыгеже, кӧ утаралт кертеш?» 27Иисус вашештен: «Мом айдеме ыштен огеш керт, Юмо кертеш». 28Тунам Петр каласен: «А теве ме, чыла коден, Тыйын почешет каенна». 29«Тыланда чынак ойлем, – каласен Иисус, – кӧ гына Юмын Кугыжаныш верч пӧртым, ача-авам, иза-шольым, ака-шӱжарым, ватым але йоча-влакым коден, 30тудо кызытсе курымышто ятыр пачаш шуко налеш, а шушаш курымышто курымаш илышым налеш.»

31Иисус латкок тунемшыжым Шкеж деке ӱжын да нунылан каласен: «Теве ме Иерусалимыш миен шуына, да Айдеме Эрге нерген пророк-влакын возымышт чылажат шукталтеш. 32Тудым чын Юмым палыдыме-влакын кидыш пуат, игылташ, вурсаш, ӱмбакыже шӱведаш тӱҥалыт. 33Сола дене кырымеке, Тудым пуштыт, но кумшо кечын ылыж кынелеш». 34Но тунемшыж-влак тиде ойлымо гыч нимом умылен огытыл. Иисусын каласымаште мо нерген ойлымо, нунын деч шылтыме лийын, сандене ыҥлен огытыл.

35Кунам Иисус Иерихон деке лишемын, корно воктене ик сокыр йодышт шинчен. 36Воктечше еҥ тӱшка эртымым колмеке, йодын: «Мо тиде тыгай?» 37Тудлан Назорей Иисус эрта манын вашештеныт. 38Сокыр кычкыраш тӱҥалын: «Иисус, Давидын Эргыже! Мыйым серлаге!» 39Ончылно кайыше-влак тудлан шып лияш кӱштеныт, но тудо эшеат чот кычкырен: «Давидын Эргыже! Мыйым серлаге!» 40Иисус шогалын да тудым Шкеж деке кондаш кӱштен. Сокыр лишеммеке, Иисус тудын деч йодын: 41«Тый Мый дечем мом ыштымым вучет?» «Господь, шинчам почылтшо», – вашештен тудо. 42Иисус тудлан каласен: «Шинчат почылтшо! Тыйым ӱшанымашет утарен». 43Сокыр тунамак ужаш тӱҥалын да, Юмым чапландарен, Иисус почеш каен. Тидым ужын, уло калык Юмым моктен.

Currently Selected:

Лк 18: УС

Highlight

Copy