Лк 20

20 ГЛАВА

1-8 Иисус деч властьше нерген йодыштыт. 9-19 Виноград аҥам кучышо-влак нерген туштен каласымаш. 20-26 Кесарьлан йозакым тӱлымаш. 27-40 Ылыжме нерген йодыш. 41-44 Христос кӧн Эргыже? 45-47 Закон туныктышо-влак деч шекланыза.

1Ик кечын храмыште Иисусын калыкым туныктымыжо да Поро Уверым каласкалымыже годым архиерей, закон туныктышо да калык кугурак-влак лишемыныт 2да ойленыт: «Мыланна каласе, могай власть дене Тый чыла тидым ыштылат? Кӧ Тыланет тидым ышташ властьым пуэн?» 3Иисус каласен: «Мыят тыланда йодышым пуэм, Мыланем каласыза: 4Иоаннын тынеш пуртымыжо Пылпомыш гыч але айдеме деч лийын?» 5Нуно икте-весышт дене кутыреныт: «Пылпомыш гыч манына гын, Тудо каласа: ”Вара молан те тудлан ӱшанен огыдал?” 6Айдеме деч манына гын, ӱмбакына кӱм кышкен, уло тиде калык мемнам пуштеш. Иоанн пророк лийын манын, нуно ӱшанат». 7Сандене нуно вашештеныт: «Тиде кушеч, ме огына пале». 8Иисус каласен: «Тугеже Мыят могай власть дене тидым ыштымем ом ойло».

9Вара калыклан Иисус тыге туштен каласкалаш тӱҥалын: «Ик еҥ аҥашыже виноградым шынден. Вара аҥажым виноград куштышо-влаклан кучаш пуэн, а шкеже кужу жаплан лектын каен. 10Жап шумеке, тарзыжым виноград ончышо-влак деке колтен. Нунышт тудлан саска ужашым пуышаш улыт улмаш. Но виноград ончышо-влак тарзым кыреныт, нимо деч посна мӧҥгеш колтеныт. 11Тунам вес тарзым колтен, тидыжымат кыреныт, мыскыленыт да нимо деч посна поктен колтеныт. 12Ынде кумшым колтен, тудымат сусыртеныт да луктын шуэныт.

13Тунам виноград аҥан озаже каласен: ”Мом мылам ышташ? Йӧратыме эргым колтем, ала тудым ужмекышт вожылыт”. 14Но виноградым куштышо-влак, тудым ужмеке, икте-весышт дене каҥашеныт: ”Тиде наследник! Айста тудым пуштына, тунам наследствыже мыланна кодеш”. 15Аҥа гыч луктын шуымеке, тудым пуштыныт. Виноград аҥан озаже ынде нунын дене мом ышта? 16Мия, виноград ончышо-влакым пуштеш, а аҥажым весе-влаклан пуа».

Тидым колыштшо-влак кычкыралыныт: «Тыге ынже лий!» 17Иисус нунын ӱмбаке тӱткын ончалын да йодын: «”Чоҥышо-влакын йӧрдымыш лукмо кӱышт негыз пусак кӱ лийын”#20:17 Пс 117:22. манме Возымашысе шомак мом вара ончыкта? 18Кӧ тиде кӱ ӱмбаке камвозеш, тудо пудырга, а кӧн ӱмбаке кӱ камвозеш, тудым пытара».

19Тыге туштен ойлымыжо нунын нерген улмым умыленытат, закон туныктышо ден архиерей-влак тунамак Иисус ӱмбак кидым нӧлталнешт улмаш, но калык деч лӱдыныт.

20Иисусым эскераш тӱҥалыныт да чын ыштышыла кояш тӧчышӧ еҥ-влакым Тудым шекланаш колтеныт. Нунышт Иисусым, иктаж-могай мутеш кучен, вуйлатышын кидыш судитлаш пуышаш улыт улмаш. 21Нуно Тудын деч йодыныт: «Туныктышо! Ме палена: Тыйын ойлымет да туныктымет чын. Еҥ-влакым от ойыркале, а чыла еҥым Юмын корныжлан чын почеш туныктет. 22Мыланна кесарьлан йозакым тӱлаш лиеш але уке, каласе». 23Иисус нунын чояланымыштым ужын да каласен: «Молан Мыйым тергеда? 24Мыланем динарий оксам ончыктыза: кӧн тушто сӱретше да кӧн лӱмжӧ?» Нуно вашештеныт: «Кесарьын». 25Иисус каласен: «Тугеже кесарьлан кесарьыным, Юмылан Юмыным пуыза». 26Нуно калык ончылно Тудым мутеш кучен кертын огытыл, вашмутшылан ӧрын, шып лийыныт.

27Колымаш гыч ылыж кынелмаш уке манын шотлышо икмыняр саддукей Иисус деке толын да Тудлан тыгай йодышым пуэн: 28«Туныктышо! Моисей мыланна возен: ”Кӧн изаже але шольыжо ватан лийын кола, а йочаже лийын огыл гын, тунам тудын ватыжым изаже але шольыжо марлан налшаш. Тидыжым колышын тукымжым шуяш ыштыман”.#20:28 Втор 25:5. 29Шым изак-шоляк лийын. Кугуракше, ӱдырым налмеке, колен, йочаже лийын огыл. 30Вара шольыжо тиде ӱдырамашым налын, тудат йочадыме колен, 31а вара кокымшо шольыжо тиде ӱдырамашым марлан налын. Тыгак лийын чыла шымытышт денат: йочадыме лийынак коленыт. 32Эн почеш ӱдырамашат колен. 33Колышо-влак ылыжме годым нунын кокла гыч кудыжын ватыже лиеш? Вет тудо шымытшынат ватыже лийын».

34Иисус вашештен: «Тиде саманыште еҥ-влак ӱдырым налыт, марлан лектыт, 35но колымаш гыч ылыж кынелаш да шушаш саманыш логалаш йӧрышӧ-влак тушто ӱдырымат огыт нал, марланат огыт лек. 36Ынде нуно коленат огыт керт, а Суксо гай лийыт. Нуно Юмын икшывыже, ылыж кынелше, улыт. 37Колышо-влакын ылыжмыштым Моисеят йӱлышӧ вондер нерген ойлымаште ончыктен. Моисей Господьым Авраамын Юмыжо, Исаакын Юмыжо да Иаковын Юмыжо манын.#20:37 Исх 3:3,16. 38Юмо колышо-влакын Юмышт огыл, а илыше-влакын, Тудлан чылан илыше улыт».

39Тунам закон туныктышо-влак кокла гыч южышт каласеныт: «Туныктышо, Тый сайын каласышыч». 40Ынде нуно Тудын деч нимом йодаш тоштын огытыл.

А Иисус нунылан каласен: 41«Кузе еҥ-влак Христосым Давидын Эргыже манын ойлат? 42-43Давид шкежат Псалтирь книгаште ойлен:

”Господь мыйын Господемлан каласен:

Тыйын тушманет-влакым йол йымакет пыштымешкем,

пурла велыштем шинче”.#20:42-43 Пс 109:1

44Тугеже Давидат Тудым Господь манеш. Кузе Христос Давидын Эргыже лийын кертеш?»

45Кунам уло калык Иисусым колыштын, тунемшыж-влаклан Тудо каласен: 46«Закон туныктышо-влак деч шекланыза. Нуно чапле вургемым чийымым, калык погынымо верлаште лиймышт годым шкаланышт вуй савымым йӧратат, синагоглаште эн ончылно шинчынешт, пайремыште эн пагалыме верым налнешт. 47Нуно тулык ӱдырамаш-влакын суртыштым йорлештарат да лӱмжылан гына кужу жап кумалыт. Нуным поснак пеҥгыде судитлымаш вуча».

Currently Selected:

Лк 20: УС

Highlight

Copy