Лк 8

8 ГЛАВА

1-3 Иисус дене пырля коштшо ӱдырамаш-влак. 4-15 Ӱдышӧ нерген туштен ойлымаш. 16-18 Волгыдо нерген. 19-21 Иисусын Аваж ден изаж-влак. 22-25 Иисус тӱтан мардежым чара. 26-39 Осал шӱлышаным паремдымаш. 40-56 Иаирын ӱдыржым ылыжтымаш да вӱр йогымо черан ӱдырамашым паремдымаш.

1Тылеч вара Иисус ола гыч олашке, ял гыч ялыш Юмын Кугыжанышын Поро Увержым каласкален коштын. Тудын дене пырля латкок тунемшыже, 2тыгак чер да осал шӱлыш деч паремдыме икмыняр ӱдырамаш лийын: Магдалина манын лӱмдымӧ Мария – тудын кӧргыж гыч шым ия лектын – 3Иродын полатыште вуйлатыше Хузан Иоанна ватыже, Сусанна да шуко молат. Нунышт мо улышт дене Иисуслан служитленыт.

4Икана, кунам калык пешак шуко погынен да Тудын деке еҥ-влак чыла олала гыч толыныт, Иисус нунылан туштен каласкален: 5«Ӱдышӧ шурным ӱдаш лектын. А ӱдымыж годым южо пырчыже корно воктеке возын, тушто нуным тошкен пытареныт, кавасе кайык-влак чӱҥгеныт. 6Весышт кӱан верыш возыныт, шытен лекмекышт, кошкеныт, вет нунылан вӱдыжгӧ ситен огыл. 7А южышт шӱкшудан верыш логалыныт, нунын дене пырля шӱкшудо кушкын да озымым пызыралын. 8А южышт сай мландыш возыныт, шытен лектыныт да шӱдӧ пачаш шуко пырчым пуэныт». Тидым каласымеке, Иисус кычкыралын: «Кӧн колышташ пылышыже уло, тек колеш!»

9Тиде туштен ойлымыжо мом ончыкта манын, тунемшыж-влак Иисус деч йодыныт. 10Тудо вашештен: «Юмын Кугыжанышын тайныж-влакым умылаш тыланда пуалтын, а молылан чылажат туштен каласыме гоч пуалтеш. Тидлан кӧра ”ончат да огыт уж, колыштыт да огыт умыло”.#8:10 Ис 6:9-10.

11Тиде туштен каласыме теве мом ончыкта: шурно урлыкаш – тиде Юмын шомакше. 12Корно воктеке вочшо пырче – тиде нуно улыт, кӧмыт шомакым колыт, но вара диавол толеш да ынышт ӱшане, ынышт утаралт манын, шӱмышт гыч шомакым наҥгая. 13А кӱан верыш вочшо пырче – тиде нуно улыт, кӧмыт шомакым колыт да, куанен, шӱмыш пыштат, ик жап ӱшанат, но вожышт укеат, алгаштарен тергыме годым кораҥыт. 14Шӱкшудан верыш логалшыже – тиде нуно улыт, кӧмыт шомакым колыт, но тысе илышыште тургыжланыме, поянлыкым погымо да ракатланыме дене пызырналтыт, сандене саскашт кушкын ок шу. 15А сай мландыш вочшыжо – тиде нуно улыт, кӧмыт шомакым колмеке, тудым поро да яндар шӱмыштӧ аралат, чытымашышт дене саскам пуат». [Тидым каласымеке, Иисус кычкыралын: «Кӧн колышташ пылышыже уло, тек колеш!»]

16«Лампым чӱктымеке, нигӧ тудым ате дене ок петыре але олымбал йымаке ок шынде. А пурышо-влак волгыдым ужышт манын, тудым лампыпӱкеныш шындат. 17Вет чыла шылтыме чараш лектеш, чыла шолыпат палыме лиеш да чараш лектеш. 18Тыгеже, кузе колыштмыдам эскерыза. Кӧн уло, тудлан пуалтеш, а кӧн уке, тудын мо уло манын шона, тудыжат налалтеш.»

19Иисус деке Аваж ден изаж-влак толыныт, но калык шукылан кӧра воктекыже миен кертын огытыл. 20Иисуслан увертареныт: «Тыйын Ават ден изат-влак тӱнӧ шогат, Тыйым ужнешт». 21Но Тудо нунылан каласен: «Юмын шомакшым колыштшо да шуктышо-влак Мыйын авам ден иза-шольым-влак улыт».

22Ик кечын Иисус тунемшыж-влак дене пырля пушыш шинчын да нунылан каласен: «Ерын вес серышкыже вончена». Нуно пуш дене каеныт. 23Кайымышт годым Иисус мален колтен. Ер ӱмбалне тӱтан мардеж лектын, пушыш вӱд темаш тӱҥалын, нуно лӱдыкшыш логалыныт. 24Тунемшыж-влак Иисус деке лишемыныт, Тудым помыжалтеныт да каласеныт: «Туныктышо! Туныктышо! Пытена!» Иисус помыжалтын да мардеж ден вӱд толкынлан чарнаш кӱштен. Нуно лыпланеныт, тымык лийын. 25«Кушто тендан ӱшанымашда?» – тунемшыж-влаклан Иисус каласен. Нуно икте-весыштлан лӱдын-ӧрын ойленыт: «Кӧ Тиде? Мардежланат, вӱдланат кӱшта, а нунышт Тудым колыштыт!»

26Нуно Галилей ваштареш верланыше Гадара кундемыш пуш дене миеныт. 27Кунам Иисус серыш лектын, Тудым ондакше олаште илыше, шукертсек ия-влак кучыман еҥ вашлийын. Тудыжо вургем деч посна коштын, пӧртыштӧ огыл, а шӱгар-влакыште илен. 28Иисусым ужмеке, тудо кычкыралын, ончыланже шуҥгалтын да кугу йӱкын ойлен: «Иисус, Кӱшнысӧ Юмын Эргыже, Тыйын мый денем мо пашат? Тый дечет сӧрвален йодам, мыйым ит орландаре!» 29Иисус тиде еҥын кӧргыж гыч осал шӱлышлан лекташ кӱштен, сандене тудо тыге ойлен. Тиде еҥым ия кужу жап орландарен улмаш. Тудын кидшым-йолжым шинчырленыт, пидыныт, тудым ороленыт, но пӧръеҥ шинчырым кӱрыштын, ия тудым ир мландыш поктен наҥгаен. 30Иисус тудын деч йодын: «Тыйын лӱмет кузе?» «Легион», – каласен тудо. Тудын кӧргыштыжӧ шуко ия улмаш. 31Пундашдыме келгытыш каяш ынже кӱштӧ манын, нуно Иисусым сӧрваленыт.

32Туштак, курыкышто, кугу сӧсна кӱтӱ коштын. Ия-влак сӧсна кӧргыш пураш эрыкым Иисус деч йодыныт. Иисус тидлан эрыкым пуэн. 33Ия-влак, тиде еҥын кӧргыж гыч лекмеке, сӧсна-влак кӧргыш пуреныт. Кӱтӱ тура сер гыч ерыш шуҥгалтын да пурен каен.

34Мо лиймым ужмеке, кӱтӱчӧ-влак куржыныт, олаште да яллаште тидын нерген каласкаленыт. 35Мо лиймым ончаш еҥ-влак толыныт. Иисус деке лишеммеке, ия-влак деч утарыме айдемым ужыныт. Тудо Иисусын йол воктенже шинчен, вургеман да яндар уш-акылан лийын. Нуно чот лӱдыныт. 36Ужшо-влак ия кучыман еҥ кузе утаралтме нерген нунылан каласкаленыт. 37А Гадара кундемысе калыкым лӱдмаш авалтенат, Иисусым шкешт деч каяш йодыныт. Иисус пушыш шинчын да мӧҥгеш каяш тарванен. 38Кӧн кӧргӧ гыч ия-влак лектыныт, тудо айдеме Иисус дене пырля каяш сӧрвален йодын. Но Иисус тудым Шкеж деч колтен да ойлен: 39«Мӧҥгышкет пӧртыл да Юмо тыланет могай кугу пашам ыштыме нерген каласкале». Тудо каен да Иисус тудлан мом ыштыме нерген уло ола мучко каласкален.

40Кунам Иисус мӧҥгеш пӧртылын, Тудын толмыжлан калык тӱшка куанен, чылан Тудым вученыт. 41Теве Иаир лӱман еҥ толын, тудо синагог вуйлатыше лийын. Иисусын йол воктекыже кумык возын да мӧҥгыжӧ пураш сӧрвален йодын. 42Тудын латкок ияш ик шкет ӱдыржӧ колаш киен.

Иисус кайыме годым чыла могырым калык Тудым шыгыремден. 43Ик ӱдырамаш вӱр йогымо дене латкок ий орланен. Эмлызе-влаклан тудо уло погыжым кучылт пытарен, но иктат тудым паремден кертын огыл. 44Тудо шеҥгечын миен да Иисусын вургем тӱржым тӱкалтен, да вӱр йогымыжо тунамак чарнен. 45«Кӧ Мый декем тӱкныш?» – йодын Иисус, но тӱкен огынал манын, чылан ойленыт. Тунам Петр да тудын дене пырля лийше-влак каласеныт: «Туныктышо! Калык Тыйым йыр авырен да шыгыремда, а Тый Мый декем кӧ тӱкныш манын ойлет!» 46«Ала-кӧ Мый декем тӱкныш, Мый кӧргем гыч вий лекмым шижым», – Иисус ойлен. 47Тунам ӱдырамаш, шолыпеш кодын кертдымыжым ужын, Иисус деке чытырен миен да ончыланже кумык возын. Молан Тудын деке тӱкнымыжӧ да кузе иканаште тӧрланымыж нерген уло калык ончылно ойлен. 48Тудлан Иисус каласен: «Ӱдырем, чот шого, тыйым ӱшанымашет утарен. Тыныслык дене кае».

49Иисус але ойленат пытарен огыл, синагог вуйлатышын пӧртшӧ гыч ик еҥ толын да каласен: «Тыйын ӱдырет колен. Туныктышым ит тургыжландаре». 50Но Иисус тидым колын да Иаирлан ойлен: «Ит лӱд, ӱшане веле, тунам ӱдырет утаралтеш». 51Пӧрт деке шумо годым Петр, Иоанн, Иаков, ӱдырын ачаж ден аваж деч молым Иисус пураш чарен. 52Ӱдыр верч чылан йӱкын шортыныт да чот ойгыреныт. Но Иисус каласен: «Ида шорт, тудо колен огыл, мала веле». 53Ӱдыр колымым паленытат, еҥ-влак Иисусым воштылыныт. 54Но Иисус, чылам поктен колтымеке, ӱдырым кид гыч налын да виян каласен: «Ӱдыр, кынел!» 55Ӱдырын чонжо пӧртылын, тудо тунамак кынелын. Иисус тудлан кочкаш пуаш кӱштен. 56Ӱдырын ачаж ден аваже чот ӧрыныт. Мо лийме нерген нигӧлан каласаш огыл манын, Иисус нунылан кӱштен.

Currently Selected:

Лк 8: УС

Highlight

Copy