Лк 9

9 ГЛАВА

1-6 Иисус латкок Апостолжым калык коклаш колта. 7-9 Иродын тургыжланымыже. 10-17 Вич тӱжем еҥым теммеш пукшымаш. 18-22 Иисусым Петр Христос манеш. Иисус колышашыж нерген каласкала. 23-27 Христос почеш кайыше-влак деч йодмаш. 28-36 Волгалт вашталтмаш. 37-43 Осал шӱлыш дене орланыше рвезым паремдымаш. 44-45 Шке колышашыж нерген Иисус угыч ойла. 46-48 Кӧжӧ кугурак. 49-50 Кӧ тендан ваштареш огыл, тудо тендан верч. 51-56 Самарийысе ял Иисусым ок пурто. 57-62 Иисус почеш.

1Иисус латкок тунемшыжым поген, нунылан чыла иям поктен лукташ, чер деч паремдаш вийым да властьым пуэн, 2Юмын Кугыжаныш нерген увертарен каласкалаш да черлым паремдаш нуным колтен. 3Тудо нунылан ойлен: «Корныш нимом ида нал: пондымат, сумкамат, киндымат, оксамат, вес вургемымат. 4Могай пӧртыш пуреда, вес вере кайымешкыда туштак илыза. 5А кушто тендам порын огыт вашлий, тудо ола гыч лекмыда годым йол гычда пуракымат почкалтыза: тидыже нунын ваштареш таныклымаш лиеш». 6Тунемшыж-влак каеныт, ял гыч ялыш коштыныт, Поро Уверым каласкаленыт да чыла вере еҥ-влакым паремденыт.

7Тетрарх Ирод чыла лийше нерген колын да, мом шонаш, пален огыл, вет иктышт тиде Иоанн ылыж кынелын маныныт, 8весышт – Илия толын, а южышт акрет годсо пророк кокла гыч иктыже ылыж кынелын маныныт. 9Ирод каласен: «Иоаннын вуйжым мый руал ойырыктенам, а кӧн нерген мый тыгайым колам, Тидыже кӧ тугай?» Ирод Иисусым ужнеже улмаш.

10Пӧртылмекышт, Апостол-влак чыла мом ыштымыштым Иисуслан каласкаленыт. Иисус, нуным пырля налын, Вифсаида манме ола воктенсе тымык верыш посна каен. 11Но калык тидым пален налын да почешыже миен. Иисус нуным порын вашлийын, Юмын Кугыжаныш нерген нунылан каласкален, кӧм паремдаш кӱлын гын, паремден.

12Кече кас велыш тайнен. Латкок тунемшыже Тудын деке лишемын да ойлен: «Калыкым колто, тек нуно воктенсе илем ден яллашке каят, малаш верым да кочкышым кычалыт. Тыште ме калык илыдыме верыште улына». 13Иисус нунылан каласен: «Те нунылан кочкаш пуыза». Нуно вашештеныт: «Мемнан вич кинде да кок кол веле. Чыла нине еҥ-влаклан кочкышым налаш ме кайышаш улына мо?» 14Вет тыште вич тӱжем наре пӧръеҥ лийын. Иисус тунемшыж-влаклан каласен: «Нуным тӱшка дене витлын-витлын шындыза». 15Тыгак ыштеныт, чылам шынденыт. 16Иисус, вич киндым да кок колым налын, пылпомышко ончалын, нуным благословитлен, тодылын да калыклан шеледаш манын, тунемшыж-влаклан пуэн. 17Чылан теммешке кочкыныт, да нунын деч кодшо кинде катышым эше латкок комдым погеныт.

18Икана, кунам Иисус шкет кумалын да тунемшыж-влак пырля лийыныт, Тудо нунын деч йодын: «Калыкыште Мыйым кӧлан шотлат?» 19Нуно вашештеныт: «Тынеш Пуртышо Иоанн улат маныт иктышт, весышт Илия улат маныт, а южышт акрет годсо пророк кокла гыч иктыже ылыж кынелын маныт». 20Тудо йодын: «А те Мыйым кӧлан шотледа?» Петр вашештен: «Юмын Христосшылан». 21Но тидын нерген нигӧлан ойлаш огыл манын, Иисус тунемшыж-влаклан пеҥгыдын кӱштен 22да каласен: «Айдеме Эрге шуко орлыкым ужшаш. Калык кугурак, архиерей ден закон туныктышо-влак Тудым йӧрдымыш луктыт. Тудым пуштыт, но кумшо кечын Тудо ылыж кынелеш».

23А вара Иисус чылалан каласен: «Кӧ Мыйын почешем кайынеже гын, тек шке эрыкшым#9:23 Эрык – воля, желание. кудалтыже, шке ыресшым налже да почешем ошкылжо. 24Вет кӧ чонжым утарынеже, тудым йомдара, а кӧ шке чонжым Мыйын верч йомдара, тудо чонжым утара. 25Айдеме уло тӱням кидышкыже налеш да шкенжым шке йомдара, але эҥгекым чыта гын, тудлан могай пайда? 26Кӧ Мый дечем да Мыйын шомакем деч вожылеш, Айдеме Эргат Шкенжын, Ачажын да святой Суксо-влакын чапышт дене толмыж годым тудын деч вожылеш. 27Тыланда чын ойлем: тыште шогышо кокла гыч южышт Юмын Кугыжанышым ужмешке огыт коло».

28Тыге ойлымо деч вара кандаш кече наре эртымеке, Петрым, Иоанным да Иаковым пырля налын, Иисус курыкыш кумалаш кӱзен. 29Кумалмыж годым Тудын чурий сынже волгалт вашталтын, вургемже ошо, йылгыжше лийын. 30Теве Тудын дене кок пӧръеҥ мутланен, тиде Моисей ден Илия лийыныт, 31нуно чапланен конченыт да Иисусын тиде тӱнясе илыш гыч Иерусалимыште кайышашыж нерген ойленыт. 32Петр да тудын дене пырля лийше-влакым омо сеҥен, а, помыжалтмекышт, Иисусын чапшым да пеленже шогышо кок еҥым ужыныт. 33Нунын Иисус деч ойырлымышт годым Петр Тудлан каласен: «Туныктышо, тыште улмына моткоч сай! Айста ме кум омашым ыштена: иктым Тыланет, иктым Моисейлан да Илиялан иктым». Мом ойлымыжым тудо пален огыл.

34Петр але ойленат пытарен огыл, пыл толын да нуным леведын. Нунын пыл лоҥгашке пурымекышт, тунемшыж-влак чот лӱдыныт. 35А пыл гыч йӱк шоктен: «Тиде Мыйын йӧратыме Эргым. Тудым колыштса!» 36Тиде йӱк чарнымеке, Иисусым нуно шкетшым ужыныт. Тунемшыж-влак шып лийыныт, мом ужмышт нерген тиде кечылаште нигӧлан ойлен огытыл.

37Вес кечын, курык гыч волымекышт, Иисусым шуко калык вашлийын. 38Калык кокла гыч ик пӧръеҥ кычкыралын: «Туныктышо, Тыйым сӧрвалем, эргым ӱмбаке ончал! Тудо мыйын икте веле. 39Осал шӱлыш тудым куча: эргым кенета кычкыраш тӱҥалеш, а тиде шӱлыш тудым чытырыкта, умшаж гыч шоҥым йоктара, тудым орландарен, пыкше ойырла. 40Тудым поктен лукташ мый Тыйын тунемшет-влакым йодынам, но нуно тидым ыштен кертын огытыл». 41Иисус вашештен: «О, локтылалтше да ӱшаныдыме тукым! Мыняре эше Мылам тендан дене пырля лийман да тендам чытыман? Эргычым тышке кондо». 42Кунам эргыже лишемын, ия тудым йӧрыктен шуэн да чытырыкташ тӱҥалын, но Иисус осал шӱлышым чарен, рвезым паремден да тудым ачажлан пуэн. 43Юмын кугу куатшылан чылан моткоч ӧрыныт.

Иисусын мом ыштымыжлан чылан ӧрын шогымо годым тунемшыж-влаклан Тудо каласен: 44«Колыштса да нине шомакем шарныза: Айдеме Эрге айдеме кидыш ужалыме лийшаш». 45Но нине шомак мом ончыктымым нуно пален огытыл, тидым нунын деч шылтыме улмаш да нуно тидым умылен огытыл, а Иисус деч тиде ойлымыжо нерген йодаш лӱдыныт.

46Нунын коклаштышт кӧжӧ кугурак манын, тунемшыж-влак шонаш тӱҥалыныт. 47Иисус нунын шӱм шонымыштым паленат, йочам налын, Шке воктекыже шогалтен 48да нунылан каласен: «Кӧ Мыйын лӱмем верч тиде йочам йӧратен налеш, тудо Мыйым налеш. А кӧ Мыйым налеш, тудо Мыйым Колтышым налеш. Кӧ тендан кокла гыч эн изи, тудо – кугу».

49Тунам Иисуслан Иоанн каласен: «Туныктышо, Тыйын лӱмет дене иям поктен лукшо ик еҥым ме ужынна, но тудо мемнан дене пырля ок кошт, садлан ме тудлан чарышна». 50Иисус Иоаннлан вашештен: «Ида чаре. Кӧ тендан ваштареш огыл, тудо тендан верч».

51Кунам Иисусым пылпомышко налме жап лишемын, Тудо Иерусалимыш каяш шонен. 52Шкеж деч ончыч увертарыше-влакым колтен. Нунышт, Тудлан мо кӱлешым чыла ямдылаш манын, Самарийысе ялыш миеныт. 53Но тусо-влак Тудым шкешт деке пуртен огытыл, вет Тудын корныжо Иерусалимыш виктаралтын. 54Тидым ужмеке, тунемшыже-влак Иаков ден Иоанн каласеныт: «Господь, шонет гын, ме Илия ыштыме семын туллан пылпомыш гыч волаш да нуным пытараш кӱштена». 55Но Иисус нунын деке савырнен да чарен каласен: «Могай шӱлышын улмыдам те огыда пале. 56Айдеме Эрге айдеме чоным пытараш огыл, а утараш толын». Вара вес ялыш каеныт.

57Корнышто улмышт годым Иисуслан ик еҥ ойлен: «Господь, кеч-кушко Тый кает, мый почешет мием». 58Тудлан Иисус вашештен: «Рывыж-влакын илыме рожышт уло, кавасе кайык-влакын – пыжашышт, а Айдеме Эргылан вуйым нигушан эҥерташ».

59А весылан каласен: «Почешем кае». Но тудыжо ойлен: «Господь, ондак ачамым тояш каяш эрыкым пу». 60Иисус каласен: «Колышо-влакыштым тояш колышо-влакым кодо, а тый кае да Юмын Кугыжаныш нерген увертаре».

61Вес еҥ Иисуслан ойлен: «Господь, мый Тыйын почешет каем, но ондак мӧҥгысем-влак дене чеверласаш эрыкым пу». 62Иисус каласен: «Кӧ шогавуйым куча, а вара шеҥгеке онча, тудо Юмын Кугыжанышлан ок йӧрӧ».

Currently Selected:

Лк 9: УС

Highlight

Copy