Мф 6
6
6 ГЛАВА
1-4 Йорлылан полшымо нерген. 5-15 Кумалме нерген. 16-18 Пӱтым кучымо нерген. 19-21 Пылпомышсо поянлык. 22-23 Кап да шинча. 24-34 Юмо да поянлык. Тыршыме да тургыжланыме.
1Шекланыза, йорлылан полшымыда годым калык ончылно, шкендам еҥ-влаклан ончыкташ тӧчен, нимом ида ыште, уке гын, Пылпомышсо Ачада деч суапым огыда нал.
2Тугеже, йорлылан полшымет годым тидын нерген ит кычкыре. Сайла кояш тӧчышӧ-влак, еҥ моктымым вучен, синагоглаште да уремлаште тыге ыштылыт. Тыланда чынак ойлем: нуно шкеныштын суапыштым ынде налыныт. 3А кунам тый йорлылан полшет, пурла кидетын мом ыштымыжым шола кидет ынже пале, 4тыйын полшымет тек шолып лиеш. Еҥлан койдымым ужшо Ачат тылат шинчаш койшын пӧртылта.
5А кумалмет годым сайла кояш тӧчышӧ гай ит лий. Нуно, еҥ ончылно шкеныштым ончыкташ манын, синагоглаште да урем луклаште шогал кумалаш йӧратат. Тыланда чынак ойлем: нуно шкеныштын суапыштым ынде налыныт. 6А тый, кунам кумалат, пӧлемышкет пуро, омсатым петыре, пеленет улшо ужаш лийдыме Ачатлан кумал. Еҥлан койдымым ужшо Ачат тылат шинчаш койшын пӧртылта. 7Кумалмыда годым Юмым палыдыме еҥ-влак семын утыжым ида ойло. Нуно шомакышт шукылан кӧра юмо колеш шонат. 8Нунын гай ида лий, вет Ачада тыланда мо кӱлешым йодмыда деч ончычак пала. 9А те тыге кумалза:
Пылпомышто улшо мемнан Ачана!
Тыйын святой лӱмет мокталтше,
10Тыйын Кугыжанышет толжо,
Тыйын эрыкет мланде ӱмбалнат
пылпомышсо гаяк лийже.#6:10 Эрык – воля, желание. Лийже – тидым «шукталтше» манынат кусараш лиеш.
11Мемнан илышаш киндым, тачылыкым, мыланна пу.
12Еҥ-шамычын мыланна ыштыме языкыштым кудалтымына гаяк
мемнан языкнамат кудалте.#6:12 Грекла возымаште: «Мыланна парымыш пурышо-влакын парымыштым ме кузе кудалтена, мемнанат парымнам тугак кудалте». «Парым» мутым тыште важмалдыкын кучылтмо, тудо языкым ончыкта. Таҥастаре: Лука 11:4.
13Языкышке#6:13 Языкышке – грекла: алгаштарымашке (искушенийышке). мемнам ит пурто,
осал дечын мемнам утаре.
Вет Тыйын Кугыжанышет, куатет, чапет курым-курымеш. Аминь.
14Еҥ-влакын сулыкыштым кудалтеда гын, Пылпомышсо Ачада тенданымат кудалта. 15А еҥ-влакын сулыкыштым огыда кудалте гын, Пылпомышсо Ачадат тендан языкдам ок кудалте.
16Пӱтым кучымыда годым сайла кояш тӧчышӧ-влак семын шӱлыкан тӱсым ида нал. Нуно ойгырышыла коймышт дене пӱтым кучымыштым еҥ-влаклан ончыктынешт. Тыланда чынак ойлем: нуно шке суапыштым ынде налыныт. 17А тый пӱтым кучымет годым вуешет ӱйым шӱрӧ да шӱргетым муш. 18Тунам пӱтым кучыметым еҥ-влак огыл, а пеленет улшо ужаш лийдыме Ачат пала. Тудыжо еҥлан койдымым ужеш да тылат шинчаш койшын пӧртылта.
19Шкаланда мланде ӱмбалсе поянлыкым ида пого, тыште тудым когарш ден рӱдаҥыш пытарат, вор-влак кӱнчен пурат да шолыштыт. 20Пылпомышсо поянлыкым шкаланда погыза, пылпомышто когаршат, рӱдаҥышат огыт пытаре, вор-влакат кӱнчен огыт пуро да огыт шолышт. 21Кушто тендан поянлыкда, туштак шӱмдат лиеш.
22Капетын лампыже – шинчат. Тугеже, шинчат яндар гын, уло капет волгыдо лиеш, 23а шинчат начар гын, уло капет пычкемыш лиеш. Тугеже, тыйын волгыдет пычкемыш гын, пычкемышыже могайрак!
24Нигӧ кок озалан тарзыланен ок керт: иктыжым ужмышудымо лиеш да весыжым йӧрата, але иктыжлан чоным пуэн ышта, весыжым ок шотло. Те ик жапыштак Юмылан да поянлыклан служитлен огыда керт.
25Сандене тыланда ойлем: мом кочкына да мом йӱына манын, чонда верч ида азаплане, ӱмбакына мом чиена манын, капда нергенат ида ойгыро. Кочкыш деч чон да чием деч кап шергырак огыл мо?
26Кавасе кайык-влакым ончалза: нуно огыт ӱдӧ, огыт тӱред, амбарышкат огыт опто, тендан Пылпомышсо Ачада нуным пукша. Те нунын деч шергырак огыдал мо? 27А тендан кокла гыч кӧ азапланымыж дене кеч ик кынергутлан кап кугытшым#6:27 «Кап кугытшым»: грек ойым «ӱмыржым» манынат кусараш лиеш. кужемден кертеш? 28Молан вургем верч азапланеда? Пасусо лилий пеледыш-влак кузе кушкыт, шекланыза: пашам огыт ыште, огыт шӱдырӧ. 29Но тыланда ойлем: поянлыкше дене чапланен гынат, Соломонат нунын кокла гыч иктыж гаят чиен огыл. 30Таче пасушто кушшо, а эрла коҥгашке шуышаш шудымат Юмо тыге чикта гын, тендам, шагал ӱшаныше-влак, Тудо утларакат сайын ок чикте мо?
31Тыгеже, ида тургыжлане. ”Мом мыланна кочкаш?”, ”Мом йӱаш?” але ”Мом чияш?” манын ида ойло. 32Чыла тидым чын Юмым палыдыме еҥ-влак кычалыт, а Пылпомышсо Ачада тыланда чыла тиде кӱлмым пала. 33Эн чот Юмын Кугыжанышым да Тудын чынжым кычалза, тунам чыла тиде тыланда пырля пуалтеш. 34Тугеже, эрласе кече нерген ида тургыжлане, вет эрласе кечын шкенжын азапланымыже уло: кажне кечылан шке тургымжо сита.
Currently Selected:
Мф 6: УС
Highlight
Share
Copy
Want to have your highlights saved across all your devices? Sign up or sign in
Библийым кусарыше институт, Хельсинки 2007
