Лука 4

Идемевсесь снарты совавтомс пежетьс Иисусонь

1Иневанькс Оймеялтсо пештязь, Иисус велявтсь мекев Иордан леенть вакссто. Оймеялтось ветизе Сонзэ чаво модав. 2Тосо ниленьгемень чить Идемевсесь снартнесь совавтомс Сонзэ пежетьс. Весе те шкастонть Иисус мездеяк эзь ярса ды зярдо те шкась ютась, Иисусонь пек вачсь пекезэ. 3Сестэ Идемевсесь мерсь Иисуснэнь: «Бути Тон Пазонть Цёразо, мерть те кевентень велявтомс кшикс». 4Иисус каршонзо мерсь: «Сёрмадозь: “Аволь ансяк кши вийсэ эри ломанесь, ансяк Пазонь эрьва валсо”». 5Идемевсесь ветизе Иисусонь сэрей пандо пряс ды сельгень прамс невтинзе Тензэ мода лангонь весе мастортнэнь 6ды кортась Иисуснэнь: «Мон макссынь Тонеть весе сынст сюпавчист ды сынст лангсо азорксчинть. Сон максозь монь кедь алов, ды монь ули вием максомс сонзэ кинень мелем. 7Бути сюконят монень, те весемесь карми улеме Тонь». 8Иисус каршонзо кортась: «Оргодть Монь эйстэ, Сатана. Сёрмадозь:

“Сюконякшнок Азоронтень,

эсеть Пазонтень,

ды важодтькак ансяк Сонзэ туртов”».

9Теде мейле Идемевсесь ветизе Иисусонь Ерусалимев, стявтызе Пазонь кудонь тёкшос ды мерсь: «Бути Тон Пазонть Цёразо, кирнявт тестэ алов, 10эдь сёрмадозь:

“Пазось кармавты Эсензэ ангелтнэнень ванстомс Тонь.

11Сынь кандтадызь Тонь кедест лангсо:

илязо эшкеве пильгеть кевс”».

12Иисус мерсь каршонзо: «Ёвтазь истяяк: “Иля снартневтне-варчавтне Азорот, эсеть Пазот”». 13Весе неть снартнематнень-варчавтнематнень прядозь, Идемевсесь кадызе Иисусонь лия шкань самс.

Назаретэнь синагогасо

14Ды Иисус, пештязь Оймеялтонь вийсэ, велявтсь Галилеяв. Сонзэ эйстэ кулятне сралесть пертьпельга. 15Иисус тонавтсь синагогатнесэ, ды весе шнасть Сонзэ.

16Иисус сась Назаретэв, косо Сон кассь-кепететсь, ды оймсема чистэ, кода свал, мольсь синагогав. Тосо Сон лиссь кунсолыцятнень икелев Пазонь Сёрмадовкстнэнь ловномо. 17Сонензэ максызь Исайя пазмарицянь книганть, конань панжозь, Сон муизе тарканть, косо сёрмадозель:

18«Азоронь Оймеялтось Моньсэнь,

эдь Сон вадимим-кочкимим монь.

Сон кучимим яволявтомо

Кенярксов куля пайстомотненень.

Сон кучимим шумбралгавтомо каладозь седейтнень,

ёвтамо пекстазтненень олячиде,

сокортнэнень валдочиде.

Сон кучимим лепштязтнень оляс нолдамо

19ды ёвтамо: сась Азоронь седеймарямонь шкась!»

20Иисус пекстызе книганть, максызе мекев синагоганть мельга якицянтень ды озась тонавтыцянть таркас. Синагогасо аштицятнень вановтост лоткасть Сонзэ лангс. 21Ды Сон кармась кортамо тенст: «Течи, зярдо тынь кунсолыде неть валтнэнь, теевсь-топавтовсь те Сёрмадовксось». 22Весе шнасть Иисусонь ды дивсесть сеть чанстев валтнэнень, конатнень Сон ёвтынзе. Ялатеке кортасть: «Сон жо ансяк Иосифень цёра!?» 23Иисус кортась тенст: «Тынь, нама, мертядо Монень валмеревксэнь валтнэсэ: “Ормаменстиця, шумбралгавтык Эсь прят!” ды: “Тейть тиринь ошсонтькак сень, мезенть, кода минь маринек, Тон теекшник Капернаум ошсо”». 24Ды Сон поладсь: «Видестэ ёвтан тенк: кодамояк пазмариця а ловови эсензэ тиринь масторсо. 25Кемеде монень: Илия пазмарицянь шкатнестэ, зярдо колмо пель марто иеть арасель пиземе, ды весе масторсонть ульнесь покш, стака вачочи, Израильсэ ульнесть ламо доват. 26Ялатеке, Пазось Илиянь киненьгак эйстэст эзизе кучо. Илия кучозель ансяк Сидон масторонь Сарепта ошонь довантень. 27Истя жо Елисей* пазмарицянь шкасто Израильсэ ульнесть проказа ормасо ламо сэредицят, ансяк кияк сынст эйстэ эзь ульне шумбралгавтозь-ванськавтозь сыявкстнэде. Ванськавтозель ансяк Наэман*, Сириянь ломанесь». 28Тень марязь, синагогасо весе кунсолыцятнень састь кежест. 29Сынь кирнявтнесть таркастост ды панизь Иисусонь ош ушов, ветизь сэрей пандо пряс, конань лангсо аштесь Назарет ошост, ды ёртыксэлизь Сонзэ тосто алов. 30Ансяк Иисус ютась ломантнень юткова ды тусь эсь кияванзо.

Капернаумонь синагогасо

31Иисус сась Галилеянь Капернаум ошов ды оймсема чистэ тонавтсь тосонь эрицятнень. 32Весе дивсесть Сонзэ тонавтомантень, эдь Сонзэ валтнэсэ ульнесь Пазонь вий. 33Се шкастонть синагогасонть ульнесь идемевсень аванькс оймеялтсо колазь ломань. Сон верьга вайгельть рангстась: 34«Ва-а-й! Назаретэнь Иисус! Мезе теть эряви минек эйстэ? Тон сыть минек ёмавтомо? Содатан, кият Тон: Тон Пазонть Иневаньксэзэ!» 35Иисус кежейстэ кардызе аванькс оймеялтонть: «Чатьмонть! Лиссть эйстэнзэ!» Аванькс оймеялтось ёртызе ломаненть масторов синагоганть куншкас ды, зыянонь апак тее, лиссь эйстэнзэ. 36Весе дивсесть ды кортасть вейкест-вейкест туртов: «Кодат неть валтнэ?! Сон эсь азорксчинь вийсэнзэ кармавты аванькс оймеялтнэненьгак лисемс ломантнестэ – ды сынь лисить». 37Теде мейле Иисусто кулясь срадсь пертьпельга.

Иисус шумбралгавты ламо сэредицят

38Иисус тусь синагогасто ды совась Симононь кудос. Те шкастонть Симононь низанязо сэредсь, теке палсь толсо. Сынь энялдсть Иисуснэнь лездамс сэредицянтень. 39Иисус мольсь ваксозонзо, комась вельксэзэнзэ ды кардызе паломанть. Ормась кадызе аванть. Сон нейке жо стясь ды кармась инжетнень каванямо. 40Чивалгома шкасто ломантне, кинь ульнесть кудосост эрьва кодамо ормасо сэредицят, ветизь ды кандызь сынст Иисусонь икелев. Сон путнесь кедензэ эрьва сэредицянть лангс ды теньсэ шумбралгавтнесь сынст. 41Ламо ломантнень эйстэ теке шкастонть лиссть идемевстнеяк, верьга вайгельть пижнезь: «Тон – Пазонь кучовт Идицясь, Пазонть Цёразо!» Ансяк Иисус идемевстнень кардась ды мерсь тенст чатьмонемс седе, мезде сынь содасть: Иисус – Пазонь кучовт Идиця.

Иисус ёвты Кенярксов куля Иудеясо

42Валске марто Иисус лиссь ошсто ды тусь чаво таркас. Ломантне кармасть вешнемензэ, ды зярдо муизь, снартнесть Сонзэ кирдемс юткстост туемадонть. 43Ансяк Иисус мерсь тенст: «Монень эряви ёвтнемс Кенярксов куля Пазонь Инязорксчиденть лия оштнэваяк, эдь Мон тень туртов кучозянгак». 44Ды Сон седе товгак пачтясь паро кулянть Галилеянь синагогатнева.

Currently Selected:

Лука 4: ОВ

Highlight

Copy