Лука 8

Иисус мельга молиця аватне

1Теде мейле Иисус яксесь ошсто ошс, велестэ велес ды пачтясь ломантнень туртов Кенярксов куля Пазонть Инязорксчидензэ. Сонзэ марто ульнесть кемгавтово тонавтницят 2ды зяро-бути ават, конатнень Сон шумбралгавтынзе ормадо ды ванськавтынзе апаро оймеялтнэнь эйстэ. Ютксост ульнесь Магдала ошсто Мария, конаньстэ Иисус пансь сисем идемевсть, 3Иоанна, конань Куза мирдезэ ульнесь Ирод инязоронь кудоветицякс, Сусанна ды ламо лия ават, конат лездасть Иисуснэнь ды Сонзэ тонавтницятненень эсест ули-паросо.

Видицядо валвелявкс

4Зярдо пурнавсть Иисусонь перька ламо ломанть, конат састь пертьпельде, Сон ёвтнесь сыненст истямо валвелявкс: 5«Вана видицясь лиссь видеме. Зярдо сон видсь, конат-конат видьмекстнэ прасть ки чирес. Тосо сынст чалгсизь ломанть ды кочксизь нармунть. 6Лиятне прасть кевев модас, куроксто лиссть ды куроксто коськсть: эзь сато летькесь. 7Лиятне прасть кирмалав пулос, лисевкстнэнь марто кассть кирмалавтнэяк ды лепштизь сынст. 8Лиятне прасть паро модас, кассть ды кандсть видьмекст, натой видезденть сядодо ламо». Те валвелявксонть прядозь, Иисус серьгедсь: «Кинь улить мариця пилензэ – кунсолозо!»

Валвелявксонть смустезэ

9Тонавтницятне кевкстизь Иисусонь, кода чарькодемс те валвелявксонть. 10Иисус ёвтась каршост: «Тыненк максозь чарькодемс Пазонь Инязорксчинзэ салавачитнень. Лиятнень марто жо Мон кортан валвелявкссо. Кадык сынь “ваныть ды ялатеке а неить, кунсолыть ды ялатеке а чарькодить”.

11Те валвелявксонть смустезэ истямо: видьмекстнэ – Пазонь вал. 12Ки чирес видезесь невти сетнень, конат кунсолыть валонть, ды мейле тенст сы Идемевсесь ды саласы седейстэст видезь валонть сень кисэ: иляст кемезеве сынь ды иляст уле идезь. 13Кевпандо лангс видезесь невти сетнень, конат марясызь валонть ды сеске кенярдозь сайсызь сонзэ седеезэст. Ялатеке неть ломантнень арась кемема юрост, сынь кемить ансяк аламо шкас. Зярдо сы кодамояк снартнема-варчавтнема, сынь потыть кемемастонть. 14Кирмалав пулос празь видьмекстнэ невтить сетнень, конат марясызь валонть, ансяк шкань ютазь эрьва чинь мелявкстнэ, сюпавчись ды тантей эрямось-аштемась лепштясызь валонть, ды сынь а раштыть. 15Паро мода лангс видезесь невти сетнень, конат марясызь валонть, кеместэ кирдить сонзэ ванькс ды чевте седейсэст ды цидярдомасо кандыть видьмекст». Тень ёвтамодо мейле Сон мерсь: «Кинь улить мариця пилензэ – кунсолозо!»

Кода алкукс кунсоломс валонть

16«Кияк лампанть а кирвазтнесы кедьге алов эли удома эзем алов путомань кисэ. Мекевланк, сонзэ путнесызь лампань кирдема таркас, ды кадык весе, кить совить, неить валдонть. 17Эдь арась истямо кекшевкс, конась аволь муеве, ды арась истямо салавань тев, конась аволь тееве содавиксэкс ды аволь лисе лангс. 18Секскак арседе сень лангсо, кода тынь кунсолотадо. Эдь кинь ули, сенень седеяк ламо максови, кинь вана арась, сень кедьстэ саеви сеяк, мезесь маряви сонензэ эсензэкс».

Иисусонь алкуксонь кудораськензэ – Сонзэ тонавтницянзо

19Весть Иисуснэнь састь авазо ды братонзо, арсесть вастовомс мартонзо. Ансяк Сонзэ малас сынь эзть ютаво: Иисусонь перька ульнесть пек ламо ломанть. 20Иисуснэнь ёвтасть: «Ават ды братот аштить ушосо, сынь Тонь неевлидизь». 21Иисус тень каршо мерсь: «Монь авам ды братон сетне, конат кунсолыть Пазонь вал ды топавтыть сонзэ».

Иисус лоткавты давол

22Весть Иисус тонавтницянзо марто озась венчес ды мерсь тенст: «Печтясынек эрькенть». Сынь сыргасть, 23ды уемстэ Иисус матедевсь. Апак учо эрькенть лангс каявсь покш давол, венчесь кармась пешкедеме ведте, секс тонавтницятне пельсть ваямодо. 24Сынь пувтызь Иисусонь ды сеересть: «Тонавтыця, тонавтыця, эль ваятано!» Сон стясь, кардынзе варманть ды ведьвелявкстнэнь. Даволось оймась, теевсь сэтьме. 25«Косо кемеманк?» – кевкстинзе Иисус тонавтницятнень. Сынь, тандадозь ды абунгадозь кевкстнесть вейкест-вейкест: «Кие те ломанесь? Сон карды мик вармантькак, ведентькак, ды сынь кунсолыть Эйсэнзэ!»

Идемевсень колавт ломанень шумбралгавтомась

26Мейле сынь пачкодсть Гадарань масторс, кона ашти Галилеянть каршо. 27Зярдо Иисус лиссь венчстэнть эрьке чирентень, каршонзо вастовсь ошсто сыця цёра ломань, кона колазель идемевстнесэ. Сонзэ лангсо умок арасель оршамопель, ды эрясь сон аволь кудосо – калмова*. 28Иисусонь неемстэ сон рангозь прась кумажа лангс икелензэ ды верьга вайгельть пижакадсь: «Иисус, Верепазонь Цёра! Мезе Тонеть эряви монь пельде? Энялдан икелеть, иля пиштевте эйсэнь!» 29Сон кортась истя секс, мекс Иисус кармавтызе аванькс оймеялтонть лисемс эйстэнзэ. Те ломанесь уш кувать кирдевсь идемевсенть виензэ ало. Пиштяканть кедензэ ламоксть сюлмсекшнизь кшнинь рисьмесэ, пильгензэяк кершакшнызь кшнинь тертьсэ – истя лепштиксэлизь азарьксчинзэ. Ялатеке неть сюлмотнень сон сезнилинзе, ды идемевсесь пансь сонзэ ломантеме таркав. 30Иисус поладызе кортамонть ды кевкстизе сонзэ: «Кода тонь леметь?» Сон каршонзо мерсь: «Монь лемем Легион*», эдь сонзэ потс совазельть ламодояк ламо идемевсть. 31Идемевстне кармасть энялдомо Иисусонь икеле: «Илямизь пане тоначинь потмакстомо отьмас».

32А васоло, пандо чиресэ, вановсь тувонь покш стада. Идемевстне кармасть энялдомо Иисусонь икеле: «Мерть миненек совамс тувотнес». Иисус мерсь совамодо. 33Сестэ идемевстне лиссть ломаньстэнть ды совасть тувотнес. Стадась сеске сэрей чирестэнть кирнявтсь эрькес ды ваясь эйзэнзэ.

34Тень неезь, тувонь ваныцятне чиезь тусть тосто ды ёвтнизь неезенть ошканть ды маласо велетнева. 35Ломантне лиссть ваномо сень, мезе теевсь. Ды зярдо сынь мольсть Иисусонь ваксс, неизь ломаненть, конань потсто лиссть идемевстне. Сон озадоль Иисусонь пильге песэнзэ, оршазь ды паро превсэ. Ломантне пек тандадсть. 36Неицятне ёвтнизь сыненст, кода пичкась идемевсьсэ колазесь. 37Сестэ весе Гадарань эрицятне виев тандадомадонть кармасть энялдомо Иисусонь икеле, туевель Сон неть таркатнестэ. Иисус озась венчентень ды сыргиксэль тов, косто сась. 38Се ломанесь, конань потсто лиссть идемевстне, энялдсь молемс Иисусонь марто. Иисус кучизе сонзэ истямо валсо: 39«Велявт эсеть кудов ды весенень ёвтнек, кодамо ине тев тейсь тонь туртов Пазось». Те ломанесь тусь ды весе ошонтень ёвтнесь, мезе тейсь сонзэ туртов Иисус.

Яирэнь тейтерень вельмевтемась ды сэредиця авань шумбралгавтомась

40Ломантне умок учость Иисусонь, ды зярдо Иисус велявтсь мекев эрькенть омбоце пелев, весе вастызь Сонзэ кенярдозь. 41Вана Иисуснэнь сась синагогань прявтось, лемезэ Яир. Сон прась Иисусонь пильгс ды энялдсь: «Инеськеть, сак монь кудос! 42Монь вейкине эйкакшом, кемгавтовошка иесэ тейтернем, кулома лангсо!»

Иисус сыргась мартонзо. Тов молемстэ ломантне пек эцесть Иисусонь малас. 43Ломантнень ютксо ульнесь ава, кона кемгавтово иеть сэредиль верень чудемасо. Авась весе ули-паронзо ютавтызе ормаменстицятнень лангс. Ялатеке сон киненьгак эзь шумбралгавтово. 44Авась сась Иисус удалов ды токизе Сонзэ ланга оршамонзо цёконть. Сеске лоткась эйстэнзэ верень чудемась. 45Иисус кевкстсь: «Кие Монь токимим?» Кияк эзь ёвта пря, Петра ды Иисус мартотне мерсть: «Тонавтыця, Тонь перька ламо ломанть ды весе эцить Эйзэть эрьва ёндо. Тон жо кевкстнят: “Кие Монь токимим?”» 46Иисус ялатеке мерсь: «Кие-бути Монь токимим. Мон мария, кода Эйстэнь лиссь вием». 47Тень марязь, авась чарькодсь: сон эзь кекшеве Иисусто. Секскак сорнозь сон лиссь Иисусонь икелев, прась кумажа лангс ды весе ломантнень икеле ёвтась Сонензэ, кодамо тувталонь коряс токизе Иисусонь ды кода сеске пичкась. 48Иисус мерсь тензэ: «Сазором, иля пеле! Кемемат шумбралгавтынзеть тонь. Азё седейоймамо марто».

49Зярдо Иисус кортась аванть марто, сась синагогань прявтонть кудосто ёвтыця ды мерсь: «Тейтернеть кулось, иляк уш сыргавтне Тонавтыцянть». 50Ёвтазенть марязь, Иисус мерсь Яирнэнь: «Иля пеле, ансяк кемть, ды тейтернесь вельми». 51Зярдо сынь пачкодсть прявтонть кудос, Иисус Петрадо, Иоанндо, Яковдо ды тейтерненть тетядонзо-авадонзо башка киненьгак эзь мере мартонзо совамс. 52Кудосонть весе ломантне авардсть ды лайшесть тейтерненть кисэ. «Илядо аварде», – мерсь Иисус, – «сон эзь куло, сон уды». 53Тейтернесь кулось, сынь теде содасть, секскак кармасть пейдеме Иисусонь лангсо. 54Иисус кудостонть весень панинзе, саизе тейтерненть кедте ды серьгедсь: «Тейтерне, стяк!» 55Тейтернентень велявтсь оймесь, ды сон нейке стясь. Иисус кармавтсь сонзэ андомс. 56Тейтерненть тетятне-аватне пек талакадсть. Иисус кармавтсь сыненст киненьгак а ёвтнемс теде, мезе лиссь.

Currently Selected:

Лука 8: ОВ

Highlight

Copy