Матвей 11
11
Нававтыця Иоаннонь кучовт ломанензэ
1Зярдо Иисус прядынзе кемгавтово тонавтницянстэнь кармавтоматнень, седе мейле тусь тосто тонавтомо ды паро кулянь ёвтнеме те ёнксонь лия оштнэва*.
2Зярдо Иоанн пекстамо кудосо аштемстэ марясь Христосонь тевтнеде, сестэ сон кучинзе кавто тонавтницянзо 3кевкстемс Сонзэ: «Паряк, Тон Се, конанень эряви самс эли миненек учомс лия?» 4Иисус каршост мерсь: «Азёдо ды ёвтадо Иоаннэнь, мезе мариде ды неиде: 5сокортнэ неить, аякицятне якить, проказасо сэредицятне ванськадыть, амарицятне марить, кулозтне вельмить, кажовтненень пачтяви Кенярксов куля. 6Уцяскав се, кие Монь кувалма а кавтолды!»
Иисус ёвтни Нававтыця Иоанндо
7Кучовтнэнь туемадо мейле Иисус кармась ломантненень Иоанндо кортамо: «Мезе лангс ваномо тынь якиде чаво модав? Вармасо лымбакстниця нудей лангс? Нама, аволь. 8Мезень ваномо эно якиде? Паряк сюпав оршамосо оршазь ломанень? Арась, сюпав оршамонь кандтницятне эрить инязоронь кудова! 9Кинь ваномо эно якиде? Пазмарицянь? Виде, Иоанн пазмариця, ялатеке кортан тенк: сон пазмарицядояк покш. 10Сон се, конадо ёвтазь Пазонь Сёрмадовкссо:
“Вана Тонь самодо икеле
кучса Монсень кулянь кандыцям,
сон анокстасы кинть Тонь туртов”.
11Видестэ мерян тенк: весе чачозтнень ютксо Нававтыця Иоанндо ине арасель, ялатеке сехте вишкинесь, кона Менельсэнть Инязорксчисэнть, сондензэ покш. 12Нававтыця Иоаннонь важодема шкастонть саезь ды те шкас Менельсэнть Инязорксчизэ виевстэ келейгали, ды сеть, кить путыть тенень виест, сайсызь сонзэ эстест. 13Весе пазмарицятнеяк, Моисеень Коеськак Иоаннонь шкас ёвтнесть тень эйстэ. 14Улиндеряй меленк кемемс – кемеде: Иоанн – се Илиясь, конань самозо умок уш ульнесь аравтозь. 15Кинь улить мариця пилензэ, – кунсолозо!
16Ки марто вейкетстясынь неень пингень ломантнень? Вана тенк истямо невтевкс: ошкужосо озадо аштить эйкакшт, конат пижнить лиятнень туртов:
17“Минь тынк туртов сединек нудейсэ,
тынь жо эзиде киште.
Минь тенк лайшинек,
тынь эзиде аварде”.
18Сась Иоанн, кона сеедьстэ кирди пост, винадо а сими, – ды сынь кортыть: “Сонзэ эйсэ идемевсь”. 19Сась Ломантнень Цёрась, ярсыяк, симияк, – ды сынь кортыть: “Вана опкан кургось ды винань вечкицясь, каявксонь пурныцянь ды лия пежетев ломанень ялгась!” Ялатеке Пазонь превейчинть невтить видекс ломантне, конат молить сонзэ киява».
Зыян аянксиця оштнэнень
20Теде мейле Иисус кармась корямо сеть оштнэнь, конатнень эрицяст эзть янксе пежетест кисэ. Эдь неть оштнэсэ Сон тейнинзе сехте ламо Эсензэ дивань-тамашань тевензэ: 21«Зыян теть, Хоразин ош! Зыян теть, Бетсаида ош! Бути тамашатнень, конатне тыненк невтезельть, неевлизь Тир ды Сидон оштнэнь эрицятне, сынь пежеттест янксемань невтемакс умок оршавольть ризнэмань оршамот ды почодовлизь пряст куловсо. 22Ансяк кортан тенк: Пазонь судонь чистэнть Тир марто Сидононь эрицятненень ули тынденк шождыне.
23Ды тонгак, Капернаум ош, менель видьс кепедевезь, тоначинь потмакстомо отьмас ёртозь улят! Улевельтькак тонь ульцятнень лангсо теезь тамашатне невтезь Содомсо, сон нейгак аштевель. 24Ансяк кортан тенк: Пазонь судонь чистэнть Содомнэнь ули тондеть шождыне».
Тетясь ды Цёрась
25Се шкастонть Иисус ознось: «Ёвтан Теть сюкпря, Тетяй, менелень ды масторонь Азоро! Сюкпря Теть сень кисэ, мекс Тон кекшнить нень превейтнеде ды ёроковтнеде ды панжтнить сетненень, конат прок вишка эйкакшт. 26Алкукс, Тетяй, истямо ульнесь Тонь паро мелесь!
27Тетям максызе весементь Монь кедь алов. Цёранть кияк аздасы Тетядонть башка, Тетянтькак содасы ансяк Цёрась ды сеть, конатненень Цёранть мелезэ панжомс Сонзэ».
Садо Монень ды оймседе
28«Садо Монень весе, конат сизесть важодемадо ды стака канстонь кандомадо. Мон максан тенк оймамо. 29Саинк эсь лангозонк Монь азорксчинь ашконть ды тонавтнеде Монь эйстэ: Мон сэтьман, чевте седеян. Истя тынк ойментеньгак муеви оймамо. 30Монь азорксчинь ашком кандомс аволь стака, ды Монь максовт канстоськак шождыне!»
Currently Selected:
Матвей 11: ОВ
Highlight
Share
Copy
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
