Матвей 12
12
Евреень оймсема чиде кевкстемась
1Весть оймсема чистэ Иисус ютась сюро паксява. Сонзэ тонавтницятнень вачсть пекест, сынь кармасть сюропрянь сезнеме ды ярсамо. 2Фарисейтне, тень неезь, мерсть Тензэ: «Вана Тонь тонавтницят теить сень, мезе а мереви теемс оймсема чистэ». 3Иисус мерсь каршост: «Арази тынь эзиде ловно седе, мезе тейсь Давид инязорось, зярдо сон ды сонзэ мартонзотнеяк вачомкшность? 4Сон совась Пазонь кудос ды тосо ярсась Пазонть икеле путозь кшитнеде, конатнеде а меревиль ярсамс Давиднэнь ды мартонзосетненень, ансяк поптнэнень. 5Эли эзиде ловнокшно Койстэнть, кода поптнэ Пазонь кудосо оймсема чинть колсить эсь важодемасост ды ялатеке сынь тень кисэ а чумондовить? 6Мерян тенк: тесэ мезе-бути Пазонь кудодонтькак покш. 7Пазонь Сёрмадовкссо ёвтазь: “Монь мельс тукшны седеймарямонк, аволь Монень кандозь печкезь ракшань аноксонк”. Чарькодевлинккак тынь тесэ ёвтазенть алкуксонь смустензэ, сестэ аволиде судя чумовтомотнень. 8Эдь Ломантнень Цёрась оймсема чинть лангсояк азоро».
Коське кедь ломань
9Иисус тусь тосто ды совась синагогас. 10Тосо ульнесь коське кедь цёра. Иисус лангс чумонь муемга фарисейтне кевкстизь: «Мереви-арась Коень коряс оймсема чистэ шумбралгавтнемс?» 11Сон мерсь каршост: «Бути киньгак юткстонк ули вейке ревезэ, ды сон оймсема чистэ пры латкс, арази сон ревензэ а каподьсы ды а таргасы тосто? 12Нама, ломанесь реведе седе питней! Лисни, оймсема чистэяк мереви теемс паро». 13Сестэ Иисус мерсь цёрантень: «Венстик кедеть!» Сон венстизе, ды кедезэ шумбралгадсь, теевсь таго омбоценть кондямокс. 14Сестэ фарисейтне лиссть тосто, пурнасть промкс, кармасть вейсэ арсеме, кода маштомс Иисусонь.
Пазонь кочкавт Важо
Иисус кармась содамо арсемадост ды тусь тосто. 15Мельганзо мольсть ламо ломанть. Сон шумбралгавтсь весе сэредицятнень 16ды кардась сынст Эйстэнзэ лиянень ёвтнемеде. 17Истя топавтовсть Исайя пазмарицянть вельде ёвтавт Пазонь валтнэ:
18«Вана Монь кочкавт Важом,
сон Монь вечкемам ды седей кенярксом.
Мон пештяса Сонзэ Эсень Оймеялтсо,
ды Сон ёвты весе раськетненень:
сась Монь видестэ судямонь шкась.
19Сон а карми пелькстамо-спорямо, а карми пижнемеяк.
А карми ульцясо верьга вайгельть кортамо.
20Сон мендявозь нудеенть а синдьсы,
ченгиця лампа суренть а мадстьсы.
Сиземань апак сода Сон ветясы видечинть изнямос.
21Сонзэ лементь лангс кармить нежедеме
весе раськень ломантне».
Иисус ды Вельзевул
22Сестэ ветясть Иисуснэнь идемевсень колавт цёра, кона ульнесь сокор ды акортыця. Иисус шумбралгавтызе сонзэ, ды истя сокорось ды акортыцясь кармась кортамо ды нееме. 23Весе ломантнень саинзе покш дивамо. Сынь кармасть кевкстнеме вейкест-вейкест: «Паряк Сон Пазонь кучовт Идиця, Давидэнь Цёра?» 24Зярдо фарисейтне тень маризь, мерсть: «Сон Вельзевулонь, идемевстнень прявтост, вийсэ панси идемевсть». 25Иисус содась сынст арсемадост ды мерсь тенст: «А ванстови мастороськак, кона явнови пельксэнь пелькс ды тюри эсь юткованзо. Истя жо эрьва ошоськак эли кудоськак, косо улить сёвномат ды пелькстамот, а кирдеви. 26Бути идемевсесь пани идемевсь, сестэ Сатанась тюри эсь юткованзо. Сестэ кодаяк а кирдеви сонзэ инязорксчизэ. 27Бути, кода тынь кортатадо, Мон идемевстнень пансян Вельзевулонь вийсэ, сестэ тынксетне кинь вийсэ пансить эйсэст? Сынст тевесткак невтить: тынк чумондоманк а виде. 28Мекевланк, бути Мон пансян идемевстнень Пазонь Оймеялтонь вийсэ, сестэ Пазонть Инязорксчизэ уш пачкодсь тенк. 29Кияк виев ломанень кудос а эцеви ды киненьгак сонзэ ули-парозо а нельгеви, бути васняяк виевенть а сюлмсесы. Мейле ансяк сон саласы весе ули-паронзо.
30Кие аволь Монь кисэ, се Монь каршо, ды кие Монь марто а пурны, се ёртни-сравтни.
31Секскак кортан тенк: эрьва кодамо пежеть ды Пазонь сялдома-покордамо нолдави-простяви ломантненень, а вана Оймеялтонть лангс ёвтазь сялдома-покордамо валось нолдазь-простязь а ули. 32Бути кияк ёвты кодамояк сялдома вал Ломантнень Цёранть каршо, сестэ нолдазь ули тензэ. Бути кияк ёвты сялдома вал Иневанькс Оймеялтонть каршо, ялатеке нолдазь а ули тензэ, те пингестэнтькак ды тона пингестэнтькак».
Чувто ды умарть
33«Паро умарь чувтось чачты паро умарть, берянь умарь чувтонть умарензэяк берянть. Чувтось содави умарензэ кувалт. 34Гуень левкст! Косто тынк кортамонк улить парокс, зярдо тынсь апартадо! Ломаненть кургсто лисни се, мезде пештязь седеезэ. 35Паро ломанесь ливтни парочинь утомстонзо паро, берянь ломанесь зыянонь утомстонзо ливтни зыян. 36Мерян тенк: эрьва аэрявикс валонть кисэ Пазонь судонь чистэ весенень сави кирдемс каршовал. 37Эсь валот кувалт чумовтомокс ловтадызь, эли эсь валот кувалт чумондтадызь».
Иона пазмарицянть тешксэзэ
38Сестэ Койс зярыя тонавтыцят ды фарисейть мерсть Иисуснэнь: «Тонавтыця! Минек ули меленек Тонь пельде неемс тамашань тешкс». 39Сон мерсь каршост: «Кодат берянть ды Пазонть икеле авидеть неень пингень ломантне! Тынь вештядо тешкс, ансяк Иона пазмарицянть тешкстэнть башка кодамояк лия тешкс тыненк максозь а ули. 40Кода Иона ульнесь покш кал потсо колмо чить ды колмо веть, истя Ломантнень Цёраськак ули моданть седейсэ колмо чить ды колмо веть. 41Ниневия ошонь ломантне стить Пазонь судс неень пингень ломантнень марто ды чумондсынзе сынст. Эдь Ниневиянь эрицятне Ионань кулянть марямодо мейле велявтсть Пазонтень, а вана ней тынк икеле Се, кона Ионадояк ине! 42Лембе ёнксонь инязоравась* сти Пазонь судс неень пингень ломантнень марто ды чумондсынзе сынст. Эдь сон масторонь пестэ сакшнось Соломононь превейчинзэ кунсоломо. Ды вана ней тынк икеле Се, кона Соломондояк ине!»
Аванькс оймеялтонь велявтомась
43«Зярдо аванькс оймеялтось лиси ломаньстэнть, сон яки ведтеме таркава ды вешни эстензэ оймамо тарка, ансяк а муи. 44Сестэ мери: “Велявтан ташто кудозон, косто лисинь”. Самсто сон мусы сонзэ чавосто, тенсезь, пурназь-сэрнязь. 45Сестэ сон моли ды саи мартонзо лия сисем оймеялт, эстедензэяк кежейть, весе совить се ломаненть потс ды кармить эрямо тосо. Ды теде мейле се ломаненть ёжомарямозо карми улеме седеяк берянь икеленсенть коряс. Истя ули неень пингень берянь ломантнень мартояк».
Иисусонь авазо ды братонзо
46Ломантнень марто Иисусонь кортамсто састь авазо ды братонзо. Сынь аштесть ушосо, ды мелест ульнесь кортамс Сонзэ марто. 47Та-кие мерсь Иисуснэнь: «Вана Тонь ават ды братот ушосо аштить, Тонь марто кортневельть». 48Сон каршонзо мерсь: «Кие Монь авам, кить Монь братон?» 49Невтсь кедьсэнзэ тонавтницянзо лангс ды мерсь: «Вана Монь авам ды братон! 50Кие топавты Монь менелень Тетянь мелензэ, се Монь братом, сазором ды авам».
Currently Selected:
Матвей 12: ОВ
Highlight
Share
Copy
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
