Матвей 13
13
Иисус ёвтни валвелявкст Менельсэнть Инязорксчидензэ
1Секе чистэнть Иисус лиссь кудосто, тусь эрьке чирес ды тозо озась. 2Ваксозонзо промсть ламо ломанть. Тень кувалт Сонензэ савсь озамс венчес. Весе лиятне аштесть стядо эрькенть чиресэ. 3Ды Иисус ламодо ёвтнесь тенст валвелявкссо.
Видицядо валвелявкс
Сон ёвтась: «Вана видицясь лиссь видеме. 4Видемстэ конат-конат видьмекстнэ прасть ки чирес. Ливтясть нармунть ды кочксизь сынст. 5Лиятне прасть кевев таркас, косо модась аламоль, ды сынь курок лиссть, секс мекс модась ульнесь аволь сэрей. 6Зярдо чизэ кармась пидеме, сынь пужсть ды коськсть, секс мекс юрост-корёност ульнесть аволь кеметь. 7Лиятне прасть кирмалав юткс; кассть кирмалавтнэ ды сынст лепштизь. 8Лиятне прасть паро модас ды кандсть видьмекст: кона сядонь кирда, кона кодгеменень кирда, кона колоньгеменень кирда. 9Кинь улить мариця пилензэ – кунсолозо!»
Мекс Иисус корты валвелявкссо
10Тонавтницянзо мольсть Иисус ваксс ды кевкстизь: «Мекс кортат тенст валвелявкссо?» 11Сон мерсь каршост: «Тыненк максозь чарькодемс Менельсэнть Инязорксчинзэ салавачитнень, а вана сыненст апак максо. 12Эдь кинь ули, сенень седеяк ламо максови, ды сонзэ карми улеме пек ламо. Кинь вана арась, сень кедьстэ саеви сеяк, мезезэ ули. 13Секс кортангак тенст валвелявкссо: сынь ваныть ды ялатеке а неить, кунсолыть ды ялатеке а марить ды а чарькодить. 14Сынст лангсо топавтневить Исайя пазмарицянть вельде ёвтавт Пазонь валтнэ:
“Карматадо пилесэнк кунсоломо, ды а чарькодьсынк,
сельмесэнк ваномо, ды а несынк.
15Неть ломантне калгодкстомтызь седеест,
пилесткак потомдызь,
сельместкак конизь, секс:
иляст нее сельмесэст, иляст маря пилесэст,
иляст чарькоде седейсэст, иляст велявто Монень
ды Мон илинь шумбралгавто сынст”.
16А вана тынь кодат уцяскавт: сельменккак неить, пиленккак марить! 17Кемеде Монень: ламо пазмарицятнень ды видечисэтнень ульнесь мелест неемс сень, мезе тынь нетядо, ансяк эзизь нее, ды марямс сень, мезе тынь марятадо, ансяк эзизь маря».
Видицядо валвелявксонть смустезэ
18«Кунсолынк эно тынь, кода чарькодемс видицядо валвелявксонть. 19Зярдо кияк марясы кулянть Менельсэнть Инязорксчидензэ ды а чарькодьсы, сестэ сы Апарось ды саласы седейстэнзэ видезенть. Ки чирес видезесь невти истямо ломаненть. 20Кевев таркас видезесь невти сень, кие марясы кулянть ды сеске кецязь-эрьгедезь сайсы седеезэнзэ. 21Ансяк сонзэ юронзо-корёнонзо аволь кеметь, секскак сон ашти аволь кувать. Зярдо сы тензэ се кулянть кисэ кодамояк стакачи эли пансема, сон сеске поты кемемастонть. 22Кирмалав юткс видезесь невти сень, кие марясы кулянть, а вана ансяк те пингень мелявкстнэ ды сюпавчис правтомась лепштясызь кулянть, ды сон кадови видьмекстэме. 23Паро модас видезесь невти сень, кие марясы кулянть ды чарькодьсы. Истямось канды видьмекст, кона сядонь кирда, кона кодгеменень кирда, кона колоньгеменень кирда».
Колы тикшеде валвелявкс
24Иисус ёвтнесь тенст лия валвелявкс: «Менельсэнть Инязорксчись моли истямо тев ёнов: ломанесь видизе эсь паксянзо паро видьмесэ. 25Веть, зярдо весе удость, сась сонзэ ятозо, видсь товзюронть юткова колы тикшеть ды тусь. 26Зярдо лиссь товзюрось ды кармась прянь каямо, сестэ неявсть колы тикшетнеяк. 27Азоронтень састь важонзо ды мерсть тензэ: “Чиряз, тон арази аволь паро видьмесэ видик паксят? Косто эно саевсть сонзэ эйс тикшетне?” 28Сон мерсь каршост: “Ятось тень теизе”. Важотне кевкстизь: “Ули мелеть, минь мольтяно, кочксынек сынст?” 29Сон мерсь тенст: “Арась, тикшетнень марто товзюротненьгак аволинк таргсе. 30Кадык нуемань самс кавонест касыть вейсэ. Нуемстэ мон мерян нуицятненень: васня пурнынк колы тикшетнень, сюлмсинк сынст пултс ды пултынк, ансяк мейле пурнынк товзюронть ды каинк утомозон”».
Горчица видьмеде ды чапавтомадо валвелявкст
31Иисус ёвтнесь тенст истямо валвелявкскак: «Менельсэнть Инязорксчизэ моли горчица видьме ёнов, конань ломанесь саизе ды видизе эсь паксязонзо. 32Сон весе видьметнеде сехте вишкине, а вана зярдо касы, тееви весе тикшетнеде покшокс, чувтонь кондямокс. Лангозонзо ливтить менелень нармунть ды натой тейнить пизэть тарадонзо потс».
33Иисус таго ёвтнесь тенст валвелявкс: «Менельсэнть Инязорксчизэ моли чапавтома ёнов, конань човоризе авась почтонь колмо парь* марто, ды теде сыргась весе чапаксось».
34Весе нетнень Иисус ёвтнинзе ломантненень валвелявкссо, ды валвелявкстомо мезеяк эзь тонавто. 35Истя топавтовсть пазмарицянть вельде ёвтавт валтнэ:
«Панжса кургом валвелявкссо ды ёвтнесынь,
мезть ульнесть кекшезь масторонть теевема шкасто саезь».
Колы тикшеде валвелявксонть смустезэ
36Мейле Иисус нолдынзе ломантнень ды совась кудос. Тонавтницянзо мольсть ваксозонзо ды мерсть Тензэ: «Панжик тенек, мезде ёвтни паксянь колы тикшеде валвелявксось?» 37Сон ёвтась каршост: «Паро видьмень видицясь – Ломантнень Цёрась, 38паксясь – мирэсь-масторось, паро видьмесь – те сеть, конатне ульнесть аравтозь Инязорксчинтень, ды колы тикшетне – Апаронть ломантне. 39Сынст видиця ятось – Идемевсесь, нуема шкась – те пингенть прядовомась, нуицятне – ангелтнэ. 40Кода колы тикшетнень пурнасызь ды толсо пултасызь, истя ули те пингенть прядовомстояк. 41Ломантнень Цёрась кучсынзе Эсь ангелэнзэ ды пурнасызь Сонзэ Инязорксчистэнть весе пежетьс совавтыцятнень ды зыянонь теицятнень. 42Каясызь сынст тоначинь гайни каштомос, косо сынь кармить авардеме ды пейсэст чикордомо. 43Сестэ видечисэтне кармить сияждомо чи ладсо Тетяст Инязорксчисэнть. Кинь улить мариця пилензэ – кунсолозо!»
Кекшезь сюпавчиде ды питней ведьэрьгеде валвелявкст
44«Менельсэнть Инязорксчизэ моли истямо тев ёновгак: пиресэ ульнесь кекшезь сюпавчи, конань ве ломань муизе ды таго кекшизе тоско. Эрьгедемадонть сон мольсь, миизе весементь, мезезэ ульнесь, ды рамизе се пиренть.
45Менельсэнть Инязорксчизэ истя жо моли се тевенть ёнов: вейке ломань вешнесь мазый ведьэрьгеть. 46Вана сон мусь рамамс вейке пек питней ведьэрьге. Сон тусь, микшнизе весементь, мезезэ ульнесь, ды рамизе сонзэ».
Калонь кундамопельде валвелявкс
47«Менельсэнть Инязорксчизэ истя жо моли истямо тев ёнов. Калонь кундыцятне эрькес каясть калонь кундамопель, козонь понгсть эрьва кодат калт. 48Зярдо сон пешкедсь, таргизь сонзэ чирес, озасть: паро калтнэнь пурнызь кедьгева, берянтнень ёртызь. 49Истя ули те пингенть прядовомстояк: лисить ангелтнэ, явсызь апаро ломантнень видечисэтнень ютксто, 50ды каясызь апартнэнь тоначинь гайни каштомос. Тосо сынь кармить авардеме ды пейсэст чикордомо».
51Иисус кевкстинзе тонавтницянзо: «Тынь весе тень чарькодинк?» Сынь ёвтасть Тензэ: «Эно, чарькодинек!» 52Сон кортась тенст: «Лисни, Койс эрьва тонавтыцясь, кона тонавтозь Менельсэнть Инязорксчинтень, моли сюпав кудазор ёнов, кона ули-паронь ванстома таркастонзо таргси таштояк, одгак».
Иисус Назаретсэ
53Зярдо Иисус прядынзе неть валвелявкстнэнь ёвтнемаст, сестэ тусь тосто 54ды сась Эсь тиринь ошозонзо ды тосо синагогасо кармась тонавтомо ломантнень. Сынь, пек дивазь, кортасть: «Косто Сон саинзе истямо превейчинть ды тамашань теема виенть? 55Арази Сон аволь чапицянть цёрась? Арази Сонзэ аванзо лемезэ аволь Мария ды братонзо аволь Яков, Иосий, Симон ды Иуда? 56Арази весе сазоронзояк аволь тесэ, минек ютксо? Косто эно Тензэ саевсь те весемесь?» 57Истя сынст арасель мелест кемемс Сонензэ.
Иисус мерсь тенст: «Пазмарицясь эрьва косо ловови, ансяк аволь чачома масторсонзо ды эсь кудосонзо». 58Ломантне эзть кеме Тензэ, секскак Сон эзь тее тосо ламо тамашат.
Currently Selected:
Матвей 13: ОВ
Highlight
Share
Copy
Want to have your highlights saved across all your devices? Sign up or sign in
© Библиянь ютавтомань институтось,
Хельсинки 2006
